ລິ້ງ ສຳຫລັບເຂົ້າຫາ

ກໍາປູ​ເຈຍ​ໄດ້​ມີ​ການ​ເຕີບ​ໂຕ​ ທາງເສດຖະກິດ​ທີ່​ເຂັ້ມ​ແຂງ ໃນ​ໄລຍະສອງ​ປີຜ່ານມາ

  • ທອງປານ ເທບວົງສາ

ຮູບຖ່າຍຂອງຫລັງຄາ ຕະຫລາດໃຫຍ່ຫລູຫລາແຫ່ງໃໝ່ "Phsar Thom Thmei" ສ້າງຕາມສະໄຕລ໌ຂອງຝຣັ່ງ ທີ່ໄຂຂຶ້ນເມື່ອວັນທີ 25 ພຶດສະພາ 2011 ໃນນະຄອນຫລວງພະນົມເປັນ ລຸນຫັລງການບູລະນະສ້າງສາ ທີ່ໃຊ້ ເວລາເຖິງ 7 ປີ. ຕະຫລາດຫລັງເກົ່າແມ່ນສ້າງຂຶ້ນໃນປີ 1937 ແບ່ງອອກເປັນສີ່ປີກຄືກັນ.

ພວກ​ເຈົ້າໜ້າ​ທີ່​ກໍາປູ​ເຈ​ຍກ່າວ​ວ່າ ອັດຕາການ​ເຕີບ​ໂຕ​ຂອງເສດຖະກິດ​ຂອງ​ປະ​ເທດ​​ແມ່ນຈະ​ສູງ​ກາຍ​ເຈັດ​ເປີ​ເຊັນ​ໃນ ​ປີ​ນີ້ ​ແລະພວກ​ນັກວິ​ເຄາະ​ການ​ເງິນ​ກ່າວ​ວ່າ ​ເຖິງຖ້າ​ແມ່ນວ່າ​ການ​ເຕີບ​ໂຕ​ຂອງເສດຖະກິດ​ໂລກ​​ຊັກ​ຊ້າ​ລົງ ກໍາປູ​ເຈຍ​ກໍ​ຈະ​ຍັງຢູ່​ໃນ​ສະພາບ​ທີ່ກຽມພ້ອມ ທີ່​ຈະຮັບ​ມື​ກັບ​ມັນໄດ້​ເປັນ​ຢ່າງ​ດີ​ ຊຶ່ງ​ເຫດຜົນສ່ວນ​ນຶ່ງ​ກໍ​ແມ່ນ​ເນຶ່ອງມາ​ຈາກ​ ການ​ລົງ​ທຶນ​ຂອງ​ຕ່າງປະ​ເທດ​ທີ່ເຂັ້ມ ແຂງ​ຢູ່​ໃນ​ກໍາປູ​ເຈຍ​ນັ້ນ​ເອງ. ​ແຕ່​ຜູ້​ສື່​ຂ່າວ​ວີ​ໂອ​ເອ ຣອນ ຄໍ​ຣ໌​ເບິນ ລາຍງານ ​ຈາກ​ບາງກອກ​ວ່າ ​ເງິນ​ຫລາຍ​ພັນ​ລ້ານ​ໂດ​ລາ​ທີ່​ຫລັ່ງ​ໄຫລ ​ເຂົ້າ​ໄປ​ໃນ​ກໍາປູ​ເຈຍ​ນັ້ນ ​ແມ່ນ​ກໍາລັງ​ກໍ່​ໃຫ້​ເກີດຄວາມ​ເປັນ​ຫ່ວງ​ຂຶ້ນມາ​ ກ່ຽວ​ກັບ​ຜົນ​ກະທົບ​ທາງ​ດ້ານ​ການ​ເມືອງ​ແລະ​ສັງຄົມ​ ຈາກ​ໂຄງການ​ພັດທະນາ​ທີ່​​ໃຫຍ່​ໂຕທັງ ຫລາຍ​ນັ້ນ​. ທອງ​ປານ ມີ​ເລຶ່ອງນີ້ ມາສະ​ເໜີ​ທ່ານ​ໃນ​ອັນດັບ​ຕໍ່​ໄປ

