ລິ້ງ ສຳຫລັບເຂົ້າຫາ

ຜູ້ນໍາປະຊາທິປະໄຕມຽນມາ ຫວັງວ່າ ການເລືອກຕັ້ງ ຈະນໍາມາ ຊຶ່ງສັກກະຫລາດໃໝ່ (ເບິ່ງວີດີໂອ)

  • Dara Baccam

ທ່ານນາງອອງ ຊານ ຊູຈີ ກໍາລັງຈະຖະແຫລງຕໍ່ຝຸງຊົນ ຫລັງຈາກໄດ້ຮັບໄຊຊະນະ ໃນການເລືອກຕັ້ງ ຢູ່ສໍານັກງານພັກ NLD ທີ່ນະຄອນຢ່າງກຸ້ງ, ວັນທີ 2 ເມສາ 2012

ທ່ານນາງອອງ ຊານ ຊູຈີ ຜູ້ນໍາປະຊາທິປະໄຕຂອງມຽນມາກ່າວວ່າ ທ່ານນາງຫວັງວ່າ ໄຊຊະ ນະທ່ານນາງແລະຂອງພັກຂອງທ່ານນາງ ໃນການເລືອກຕັ້ງເມື່ອວັນອາທິດຜ່ານມານັ້ນ ຈະ ເປັນການກ້າວເຂົ້າສູ່ສັກກະຫລາດໃໝ່ ຢູ່ໃນມຽນມາ. ເຖິງແມ່ນວ່າທ່ານນາງແລະພັກສັນນິ ບາດແຫ່ງຊາດເພື່ອປະຊາທິປະໄຕ ຫລື NLD ຂອງທ່ານນາງ ຈະມີພຽງເສດສ້ຽວນຶ່ງຂອງ ອໍານາດຢູ່ໃນສະພາແຫ່ງຊາດກໍຕາມ ແຕ່ກໍເປັນທີ່ຄາດກັນວ່າ ພວກເຂົາເຈົ້າຈະເປັນພັກຝ່າຍ ຄ້ານທີ່ແຂງຂັນຫ້າວຫັນ ຕໍ່ລັດຖະບານທີ່ໜຸນຫລັງໂດຍຝ່າຍທະຫານນັ້ນ. Daniel Schearf ຜູ້ສື່ຂ່າວວີໂອເອ ລາຍງານມາຈາກນະຄອນຢ່າງກຸ້ງ ຊຶ່ງດາຣາຈະນໍາລາຍລະອຽດມາສະເໜີ ທ່ານ.

ຟັງລາຍງານໂດຍເຕັມ:

((ສຽງຮ້ອງໂຮຂອງພວກສະໜັບສະໜຸນ....))

ພວກ​ສະໜັບສະໜຸນ​ແລະ​ສື່​ມວນ​ຊົນ​ຫລາຍ​ຮ້ອຍ​ຄົນ​ພາກັນ​ເຕົ້າ​ໂຮມ​ກັນ​ຢູ່ ນອກ​ສໍານັກ
ງານ​ສູນ​ກາງ​ພັກ​ສັນ​ນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕ ຫລື NLD ຂອງ​ທ່ານ​ນາງ​ອອງ
ຊານ ຊູ​ຈີ ຕອນ​ເຊົ້າວັນ​ຈັນວານ​ນີ້ ​ເພື່ອ​ລໍຖ້າ​ຟັງ ທ່ານ​ນາງ​ກ່າວຄໍາ​ປາ​ໄສ​ສັ້ນໆ ຮັບເອົາໄຊ
ຊະນະ​ໃນການເລືອກຕັ້ງ.

