ຄວາມຮຸນແຮງທາງດ້ານສາສະໜາຍັງດຳເນີນຢູ່ຕໍ່ມາໃນເມືອງ Sittwe ທາງພາກຕາເວັນ
ຕົກຂອງມຽນມາ ບ່ອນທີ່ພວກຊົນເຜົ່າຣາຄີນ ທີ່ອາໄສຢູ່ໃນເມືອງດັ່ງກ່າວ ແຈ້ງໃຫ້ວີໂອ
ເອຊາບ ທາງໂທລະສັບ ໃນວັນອັງຄານວານນີ້ວ່າ ໄຟຍັງສືບຕໍ່ໄໝ້ ແລະສ້າງຄວາມເສຍ
ຫາຍໃຫ້ແກ່ເຮືອນຊານບ້ານຊ່ອງ ຕະຫຼອດທັງຫ້າງຮ້ານ ຂະນະທີ່ພວກຊົນເຜົ່າໂຣຮິງຢາ
ພາກັນຫຼົບໜີຕຳຫຼວດປາບຈະລາຈົນນັ້ນ.
ທີ່ເມືອງ Maungdaw ປະຊາຊົນລາຍງານວ່າ ຖະໜົນຫົນທາງສ່ວນໃຫຍ່ແມ່ນສະຫງົບ
ງຽບ ແລະຢູ່ນະຄອນຢ່າງກຸ້ງ ທີ່ຕັ້ງຫ່າງອອກໄປ 400 ຫຼັກກິໂລແມັດນັ້ນ ຕຳຫຼວດໄດ້
ຂັບໄລ່ພະສົງສະສະໜາພຸດຈຸນ້ອຍໆກຸ່ມນຶ່ງ ທີ່ວັດ Sule ໃຫ້ແຕກພ່າຍໜີໄປ.
ຄວາມຮຸນແຮງທີ່ວ່ານີ້ ພາໃຫ້ເກີດຄວາມຢ້ານກົວວ່າ ບັນຫາຂັດແຍ້ງອາດຈະລະເບີດຂຶ້ນ
ອີກ ລະຫວ່າງພວກຊົນເຜົ່າທີ່ເປັນສັດຕູກັນໃນອະດີດຜ່ານມາ.
ທ່ານ Phil Robertson ຮອງຜູ້ອຳນວຍການຝ່າຍເອເຊຍຂອງກຸ່ມປົກປ້ອງສິດທິມະນຸດ
Human Rights Watch ກ່າວວ່າ ມີລາຍງານແຈ້ງວ່າ ຕຳຫຼວດປາບຈະລາຈົນທີ່ສົ່ງໄປ
ຍັງເຂດດັ່ງກ່າວແມ່ນເຂົ້າຂ້າງຊົນເຜົ່າຣາຄີນຫຼາຍກວ່າຊົນເຜົ່າໂຣຮິງຢາ. ທ່ານກ່າວວ່າລັດ
ຖະບານຕ້ອງມີຄວາມຍຸຕິທຳໃນການແກ້ໄຂບັນຫາຂັດແຍ້ງນີ້.
ທ່ານ Robertson ເວົ້າວ່າ “ແນ່ນອນມັນມີຄວາມບົ່ມຊ້ອນ ທີ່ຈະສ້າງຄວາມເຊື່ອມເສຍ
ຢ່າງຫລວງຫຼາຍ ໃຫ້ແກ່ຊື່ສຽງໃນການປະຕິຮູບຂອງລັດຖະບານຊຸດນີ້ ຖ້າພວກເຂົາເຈົ້າ ຫາກບໍ່ສາມາດແກ້ໄຂຄວາມຮຸນແຮງທາງດ້ານສາສະໜາດັ່ງກ່າວນັ້ນໄດ້.”
ທ່ານ Robertson ກ່າວວ່າ ການທີ່ມີຊົນເຜົ່າຫຼາກຫລາຍທີ່ແຕກຕ່າງກັນນັ້ນ ເຮັດໃຫ້
ອະນາຄົດຂອງມຽນມາກາງຕໍ່ນຳການກາຍເປັນປະເທດປະຊາທິປະໄຕທີ່ກ້າວໜ້າແລະ
ປະກອບດ້ວຍຫຼາຍຊົນຊາດຊົນເຜົ່າ.
