ການໂຮມຊຸມນຸມກັນສອງຄັ້ງເພື່ອຕໍ່ຕ້ານບັນຫາການຂາດແຄນກະແສໄຟ ຟ້າຢ່າງຊໍາເຮື້ອຢູ່
ທີ່ນະຄອນຢ່າງກຸ້ງ ເມືອງຫຼວງດ້ານການຄ້າຂອງມຽນມາ ໄດ້ສິ້ນສຸດລົງຢ່າງສັນຕິເມື່ອວັນອັງຄານວານນີ້ ຫຼັງຈາກປະຊາຊົນ ໄດ້ໄປເຕົ້າໂຮມກັນຢູ່ໃນເຂດໃຈກາງເມືອງເພື່ອປະທ້ວງບັນຫາໄຟຟ້າມອດຢູ່ເລື້ອຍໆນັ້ນ.
ການປະທ້ວງຕ່າງໆ ພ້ອມກັບການໂຮມຊຸມນຸມທໍານອງດຽວກັນ ເມື່ອວັນ ອາທິດແລະວັນຈັນທີ່ເມືອງມັນດາເລ ງນັບວ່າເປັນເຫດການທີ່ບໍ່ຄ່ອຍໄດ້ພົບເຫັນຢູ່ໃນມຽນມາ ຊຶ່ງເຄີຍຕົກຢູ່ພາຍໃຕ້ການປົກຄອງແບບກົດຂີ່ຂອງພວກທະຫານ ມາເປັນເວລາເຄິ່ງສັດຕະວັດ ຈົນເຖິງປີແລ້ວນີ້.
ພວກເຫັນເຫດການກ່າວວ່າ ການປະທ້ວງເມື່ອວັນອັງຄານວານນີ້ ທີ່ວັດ Sule ໃນເຂດໃຈກາງນະຄອນຢ່າງກຸ້ງ ທີ່ມີປະມານ 150 ຄົນເຂົ້າຮ່ວມໂຮມທັງອະດີດນັກໂທດການເມືອງທີ່ຖືກຈໍາຄຸກໂດຍລັດຖະບານທະຫານ ທີ່ໄດ້ສະຫຼະອໍານາດເມື່ອ 13 ເດືອນຜ່ານມາ. ອົງການຂ່າວຝຣັ່ງລາຍງານວ່າມີການວາງກຳລັງຕໍາຫຼວດຢ່າງໜາແໜ້ນຢູ່ບ່ອນປະທ້ວງເມື່ອຕອນບ່າຍ ວັນອັງຄານວານນີ້ ແລະເວົ້າອີກວ່າ ສະມາຊິກພັກຝ່າຍຄ້ານຫຼາຍຄົນຖືກກັກຂັງໄວ້ເປັນເວລາສັ້ນໆ ເພື່ອສອບປາກສອບຄໍາ ກ່ອນຈະປ່ອຍຕົວໄປ.
ມີປະຊາຊົນຫຼາຍກວ່ານຶ່ງພັນຄົນໄດ້ພາກັນປະທ້ວງເມື່ອວັນອາທິດ ແລະວັນຈັນ ທີ່ເມືອງມັນດາເລ ແຕ່ບໍ່ມີລາຍງານຜູ້ຖືກຈັບກຸມຢູ່ໃນເມືອງໃຫຍ່ອັນດັບສອງຂອງປະເທດນັ້ນ.
ໄຟຟ້າມອດ ຖືເປັນເລຶ່ອງທໍາມະດາ ຢູ່ໃນມຽນມາ ຄືເວລາໄຟມອດແຕ່ລະເທື່ອ ປົກກະຕິຈະດົນນານເຖິງຫົກຊົ່ວໂມງຢູ່ທີ່ນະຄອນຢ່າງກຸ້ງແລະ ຢູ່ເມືອງມັນດາເລນັ້ນ ຈະດົນກວ່າ
ຢູ່ຢ່າງກຸ້ງເຖິງສາມເທົ່າ.
