ພວກຕຸລາການ 12 ຄົນ ແລະພວກສຳຮອງອີກ 6 ຄົນ ໄດ້ມານັ່ງຢູ່ໃນສານ ໃນວັນອັງຄານວານນີ້ ຫຼັງຈາກໃຊ້ເວລາ 2 ເດືອນໃນການຄັດເລືອກເອົານັ້ນ ເພື່ອການດຳເນີນຄະດີລົງໂທດປະຫານຊີວິດຂອງລັດຖະບານກາງ ຕໍ່ນາຍ Dzhokhar Tsarnaev ຜູ້ຕ້ອງສົງໄສໃນການວາງລະເບີດໃສ່ການແຂ່ງຂັນແລ່ນທົນ Marathon ທີ່ນະຄອນບອສຕັນນັ້ນ.
ຄະນະຕຸລາການດັ່ງກ່າວ ປະກອບດ້ວຍພວກຜູ້ຊາຍ 8 ຄົນ
ແລະແມ່ຍິງ 10 ຄົນ. ພວກຕຸລາການເຫຼົ່ານີ້ແມ່ນຮວມທັງ
ຊ່າງທາສີເຮືອນທຸລະກິດສ່ວນຕົວຄົນນຶ່ງ ເຈົ້າໜ້າທີ່ຄວບຄຸມການບິນຄົນນຶ່ງ ຜູ້ຊ່ອຍວຽກຫົວໜ້າບໍລິຫານບໍລິສັດທະນາຍຄວາມຄົນນຶ່ງ ແລະອະດີດນາງພະຍາບານປະຈຳຫ້ອງສຸກເສີນຄົນນຶ່ງ.
ການຖະແຫຼງຕ່າງໆເພື່ອເປີດການດຳເນີນຄະດີ ກຳນົດຈະມີຂຶ້ນໃນວັນພຸດມື້ນີ້.
ນາຍ Tsarnaev ໄວ 21 ປີ ໄດ້ໃຫ້ການວ່າຕົນບໍ່ມີຄວາມຜິດຫຍັງຕໍ່ຂໍ້ກ່າວຫາ 30 ກະທົງ ຕໍ່ຜູ້ກ່ຽວ ເກີດຈາກລະເບີດທີ່ແຕກຂຶ້ນສອງລູກທີ່ເສັ້ນໄຊຂອງການແລ່ນທົນໃນເດືອນເມສາປີ 2013 ນັ້ນ.
ລະເບີດດັ່ງກ່າວໄດ້ສັງຫານປະຊາຊົນ 3 ຄົນ ແລະເຮັດໃຫ້ມີຜູ້ໄດ້ຮັບບາດເຈັບຫຼາຍກວ່າ 260 ຄົນ. ຢ່າງໜ້ອຍປະຊາຊົນ 16 ຄົນໄດ້ເສຍເສຍແຂນຂາໄປ. ຂໍ້ຫາເຫຼົ່ານີ້ ແມ່ນຮວມ
ທັງການເສຍຊີວິດຂອງເຈົ້າໜ້າທີ່ຕຳຫຼວດຄົນນຶ່ງທີ່ມະຫາວິທະຍາໄລ MIT ໃນເວລາບໍ່ເທົ່າໃດມື້ຫຼັງຈາກການວາງລະເບີດແລ້ວ. ຂໍ້ຫາ 17 ຂໍ້ໃນຈຳນວນ 30 ກະທົງແມ່ນມີໂທດເຖິງຂັ້ນປະຫານຊີວິດ ຖ້າມີຄວາມຜິດແທ້.
ບັນດາເຈົ້າໜ້າທີ່ ກ່າວວ່າ ເວລານັ້ນນາຍ Tsarnaev ມີອາຍຸ 19 ປີ ແລະອ້າຍຂອງລາວ ນາຍ Tamerlan ມີອາຍຸ 26 ປີ ໄດ້ທຳການ
ວາງລະເບີດເພື່ອແກ້ແຄ້ນ ຕໍ່ສະຫະລັດທີ່ທຳສົງຄາມໃນອີຣັກ ແລະໃນອັຟການິສຖານນັ້ນ. ພວກສອງນ້ອງອ້າຍນີ້ ເປັນຊົນຊາວ Checnya ຊຶ່ງເປັນຊົນກຸ່ມນ້ອຍທີ່ເຄີຍອາໄສຢູ່ໃນ Kyrgyzstan ອະດີດສະຫະ ພາບໂຊຫວຽດ ແລະໃນເຂດ Dagestan ທີ່ວຸ້ນວາຍຂອງຣັດເຊຍ. ພວກເຂົາເຈົ້າໄດ້ເຂົ້າມາອາໄສຢູ່ໃນສະຫະລັດໂດຍຕິດຕາມພໍ່ແມ່ເຂົາເຈົ້າມາ ແລະພວກນ້ອງສາວອີກ 2 ຄົນ ເມື່ອປະມານນຶ່ງທົດສະວັດຜ່ານມາ ກ່ອນເຫດການວາງລະເບີດນີ້ເກີດຂຶ້ນ.