ທ່ານ Robertson ເວົ້າວ່າ “ມີຫຼາຍຊົນຊາດຊົນເຜົ່າໂພດ ທີ່ອາໄສຢູ່ໃກ້ຊິດກັນ ເກີນ
ກ່ວາຈະປ່ອຍໃຫ້ຄວາມຮຸນແຮງ ລະຫວ່າງສອງຊົນເຜົ່າແບບນີ້ ເກີດຂຶ້ນໄດ້ ເພາະວ່າ
ມັນຈະເຮັດໃຫ້ພວກຫົວຮຸນແຮງຈັດ ທີ່ຄຽດຊັງຕໍ່ຊົນເຜົ່າອື່ນຢູ່ແລ້ວນັ້ນ ສວຍໃຊ້ເຫດ
ການນີ້ ຊຶ່ງເປັນອັນຕະລາຍທີ່ສຸດ.”
ເຖິງແມ່ນຊົນເຜົ່າຣາຄີນ ໄດ້ຮັບການກົດຂີ່ ດ້ວຍນໍ້າມືຂອງລັດຖະບານ ມາໄດ້ຫຼາຍທົດ
ສະວັດແລ້ວກໍຈິງແຕ່ລາຍງານຂ່າວຂອງສື່ມວນຊົນພາຍໃນປະເທດກ່ຽວກັບການກໍ່ຈະ
ລາຈົນຄັ້ງນີ້ ແມ່ນອຽງໄປທາງຕໍ່ຕ້ານປະຊາຊົນເຜົ່າໂຣຮິງຢາ. ສື່ມວນຊົນທີ່ໄດ້ຮັບການ
ສະໜັບສະໜຸນຈາກລັດຖະບານແລະອົງການຂ່າວເອກກະຊົນຕ່າງໆໄດ້ລາຍງານກ່ຽວ
ກັບບັນຫາຂັດແຍ້ງດັ່ງກ່າວ ໂດຍໃຊ້ຄຳເວົ້າແບບເຊື່ອມເສຍຕໍ່ເຜົ່າໂຣຮິງຢາ.
ໃນການຖະແຫຼງ ຈາກກຸງລອນດອນ ປະເທດອັງກິດ ທ່ານ Knurl Islam ນັກເຄື່ອນ
ໄຫວ ພ້ອມທັງເປັນນັກວິຊາການຂອງເຜົ່າໂຣຮິງຢາກ່າວວ່າ ການພະຍາຍາມກີດກັນ
ເຜົ່າໂຣຮິງຢາຢູ່ໃນລັດຣາຄີນນັ້ນ ແມ່ນໄດ້ມີປະຫວັດສາດອັນຍາວນານມາແລ້ວ.
ທ່ານ Islam ເວົ້າວ່າ “ພວກເຮົາແມ່ນສອງປະຊາຄົມ. ພວກເຮົາໄດ້ດຳລົງຊີວິດຢູ່ດ້ວຍ
ກັນມາເປັນເວລາດົນນານ ແລະພວກເຮົາກໍຍັງຢູ່ນຳກັນ ໃນທຸມື້ນີ້. ພວກເຮົາຕ້ອງໄດ້
ດຳລົງຊີວິດຢູ່ດ້ວຍກັນ ພວກເຮົາຮູ້ດີ. ແຕ່ພວກເຂົາເຈົ້າບໍ່ຕ້ອງການຊາວມຸສລິມ. ເຂົາ
ເຈົ້າເວົ້າວ່າ ພວກເຮົາເປັນຄົນເຂົ້າເມືອງຜິດກົດໝາຍ ພວກເຮົາບໍ່ມີສິດຫຍັງທີ່ຈະໄປຢູ່
ໃນປະເທດຂອງພວກເຂົາເຈົ້າ.”