ກໍາປູ​ເຈຍ​ໄດ້​ມີ​ການ​ເຕີບ​ໂຕ​ທາງເສດຖະກິດ​ທີ່​ເຂັ້ມ​ແຂງໃນ​ໄລຍະສອງ​ປີ ນັບຕັ້ງ​ແຕ່ເກີດ
​ວິ​ກິດ​ການ​ການ​ເງິນ​ໂລກ​ ເມື່ອປີ 2008 ​ເປັນ​ຕົ້ນ​ມາ. ການ​ລົງທຶນ​ຂອງ​ຕ່າງປະ​ເທດ
ອຸດສາຫະກໍາ​ການທ່ອງທ່ຽວ​ທີ່ຈ​ະ​ເຣີນ​ເຕີບ​ໂຕ​ຂື້ນ​ໄປເລື້ອຍໆ ​ພ້ອມ​ກັບພາກສ່ວນ
​ການ​ກະເສດ​ທີ່​ເຂັ້ມ​ແຂງ ​ໄດ້ເປັນປັດ​ໄຈ​ສໍາຄັນ​ຂອງ​ການ​ເຕີບ​ໂຕນີ້.

ພວກ​ສ່ວນອຸດ​ສາ​ຫະກໍາຕັດຫຍິບ ແລະແຜ່ນ​ແພ ກໍກໍາລັງ​ຈະ​ເຣີນ​ເຕີບ​ໂຕ​ດີ​ເຊັ່ນ​ກັນ
ໂດຍທີ່​ຄາດ​ວ່າ​ອັດຕາການ​ສົ່ງ​ອອກຈະຖີບ​ຕົວ​ສູງ​ຂື້ນ​ ເຖິງ 40 ​ເປີ​ເຊັນ​ ສໍາລັບ​ປີ​ນີ້.

ທ່ານ ສຕີ​ເວິ່ນ ຮິ​ກກິນ​ສ໌ ​ເຈົ້າໜ້າ​ທີ່​ຫົວໜ້າ​ບໍລິຫານ​ທະນາຄານ ANZ Royal Bank
ໃນ​ນະຄອນຫລວງ​ພະນົມ​ເປັນ ​ສະ​ແດງ​ຄວາມ​ເຫັນ​ວ່າ:

ຕະຫລາດຫລັກຊັບຂອງກໍາປູເຈຍ ທີ່ໄຂຂຶ້ນເມື່ອວັນທີ 11 ກໍລະກົດ 2011 ໃນນະຄອນຫລວງພະນົມເປັນ. (AP Photo/Heng Sinith)
ຕະຫລາດຫລັກຊັບຂອງກໍາປູເຈຍ ທີ່ໄຂຂຶ້ນເມື່ອວັນທີ 11 ກໍລະກົດ 2011 ໃນນະຄອນຫລວງພະນົມເປັນ. (AP Photo/Heng Sinith)

“ເວລາ​ນີ້​ເສດຖະກິດ​ຂອງ​ກໍາປູ​ເຈຍ
​ອາດ​ຈະ​ຖື​ວ່າ​ຢູ່​ໃນ​ເກນ​ດີ​ທີ່​ສຸດເທົ່າທີ່​
ເຄີຍເປັນມາ
ໂດຍບໍ່​ມີ​ບັນຫາ​ຕ່າງໆ
ທີ່​ກໍາລັງ​ຄຸກ​ຄາມ​ຢູ່ໃນເຂດອື່ນ​ໆ​ຂອງ
​ໂລກ. ພວກ​ເຮົາຄິດ​ວ່າ
ການ​ເຕີບ​ໂຕ
ຂອງ
ເສດຖະກິດ​ໃນ​ປີ​ນີ້ ຈະຢູ່​ອັດຕາ
​ເຈັດ​ຫາແປດ​ເປີ​ເຊັນ ​ແລະ
ຖ້າ​ຫາກ
ສະ​ພາບການ​ໃນ​ທົ່ວໂລກຍັງ​ເປັນປົກ
ກະຕິ
ຢູ່​ຕໍ່​ໄປແລ້ວ ພວກ​ເຮົາກໍຢາກ
ຈະ
ຄາດຫວັງວ່າ ອັດຕາ​ການ​ເຕີບ​ໂຕ
ຄົງ​ຈະຢູ່​ໃນ​ລະດັບແປດ​ຫາ​ສິບ​ເປີ​ເຊັນ
ໃນ​ບໍ່ເທົ່າ​ໃດ​ປີ​ຕໍ່ໜ້າ​ນີ້
.

