ທ່ານນາງອອງຊານຊູຈີ ຜູ້ນໍາປະຊາທິປະໄຕໃນມຽນມາ ໄດ້ປະກາດ “ຍຸກໃໝ່” ສໍາລັບມຽນມາໃນວັນຈັນມື້ນີ້ ຫຼັງຈາກພັກຂອງທ່ານນາງອ້າງເອົາໄຊຊະນະຢ່າງຖ້ວມລົ້ນ ໃນການເລືອກຕັ້ງສະພາແຫ່ງຊາດຮອບພິເສດໃນວັນອາທິດວານນີ້.
ເຖິງແມ່ນວ່າ ຜົນການເລືອກຕັ້ງຢ່າງເປັນທາງການອາດໃຊ້ເວລາຫຼາຍມື້ ຈຶ່ງຈະມີການປະກາດໃຫ້ຊາບກໍຕາມ ແຕ່ພັກຝ່າຍຄ້ານ ສັນນິບາດແຫ່ງຊາດເພື່ອປະຊາທິປະໄຕໃນມຽນມາ ກໍກ່າວວ່າ ພວກຕົນໄດ້ຮັບຢ່າງນ້ອຍ 43 ບ່ອນນັ່ງໃນຈໍານວນທັງໝົດ 44 ບ່ອນ ທີ່ພັກໄດ້ເຂົ້າແຂ່ງ ຂັນເອົາ ທີ່ຮວມທັງ 4 ບ່ອນໃນນະຄອນຫຼວງເນປີຕໍ ຊຶ່ງເປັນເຂດທີ່ພວກລັດຖະກອນແລະ
ທະຫານອາໄສຢູ່ເປັນສ່ວນໃຫຍ່ນັ້ນ.
ທ່ານນາງອອງຊານຊູຈີ ກ່າວຕໍ່ບັນດາຜູ້ທີ່ສະໜັບສະໜຸນທ່ານນາງຢູ່ ຂ້າງນອກສໍານັກງານໃຫຍ່ຂອງພັກ NLD ໃນນະຄອນຢ້າງກຸ້ງໃນວັນຈັນມື້ນີ້ວ່າ ທ່ານນາງຫວັງວ່າ ຜົນຂອງການເລືອກຕັ້ງຈະບັງຄັບໃຫ້ລັດຖະບານເອົາຫົວຊາຕໍ່ຄວາມປະສົງຂອງປະຊາຊົນພົນລະເມືອງທໍາມະດາສາມັນ.
ທ່ານນາງອອງຊານຊູຈີເວົ້າວ່າ “ພວກເຮົາຫວັງວ່າ ນີ້ຈະແມ່ນການເລີ້ມຕົ້ນຂອງຍຸກໃໝ່ ບ່ອນທີ່ຈະມີການເນ້ນໜັກຫຼາຍຂຶ້ນໃສ່ບົດບາດຂອງປະຊາຊົນໃນເລື່ອງການເມືອງປະຈໍາວັນຂອງປະເທດນັ້ນ.”
ທ່ານນາງອອງຊານໄດ້ຮຽກຮ້ອງໄປຍັງພັກການເມືອງອື່ນໆ ໃຫ້ຊ່ອຍກັນນໍາເອົາປະຊາທິ
ປະໄຕແລະສະພາບການເປັນຢູ່ທີ່ດີຂຶ້ນ ມາສູ່ປະເທດທີ່ທຸກຈົນແຫ່ງນີ້.
ພັກເພື່ອຄວາມເປັນເອກະພາບແລະການພັດທະນາຂອງສະຫະພາບ ທີ່ອໍານາດປົກຄອງ
ທະຫານໄດ້ຈັດຕັ້ງຂຶ້ນມາ ກ່ອນໂອນອໍານາດຫລັງຈາກການເລືອກຕັ້ງທົ່ວໄປໃນປີແລ້ວນີ້
ຍັງຈະສືບຕໍ່ມີສຽງຂ້າງຫຼາຍຕໍ່ໄປ ໃນສະພາແຫ່ງຊາດນັ້ນ.
ເຖິງຢ່າງໃດກໍດີ ບັນດານັກການທູດນາໆຊາດ ທີ່ຕິດຕາມສິ້ງຊອມເບິ່ງການເລືອກຕັ້ງ ໄດ້
ສະແດງຄວາມເຫັນໃນແງ່ດີ ໃນວັນຈັນມື້ນີ້.
ພວກສັງເກດການຈາກກຸ່ມອາຊ່ຽນໄດ້ອອກຖະແຫຼງການສະບັບນຶ່ງກ່າວວ່າ ການເລືອກຕັ້ງ
ໄດ້ດໍາເນີນໄປຢ່າງເສລີ ຍຸຕິທໍາແລະໂປ່ງໃສ ແລະທ່ານ David Lipman ຫົວໜ້າຄະນະສັງ
ເກດການຈາກສະຫະພາບຢູໂຣບ ກໍໄດ້ສະແດງຄວາມພໍອົກພໍໃຈນໍາການປ່ຽນແປງຕ່າງໆທີ່
ພວມດໍາເນີນໄປຢູ່ໃນພະມ້າ ຫລືມຽນມານັ້ນ.
