ທາງການ ລາວ ຄາດຫວັງວ່າປະຊາຊົນ ລາວ ຈະສາມາດເຂົ້າເຖິງ ແລະ ໄດ້ຮັບຂໍ້ມູນ
ຂ່າວສານ ກ່ຽວກັບ ກົດໝາຍໄດ້ຫຼາຍຂຶ້ນ ໂດຍການເຊື່ອມຕໍ່ Application Version
3 ດ້ວຍລະບົບໂທລະສັບມືຖື.
ທ່ານ ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ຢືນຢັນວ່າ ການພັດທະນາ
ໂຄງຂ່າຍການເຜີຍແຜ່ຂໍ້ມູນຂ່າວສານ ກ່ຽວກັບ ກົດໝາຍ ແລະ ລະບຽບການຕ່າງໆ
ຂອງລັດຖະບານ ລາວ ດ້ວຍການນຳໃຊ້ ແອັບພລີເຄຊັນ ໃນລະບົບໂທລະສັບມືຖືທີ່ທັນ
ສະໄໝນັ້ນ ຈະເຮັດໃຫ້ປະຊາຊົນ ລາວ ສາມາດເຂົ້າເຖິງ ແລະ ໄດ້ຮັບຂໍ້ມູນຂ່າວສານ
ດ້ານກົດໝາຍ ແລະ ລະບຽບການຕ່າງໆຂອງລັດຖະບານໄດ້ຢ່າງກວ້າງຂວາງ ແລະ
ເທົ່າທັນກັບສະພາບການຕ່າງໆທີ່ປ່ຽນແປງຢ່າງໄວວາອີກດ້ວຍ.
ການພັດທະນາ ແອັບພລີເຄຊັນ ດັ່ງກ່າວນີ້ ລັດຖະບານ ສະຫະລັດ ອາເມຣິກາ ໄດ້ໃຫ້
ການຊ່ວຍເຫຼືອລັດຖະບານ ລາວ ຜ່ານອົງການ USAID ເປັນເວລາ 5 ປີພາຍໃຕ້ເປົ້າ
ໝາຍເພື່ອຊ່ວຍໃຫ້ ສປປ ລາວ ສາມາດເຊື່ອມໂຍງເຂົ້າກັບຕະຫຼາດໂລກໃຫ້ໄດ້ຢ່າງມີ
ປະສິດທິພາບ ກໍຄືການເຮັດໃຫ້ບັນດານັກທຸລະກິດ ນັກລົງທຶນປະຊາຊົນ ລາວ ແລະ
ຊາວຕ່າງຊາດສາມາດເຂົ້າເຖິງບັນດານິຕິກຳຕ່າງໆໃນ ລາວ ໄດ້ຢາງສະດວກວ່ອງໄວ
ທັງຍັງສາມາດປະກອບຄວາມເຫັນທີ່ມີຕໍ່ນິຕິກຳຕ່າງໆໄດ້ອີກດ້ວຍ ດັ່ງທີ່ທ່ານ ເສີມສຸກ
ໃຫ້ການຢືນຢັນວ່າ
"ເພື່ອອຳນວຍຄວາມສະດວກໃຫ້ແກ່ປະຊາຊົນບັນດາເຜົ່າ ສະນັ້ນກະຊວງຍຸຕິທຳ ຈຶ່ງ
ໄດ້ສືບຕໍ່ຄົ້ນຄວ້າ, ສ້າງ ແລະ ພັດທະນາ ແອັບພລີເຄຊັນ ກົດໝາຍຈາກ Version 1,
Version 2 ມາເປັນ Version 3 ໃຫ້ເປັນອີກຊ່ອງທາງນຶ່ງຂອງການໂຄສະນາເຜີຍແຜ່
ກົດໝາຍ ໃຫ້ມີຄວາມທັນສະໄໝໃນການຄົ້ນຫາທາງໂທລະສັບມືຖື ເຮັດໃຫ້ປະຊາຊົນ
ໄດ້ເຂົ້າເຖິງຂໍ້ມູນຂ່າວສານທາງດ້ານກົດໝາຍ, ການແຈ້ງເຕືອນ ເມື່ອມີກົດໝາຍໃໝ່
ຫຼື ກົດໝາຍປັບປຸງ ບໍ່ວ່າຈະເປັນນິຕິກຳກຸ່ມກົດໝາຍ ແລະ ນິຕິກຳທີ່ສາມາດປະກອບ
ຄວາມເຫັນໂດຍຜ່ານ ແອັບພລີເຄຊັນ ກົດໝາຍໄດ້ຢ່າງວ່ອງໄວ ແລະ ງ່າຍດາຍຂຶ້ນ
ກວ່າເກົ່າ."