ພັກ​ NLD ໄດ້​ປະກາດ​ໃນຕອນແລງວັນ​ອາທິດວ່າ ​ທ່ານ​ນາງ​ແລະຜູ້​ສະໝັກ​ເລືອກ​ຕັ້ງຂອງ
ພັກ ​ໄດ້​ຊະນະ​ເກືອບ​ວ່າທັງ​ໝົດ​ຂອງ 45 ບ່ອນ​ນັ່ງທີ່ມີການແຂ່ງຂັນກັນ ໃນການ​ເລືອກຕັ້ງ
ພິ​ເສດຄັ້ງ​ນີ້.

ຖ້າ​ຫາກໄດ້ຮັບການ​ຢືນຢັນ​ ຜົນການ​ເລືອກ​ຕັ້ງກໍໜ້າ​ຈະ​ເປັນ​ການປະຕິເສດ ແລະ​ຕ້ອງ​ຕິ​ຢ່າງໂຈ່ງແຈ້ງຂອງມະຫາຊົນ​ ຕໍ່ພັກເພື່ອຄວາມເປັນເອກະພາບ​ແລະ​ການ​ພັດທະນາຂອງ
ສະຫະພາບ ຫລື USDP ທີ່​ໜຸນ​ຫລັງ​ໂດຍ​ຝ່າຍ​ທະຫານ​ ຊຶ່ງ​ເປັນ​ຜູ້​ກໍາ​ບ່ອນນັ່ງສ່ວນຫລາຍ​ ໃນອັດຕາຖ້ວມລົ້ນຢູ່ໃນ​ສະພາ​ແຫ່ງ​ຊາດນັ້ນ.

ທ່ານ​ນາງ​ອອງ ຊານ ຊູ​ຈີ ເຈົ້າຂອງ​ລາງວັນ​ໂນ​ແບ​ລ ໃຫ້ຄໍາໝັ້ນສັນຍາ​ວ່າ ​ເວລາ​ທ່ານນາງແລະ
​ພັກ​ຂອງ​ທ່ານ​ນາງ​ ເຂົ້າ​ໄປ​ຮ່ວມ​ຢູ່​ໃນ​ຄະນະ​ລັດຖະບານ​ຫລັງ​ຈາກເວລາ​ 20 ກວ່າປີ ທີ່​ໄດ້ຖືກ
ພັດ​ຖິ່ນ​ທາງ​ການ​ເມືອງ​ນັ້ນ ພວກ​ທ່ານຈະ​ໃຫ້ ຄວາມ​ຮ່ວມ​ມື​ກັບ​ໝົດ​ທຸກ​ຝ່າຍ ​ທີ່​ເຕັມ​ໃຈ​ຈະ
​ປະຕິບັດ​ງານ​ເພື່ອ​ຄວາມ​ປອງ​ດອງ​ຊາດ.

ທ່ານ​ນາງ​ອອງ ຊານ​ ຊູ​ຈີ ​ໄດ້​ເອີ້ນ​ການເລືອກ​ຕັ້ງ​ໃນວັນ​ອາທິດນັ້ນ ວ່າ​ເປັນ​ຮ່ອຍ​ຮອຍ​ທີ່​ໃຫ້
​ຄວາມ​ຫວັງ​ ສໍາລັບ​ປະຊາທິປະ​ໄຕແລະ​ຄວາມ​ປອງດອງ​ກັນ​ຢູ່​ໃນ​ມຽນມາ. ທ່ານ​ນາງ​ເວົ້າວ່າ:

“ພວກ​ເຮົາ​ຫວັງ​ວ່າ​ ​ນີ້​ຈະ​ເປັນ​ຈຸດ​ເລິ່ມຕົ້ນ​ຂອງ​ສັກກະຫລາດ​ໃໝ່ ທີ່​ຈະ​ມີ​ການ​ເນັ້ນ​
ໜັກຫລາຍຂຶ້ນ ​ໃສ່ກົດ​ເກນ​ຂອງ​ປະຊາຊົນ​ຢູ່​ໃນ​ກິດຈະ​ວັດການ​ເມືອງ​ປະຈໍາວັນ​ຂອງ
​ປະ​ເທດ​ຊາດ​ຂອງ​ພວກ​ເຮົາ.”