ແຕ່​ທ່ານ ຮິ​ກກິ້ນ​ສ໌ ກ່າວ​ວ່າ ອັດຕາ​ເງິນ​ເຟີ້
​ຈະ​ຕ້ອງຖືກ​ຄວບ​ຄຸມໄວ້​ ​ໂດຍ​ສະ​ເພາະ​ກ່ຽວ​ກັບລາຄາ​ອາຫານ​ທີ່​ກໍ​າລັງ​ຖີບ​ຕົວສູງ​ຂຶ້ນນັບ​ມື້​ນັ້ນ.

ເຖິງ​ແມ່ນວ່າມີສະພາວະ​ທີ່​ບໍ່​ແນ່ນອນທາງເສດຖະກິດ ຢູ່​ໃນ​ພາກ​ພື້ນ​ຢູໂຣບ​ແລະ​ສະຫະລັດ
ໃນເວລາ​ນີ້​ກໍ​ຕາມ ທະນາຄານ​ພັດທະນາ​ເອ​ເຊຍກໍປະເມີນ​ວ່າ ອັດຕາ​ການ​ເຕີບ​ໂຕຂອງກໍາປູ​
ເຈຍໃນ​ປີ​ນີ້​ ຈະ​ຕົກ​ຢູ່​ໃນ​ລະດັບ 6.8 ​ເປີ​ເຊັນ​ ​ແລະ​ຄາດຄະ​ເນ​ວ່າ ອັດຕາ​ຈະ​ຕໍ່າ​ລົງ​ພຽງ​ແຕ່
ໜ້ອຍດຽວ ໃນ​ປີໜ້າ​.

ພວກ​ນັກວິ​ເຄາະ​ກ່າວ​ວ່າ ພວກ​ນັກ​ລົງ​ທຶນ​ຊາວ​ຕ່າງປະ​ເທດ​ຈາກ​ຍີ່ປຸ່ນ​ ​ກໍາລັງ​ພາກັນ​ຊອກ​
ຫາທາງ​ເລືອກອື່ນ ​ແທນ​ປະ​ເທດຈີນ​ແລະ​ໄທ ​ແລະ​ໄປສົມທົບ​ກັບພວກ​ປະ​ເທດໃນ​ຂົງ​ເຂດ
ທີ່​ໄດ້ໄປລົງທຶນ​ຢູ່​ໃນ​ກໍາປູ​ເຈຍ​ມາ​ເປັນ​ເວລາ​ດົນ​ນານ​ແລ້ວ ​ເຊັ່ນ​ຫວຽດນາມ ​ແລະ​ເກົາຫລີ
ໃຕ້ນັ້ນ.

ພະນັກງານເສີບເຢັ້ນເບຍໃຫ້ແຂກ ທີ່ຮ້ານກິນດື່ມ ແຫ່ງນຶ່ງໃນກໍາປູເຈຍ.(AP Photo/Chhor Bunna)
ພະນັກງານເສີບເຢັ້ນເບຍໃຫ້ແຂກ ທີ່ຮ້ານກິນດື່ມ ແຫ່ງນຶ່ງໃນກໍາປູເຈຍ.(AP Photo/Chhor Bunna)

ແຕ່​ຈີນ​ຍັງ​ຄົງ​ເປັນ​ປະ​ເທດ​ທີ່ລົງ​ທຶນ​ຫລາຍ​ກ່ວາ​ໝູ່​ຢູ່​ໃນ​ກໍາປູ​ເຈຍ. ​ສື່ທາງ​ການ​ຂອງຈີນ
ລາຍງານ​ວ່າ ພວກ​ນັກ​ລົງ​ທຶນ​ຈີນໄດ້ທຸ່ມເທ​ເງິນ​ຈໍານວນມະຫາສານ ​ຄື​ປະມານ​ 5,500
ລ້ານ​ໂດ​ລາ​ ​ໃສ່​ການ​ລົງທຶນ​ໃນ​ກໍາປູ​ເຈຍໃນ​ຊ່ວງ​ເຈັດເດືອນ​ທໍາ​ອິດ​ຂອງ​ປີນີ້.

