ປະເທດ ກຳປູເຈຍ ໄດ້ຮັບເອົາກຸ່ມທຳອິດ ຂອງຜູ້ຂໍລີ້ໄພ ຈາກ
ປະເທດອອສເຕຣເລຍ ເຊິ່ງເປັນສ່ວນໜຶ່ງໃນຂໍ້ຕົກລົງກ່ຽວກັບ
ການຕັ້ງຖິ່ນຖານໃໝ່ ຂອງພວກອົບພະຍົບ ທີ່ໄດ້ຖືກວິພາກວິ
ຈານຢ່າງກວ້າງຂວາງໂດຍກຸ່ມປົກປ້ອງສິດທິມະນຸດ.
ເຈົ້າໜ້າທີ່ຢູ່ສະໜາມບິນພະນົມເປັນໄດ້ຢືນຢັນວ່າ ພວກອົບພະຍົບໄດ້ໄປຮອດກຳປູເຈຍ ໃນວັນພະຫັດມື້ນີ້ ແລະ ໄດ້ຖືກນຳສົ່ງໄປອົງການເພື່ອຜູ້ເຄື່ອນຍ້າຍຖິ່ນຖານສາກົນ ຫຼື IOM, ເຊິ່ງເປັນຜູ້ຊ່ວຍກ່ຽວກັບການຕັ້ງຖິ່ນຖານໃໝ່ໃຫ້ແກ່ພວກເຂົາ.
ໃນຖະແຫຼງການສະບັບນຶ່ງ ອົງການ IOM ໄດ້ກ່າວວ່າ ພວກເຂົາຈະ “ເລີ່ມສະໜອງການສະໜັບສະໜູນທີ່ສຳຄັນ, ລວມມີ ການຝຶກສອນພາສາ, ວັດທະນະທຳ ແລະ ການປັບຕົວເຂົ້າສັງຄົມ, ການບໍລິການການສຶກສາ, ການບໍລິການສາທາລະນະສຸກ, ແລະ ການບໍລິການວຽກເຮັດງານທຳ” ສຳລັບຜູ້ຂໍລີ້ໄພ. ຖະແຫຼງການກ່າວຕື່ມວ່າ ພວກເຂົາຈະໄດ້ຮັບການສະໜັບສະໜູນແລະ ສົ່ງເສີມໃຫ້ລວມກັນເຂົ້າກັບສັງຄົມກຳປູເຈຍ ແລະ ໃຫ້ກາຍເປັນຄົນທີ່ສາມາດເບິ່ງແຍງຕົນເອງໄດ້ໂດຍໄວເທົ່າທີ່ຈະໄວໄດ້.”
ໃນປີກາຍນີ້ ກຳປູເຈຍໄດ້ບັນລຸຂໍ້ຕົກລົງ ມູນຄ່າ 32 ລ້ານໂດລາເພື່ອຕັ້ງຖິ່ນຖານໃໝ່ໃຫ້ແກ່ພວກອົບພະຍົບທີ່ໄດ້ຖືກປະຕິເສດໂດຍ ອອສເຕຣເລຍ ແລະ ປະຈຸບັນນີ້ໄດ້ຮັບການເບິ່ງແຍງທີ່ສູນ ຄວບຄຸມຕົວໃນ ປະເທດເກາະປາຊີຟິກ Nauru.
ນັກວິຈານກ່າວວ່າ ຂໍ້ຕົກລົງດັ່ງກ່າວ ແມ່ນຖືກຕີລາຄາວ່າ ປະເທດອອສເຕຣເລຍ, ເຊິ່ງເປັນ
ປະເທດໜຶ່ງທີ່ມີເສດຖະກິດໃຫຍ່ທີ່ສຸດໃນໂລກ, ລະເລີຍຄວາມຮັບຜິດຊອບຕໍ່ພັນທະສາກົນຂອງ
ພວກເຂົາ ແລະ ປະຖິ້ມພວກອົບພະຍົບໃຫ້ກຳປູເຈຍ ເຊິ່ງເປັນໜຶ່ງໃນປະເທດທີ່ທຸກຍາກທີ່ສຸດໃນໂລກ ເປັນຜູ້ຮັບຜິດຊອບ.
