ລົມພາຍຸ Megi ທີ່ກໍາລັງພັດເຂົ້າໄປໃກ້ຟີລິບປິນ ໄດ້ເພີ່ມຄວາມແຮງຂຶ້ນເປັນລົມໄຕ້ຝຸ່ນໃຫຍ່ ຫລື super-typhoon ຊຶ່ງມີລົມພັດແຮງ 195 ຫລັກກິໂລແມັດຕໍ່ຊົ່ວໂມງ ຊຶ່ງບາງຄັ້ງພັດແຮງເຖິງ 230 ຫລັກ ຕໍ່ຊົ່ວໂມງ.
ບັນດານັກພະຍາກອນອາກາດກ່າວວ່າ ພາຍຸໄຕ້ຝຸ່ນ Megi ກໍາລັງມຸ້ງໜ້າໄປສູ່ພາກເໜືອສຸດຂອງເກາະ Luzon ເກາະໃຫຍ່ສຸດຂອງຟີລິບປິນ ແລະຄາດວ່າຈະພັດໄປຂຶ້ນຝັ່ງໃນຕອນເຊົ້າວັນຈັນມື້ອື່ນ ໂດຍຈະມີລົມແຮງສູງໃນຕອນແລງວັນອາທິດມື້ນີ້.
ກົມພະຍາກອນອາກາດຂອງຟີລິບປິນກ່າວວ່າ ພາຍຸ Megi ສາມາດໂຄ່ນພວກຕົ້ນໄມ້ໃຫ້ລົ້ມລົງ ທໍາລາຍບ້ານເຮືອນທີ່ກໍ່ສ້າງດ້ວຍວັດຖຸກໍ່ສ້າງທີ່ບໍ່ແໜ້ນໜາ ເຮັດໃຫ້ດິນເຈື່ອນແລະນໍ້າຖ້ວມ ແລະພາໃຫ້ລົມແຮງຂຶ້ນໄດ້ໃນຂົງເຂດແຄມຝັ່ງທະເລ.
ບັນດາເຈົ້າໜ້າທີ່ກ່າວວ່າ ພວກຜູ້ຄົນທີ່ອາໄສຢູ່ໃນເຂດດິນຕໍ່າແລະປະ ຊາຄົມໃນແຄມທະເລ ກໍາລັງໄດ້ຮັບຄໍາເຕືອນໃຫ້ພາກັນຍົກຍ້າຍໄປຍັງຂົງເຂດທີ່ປອດໄພກວ່າ ແລະຖ້າຫາກວ່າພວກເຂົາເຈົ້າບໍ່ຍອມຍົກຍ້າຍໜີ ທາງການກໍຈະໃຊ້ກໍາລັງບັງຄັບ.
ຈີນກໍກໍາລັງກຽມຮັບມືກັບລົມພາຍຸລູກນີ້ເຊ່ນກັນ ຊຶ່ງອົງການຂ່າວຊິນຫົວຂອງທາງການຈີນກ່າວວ່າ ພາຍຸລູກນີ້ສາມາດເປັນພາຍຸໄຕ້ຝຸ່ນທີ່ຮ້າຍແຮງທີ່ສຸດຂອງປີນີ້ ກໍໄດ້.
ປະທານາທິບໍດີ Benigno Aquino ແຫ່ງຟີລິບປິນໄດ້ສັ່ງໃຫ້ລາຍງານຄວາມຄືບໜ້າຂອງພາຍຸລູກນີ້ ໃຫ້ປະຊາຊົນຊາບໃນທຸກໆຊົ່ວໂມງ ແລະໃນວັນເສົາວານນີ້ ທ່ານກໍໄດ້ສັ່ງໃຫ້ທໍາການກະກຽມເຄື່ອງຊ່ອຍເຫລືອບັນເທົາທຸກ ແລະອຸບປະກອນຊ່ອຍກູ້ໄພໄວ້ ແລະວ່າພວກປ້າຍໂຄສະນາຕ່າງໆ ກໍຄວນຖືກປົດລົງໄວ້.
ທ່ານ Aquino ໄດ້ສັ່ງປົດຫົວໜ້າກົມພະຍາກອນອາກາດແຫ່ງລັດໃນເດືອນກໍລະກົດຜ່ານມາ ໂດຍກ່າວຫາຜູ້ກ່ຽວວ່າ ພະຍາກອນອາກາດຜິດພາດ ຫລັງຈາກລົມໄຕ້ຝຸ່ນລູກນຶ່ງປະທະນະຄອນຫລວງມານີລາ ເຮັດໃຫ້ປະຊາຊົນເສຍຊີວິດໄປຫລາຍກວ່າ 100 ຄົນ.