ໃນ​ບັນ​ດາ​ໂຄງການ​ລົງທຶນທີ່​ໃຫຍ່​ໂຕທັງ
ຫລາຍ​ຂອງ​ຈີນ ​ກໍ​ມີ​ໂຄງ​ການ​ພັດທະນາ​
ທີ່ດິນຫລູຫລາແຫ່ງ​ນຶ່ງ ມູນ​ຄ່າ​ສາມ​ພັນ
​ລ້ານ​ໂດ​ລາ. ນອກ​ນີ້​ແລ້ວ​ຈີນ​ຍັງ​ໄດ້​ສະ
ໜອງ​ເງິນໃຫ້ ສໍາລັບການ​ກໍ່ສ້າງ​ຖະໜົນ
​ຫົນທາງ​ແລະ​ເຂື່ອນ​ໄຟຟ້າ​ນໍ້າຕົກ​ອີກ.
​ແລະສອງທະນາຄານ​ຊັ້ນ​ນໍາຂອງຈີນ ຄື
ທະນາຄານ​ອຸດສາຫະກໍາ​ແລະ​ການ​ຄ້າຂອງ​ຈີນ ​ແລະ​ທະນາຄານ​ຈີນ ກໍ​ໄດ້​ເປີດ​ສາຂາຢູ່​ໃນ
​ກໍາປູ​ເຈຍ ​ປີ​ນີ້.

ທ່ານ ພີ​ເຕີ້ ບຣິມ​ເບິ​ລ (Peter Brimble) ນັກ​ເສດ​ຖະ​ສາດ​ອາວຸ​ໂສ​ປະ​ຈໍາ​ທະນາຄານ​ພັດ
ທະນາ​ເອ​ເຊຍ ຫລື ​ເອດີ​ບີ ກ່າວ​ວ່າ ​ເຖິງ​ແມ່ນກໍາປູ​ເຈຍ​ມີ​ຄວາມ​ຍິນ​ດີ​ຮັບ​ເອົາ​ເງິນ​ລົງທຶນ
ຈາກ​ຈີນ​ກໍ​ຈິງ ​ແຕ່​ການ​ຊ່ວຍ​ເຫລືອ​ຈາກ​ຈີນ​ກໍອາດສາມາດ ​ມີ​ຂໍ້​ຈໍາ​ກັດ​ຮັດແຄບ​ໄດ້​.

ທ່ານ ບຣິມ​ເບິ​ລ ​ເວົ້າ​ວ່າ: “ການ​ຊ່ວຍ​ເຫລືອ​ຂອງ​ຈີນ​ນັ້ນ​ແມ່ນ​ມີ​ການຜູກ​ມັດຫລາຍ​
ທີ່​ສຸດ ຄື​ບໍ່​ມີ​ການປະມູນ​ໃດໆ. ມີ​ທາງ​ເປັນ​ໄປ​ໄດ້​ວ່າ ຄື​ໂດຍ​ສະ​ເພາະ ຖ້າວ່າເປັນ​
ເງິນແບບໃຫ້​ຢືມ ​ແທນ​ທີ່​ຈະ​ແມ່ນ​ເງິນໃຫ້​ລ້ານັ້ນ ທ່ານ​ກໍ​ອາດ​ຈະ​ຕ້ອງ​ໃຊ້​ຈ່າຍ​ຄືນ​ໄປ
ຫລາຍ​ກວ່າ​ຈໍານວນ​ທີ່​ໄດ້​ຮັບ ​ເພາະວ່າ​ຈີນ​ບໍ່​ເຊື່ອ​ໃນວິທີ​ການ​ປະມູນ​ແຂ່ງ​ກັນ ຊຶ່ງ​
ຂ້າພະ​ເຈົ້າຄິດ​ວ່າ​ລັດຖະບານ​ກໍາປູ​ເຈຍ ກໍ​ຮູ້​ດີ​ໃນ​ເລຶ່ອງນີ້.”