ທ່ານ​ນາງ ອອງ ຊານ ຊູ​ຈີ ກ່າວ​ຕໍ່​ໄປ​ວ່າ ຫລັງຈາກໄດ້ເຂົ້າປະກອບສ່ວນຢູ່ ໃນສະພາແຫ່ງຊາດ
ແລ້ວ ພັກ NLD ກໍຈະສືບຕໍ່ຜັກດັນ ໃຫ້ມີການປົກຄອງດ້ວຍຕົວບົດກົດໝາຍ ໃຫ້ມີການສິ້ນ
ສຸດລົງຂອງຂໍ້ຂັດແຍ້ງທັງໝົດຂອງບັນດາຊົນເຜົ່າ ແລະການດັດແກ້ລັດຖະທໍາມະນູນ.

ການດັດແກ້ລັດຖະທໍາມະນູນທີ່ຮ່າງຂຶ້ນມາໂດຍຝ່າຍທະຫານນັ້ນ ແມ່ນຈະ ເປັນການທ້າທາຍ
ພໍສົມຄວນສໍາລັບພັກ NLD ເພາະ​ເຖິງ​ແມ່ນ​ວ່າຈະໄດ້​ຊະນະ​ບ່ອນ​ນັ່ງ​ທັງໝົດ​ໃນ​ການ​ເລືອກ​ຕັ້ງ
​ຄັ້ງ​ພິ​ເສດໃນ​ວັນ​ອາທິດ​ ລນັ້ນ​ກໍຕາມ ​ມັນກໍເປັນພຽງ​ປະມານ 7 ​ເປີ​ເຊັນ​ເທົ່ານັ້ນ ຂອງ​ຈໍານວນ
ຫລາຍ​ຮ້ອຍ​ບ່ອນ​ນັ່ງ​ທີ່​ຄອບຄອງໂດຍຝ່າຍ​ທະຫານ ແລະພວກ​ສະໜັບສະໜຸນ​ທະຫານເປັນ
ສ່ວນ​ໃຫຍ່​ນັ້ນ.

ພວກຜູ້ແທນເຫລົ່ານັ້ນມີ​ສິ່ງກະຕຸ້ນໃຈ​ໜ້ອຍ​ຫລາຍ ທີ່ຈະພາໃຫ້ເຂົາເຈົ້າ​ສະໜັບສະໜຸນ​ໃຫ້​ມີ
​ການດັດ​ແກ້​ລັດຖະທໍາ​ມະນູນ. ລັດຖະທໍາ​ມະນູນ​ສະບັບ​ປັດຈຸບັນ​ ແມ່ນ​ຮັບປະກັນການ​ສືບ​ຕໍ່
​ກໍາ​ອໍານາດ​ຂອງ​ຝ່າຍ​ທະຫານ​ຢູ່​ໃນ​ລັດຖະບານ​ຕໍ່​ໄປ ໂດຍລະບຸວ່າ​ນຶ່ງ​ສ່ວນ​ສີ່ຂອງບ່ອນ​ນັ່ງ​ທັງ
​ໝົດ​ໃນ​ສະພາແມ່ນ ຈອງ​ໄວ້ໃຫ້ຝ່າຍທະຫານ.

ຢ່າງໃດກໍຕາມ ທ່ານ​ນາງ Suzanne DiMaggio ຮອງ​ປະທານ ໂຄງການ​ນະ​ໂຍບາຍ​ໂລກ ທີ່
ສະມາຄົມເອ​ເຊຍ ກ່າວ​ວ່າ ​ເຖິງ​ແມ່ນພັກ NLD ໄດ້ກາຍມາເປັນການ​ທ້າ​ທາຍ​ນ້ອຍໆຢູ່ໃນ
​ສະພາກໍ​ຕາມ ​ແຕ່​ໄຊຊະນະ​ຄັ້ງ​ນີ້ ​ກໍ​ຖື​ວ່າ​ມີຄວາມສໍາຄັນ​ຢູ່.​ ທ່ານ​ນາງ DiMaggio ເວົ້າວ່າ:

“ໂດຍ​ສະ​ເພາະ​ແລ້ວໃນ​ເວລາ​ນີ້​ ຢ່າງ​ໜ້ອຍ​ພວກ​ເຮົາ​ກໍເລິ່ມມີ​ສຽງ​ຂອງ​ຝ່າຍຄ້ານ
ຂຶ້ນມາຢູ່ພາຍໃນ​ສະພາ ຊຶ່ງ​ເປັນ​ສຽງ​ຄັດຄ້ານ​ທີ່​ໜ້າ​ເຊື່ອ​ຖື ​ແລະ​ຂ້າພະ​ເຈົ້າຄິດ​ວ່າ
ນີ້​ຄື​ຈຸດ​ເລິ່ມຕົ້ນ​ຂອງ​ສິ່ງ​ໃດສິ່ງ ນຶ່ງ ທີ່​ມີ​ແຕ່​ຈະ​ເຕີບ​ໂຕ​ຂຶ້ນນັບ​ມື້ ​ເທົ່າ​ນັ້ນ.”

ທ່ານ​ນາງ DiMaggio ກ່າວ​ຕໍ່​ໄປ​ວ່າ ຜົນ​ການ​ເລືອກ​ຕັ້ງ​ສະ​ແດງ​ໃຫ້​ເຫັນ​ວ່າ ມັນ​ເຖິງເວລາ​ແລ້ວ
​ສໍາ​ລັບ​ສະຫະລັດ​ ທີ່​ຈະ​ຍົກ​ເລີກ​ການ​ລົງໂທດທາງ​ເສດຖະກິດຕໍ່​ມຽນມາ​.

ປະຊາຊົນມຽນມາສະແດງຄວາມດີໃຈນໍາຜົນ ຂອງການເລືອກຕັ້ງ, ວັນທີ 2 ເມສາ 2012.
ປະຊາຊົນມຽນມາສະແດງຄວາມດີໃຈນໍາຜົນ ຂອງການເລືອກຕັ້ງ, ວັນທີ 2 ເມສາ 2012.

ສະຫະລັດ ​ແລະ​ສະຫະພາບ​ຢູໂຣບ ​ໃນ​
ຫລາຍໆປະ​ເທດ​ ໄດ້​ວາງ​ຂໍ້​ຈໍາກັດຮັດ​ແຄບ
​ດ້ານ​ການ​ຄ້າ​ຕໍ່​ມຽນມາ ​ຍ້ອນ​ປະວັດ​ທີ່​ບໍ່ດີ
​ໃນດ້ານສິດທິ​ມະນຸດ​ຂອງມຽນມາ​ນັ້ນ. ​ວັນ​
ຈັນ​ວານ​ນີ້ ຫົວໜ້າຝ່າຍ​ການ​ຄ້າ​ຂອງສະຫະ
ພາບ​ຢູໂຣບ ຫລື ອີຢູ ກ່າວ​ວ່າ ຖ້າ​ຫາກ​ການ
​ເລືອກ​ຕັ້ງ​ໃນ​ມຽນມາ​ຄັ້ງ​ນີ້​ໄດ້​ພິສູດ​ໃຫ້​ເຫັນ​
ວ່າ ​ເປັນ​ໄປ​ຢ່າງ​ເສລີ​ແລະ​ຍຸດຕິ​ທໍາ​ແລ້ວ ອີຢູ
​ກໍ​ຈະ​ພິຈາລະນາ ​ຍົກ​ເລິກການ​ລົງ​ໂທດ
​ຕ່າງໆ​ຕໍ່ມຽນ​ມາ ຢູ່​ໃນ​ກອງ​ປະຊຸມຄັ້ງ​ວັນ​ທີ
21 ​ເມສາ ທີ່​ນະຄອນ​ຫລວງ Brussels
ປະ​ເທດ​ເບ​ລຢ້ຽມ​ນັ້ນ.

