ແຂວງບໍລິຄໍາໄຊ ຈັດສັນດິນ ເພື່ອພັດທະນາເຂດ ເສດຖະກິດສະເພາະ ແລະສ້າງຂົວຂ້າມແມ່ນໍ້າຂອງ

ທ່ານບຸນທັນ ວົງຊະນະ ຮອງຫົວໜ້າຫ້ອງການແຜນການແລະ
ການລົງທຶນ ແຂວງບໍລິຄໍາໄຊ ໄດ້ມີມະຕິຈັດສັນທີ່ດິນທີ່ມີເນື້ອ
ທີ່ລວມເຖິງ 4,500 ເຮັກຕ້າໃນເຂດເມືອງຄໍາເກີດ ເພື່ອພັດ
ທະນາເປັນເຂດເສຖະກິດສະເພາະຂອງແຂວງ ຢ່າງເປັນ
ທາງການ ເມື່ອບໍ່ດົນມານີ້ ດ້ວຍເປົ້າໝາຍທີ່ຈະດຶງດູດເອົາ
ການລົງທຶນຂອງທັງເອກກະຊົນລາວ ແລະຕ່າງຊາດໃຫ້ເຂົ້າ
ມາໃນແຂວງບໍລິຄໍາໄຊຫຼາຍຂຶ້ນ.

ທາງການແຂວງບໍລິຄໍາໄຊ ໄດ້ຕັ້ງຊື່ເຂດເສດຖະກິດສະເພາະ
ດັ່ງກ່າວນີ້ວ່າ ເຂດເສດຖະກິດສະເພາະວຽງຄໍາ-ທ່າສະອາດ ທີ່ຕັ້ງຢູ່ຫ່າງຈາກຕົວແຂວງປະມານ 90 ກິໂລແມັດ ຊຶ່ງເປັນຈຸດ ເຊື່ອມຕໍ່ລະຫວ່າງຖະໜົນເລກ 8 ກັບຖະໜົນເລກ 13 ໃຕ້ ຈຶ່ງສາມາດເຊື່ອມຕໍ່ການຄົມມະນາຄົມ-ຂົນສົ່ງກັບຫວຽດນາມ
ແລະໄທໄດ້ທັງສອງທາງ ແລະທີ່ສໍາຄັນກໍຄືທາງການແຂວງບໍລິຄໍາໄຊຍັງມີແຜນການ
ທີ່ ຈະຊຸກຍູ້ໃຫ້ດໍາເນີນການກໍ່ສ້າງຂົວຂ້າມແມ່ນໍ້າຂອງ ເພື່ອເຮັດໃຫ້ການຄົມມະນາຄົມ- ຂົນສົ່ງ ຈາກໄທໄປຫວຽດນາມໂດຍມີແຂວງບໍລິຄໍາໄຊເປັນສູນກາງການເຊື່ອມຕໍ່ນັ້ນ
ສາມາດປະຕິບັດໄດ້ຢ່າງສະດວກວ່ອງໄວອີກດ້ວຍ.


ແຕ່ຢ່າງໃດກໍຕາມ ທາງການແຂວງບໍລິຄໍາໄຊ ກໍຍັງຄົງ ບໍ່ສາມາດອະນຸຍາດໃຫ້ເອກກະຊົນລາວແລະຕ່າງຊາດ
ເຂົ້າໄປລົງທຶນໃນເຂດເສດຖະກິດສະເພາະດັ່ງກ່າວນີ້ໄດ້ ເພາະຕ້ອງລໍຖ້າການອະນຸມັດແຜນການຈາກຄະນະກໍາ
ມະການເພື່ອຄຸ້ມຄອງເຂດເສດຖະກິດພິເສດ ແລະເຂດ ເສດຖະກິດ ສະເພາະແຫ່ງຊາດລາວຢ່າງເປັນທາງການ ເສຍກ່ອນ ຫາກແຕ່ກໍເຊື່ອວ່າການອະນຸມັດຈະມີຂຶ້ນໃນໝໍ່ໆນີ້.

ທັງນີ້ກໍເພາະວ່າຄະນະກໍາມະການເພື່ອຄຸ້ມຄອງເຂດເສດຖະກິດພິເສດແລະເຂດເສດຖະກິດ
ສະເພາະແຫ່ງຊາດ ພາຍໃຕ້ການເປັນປະທານຂອງທ່ານສົມສະຫວາດ ເລ່ງສະຫວັດ ຮອງ
ນາຍົກລັດຖະມົນຕີຜູ້ຊີ້ນໍາວຽກງານດ້ານເສດຖະກິດຂອງລັດຖະ ບານລາວນັ້ນ ໄດ້ປະ​ກາດ ເປົ້າໝາຍຢ່າງເປັນທາງການເມື່ອບໍ່ດົນມານີ້ວ່າສ້າງຕັ້ງ ເຂດເສດຖະກິດພິເສດ ແລະເຂດ ເສດຖະກິດສະເພາະໃຫ້ໄດ້ເຖິງ 41 ແຫ່ງໃນທົ່ວ ປະເທດນັ້ນເອງ.