ທີ່ຊາຍຫາດແຫ່ງນຶ່ງ ໃນເມືອງ ສີຫານຸວິລ, ກໍປູເຈຍ
ທີ່ຊາຍຫາດແຫ່ງນຶ່ງ ໃນເມືອງ ສີຫານຸວິລ, ກໍປູເຈຍ

ພວກ​ນັກ​ວິຈານ​ກ່າວ​ວ່າ ອິດ​ທິ​ພົນ​ທາງ
​ເສດຖະກິດ​ຂອງ​ຈີນນັ້ນແມ່ນເຊື່ອມ​ໂຍງ
​ກັບ​ຄວາມ​ເປັນ​ຫ່ວງ​ໃນ​ດ້ານ​ການ​ເມືອງ
ຊຶ່ງ​ເຂົາ​ເຈົ້າຊີ້​ໄປ​ໃສ່ ເຫດການ​ນຶ່ງ​ໃນ​ປີ
2009 ​ເວລາກໍາ​ປູ​ເຈຍ​ເນລະ​ເທດພວກ
​ຊົນ​ເຜົ່າມຸສລິ​ມ​ວີ​ເກີ້ ທີ່ເຂົ້າ​ໄປຂໍ​ລີ້ໄພ
ການ​ເມືອງ ​ຫລັງ​ຈາກ​ໄດ້​ພາ​ກັນຫລົບ
​ໜີຈາກ​ຄວາມ​ຮຸນ​ແຮງ​ຢູ່​ໃນ​ຈີນ. ບໍ່​ດົນ
​ຫລັງ​ຈາກ​ພວກ​ຊາວວີ​ເກີ້ໄດ້ເດີນທາງ
​ອອກ​ຈາກ​ກໍາປູ​ເຈຍ​ໄປ ​ເຈົ້າໜ້າ​ທີ່​ອາວຸ
​ໂສ​ຈີນ​ຄົນນຶ່ງ​ກໍໄດ້​ເດີນທາງໄປ​ກໍາປູ​ເຈຍ
​ເພື່ອ​ເຊັນສັນ ຍາການ​ຄ້າ 14 ສະບັບ
ກັບ​ກໍາປູ​ເຈຍ ​ມູນຄ່າ 850 ລ້ານ​ໂດ​ລາ.

ທ່ານ ເດ​ວິດ ຄາ​ເທີ ປະທານ​ສະມາຄົມ​ທຸລະ​ກິດ​ອອສ​ເຕຣເລຍ​ແຫ່ງ​ກໍາປູ​ເຈຍ​ກ່າວ​ວ່າ ກໍາປູ​ເຈຍ​ແມ່ນ​ຍິນ​ດີ​ຕ້ອນຮັບ​ການ​ລົງທຶນ​ຂອງຈີນ​.

ທ່ານ ຄາ​ເທີ ​ເວົ້າ​ວ່າ:“ແນ່​ນອນ​ຢູ່​ແລ້ວ​ວ່າ​ ຈີນມີ​ອິດ​ທະ​ພົນໃຫຍ່ຫລວງ ຢູ່ໃນ​ກໍາປູ​ເຈຍ
ຄືສະພານ​ແລະຖະໜົນ​ຫົນທາງ ກໍາລັງ​ທະຍອຍ​ຖືກ​ສ້າງ​ຂຶ້ນມາ ສະ​ນັ້ນ​ຈຶ່ງ​ມີ​ຄວາມ​ຮູ້ສຶກ
ກັນວ່າ​ ມີເງິນຂອງຈີນເປັນຈໍານວນ​ຫລວງຫລາຍ​ຢູ່​ໃນກໍາປູ​ເຈຍ ​ແຕ່​ຂ້າພະ​ເຈົ້າຄິດ​ວ່າ​
ຄົນ​ສ່ວນ​ຫລາຍ​ຮູ້​ດີ​ວ່າ​ມັນ​ມີ​ເງື່ອນ​ໄຂ​ພັນທະ​ຕິດມານໍາ. ມັນກໍ​ດີຢູ່​ ແຕ່​ກໍຢ່າ​ລືມ​ວ່າ​ເຮົາ​
ຕ້ອງ​ໄດ້​ຊໍາລະ​ຄືນ​ໃນເວລາໃດເວລານຶ່ງ.”

