ເມື່ອວັນສຸກ ທີ 24 ກຸມພາຜ່ານມານີ້ ທ່ານ ສຸຣິນ ພິດສຸວັນ ເລຂາທິການໃຫຍ່ສະມາຄົມອາຊ່ຽນ ກ່າວວ່າ ທ່ານຄິດວ່າ ພວກຜູ້ນໍາມຽນມາແມ່ນມີຄວາມໝັ້ນໝາຍແທ້ ທີ່ຈະທໍາການປະຕິຮູບດ້ານເສດຖະກິດ ແລະການເມືອງຕໍ່ໄປ ຕາບໃດທີ່ພວກເຂົາເຈົ້າຍັງສາມາດຄວບຄຸມການດໍາເນີນການດັ່ງກ່າວເອັງ.
ທ່ານ ສຸຣິນ ເວົ້າວ່າ: “ເຊັ່ນດຽວກັບທຸກໆລັດຖະບານຜູກຂາດອໍານາດລວມສູນ ແລະຜະເດັດການ ທີ່ຢາກຈະເປີດກວ້າງນັ້ນ ຖ້າຫາກວ່າເຮົາບໍ່ຢາກປະເຊີນ ກັບຄວາມບໍ່ດຸ່ນດ່ຽງແລະຄວາມເຄັ່ງຕຶງ ແລະການປະເຊີນໜ້າໂດຍທັນທີແລ້ວ ເຮົາກໍຕ້ອງດໍາເນີນການແບບລະມັດລະວັງ ຄ່ອຍເຮັດ ຄ່ອຍທໍາ ແລະຂ້າພະເຈົ້າຄິດວ່າ ພວກເຂົາເຈົ້າກໍມຸ້ງໝັ້ນທີ່ຈະກະທໍາຢ່າງນັ້ນ.”
ທ່ານສຸຣິນ ໄດ້ໃຫ້ຄວາມເຫັນດັ່ງທີ່ກ່າວມານີ້ ທີ່ສະໂມສອນນັກຂ່າວຕ່າງປະເທດປະຈໍາປະເທດໄທ ໃນລະຫວ່າງການຢຸດແວ່ບາງກອກ ຫລັງຈາກການ ຢ້ຽມຢາມມຽນມາເປັນເວລາສີ່ມື້.
ໃນລະຫວ່າງການຢ້ຽມຢາມມຽນມານັ້ນ ທ່ານສຸຣິນ ໄດ້ພົບປະກັບປະທານາທິບໍດີ ທຽນ ເຊນ ແລະຜູ້ນໍາລັດຖະບານຄົນອື່ນໆອີກ ພວກທີ່ທ່ານສຸຣິນກ່າວວ່າ ຮັບຮູ້ໃນສິ່ງທ້າທາຍແລະໂອກາດຕ່າງໆຈາກການປະຕິຮູບ ປະເທດຊາດນັ້ນ.
ນອກນີ້ແລ້ວ ຜູ້ນໍາສະມາຄົນອາຊ່ຽນ ຍັງໄດ້ພົບປະເປັນຄັ້ງທໍາອິດກັບທ່ານ ນາງອອງຊານ ຊູຈີ ຜູ້ນໍາຝ່າຍຄ້ານ ແລະຜູ້ນໍາສັນນິບາດແຫ່ງຊາດເພື່ອປະ ຊາທິປະໄຕ ຫລື NLD ຂອງມຽນມາ. ທ່ານສຸຣິນກ່າວວ່າ ການເຂົ້າປະ ກອບສ່ວນຂອງພັກ NLD ໃນການເລືອກຕັ້ງທີ່ເສລີແລະຍຸຕິທໍາ ທີ່ກໍານົດ ຈະຈັດຂຶ້ນໃນເດືອນເມສາໜ້ານີ້ ແມ່ນຈະເປັນການທົດສອບທີ່ສໍາຄັນຫລາຍທີ່ສຸດ ສໍາລັບຄວາມໝັ້ນໃຈຂອງລະຫວ່າງຊາດ ກ່ຽວກັບການດໍາເນີນຂັ້ນຕອນການປະຕິຮູບໃນມຽນມານັ້ນ.
ທ່ານ ສຸຣິນ ເວົ້າວ່າ: “ແມ່ນຍ້ອນເຫດຜົນອັນນີ້ນີ່ແຫລະ ທີ່ປະຊາຄົມນານາຊາດກໍາລັງລໍຖ້າເບິ່ງ ສັນຍານທີ່ສະແດງອອກມາໃຫ້ເຫັນຈາກວົງໃນຂອງລັດຖະບານ ວ່າເລຶ່ອງນີ້ຈະເປັນໄປແບບຍືນຍົງຖາວອນແທ້ບໍ່ ຈະນໍາໄປສູ່ການເປີດກວ້າງຂຶ້ນກວ່າເກົ່າແທ້ບໍ່ ຫລືວ່າ ເປັນພຽງພາບລວງຕາຊື່ໆບໍ?”
ມຽນມາກໍາລັງພິຈາລະນາຢູ່ວ່າ ຈະອະນຸຍາດໃຫ້ນັກສັງເກດການຈາກສະມາຄົມອາຊ່ຽນ ເຂົ້າໄປສັງເກດການເບິ່ງການເລືອກຕັ້ງຫລືບໍ່.
ແຕ່ວ່າ ເຖິງແມ່ນມຽນມາຈະອະນຸຍາດໃຫ້ມີນັກສັງເກດການຈາກສະມາຄົມ ຊ່ຽນກໍຈິງ ທ່ານສຸຣິນກໍຮັບຮູ້ວ່າ ສະມາຄົມອາຊ່ຽນກໍບໍ່ແມ່ນອົງການຈັດຕັ້ງທີ່ວ່າດີທີ່ສຸດສໍາລັບການແບ່ງປັນ ຫລືວ່າ ຕິດຕາມເບິ່ງການເຄຶ່ອນໄຫວເພື່ອປະຊາທິປະໄຕ ໃນມຽນມານັ້ນ.
ທ່ານ ສຸຣິນ ເວົ້າວ່າ: “ເວົ້າຢ່າງຍຸຕິທໍາ ກົງໄປກົງມາ ແລະຢ່າງເປັນຈິງແລ້ວ ຄວາມເຊື່ອຖືໃນອາຊ່ຽນບໍ່ເຖິງຂັ້ນຢູ່ໃນລະດັບເອ ບວກ. ແຕ່ນີ້ມັນເປັນຈຸດເລີ່ມຕົ້ນ ມັນເປັນຄວາມໝັ້ນໝາຍ ມັນເປັນການຮັບຮູ້ປະການນຶ່ງວ່າ ຖ້າປາດສະຈາກສິ່ງຊີ້ບອກໃດໆຈາກພາຍນອກ ວັດແທກຈາກພາຍນອກແລ້ວ ມັນກໍຈະລໍາບາກຫລາຍທີ່ຈະຢືນຢັນໃຫ້ໂລກຮູ້ວ່າ ມຽນມາໄດ້ທໍາການປ່ຽນແປງບາງຢ່າງແລ້ວ.”
ສະມາຊິກສິບປະເທດຂອງສະມາຄົນອາຊ່ຽນ ແມ່ນມີໂຮມທັງພວກປະເທດປະຊາທິປະໄຕທີ່ກໍາລັງພັດທະນາ ແຕ່ກໍມີປະເທດນຶ່ງທີ່ມີລະບອບລາຊາທິ ປະໄຕເດັດຂາດ ຄື ບຣູໄນ ແລະສອງປະເທດຄອມມີວນີສທີ່ປົກຄອງໂດຍພັກການເມືອງດຽວ ຊຶ່ງກໍຄືລາວ ແລະຫວຽດນາມ.
ນອກຈາກສາມປະເທດທີ່ກ່າວຊື່ມາຂ້າງເທິງ ກັບມຽນມາແລ້ວ ສະມາຊິກອື່ນໆຂອງອາຊ່ຽນ ກໍມີ ກໍາປູເຈຍ ອິນໂດເນເຊຍ ມາເລເຊຍ ຟິລິບປິນ ສິງກະໂປ ແລະໄທ.
ທ່ານສຸຣີນກ່າວອີກວ່າ ການເປັນເຈົ້າພາບກອງປະຊຸມສະມາຄົມອາຊ່ຽນໃນ ປີ 2014 ຂອງມຽນມານັ້ນ ແມ່ນຈະຊ່ວຍຮັບປະກັນວ່າ ມຽນມາຈະບໍ່ຫັນຫລັງໃຫ້ຄວາມພະຍາຍາມເພື່ອການປະຕິຮູບນັ້ນ ແຕ່ທ່ານສຸຣິນກໍໄດ້ໃຫ້ຂໍ້ ສັງເກດວ່າ ມຽນມາຈະຕ້ອງມີການຈັດຕຽມຫລາຍສິ່ງຫລາຍຢ່າງ ຢ່າງເອົາຈິງເອົາຈັງ ຊຶ່ງໂຮມທັງການປັບປຸງຖະໜົນຫົນທາງ ການໂທລະຄົມມະນາ ຄົມ ແລະລະບົບອິນເທີເນັດໃຫ້ດີຂຶ້ນ ມີໂຮງແຮມຮອງຮັບແຂກໃຫ້ພຽງພໍ ແລະມີລະບົບການທະນາຄານ ແລະການເງິນທີ່ໝັ້ນຄົງ.
ທ່ານ ສຸຣິນ ເວົ້າວ່າ: “ຖ້າຫາກວ່າ ມຽນມາຈະປະຕິບັດໜ້າທີ່ການເປັນປະທານສະມາຄົມອາຊ່ຽນຂອງຕົນໃນຄັ້ງນີ້ ຢ່າງເຕັມເມັດເຕັມໜ່ວຍ ຢ່າງມີຄວາມຮັບຜິດຊອບ ມີປະສິດທິພາບ ແລະຢ່າງສໍາເລັດຜົນແລ້ວ ຫລາຍສິ່ງຫລາຍຢ່າງຈະຕ້ອງເກີດ ຂຶ້ນພາຍໃນສອງປີຕໍ່ໜ້ານີ້.”
ທ່ານສຸຣິນ ກ່າວມ້ວນທ້າຍວ່າ ສິ່ງສໍາຄັນປະການນຶ່ງນັ້ນ ກໍຄືລະບົບການ ເງິນຂອງມຽນມາ ທີ່ເປັນລະບົບໃຊ້ເງິນສົດຢ່າງດຽວເປັນສ່ວນໃຫຍ່ນັ້ນ ແມ່ນຈະຕ້ອງໄດ້ຖືກຍົກເລີກໄປ ເພາະທ່ານສຸຣີນກ່າວວ່າ ລະບົບດັ່ງກ່າວມັນບໍ່ພຽງພໍ ສໍາລັບສະໜັບສະໜຸນການເປັນເຈົ້າພາບຈັດກອງປະຊຸມເສດ ຖະກິດແລະການເມືອງ ຕະຫລອດເວລານຶ່ງປີ ອັນເປັນຄວາມຮັບຜິດຊອບຂອງປະທານສະມາຄົມອາຊ່ຽນນັ້ນ.