ໃນຂະນະທີ່ພວກນັກວິສະວະກອນ ຂອງອົງການ NASA ພວມຈະເສັດ ສິ້ນວາລະສຸດ ທ້າຍ ຂອງການປະກອບກ້ອງໂທຣະທັດອະວະກາດໃໝ່ James Webb ທີ່ມີກຳນົດວ່າ ຈະນຳ ອອກຕິດຕັ້ງໃນປີ 2018 ນີ້ ສະມາຄົມນາໆຊາດທີ່ນຳພາໂດຍສະຫະລັດ ກໍແມ່ນໄດ້ວາງພື້ນຖານແລະກໍ່ສ້າງພາກສ່ວນຕ່າງໆ ຂອງກ້ອງໂທຣະທັດດັ່ງກ່າວໃສ່ເທິງໜ້າດິນ ແລ້ວ ຊຶ່ງເປັນອັນທີ່ໃຫຍ່ກວ່າອັນອື່ນໃດ ນັກຂ່າວ VOA George Putic ມີລາຍງານ ຊຶ່ງວັນນະສອນ ສະເໜີລາຍລະອຽດເລື້ອງນີ້ໃນອັນດັບຕໍ່ໄປ.
ກະຈົກຂອງກ້ອງໂທລະທັດອະວະກາດ Hubble Space ທີ່ໄດ້ເຮັດໃຫ້ເຮົາມອງເຂົ້າໄປ ເຫັນສ່ວນເລິກຂອງອະວະກາດມີຂະໜາດແຕ່ພຽງ 4.5 ແມັດ ມົນທົນ ເທົ່ານັ້ນ.
ສ່ວນກະຈົກຕົ້ນຕໍຂອງກ້ອງໂທລະທັດອາວະກາດ James Webb ຈະມີ ຄວາມກວ້າງ 25 ແມັດ ມົນທົນ ເພາະສະນັ້ນ ພວກນັກດາຣາສາດ ຈຶ່ງຄາດຫວັງວ່າ ຈະໄດ້ເຫັນຜົນຂອງຮູບພາບທີ່ຊັດເຈນ ແຈ່ມແຈ້ງຂຶ້ນເປັນຫຼາຍເທົ່າ.
ແຕ່ວ່າ ກະຈົກທັງສອງແຜ່ນນັ້ນແມ່ນຈະກາຍເປັນສິ່ງທີ່ນ້ອຍໄປ ເມື່ອສົມທຽບ ໃສ່ກັບກ້ອງ ໂທລະທັດຂະໜາດຍັກ Giant Magellan Telescope ທີ່ກຳລັງ ສ້າງຂຶ້ນ ໃນທະເລ ຊາຍ Atacama ໃນປະເທດ Chile ຊຶ່ງຈະມີລັດສະໝີ ກວ້າງກວມເອົາເຖິງປະມານ 368 ແມັດ ມົນທົນນັ້ນ.
ທ່ານ Patrick McCarthy ຜູ້ອຳນວຍການຂອງ ບໍລິສັດ ກ້ອງໂທລະທັດ Magellan ກ່າວວ່າ ໃນການສັງເກດເບິ່ງຫຼາຍໆພາກສ່ວນທີ່ມອງເຫັນໄດ້ນັ້ນເຮົາຈະເຫັນວ່າ ກ້ອງ ໂທລະທັດ ໃໝ່ສອງຢ່າງນີ້ຈະເປັນປະກອບຂອງກັນ.
ທ່ານ McCarthy ກ່າວວ່າ “ຂ້າພະເຈົ້າ ຄິດວ່າ ເວລາກ້ອງທັງສອງໜ່ວຍນີ້ ເຮັດວຽກຮ່ວມກັນ ມັນຈະໃຫ້ຮູບພາບທີ່ສົມບູນແບບທີ່ສຸດ ບ່ໍວ່າພວກເຮົາຈະເບິ່ງດາວນົບພະ ເຄາະ ຫຼື ດາວໜ່ວຍຢູ່ໃກ້ອ້ອມຮອບໂຕເຮົາກໍຕາມ ເບິ່ງເຂົ້າໄປ ໃນໃຈ ກາງຂອງຈັກ ກະວານທີ່ເອີ້ນ ວ່າ black holes ຫຼື ເບິ່ງຍ້ອນກັບຄືນໄປຫາຈັກກະວານ ກ່ອນໜ້ານີ້ ທີ່ເອີ້ນວ່າ First Light ໃນຕອນທີ່ພວກເຮົາເຫັນໝູ່ດວງດາວ ຈຸທຳອິດໃນຈັກກະວານ.”