ໂຄງການ​ພັດທະ​ນາ​ຕ່າງ​ທີ່ໄດ້​ເງິນ​ມາ​ຈາກ​ການ​ລົງທຶນ​ຂອງ​ຈີນ​ນັ້ນ ອາດ​ສາມາດ​ມີຜົນ​ກະທົບ​ອັນ​ໃຫຍ່​ຫລວງ​ຕໍ່​ກໍາປູ​ເຈຍ ຊຶ່ງ​ເປັນນຶ່ງ​ໃນ​ປະ​ເທດ​ທຸກ​ຈົນ​ທີ່​ສຸດ​ຂອງ​ຂົງ​ເຂດ​ເອ​ເຊຍນັ້ນ. ​ໃນ​ຂະນະ​ທີ່​ພວກ​ເຈົ້າໜ້າ​ທີ່​ກໍາປູ​ເຈຍ ​ສະ​ແດງ​ຄວາມ​ຍິນ​ດີ​ກັບ​ການ​ລົງທຶນຕ່າງໆ​ໃນ​ການ​ຍົກ​ລະ ດັບໂຄງ​ລ່າງ​ພື້ນຖານ​ຂອງ​ກໍາປູ​ເຈຍ​ນັ້ນ​ ກໍ​ໄດ້​ມີ​ປະຊາຊົນຫລາຍ​ພັນ​ຄົນ​ຖືກ​ບັງຄັບ​ໃຫ້​ຍ້າຍ​ໜີຈາກ​ຖິ່ນ​ຢູ່​ອາ​ໃສ ​ເພື່ອຫລີກ​ທາງ​ໃຫ້ໂຄງການ​ສ້າງສາໃໝ່ຕ່າງໆ. ​ໃນ​ປີ 2010 ພວກ​ກຸ່ມ​ສິດທິ​ປະ​ເມີນ​ວ່າ ມີ​ປະຊາຊົນ 30,000 ຄົນຖືກ​ບັງຄັບ​ໃຫ້​ຍົກຍ້າຍ​ໜີ​ອອກ​ຈາກເຮືອນ​ຊານ​ຂອງ​ພວກ​ເຂົາ​ເຈົ້າ ຍ້ອນໂຄງ ການຂຸດ​ຄົ້ນ​ບໍ່​ແຮ່ ການ​ກະ​ເສດ ​ແລະ​ເຂຶ່ອນ​ໄຟຟ້າ​ນໍ້າຕົກ ດັ່ງ​ນີ້​ເປັນ​ຕົ້ນ.

ເຖິງແມ່ນເສດຖະກິດຂອງກໍາປູເຈຍກໍາລັງຈະເລີນ ແຕ່ ຄົນທຸກກໍຍັງມີຫລາຍຢູ່ ເຊ່ນເດັກນ້ອຍຄົນນີ້ ໃນແຂວງ ສຽມຣຽບ ທີ່ຕ້ອງໄດ້ອາໃສດູດນົມສົດຈາກງົວ ເພາະວ່າ ພໍ່ແມ່ພາກັນໄປຊອກວຽກເຮັດຢູ່ໄທໝົດ.(ເດືອນກັນຍາ 2011)
ເຖິງແມ່ນເສດຖະກິດຂອງກໍາປູເຈຍກໍາລັງຈະເລີນ ແຕ່ ຄົນທຸກກໍຍັງມີຫລາຍຢູ່ ເຊ່ນເດັກນ້ອຍຄົນນີ້ ໃນແຂວງ ສຽມຣຽບ ທີ່ຕ້ອງໄດ້ອາໃສດູດນົມສົດຈາກງົວ ເພາະວ່າ ພໍ່ແມ່ພາກັນໄປຊອກວຽກເຮັດຢູ່ໄທໝົດ.(ເດືອນກັນຍາ 2011)

