ເງິນຕາຂອງຫລາຍປະເທດເອເຊຍໄດ້ແຂງຄ່າຂຶ້ນໃນການ ແລກປ່ຽນກັບເງິນດອນລາສະຫະລັດນັບແຕ່ຕົ້ນປີນີ້ມາ. ເງິນເຢັນຂອງຍີ່ປຸ່ນ ເງິນ ringgit ຂອງມາເລເຊຍ ເງິນບາດຂອງໄທ ເງິນຣູເປຍຂອງອິນໂດເນເຊຍ ເງິນດອນລາສິງກະໂປ ແລະເງິນສະກຸນອື່ນໆໄດ້ແຂງຄ່າຂຶ້ນໃນລະຫວ່າງ 3 ຫາ 8 ເປີເຊັນ ໃນການແລກປ່ຽນກັບເງິນດອນລາຂອງ ສະຫະລັດ.
ການເສດຖະກິດຂອງພວກປະເທດໃນເອເຊຍສ່ວນຫລາຍໄດ້ຟື້ນໂຕຄືນຢ່າງແຂງແຮງ ຈາກວິກິດການການເງິນໂລກ ທີ່ເລີ່ມຂຶ້ນໃນປີ 2008 ນັ້ນ. ແຕ່ພວກປະເທດທີ່ພັດທະນາແລ້ວ ຫລືພວກເສດຖະກິດລາຍໃຫຍ່ໆຂອງໂລກ ຮວມທັງສະຫະລັດນໍາ ແມ່ນກໍາລັງຍັງບຶກບືນຕໍ່ສູ້ເພື່ອຟື້ນໂຕຄືນ. ໃນຂົງ ເຂດເອເຊຍຕາເວັນອອກສຽງໃຕ້ໂດຍສະເພາະ ເງິນລົງທຶນກໍາລັງລັ່ງໄຫລເຂົ້າໄປ ແລະການສົ່ງອອກສິນຄ້າກໍກໍາລັງເພີ່ມທະວີຂຶ້ນ. ແຕ່ພວກນັກເສດຖະສາດແລະວົງການອຸດສາຫະກໍາ ເຕືອນວ່າ ການແຂງຄ່າຂອງເງິນຕາກໍາລັງເລີ້ມສ້າງຄວາມເສຍຫາຍໃຫ້ແກ່ພວກສິນຄ້າສົ່ງອອກ.
ການເສດຖະກິດທີ່ອາໄສສິນຄ້າສົ່ງອອກຂອງພວກປະເທດໃນເອເຊຍ ແມ່ນອາໄສກາງຕໍ່ນໍາການອ່ອນຄ່າຂອງເງິນຕາຂອງຕົນ ມາເປັນເວລາດົນນານ ເພື່ອສົ່ງເສີມການເຕີບໂຕຂອງເສດຖະກິດຂອງຕົນ. ມາບັດນີ້ພວກຜະລິດສິນຄ້າດ້ານການກະເສດແລະອຸດສາຫະກໍາ ກໍາລັງພົບວ່າຄວາມໄດ້ປຽບດັ່ງກ່າວພວມສູນຫາຍໄປ ແລະການທີ່ເງິນຕາຂອງປະເທດຂອງເຂົາເຈົ້າແຂງຄ່າຂຶ້ນນັ້ນ ໄດ້ສົ່ງຜົນໃຫ້ສິນຄ້າຂອງເຂົາເຈົ້າໃນຕ່າງປະເທດມີລາຄາແພງຂຶ້ນ ຊຶ່ງ ເຮັດໃຫ້ການດໍາເນີນທຸລະກິດຍາກຂຶ້ນ ເນື່ອງຈາກວ່າພວກຕະຫລາດໃຫຍ່ໆຂອງເຂົາເຈົ້າ ຄືພວກປະເທດທີ່ພັດທະນາແລ້ວນັ້ນ ຍັງມີເສດຖະກິດທີ່ອ່ອນແອຢູ່.
ທ່ານນາງ Shamika Sirimanne ນັກເສດຖະສາດດ້ານການຄ້າປະຈຳອົງການສະຫະປະ ຊາຊາດ ທີ່ບາງກອກ ກ່າວຊີ້ແຈງດັ່ງນີ້:
"ການຟື້ນຕົວຄືນຂອງເສດຖະກິດໂລກແມ່ນຍັງບໍ່ແນ່ນອນຫລາຍ ໃນຂະນະນີ້ ແລະແມ່ນແທ້ ພວກຕະຫລາດຕາເວັນຕົກກຳລັງເປີດຂຶ້ນ ແຕ່ມັນກໍບໍ່ໄວເທົ່າທີ່ພວກເຮົາຢາກໃຫ້ມັນເປັນ. ດັ່ງນັ້ນ ສຳລັບພວກປະເທດໃນຂົງເຂດນີ້ ການ ແຂ່ງຂັນແມ່ນດຸເດືອດຫລາຍ. ແລະຖ້າວ່າອັດຕາແລກປ່ຽນເງິນຕາ ຫາກຖ່ວງດຶງ ສິນຄ້າຂອງເຂົາເຈົ້າໄວ້ ມັນກໍຈະສ້າງບັນຫາໃຫຍ່ໃຫ້ບັນດາຜູ້ສົ່ງອອກທັງຫລາຍ."