ແຕ່ຢ່າງໃດກໍຕາມ ບັນຫາສຳຄັນປະການນຶ່ງທີ່ເຮັດໃຫ້ການຮັບຮູ້ ກ່ຽວກັບ ກົດໝາຍ
ຂອງ ລາວ ມີການສັບສົນ ແລະ ບໍ່ມີຄວາມຕໍ່ເນື່ອງນັ້ນ ກໍຄືການປັບປຸງບັນດາກົດໝາຍ
ແລະ ນິຕິກຳຕ່າງໆທີ່ເກີດຂຶ້ນທຸກຄັ້ງໃນກອງປະຊຸມສະພາແຫ່ງຊາດ ລາວ ນັບຈາກທີ່
ໄດ້ມີການປະກາດໃຊ້ລັດຖະທຳມະນູນໃນປີ 1991 ເປັນຕົ້ນມານັ້ນກໍປາກົດວ່າ ໄດ້ມີ
ການປັບປຸງລັດຖະທຳມະນູນໃນປີ 2003 ແລະ ປີ 2015 ສ່ວນກົດໝາຍທີ່ປະກາດບັງ
ຄັບໃຊ້ທັງໝົດ 138 ສະບັບກໍໄດ້ມີການປັບປຸງເຖິງ 69 ສະບັບ ຊຶ່ງລວມເຖິງກົດໝາຍ
8 ສະບັບທີ່ໄດ້ປັບປຸງໃນກອງປະຊຸມສະໄໝສາມັນຄັ້ງທີ 5 ຂອງສະພາແຫ່ງຊາດລາວ
ຊຸດທີ 8 ເມື່ອເດືອນມິຖຸນາ 2018 ທີ່ຜ່ານມາ.
ນອກຈາກນັ້ນ ການບັງຄັບໃຊ້ກົດໝາຍທີ່ດ້ອຍປະສິດທິພາບ ກໍນັບເປັນອີກບັນຫານຶ່ງ
ທີ່ສຳຄັນເຊັ່ນດຽວກັນ ທັງນີ້ໂດຍທ່ານ ຄຳສານ ສຸວົງ ປະທານອົງການໄອຍະການປະ
ຊາຊົນສູງສຸດ ຍອມຮັບວ່າປະຊາຊົນ ລາວ ໄດ້ສະແດງຄວາມບໍ່ພໍໃຈ ແລະ ບໍ່ເຊື່ອໝັ້ນ
ຕໍ່ການປະຕິບັດໜ້າທີ່ຂອງບັນດາພະນັກງານໄອຍະການເພີ່ມຂຶ້ນນັບມື້ ໂດຍມີສາເຫດ
ມາຈາກການປະຕິບັດໜ້າທີ່ໂດຍບໍ່ສຸດຈະລິດ ໂດຍສະເພາະແມ່ນການຮັບເອົາສິນບົນ
ຈາກຜູ້ຕ້ອງຫາ ເພື່ອຊ່ວຍໃຫ້ພົ້ນຜິດທັງໃນຄະດີແຜ່ງ ແລະ ຄະດີອາຍານັ້ນ ຖືເປັນບັນ
ຫາທີ່ເກີດຂຶ້ນຫຼາຍທີ່ສຸດໃນປັດຈຸບັນ.
ທັງນີ້ ອົງການໄອຍະການປະຊາຊົນ ລາວ ໄດ້ແກ້ໄຂບັນຫາດັ່ງກ່າວ ດ້ວຍການເປີດ
ຮັບຈົດໝາຍຮ້ອງຮຽນໂດຍກົງຈາກປະຊາຊົນ ໂດຍມີເງື່ອນໄຂວ່າປະຊາຊົນຜູ້ທີ່ສົ່ງຈົດ
ໝາຍຮ້ອງຮຽນນັ້ນ ຈະຕ້ອງເປີດເຜີຍຊື່ ແລະ ລົງລາຍເຊັນຂອງຕົນດ້ວຍ ຊຶ່ງກໍປະກົດ
ວ່າໃນຮອບປີທີ່ຜ່ານມາ ມີປະຊາຊົນ ລາວ ສົ່ງຈົດໝາຍຮ້ອງຮຽນເຖິງອົງການໄອຍະ
ການປະຊາຊົນ ລາວ ພຽງ 3 ສະບັບເທົ່ານັ້ນ ສ່ວນອົງການໄອຍະການປະຊາຊົນ ກໍໄດ້
ດຳເນີນການສອບສວນໄປແລ້ວ 1 ສະບັບ ຊຶ່ງພົບວ່າເປັນຈິງຕາມການຮ້ອງຮຽນຂອງ
ປະຊາຊົນດັ່ງກ່າວ ຈຶ່ງໄດ້ດຳເນີນຄະດີອາຍາກັບພະນັກງານໄອຍະການ 2 ຄົນ ແລະ
ປົດອອກຈາກໜ້າທີ່ໄປແລ້ວ 3 ຄົນ ສ່ວນອີກ 2 ສະບັບທີ່ເຫຼືອນັ້ນຍັງຄົງດຳເນີນການ
ສອບສວນເລື້ອຍມາຈົນເຖິງປັດຈຸບັນນີ້.