ໜ່ວຍ​ສະ​ເພາະ​ກິດ​ດ້ານ​ສິດທິ​ໃນເຄຫະສະ
ຖານ ຊຶ່ງ​ເປັນກຸ່ມ​ສິດທິກຸ່ມ​ນຶ່ງ ​ທີ່​ໂຈມ​ຕີ​ນະ
​ໂຍບາຍ​ການ​ຕັ້ງ​ຖິ່ນ​ຖານ​ໃໝ່​ຂອງ​ລັດຖະ
ບານ​ກໍ​າ​ປູ​ເຈ​ຍ ກ່າວ​ວ່າ ອາດ​ມີປະຊາຊົນ
​ຫລາຍ​ເຖິງ 150,000 ຄົນ ​ຖືກ​ບັງຄັບ​ໃຫ້
​ຍົກຍ້າຍ​ ໜີອອກຈາກ​ບ້ານ​ຢູ່​ອາ​ໃສ​ໃນ
​ຫລາຍ​ປີ​ຕໍ່ໜ້າ​ນີ້ ຊຶ່ງ​ໃນ​ນັ້ນ ອາດ​ຈະ​ມີ
ຢ່າງ​ໜ້ອຍ 80,000 ຄົນ​ ໃນ​ນະຄອນ
ຫລວງ​ພະນົມ​ເປັນ.

ທ່ານ ຮັງ ​ໄຊ​ຢາ ຜູ້​ອໍານວຍ​ການ​ສະ​ຖາ​ບັນ
​ເພື່ອ​ປະຊາທິປະ​ໄຕ​ຂະແມ ກ່າວ​ວ່າ ພວກ​
ນັກ​ລົງທຶນ​ຊາວ​ຕ່າງປະ​ເທດຈະ​ຕ້ອງ​ເຄົາລົບ
​ນັບຖື​ສິດທິ ມະນຸດ ​ເພື່​ອທີ່​ຈະ​ຮັກສາ​ຄວາມ
​ສໍາ​ພັນໃນ​ໄລຍະ​ຍາວ​ໃນ​ກໍາປູ​ເຈຍ.

ທ່ານ ຮັງ ໄຊຍາ ​ເວົ້າ​ວ່າ: ​ “ການ​ມີ​ຄວາມ​ສໍາພັນ​ແບບ​ສອງ​ຝ່າຍໃດໆ​ກັບ​ຈີນ​ນັ້ນ ​ແມ່ນ​ຈະຕ້ອງ​ເປັນຄວາມ​ສໍາພັນ​ທີ່ເຄົາລົບ​ສິດທິ​ມະນຸດ​ແລະ​ປະຊາທິປະ​ໄຕ​ໃນ​ປະ​ເທດ​. ​ແລະນີ້​ຫລະ ຄື​ສິ່ງ​ທີ່​ບໍ່​ກໍາລັງເກີດ​ຂຶ້ນ​ໃນ​ວົງ​ການ​ລັດຖະບານ​ ໃນ​ການ​ເລືອກ​ວິທີ​ປະຕິບັດຕໍ່​ຈີນ​ນັ້ນ.”

ຜົນງານ​ທາງ​ເສດຖະກິດ​ຂອງ​ກໍາປູ​ເຈຍ​ຈະ​ຖືກຍົກ​ຂຶ້ນ​ມາ​ເນ້ນ​ຍໍ້າ​ໃຫ້​ເຫັນ ​ໃນ​ປີ 2012 ​ເວລາ​ນະຄອນຫລວງ​ພະນົມ​ເປັນ​ ​ເປັນ​ເຈົ້າພາບ​ຈັດ​ກອງ​ປະ ຊຸມ​ປະ​ຈໍາປີ​ຂອງ​ສະມາຄົມ​ອາ​ຊ່ຽນ.

ພວກ​ນັກວິ​ເຄາະ​ກ່າວ​ວ່າ ​ອະນາຄົດ​ທາງດ້ານເສດຖະກິດ​ຂອງ​ກໍາປູ​ເຈຍ​ນັ້ນ ​ແມ່ນພົວພັນ​ກັນ​ຫລາຍ​ຂຶ້ນນັບ​ມື້ ກັບໂຊກ​ລາບ ຫລືຄວາມ​ຈະ​ເລີ​ນດ້ານ​ເສດຖະກິດຂອງ​ພວກ​ປະ​ເທດ​ເພື່ອນ​ບ້ານ​ທີ່ໃກ້​ຊິດ ຄື​ໄທ ຫວຽດນາມ ​ແລະ​ລາວນັ້ນ ​ແລະ​ອີກເພື່ອນ​ບ້ານນຶ່ງ ​ທີ່ຢູ່ຫ່າງໄກຂຶ້ນໄປ​ທາງ​ທິດເໜືອ ກໍ​ຄື ​ຈີນ ນັ້ນ​ເອງ.

XS
SM
MD
LG