ເພື່ອເອົາມັນແຍກອອກຈາກການສັ່ນສະເທືອນ ກ້ອງໂທລະທັດທີ່ໜັກ 1 ພັນ 200 ໂຕນນີ້ ທີ່ຈະຕັ້ງຢູ່ຖານທີ່ມີນ້ຳມັນໃນລະບົບທີ່ລອຍໄດ້ຕາມລຳພັງ ປາດສະຈາກການກະທົບໃດໆ. ກ້ອງຖ່າຍຈຳນວນນັບບໍ່ຖ້ວນແບບຕ່າງໆກັນ ຈະບັນທຶກຮູບພາບແລະຈຳແນກແສງສີ ຊອກຫາວັດຖຸທີ່ເລິກແລບນ້ອຍທີ່ສຸດເປັນອະນຸພາບ ຊຶ່ງແສງສີດັ່ງກ່າວແມ່ນ ຈະມາຈາກ ທີ່ຫ່າງ ໄກນັບເປັນພັນໆລ້ານກິໂລແມັດ.
ທ່ານ McCarthy ກ່າວວ່າ “ໜ່ວຍວັດແທກຄວາມເຂັ້ມຂອງແສງ ຫຼື Photons ຈະເກັບກຳເຂົ້າມາໃນທຸກໆ 15-20 ນາທີ ຊຶ່ງມັນຈະໃຊ້ເວລາໃນການຖ່າຍພາບແສງສີທີ່ວ່ານັ້ນ. ໃນກໍລະນີຂອງພວກເຮົານີ້ ພວກເຮົາຄິດວ່າ ຈະສາມາດເກັບໄດ້ ນາທີນຶ່ງ 2-3 Photons ແຕ່ວ່າເຈົ້າຕ້ອງການຫຼາຍໆຮ້ອຍ Photons ເພື່ອຈະໃຫ້ໄດ້ຮັບສັນ ຍານທີ່ດີ ເພາະສະນັ້ນ ເຮົາຈຶ່ງຈຳເປັນຕ້ອງມີຄວາມອົດທົນ ໃຈເຢັນໆ.”
ທ່ານ McCarthy ກ່າວວ່າ ຍ້ອນຄວາມອ່ອນໄຫວຂອງກ້ອງໂທລະທັດ ເຮົາຈຶ່ງສາມາດເກັບກຳເອົາແສງທຽນເຄັກວັນເກີດທີ່ຢູ່ເທິງດວງເດືອນໄດ້ ບໍ່ມີຜູ້ໃດຄາດຝັນໄດ້.
ທ່ານ McCarthy ກ່າວວ່າ “ສິ່ງທີ່ສຳຄັນທີ່ສຸດກໍຄື ການຄົ້ນພົບທີ່ບໍ່ຄາດຄິດ. ສິ່ງຊຶ່ງນັ້ນ ແມ່ນເລື້ອງລາວຕ່າງໆເລື້ອຍໆຂອງດາຣາສາດ. ໃນການສ້າງຄວາມສາມາດແນວໃໝ່ ຂຶ້ນມາ ພວກໜຸ່ມນ້ອຍແມ່ນຈະພາກັນຄົ້ນພົບສິ່ງໃໝ່ໆ ທີ່ບໍ່ມີຜູ້ໃດຄາດຝັນມາກ່ອນ ຫຼືບໍ່
ກໍແມ່ນວ່າພວກເຂົານັ້ນຈະພິສູດໃຫ້ເຫັນວ່າພວກຜູ້ໃຫຍ່ໄດ້ພາດພັ້ງໄປ.”
ໂຄງການຮ່ວມ ທີ່ເປັນເງິນມະຫາສານ 1 ພັນລ້ານໂດລ່າລະຫວ່າງສະຫະລັດ ອອສເຕຣເລຍ ບຣາຊີລ ເກົາຫຼີໃຕ້ ແລະ Chile ນີ້ ຈະເປີດໃຫ້ຊົມກັນໄດ້ໃນຮອບປະຖົມມະເລີກໃນປີ 2022 ແລະຈະປະກອບກິດຈະການຢ່າງຄົບຖ້ວນໃນປີ 2026.