ມີຊາວຣາຄີນຈຳນວນຫຼວງຫຼາຍ ຖືວ່າ ຊາວໂຣຮິງຢາ ເປັນພວກທີ່ຫາກໍເຂົ້າມາຢູ່ໃໝ່
ຈາກບັງກລາແດັສແລະບໍ່ມີຄຸນນະສົມບັດພຽງພໍທີ່ຈະເປັນພົນລະເມືອງຂອງມຽນມາ
ໄດ້.
ທ່ານ Hula Saw ສະມາຊິກຄົນນຶ່ງຂອງພັກພັດທະນາຊົນເຜົ່າຣາຄີນ ກ່າວວ່າ ຊົນ
ເຜົ່າໂຣຮິງຢາໄດ້ພະຍາຍາມສະແຫວງຫາສິດທິໃນການເປັນພົນລະເມືອງມຽນມາ ທີ່
ພວກເຂົາເຈົ້າບໍ່ສົມຄວນຈະໄດ້ຮັບນັ້ນ ມາເປັນເວລາດົນນານແລ້ວ.
ທ່ານ Hula Saw ເວົ້າວ່າ “ພວກເຮົາຕ້ອງໄດ້ໃຫ້ສິດທິມະນຸດແກ່ພວກເຂົາເຈົ້າແຕ່
ພວກເຮົາບໍ່ຍອມຮັບຮູ້ວ່າພວກເຂົາມີສິດທິໃນການເປັນພົນລະເມືອງມຽນມາ."
ມີລາຍງານວ່າ ໃນຂະນະທີ່ຄວາມຮຸນແຮງຍັງດຳເນີນຢູ່ຕໍ່ມານັ້ນ ພວກໂຣຮິງຢາຈໍາ
ນວນຫຼວງຫຼາຍ ໄດ້ພາກັນຫຼົບໜີໄປຈາກລັດດັ່ງກ່າວ ໂດຍທາງເຮືອແລະທາງພາກ
ພື້ນດິນ. ບັງກລາແດັສບໍ່ຍອມເປີດຊາຍແດນ ຮັບເອົາພວກໂຣຮິງຢາ ທີ່ຫຼົບໜີຈາກ
ບັນຫາຂັດແຍ້ງໃນມຽນມາ.
ຄວາມຮຸນແຮງໄດ້ລະເບີດຂຶ້ນໃນວັນທີ 4 ມິຖຸນາຜ່ານມານີ້ເວລາຝູງຊົນເຜົ່າຣາຄີນ
ທີ່ນັບຖືສາສະໜາພຸດຈຸນຶ່ງໃນ Sitwe ເມືອງຫຼວງຂອງລັດໄດ້ໂຈມຕີລົດເມ ຄັນນຶ່ງ
ແລະສັງຫານຜູ້ໂດຍສານ ເຜົ່າໂຣຮິງຢາ 10 ຄົນ ທີ່ເຂົາເຈົ້າເຂົ້າໃຈຜິດຄິດວ່າ ເປັນ
ພວກທີ່ຮັບຜິດຊອບໃນການຂົ່ມຂືນສຳເລົາໝູ່ຫຼືລຽນຄິວ ແລ້ວສັງຫານແມ່ຍິງທີ່ຖື
ສາສະໜາພຸດຄົນນຶ່ງ.
ຄວາມຮຸນແຮງທີ່ວ່ານີ້ໄດ້ເນັ້ນໃຫ້ເຫັນເຖິງຄວາມເຄັ່ງຕຶງທີ່ມີມາເປັນເວລາດົນນານ
ລະຫວ່າງຊົນເຜົ່າຣາຄີນທີ່ນັບຖືສາສະໜາພຸດແລະພວກຊົນກຸ່ມນ້ອຍເຜົ່າໂຣຮິງຢາ
ທີ່ນັບຖືສາສະໜາອິສລາມ. ມຽນມາບໍ່ໄດ້ຖືວ່າ ພວກໂຣຮິງຢາທີ່ມີຢູ່ປະມານ 80້0
ພັນຄົນເປັນພົນລະເມືອງມຽນມາ ແຕ່ໄດ້ຖືພວກເຂົາວ່າເປັນຄົນເຂົ້າເມືອງຜິດກົດ
ໝາຍຈາກບັງກະລາແດັສ ທີ່ເປັນເພື່ອນບ້ານ.
ນອກນັ້ນແລ້ວ ເລື່ອງນີ້ຍັງເປັນ
ບັນຫາທ້າທາຍທີ່ສຳຄັນສຳຫຼັບ
ລັດຖະບານໃໝ່ຂອງມຽນມາທີ່
ໄດ້ເຂົ້າກຳອຳນາດ ໃນປີກາຍນີ້
ລຸນຫຼັງທີ່ໄດ້ມີການປົກຄອງຢ່າງ
ໂຫດຮ້າຍຂອງພວກທະຫານມາ
ເປັນເວລາຫຼາຍທົດສະວັດ.
ປະທານາທິບໍດີ Thien Sein
ໄດ້ເຕືອນໃນວັນອາທິດຜ່ານມາ
ນີ້ວ່າຄວາມຮຸນແຮງອາດຈະເປັນ
ໄພອັນຕະລາຍຕໍ່ຂັ້ນຕອນການ
ປະຕິຮູບທີ່ຫາກໍເລີ່ມຂຶ້ນ ເມື່ອບໍ່ດົນມານີ້ຂອງປະເທດ. ທ່ານເວົ້າວ່າ ຄວາມວຸ້ນວາຍວ່ານີ້
ແມ່ນໄດ້ຮັບການຊຸກຍູ້ຍ້ອນດ້ວຍຄວາມຄຽດຊັງແລະການແກ້ແຄ້ນ ທີ່ອີງຕາມສາສະໜາ
ແລະຊົນຊາດແລະກ່າວຕໍ່ໄປວ່າ ມັນອາດສາມາດແຜ່ລາມໄປຍັງເຂດອື່ນໆຂອງປະເທດໄດ້
ຊຶ່ງທ່ານເຕືອນວ່າ ຖ້າມັນຫາກເກີດຂຶ້ນຈິງ ສະຖຽນລະພາບ ສັນຕິພາບ ແລະ ຂັ້ນຕອນ
ການສ້າງສາປະຊາທິປະໄຕຂອງມຽນມາ ກໍອາດໄດ້ຮັບຜົນກະທົບຢ່າງຮ້າຍແຮງ.
ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ກ່າວໃນ ມື້ວັນຈັນ
ຜ່ານມານີ້ວ່າ ທ່ານນາງມີຄວາມວິຕົກກັງວົນເປັນທີ່ສຸດ ກ່ຽວກັບ ສະຖານະການດັ່ງກ່າວ
ຊຶ່ງທ່ານນາງໄດ້ຮຽກຮ້ອງໃຫ້ມີການສືບສວນຢ່າງໂປ່ງໃສກ່ຽວກັບຄວາມຮຸນແຮງນີ້ ແລະ
ເວົ້າວ່າ ສະຖານະການໄດ້ເນັ້ນໃຫ້ເຫັນເຖິງຄວາມຈຳເປັນ ສຳຫຼັບດຳເນີນການ ຢ່າງຈິງຈັງ
ເພື່ອໃຫ້ບັນລຸການສ້າງຄວາມປອງດອງຊາດຢູ່ໃນມຽນມາ.
ອົງການສະຫະປະຊາຊາດ ໄດ້ເລີ້ມຍົກຍ້າຍ ພະນັກງານຂອງຕົນ ແລະສະມາຊິກຄອບຄົວ
ຂອງເຂົາເຈົ້າ ຫຼາຍກວ່າ 40 ຄົນ ອອກໄປຈາກຖານປະຕິບັດງານໃນເມືອງ Muangdaw
ຕິດກັບຊາຍແດນບັງກະລາແດັສນັ້ນ. ທ່ານ Ashok Nigam ຫົວໜ້າຝ່າຍພັດທະນາຂອງ
ອົງການສະຫະປະຊາຊາດໃນເຂດດັ່ງກ່າວເວົ້າວ່າ ທ່ານຫວັງວ່າພວກຄົນງານເຫຼົ່ານີ້ຈະສາ
ມາດເດີນທາງກັບຄືນໄປໄດ້ຫຼັງຈາກຄວາມຮຸນແຮງຜ່ອນຄາຍລົງແລ້ວ.