​ເມື່ອ​ວັນ​ສຸກ​ຜ່ານ​ມາ​ນີ້ ພັກ NLD ກ່າວ​ວ່າ ຕົນ​ບໍ່​ຄາດ​ວ່າການ​ເລືອກ​ຕັ້ງ​ຄັ້ງນີ້​ຈະເປັນໄປຢ່າງ​
ເສລີ​ແລະ​ຍຸດຕິ​ທໍາ​ ແລະທ່ານ​ນາງ​ອອງຊານ ຊູ​ຈີ ກ່າວ​ວ່າ ພັກ NLD ຈະແຈ້ງໃຫ້ມະຫາຊົນ
ຊາບຢ່າງທົ່ວເຖິງກ່ຽວກັບຄວາມຜິດປົກກະ ຕິຕ່າງໆທີ່ເກີດຂຶ້ນ ເພື່ອຮັບປະກັນວ່າມັນບໍ່ໄດ້
ຖືກມອງຂ້າມ. ພັກ NLD ​ໄດ້​ຊີ້ໃຫ້ເຫັນຊື່​ຂອງ​ຫລາຍໆ​ຄົນທີ່​ຕາຍ​ໄປ​ແລ້ວ ​ຢູ່​ໃນ​ບັນຊີ​ຜູ້​ມີ
​ສິດ​ເລືອກ​ຕັ້ງ ພ້ອມ​ທັງ​ຊື່ພວກ​ມີ​ສິດ​ປ່ອນ​ບັດຫລາຍໆຄົນ ທີ່​ມີໝາຍ​ເລກລົງທະບຽນອັນ
ດຽວ​ກັນ​.

ພວກ​ມີ​ສິດ​ປ່ອນ​ບັດ​ບາງ​ຄົນ​ຈົ່ມວ່າ​ ມີຂີ້​ເຜິ້ງທາ​ໃສ່​ບັດ​ເລືອກ​ຕັ້ງ ຊຶ່ງ​ເຮັດໃຫ້ ເຂົາເຈົ້າບໍ່ສາມາດ
ໝາຍບັດໄດ້ຢ່າງຄັກແນ່ ເພາະມັນສາມາດລືບອອກໄດ້.

((ສຽງຊາວບ້ານ...))

​ບ້ານ ວາ ​ເທ​ນ ຄາ ທີ່​ເມືອງ Kawtmu ​ເປັນ​ເຂດ​ເລືອກ​ຕັ້ງ​ຂອງ​ທ່ານ​ນາງ ອອງ ຊານ ຊູ​ຈີ

ໝູ່​ບ້ານ​ທີ່​ຍາກຈົນ​ແລະ​ຢູ່​ສອກຫລີກ​ນີ້ ໄດ້ຕົກເປັນເປົ້າຂອງຄວາມ​ສົນ​ໃຈ​ ​ເວລາ​ອະດີດນັກ​ໂທດ​
ຈິດ​ສໍານຶກ​ທີ່​ມີ​ຊື່​ສຽງ​ທີ່​ສຸດຂອງມຽນມາ ​ໄດ້​ເລືອກ​ເອົາ​ບ້ານ​ນີ້​ເປັນບ່ອນລົງທະບຽນ​ສໍາມະ​ໂນ​
ຄົວ​ຂອງ​ທ່ານນາງ.

