ທ່ານນາງອອງຊານຊູຈີ ຜູ້ນໍາຝ່າຍຄ້ານໃນມຽນມາ ໄດ້ກັບ
ຄືນໄປຍັງສໍານັກງານໃຫຍ່ຂອງພັກຂອງທ່ານນາງໃນວັນຈັນ
ມື້ນີ້ ໃນຂະນະທີ່ຄວາມກົດດັນໄດ້ເລີ່ມກໍ່ໂຕຂຶ້ນ ເພື່ອໃຫ້ມີ
ການທົບທວນຄືນເບິ່ງການລົງໂທດຂອງນາໆຊາດ ຕໍ່ປະ
ເທດຂອງທ່ານນາງນັ້ນ.
ບັນຫາດັ່ງກ່າວກໍາລັງຖືກຊຸກຍູ້ໂດຍປະທານາທິບໍດີ Jose
Ramos-Horta ແຫ່ງຕີມໍຕາເວັນອອກ ຫລືຕີມໍແລັສເຕ
ຊຶ່ງຜູ້ກ່ຽວກໍເຄີຍໄດ້ຮັບລາງວັນໂນແບລຂະແໜງສັນຕິພາບ
ຄືກັນກັບທ່ານນາງອອງຊານຊູຈີ. ທ່ານ Ramos-Horta
ກ່າວໃນວັນຈັນມື້ນີ້ວ່າ ເວລານີ້ ທ່ານນາງອອງ ຊານຊູຈີ
ກໍໄດ້ຖືກປ່ອຍໂຕເປັນອິດສະລະແລ້ວ ສະນັ້ນ ສະຫະລັດ
ແລະສະຫະພາບຢູໂຣບກໍຄວນຍົກເລີກການລົງໂທດຕ່າງໆ
ເສຍ ເພາະວ່າການລົງໂທດທີ່ວ່ານີ້ໄດ້ສ້າງຄວາມເສຍຫາຍ
ໃຫ້ແກ່ປະຊາຊົນທີ່ທຸກຍາກເປັນສ່ວນໃຫຍ່.
ສະຫະລັດກ່າວວ່າ ການລົງໂທດຂອງຕົນມີວັດຖຸປະສົງເພື່ອລົງໂທດພວກຜູ້ນໍາອໍານາດ
ປົກຄອງເທົ່ານັ້ນ ບໍ່ແມ່ນລົງໂທດປະຊາຊົນທໍາມະດາສາມັນຂອງມຽນມາ. ແຕ່ທ່ານນາງ
ອອງຊານຊູຈີເອງ ໄດ້ເວົ້າຕໍ່ກອງປະຊຸມໃຫ້ສໍາພາດຂ່າວໃນວັນອາທິດວານນີ້ວ່າ ທ່ານ
ນາງຈະຮຽກຮ້ອງໃຫ້ຍົກເລີກການລົງໂທດນັ້ນ ຖ້າປະຊາຊົນມຽນມາຫາກບອກທ່ານນາງ
ວ່າ ເຂົາເຈົ້າຕ້ອງການເຊ່ນນັ້ນ.
ນັກເຄື່ອນໄຫວເພື່ອປະຊາທິປະໄຕທີ່ໄດ້ຮັບລາງວັນໂນແບລຂະແໜງ ສັນຕິພາບທ່ານນີ້ ຍັງ
ໄດ້ກ່າວຕໍ່ວີໂອເອໃນວັນອາທິດວານນີ້ວ່າ ແນ່ນອນວ່າ ທ່ານນາງບໍ່ໄດ້ມີຄວາມມຸ່ງໝັ້ນ ທີ່
ຈະປະທະກັບພວກຜູ້ນໍາທະຫານໃນມຽນມາ ແຕ່ຢ່າງໃດເລີຍ.
ຖ້າຫາກການລົງໂທດຖືກຍົກເລີກ ພວກບໍລິສັດຈາກຝ່າຍຕາເວັນຕົກກໍຈະມີຄວາມກະຕືລືລົ້ນ
ຢາກໄປລົງທຶນຢູ່ໃນມຽນມາ ຊຶ່ງອຸດົມສົມບູນໄປດ້ວຍພະລັງງານແລະແຮ່ທາດນັ້ນ.
ສະຫະລັດໄດ້ພະຍາຍາມດໍາເນີນນະໂຍບາຍເຂົ້າໄປພົວພັນແບບລະມັດ ລະວັງມາກັບລັດຖະ
ບານມຽນມາ ເພາະເປັນຫ່ວງບໍ່ຢາກເຫັນມຽນມາກາຍເປັນປະເທດບໍລິວານຂອງຈີນ.