ສໍາລັບໃນໄລຍະ 10 ປີຕໍ່ໜ້ານີ້ ທາງການລາວກໍໄດ້ວາງເປົ້າໝາຍທີ່ຈະສ້າງຕັ້ງເຂດເສດ ຖະກິດພິເສດ ແລະເຂດເສດຖະກິດສະເພາະໃຫ້ໄດ້ບໍ່ໜ້ອຍກວ່າ 10 ແຫ່ງ ຊຶ່ງກໍເຮັດໃຫ້ ຈໍາເປັນຕ້ອງດຶງເອົາເງິນລົງທຶນຈາກຕ່າງປະເທດເຂົ້າມາພັດທະ ນາພື້ນຖານໂຄງລ່າງ ໃນ
ທັງ 10 ເຂດດັ່ງກ່າວ ໃຫ້ໄດ້ໃນມູນຄ່າລວມບໍ່ໜ້ອຍກວ່າ 3 ພັນລ້ານໂດລາ ໂດຍຍັງບໍ່ ລວມເຖິງເງິນລົງທຶນ ສໍາລັບອຸດສາຫະກໍາການຜະລິດຕ່າງໆແຕ່ຢ່າງໃດ. ແລະຖ້າຫາກ ການດໍາເນີນງານເປັນໄປຕາມແຜນການທີ່ວາງໄວ້ ກໍຈະສ້າງວຽກເຮັດງານທໍາໃຫ້ແກ່ປະ
ຊາຊົນລາວໄດ້ຫຼາຍກວ່າ 5 ໝື່ນຄົນ ກັບທັງຍັງຈະເຮັດໃຫ້ລາຍໄດ້ສະເລ່ຍຂອງປະຊາຊົນ
ລາວ ຢູ່ໃນ ເຂດດັ່ງກ່າວບໍ່ຕໍ່າກວ່າ 2,400 ໂດລາຕໍ່ຄົນຕໍ່ປີອີກດ້ວຍ.


ແຕ່ຢ່າງໃດກໍຕາມ, ທ່ານສົມສະຫວາດ ກໍຍອມຮັບວ່າ
ການພັດທະນາເສດຖະກິດ ພິເສດ ແລະເສດຖະກິດ
ສະເພາະໃນລາວນັ້ນ ໄດ້ຄືບໜ້າໄປຢ່າງຊັກຊ້າຫຼາຍ
ຍົກ ເວັ້ນເຂດເສດຖະກິດພິເສດສາມຫຼ່ຽມຄໍາຢູ່ທີ່
ແຂວງບໍ່ແກ້ວເທົ່ານັ້ນ ທີ່ຖືວ່າມີການ ພັດທະນາຢ່າງ
ວ່ອງໄວ ດັ່ງທີ່ທ່ານສົມສະຫວາດ ໄດ້ຢືນຢັນວ່າ:

“ເຂດເສດຖະກິດພິເສດສາມຫຼ່ຽມຄໍາໄດ້ມີຄວາມ
ພັດທະນາຢ່າງເດັ່ນຊັດ ອັນໄດ້ປະກອບສ່ວນ ເຂົ້າໃນການພັດທະນາພື້ນຖານໂຄງຫລ່າງ ແລະການສ້າງວຽກເຮັດງານທໍາໃຫ້ ປະຊາຊົນທ້ອງຖິ່ນ ເຖິງຢ່າງນັ້ນກໍຕາມ ຄວາມຄືບໜ້າຂອງວຽກງານດັ່ງກ່າວ ເວົ້າລວມຍັງຊັກຊ້າ ຍັງບໍ່ທັນສາມາດເສີມຂະຫຍາຍກໍາລັງແຮງຈາກບັນດາ ພາກ ສ່ວນເສດຖະກິດຕ່າງປະເທດໄດ້ເທົ່າທີ່ຄວນ.”

ໃນປັດຈຸບັນນີ້ ໃນລາວມີເຂດເສດຖະກິດພິເສດທີ່ໄດ້ຮັບການພັດທະນາແລະ ສາມາດ ຮອງ
ຮັບການລົງທຶນຂອງເອກກະຊົນລາວແລະຕ່າງຊາດໄດ້ແລ້ວ 3 ແຫ່ງ ກໍຄືເຂດເສດຖະກິດ ພິເສດສະຫວັນ-ເຊໂນ ໃນແຂວງສະຫວັນນະເຂດ ເຂດເສດຖະກິດພິເສດບໍ່ເຕັນແດນຄໍາ ທີ່ແຂວງຫຼວງນໍ້າທາ ແລະເຂດເສດຖະກິດພິເສດສາມຫຼ່ຽມຄໍາຢູ່ແຂວງບໍ່ແກ້ວ ຕາມລໍາດັບ.