ທີ່ປະເທດໄທ ທະນາຄານກາງກ່າວວ່າ ການຫລັ່ງໄຫລຂອງເງິນທຶນເຂົ້າປະເທດແລະການລົງທຶນໄດ້ເຮັດໃຫ້ເງິນບາດແຂງຄ່າຂຶ້ນຫລາຍກວ່າ 6 ເປີເຊັນ ເມື່ອແລກປ່ຽນກັບເງິນດອນລາສະຫະລັດ. ການສົ່ງອອກຊຶ່ງແຂງແຮງຂຶ້ນໃນຕົ້ນປີນີ້ ກໍາລັງເລີ້ມຊັກຊ້າລົງ ຍ້ອນມີການແຂ່ງຂັນຫລາຍຂຶ້ນນັບມື້ ຈາກຄູ່ແຂ່ງທີ່ສໍາຄັນໆ ເຊ່ນຫວຽດນາມເປັນຕົ້ນ.
ທ່ານ ວິໄຊ ສິຣິປະເສີດ ປະທານກິຕິມະສັກຂອງສະມາຄົມພໍ່ຄ້າເຂົ້າຂອງໄທ ກ່າວວ່າ :
"ໂດຍສ່ວນລວມແລ້ວ ເນຶ່ອງຈາກວ່າໄທເປັນປະເທດທີ່ສົ່ງອອກຢ່າງຫລວງຫລາຍ ນັ້ນ ເມື່ອໃດອັດຕາເງິນແຂງຄ່າຂຶ້ນ ມັນກໍຈະສ້າງຄວາມ ເດືອດຮ້ອນໃຫ້ແກ່ໝົດ ທຸກພາກສ່ວນ ຄືພາກສ່ວນສົ່ງອອກທັງໝົດ ໂຮມທັງພາກສ່ວນ ສົ່ງອອກເຂົ້ານໍາ. ຂ້າພະເຈົ້າຄິດວ່າມັນເປັນຜົນປະໂຍດແກ່ພວກເຮົາ ທີ່ຈະຮັກສາອັດຕາຄ່າເງິນຂອງ ພວກເຮົາໃຫ້ທຸ່ນທຽງເອົາໄວ້ ບໍ່ໃຫ້ອ່ອນຕົວລົງ ບໍ່ໃຫ້ແຂງຄ່າຂຶ້ນໄປ ກວ່າເກົ່າ ແຕ່ໃຫ້ມີຄວາມທຸ່ນທ່ຽງ ຖ້າຫາກເຮົາເຮັດໄດ້ ຊຶ່ງນັ້ນຈະເປັນນະໂຍບາຍທີ່ດີທີ່ ສຸດ. ແຕ່ວ່າ ເວລານີ້ ພວກເຮົາກໍາລັງພະຍາຍາມກ້າວຂຶ້ນມາ ເປັນຜູ້ທີ່ເຂັ້ມແຂງ
ທີ່ສຸດຜູ້ນຶ່ງ."
ຄືກັນກັບພວກນັກທຸລະກິດອື່ນໆອີກຫລາຍຄົນໃນຂົງເຂດ ທ່ານວິໄຊຈົ່ມວ່າ ບາງປະເທດໃນ ເອເຊຍທໍາການຄວບຄຸມຄ່າຂອງເງິນຕາຂອງຕົນ ແລະປ້ອງກັນບໍ່ໃຫ້ມັນແຂງຄ່າຂຶ້ນ. ທ່ານ ຍົກໂຕຢ່າງວ່າ ຮາໂນຍໄດ້ລົດຄ່າຂອງເງິນດົງລົງ ໃນຮອບປີຜ່ານມານີ້ ຊຶ່ງໄດ້ອໍານວຍໃຫ້ ຫວຽດນາມມີສ່ວນແບ່ງຫລາຍຂຶ້ນໃນຕະຫລາດ ເຂົ້າຂອງໂລກ. ຫວຽດນາມບໍ່ປ່ອຍໃຫ້ມີການແລກປ່ຽນເງິນຕາຂອງຕົນໄດ້ຢ່າງເສລີ ໃນຕະຫລາດແລກປ່ຽນເງິນຕາຕ່າງປະເທດ ກົງກັນ ຂ້າມກັບເງິນບາດຂອງໄທນັ້ນ.
ນອກນີ້ແລ້ວ ບັນດານັກເສດຖະສາດແລະພວກຜະລິດສິນຄ້າໃນທົ່ວໂລກ ຍັງໄດ້ພາກັນຈົ່ມວ່າມາເປັນເວລາຫລາຍປີແລ້ວ ວ່າຈີນຮັກສາຄ່າເງິນຕາຂອງຕົນໄວ້ໃນລະດັບຕໍ່າຜິດປົກກະຕິ. ໃນເດືອນມິຖຸນາຜ່ານມາ ລັດຖະບານກຸງປັກກິງກ່າວວ່າ ຕົນຈະປ່ອຍໃຫ້ຄ່າຂອງເງິນຢວນ ຂອງຕົນ ສູງຂຶ້ນໃນການແລກປ່ຽນກັບເງິນດອນລາສະຫະລັດແລະເງິນສະກຸນອື່ນໆ. ຢ່າງໃດ ກໍຕາມ ຄ່າຂອງເງິນຢວນເກືອບວ່າ ບໍ່ມີການໄດ້ປ່ຽນແປງເລີຍ.
ພວກນັກເສດຖະສາດ ກ່າວຕື່ມວ່າ ອຸດສາຫະກໍາສົ່ງອອກຂອງເອເຊຍຈະປະເຊີນກັບການໄດ້ກໍາໄລນ້ອຍລົງໃນຫລາຍໆເດືອນຂ້າງໜ້ານີ້ ຊຶ່ງພາໃຫ້ເກີດຄວາມເປັນຫ່ວງຫລາຍຂຶ້ນ ກ່ຽວກັບການຫວ່າງງານ ແລະການເຕີບໂຕຊ້າລົງຂອງເສດຖະກິດໃນທົ່ວຂົງເຂດ.