ນາງ Nan Myat Myat Thu Win ອາຍຸ 23 ປີ ​ແລະ​ຄອບຄົວ​ ມີ​ຮ້ານຂາຍເຄື່ອງ​ນ້ອຍໆ​
ຮ້ານ​ນຶ່ງ ​ຢູ່​ຂ້າງເຮືອນຂອງທ່ານນາງອອງ ຊານ ຊູຈີ​. ນາງ​ເວົ້າ​ວ່າ ນາງ​ຫວັງວ່າ ທ່ານ​ນາງ
ອອງຊານ ຊູ​ຈີ ຈະ​ສາມາດ​ຊ່ວຍ​ເຫລືອ​ພວກຄົນຫວ່າງງານ​ຂອງໝູ່​ບ້ານໄດ້ ​ແຕ່​ນາງ​ກໍ​ຮັບ​ຮູ້
​ວ່າ​ເຖິງ​ແມ່ນໄດ້ ຮັບໄຊຊະນະໃນ​ການ​ເລືອກ​ຕັ້ງ​ກໍ​ຕາມ ແຕ່​ພັກ NLD ກໍ​ຈະ​ມີ​ອໍາ​ນາດແຕ່​
ພຽງ​ໜ້ອຍ​ດຽວ. ນາງນ່ານ ເວົ້າວ່າ:

“ຢ່າງ​ໜ້ອຍ​ ເພິ່ນ​ກໍ​ສາມາດ​ທີ່​ຈະ​ນໍາ​ສະ​ເໜີ​ບັນຫາ​ຕ່າງໆ ​ເຊັ່ນ​ເລື່ອງຄວາມທຸກ​ຈົນ​ນັ້ນ
ຕໍ່​ສະພາໄດ້ ຊຶ່ງ​ວ່າ​ມັນ​ຈະ​ໄດ້ຮັບການ​ແກ້​ໄຂຫລື​ບໍ່ນັ້ນ ກໍ​ຂຶ້ນຢູ່​ກັບ​ລັດຖະບານ.”

ທຸກໆ​ຄົນ​ຢູ່​ໃນ​ບ້ານ War Thein Kha ທີ່​ໄດ້​ລົມກັບ​ວີ​ໂອ​ເອ ກ່າວວ່າ​ ພວກ​ເຂົາ​ເຈົ້າ​ເປັນ​ຜູ້​
ສະໜັບສະໜຸນ​ທ່ານ​ນາງ​ອອງຊານ ຊູ​ຈີ ທັງນັ້ນ.

​ແມ່ຕູ້ດໍ ​ເອ ອາຍຸ 95 ປີ ທີ່ອາ​ໃສ​ຢູ່​ໃນ​ໝູ່​ບ້ານ​ແຫ່ງ​ນີ້​ມາ​ຕະຫລອດຊີວິດຂອງລາວ ກ່າວ​ວ່າ
ລາວ​ຮັກ​ທ່ານ​ນາງ​ອອງ ຊານ ຊູ​ຈີ ​ແລະ​ຈະ​ບໍ່​ມີ​ວັນ​ປ່ອນ​ບັດເອົາ​ພັກ USDP ທີ່​ໜຸນ​ຫລັງ​ໂດຍ
​ຝ່າຍ​ທະຫານ​ນັ້ນ. ​ແມ່ຕູ້​ເອ ກ່າວ​ວ່າ:

“​ຂ້ອຍ​ບໍ່​ມັກ​ພວກເຂົາ ດັ່ງ​ນັ້ນ​ຂ້ອຍ​ຈະບໍ່​ປ່ອນພວກ​ເຂົາ ພວກ​ນີ້​ປົກຄອງ​ປະ​ເທດ​
ມາ​ໄດ້​ຫລາຍ​ຟ້າ​ຫລາຍ​ປີ​ແລ້ວ ມັນ​ຄວນຈະ​ເປັນ​ເວລາແລະໂອກາດ​ຂອງ​ທ່ານ​ນາງ
ອອງຊານ ຊູ​ຈີ​ ​ແລ້ວ.”

ຜົນ​ການ​ເລືອກ​ຕັ້ງ​ຢ່າງ​ເປັນ​ທາງ​ການ ຄາດ​ວ່າ​ ຈະ​ບໍ່ມີການ​ແຈ້ງ​ໃຫ້​ຊາບ​ຈົນ ກວ່າ​ອີກ​ຫລາຍ​ມື້​

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG