ເບິ່ງວີດິໂອລາຍງານຂ່າວເປັນພາສາອັງກິດ
ລັດຖະມົນຕີຕ່າງປະເທດສະຫະລັດ ທ່ານນາງຮິລເລີຣີ ຄລິນຕັນ ເວົ້າວ່າ: “ພວກເຮົາ
ພ້ອມແລ້ວທີ່ຈະກ້າວໄປໄກກ່ວານີ້ອີກ ຖ້າຫາກການປະຕິຮູບຕ່າງໆ ດໍາເນີນ
ສືບຕໍ່ໄປ ແຕ່ປະວັດສາດແມ່ນສິດສອນໃຫ້ພວກເຮົາມີຄວາມລະມັດລະວັງ.
ພວກເຮົາຮູ້ດີວ່າ ໄດ້ມີການຖອຍຫລັງຢ່າງຮ້າຍແຮງ ແລະພ້ອມກັບຄວາມຜິດ
ຫວັງທີ່ຢ່າງໃຫຍ່ຫລວງຫລາຍຄັ້ງ ໃນຕະຫລອດໄລຍະຫລາຍສິບປີຜ່ານມາ.”
ທ່ານນາງຮິລເລີຣີ ຄລິນຕັນ ກັບທ່ານນາງອອງ ຊານ ຊູຈີ ຢືນຈັບມືກັນ ເວລາໃຫ້ສໍາ
ພາດຕໍ່ພວກນັກຂ່າວເມື່ອວັນສຸກຜ່ານມາ ຢູ່ລະບຽງບ້ານຂອງທ່ານນາງອອງຊານ ຊູຈີ
ທີ່ນະຄອນຢ່າງກຸ້ງ ບ່ອນທີ່ທ່ານນາງຖືກກັກບໍລິເວນມາເປັນເວລາສ່ວນໃຫຍ່ຂອງຊາວ
ປີຜ່ານມາ. ທ່ານນາງຄລິນຕັນ ກ່າວວ່າ ສະຫະລັດຈະມອບການຊ່ວຍເຫລືອໃນມູນຄ່າ
ນຶ່ງລ້ານສອງແສນໂດລາ ແກ່ມຽນມາ ເພື່ອຊ່ວຍເຫລືອພວກປະສົບໄພລະເບີດຝັງດິນ
ການດໍາເນີນການດ້ານການເງິນຈຸນລະພາກຫລືຂະໜາດນ້ອຍ ແລະການລິເລີ່ມ ດ້ານການຮັກສາສຸຂະພາບ.
ເບິ່ງຮູບສະໄລດ໌ກ່ຽວກັບຊີວິດຊາວມຽນມາ ໃນນະຄອນຢ່າງກຸ້ງ:
ແຕ່ທ່ານນາງຄລິນຕັນ ກ່າວວ່າ ການລົງໂທດທີ່ໜັກໜ່ວງຕໍ່ມຽນມານັ້ນຍັງຈະບໍ່ຖືກຍົກເລີກເທື່ອ ຈົນກວ່າວ່າມຽນມາຈະເອົາບາດກ້າວທີ່ເປັນຮູບປະທໍາ ໄປສູ່ປະຊາທິປະໄຕ ເສຍກ່ອນ.
ທ່ານນາງຮິລເລີຣີ ຄລິນຕັນ ເວົ້າວ່າ: “ພວກເຮົາຈະສະໜອງຕອບແບບ ບາດກ້າວຕໍ່ບາດກ້າວ ແລະຖ້າຫາກມີຄວາມກ້າວໜ້າຢ່າງພຽງພໍ ແທ້ໆແລ້ວ ພວກເຮົາກໍຈະພິດຈາລະນາຍົກເລີກ ການລົງໂທດໃຫ້.”
ທ່ານນາງຮິລເລີຣີ ຄລິນຕັນ ໄດ້ຍ້ອງຍໍສັນເສີນການນໍາພາທີ່ແນ່ວແນ່ ແລະແຈ້ງຂາວ ຂອງທ່ານນາງອອງຊານ ຊູຈີ ໂດຍກ່າວວ່າ ສະຫະລັດ ຕ້ອງການຢາກຈະເຫັນມຽນມາ ໄດ້ມີບ່ອນຫລືຖານະທີ່ຖືກຕ້ອງຊອບທໍາຂອງຕົນຢູ່ໃນໂລກນີ້ ແລະ ໄດ້ເອີ້ນຜູ້ນໍາປະຊາທິປະໄຕມຽນມາວ່າ ເປັນແຮງດົນໃຈ.
ສ່ວນທ່ານນາງອອງຊານ ຊູຈີ ນັ້ນ ກ່າວວ່າ ທ່ານນາງມີຄວາມພໍໃຈນໍາ ແນວທາງ ທີ່ສະຫະລັດກໍາລັງເຂົ້າມາພົວພັນກັບມຽນມາຢູ່ໃນເວລານີ້ ແລະກໍຄິດວ່າ ມັນຈະເຮັດໃຫ້ຂັ້ນຕອນການສ້າງປະຊາທິປະໄຕໃນມຽນມານັ້ນ ງ່າຍຂື້ນ.
ໃນລະຫວ່າງການຢ້ຽມຢາມນະຄອນຫລວງເນປິດໍຂອງມຽນມາ ເພື່ອວັນ ພະຫັດແລ້ວນີ້ ທ່ານນາງລັດຖະມົນຕີຕ່າງປະເທດຄລິນຕັນ ກ່າວວ່າ ບາດກ້າວໃດກໍຕາມທີ່ມຽນມາຈະດໍາເນີນ ເພື່ອກ້າວໄປສູ່ການປະຕິຮູບທາງການເມືອງນັ້ນ ແມ່ນຈະໄດ້ຮັບການພິດຈາລະນາຢ່າງລະອຽດຖີ່ຖ້ວນແລະ ລະມັດລະວັງ.
ທ່ານນາງໄດ້ຮຽກຮ້ອງໃຫ້ລັດຖະບານມຽນມາ ເລັ່ງລັດຄວາມພະຍາຍາມໃນການປອງດອງຊາດໃຫ້ໄວຂຶ້ນ ໂດຍການປ່ອຍຕົວພວກນັກໂທດການ ເມືອງຕື່ມອີກ ແລະຍຸດຕິການປະຕິບັດການຢ່າງຮຸນແຮງຕ້ານພວກຊົນກຸ່ມນ້ອຍນັ້ນເສຍ. ນອກນີ້ແລ້ວ ທ່ານນາງຄລິນຕັນຍັງໄດ້ຮຽກຮ້ອງໃຫ້ມຽນມາຍຸຕິການພົວພັນທາງທະຫານທີ່ຜິດກົດໝາຍໃດໆກັບເກົາຫລີເໜືອ ແລະຈົ່ງເຄົາລົບນັບຖືຄວາມເຫັນໂດຍສ່ວນລວມຂອງນາໆຊາດ ທີ່ຄັດຄ້ານຕໍ່ການເຜີຍແຜ່ອາວຸດນີວເຄລຍນັ້ນ.
ທ່ານນາງຄລິນຕັນໄດ້ໂອ້ລົມກັບ ພວກນັກຂ່າວ ຫລັງຈາກການພົບປະຄັ້ງປະວັດສາດ ກັບປະທານາທິບໍດີມຽນມາ ທ່ານ Thein Sein ທີ່ໄດ້ເປັນຜູ້ກໍາ
ກັບດູແລນໍາການເອົາບາດ
ກ້າວໄປສູ່ການປະຕິຮູບຕ່າງໆແບບທົດລອງ ນັບຕັ້ງແຕ່ທ່ານເຂົ້າຮັບຕໍາແໜ່ງປະທານາທິບໍດີໃນເດືອນມີນາຜ່ານມານັ້ນ. ສ່ວນທ່ານ Thein Sein ອະດີດນາຍພົນສໍາຄັນຂອງ
ມຽນມາ ໄດ້ສະແດງຄວາມຊົມເຊີຍຕໍ່ສິ່ງທີ່ທ່ານເອີ້ນວ່າ ສັກກະຫລາດໃໝ່ໃນຄວາມສໍາພັນລະຫວ່າງສະຫະລັດແລະມຽນມານັ້ນ.
ທ່ານນາງ ຄລິນຕັນ ເປັນລັດຖະມົນຕີຕ່າງປະເທດສະຫະລັດຄົນທໍາອິດທີ່ໄດ້ໄປຢ້ຽມຢາມມຽນມາ ໃນຮອບ 50 ປີ.
ຮູບສະໄລດ໌ກ່ຽວກັບຊີວິດຊາວມຽນມາ ໃນນະຄອນຢ່າງກຸ້ງ ຕື່ມອີກ:
ລັດຖະບານຊຸດໃໝ່ມຽນມາ ໄດ້ປ່ອຍຕົວພວກນັກໂທດການເມືອງປະມານ 200 ຄົນແລ້ວ ແລະໂຍະຍານຂໍ້ຈໍາກັດຮັດແຄບວົງການຂ່າວບາງປະການ ແລະເປີດການໂອ້ລົມສົນທະນາກັບພວກທີ່ຕ້ອງຕິຕົນບາງຄົນ ໂຮມທັງທ່ານນາງອອງຊານຊູຈີ ນັ້ນນໍາ.
ທ່ານນາງອອງຊານ ຊູຈີ ຜູ້ໄດ້ຮັບລາງວັນໂນເເບລຂະແໜງສັນຕິພາບ ໄດ້ຖືກປ່ອຍຕົວຈາກການກັກບໍລິເວນໃນເວລາສ່ວນໃຫຍ່ຂອງ 20 ປີ ທີ່ຜ່ານມາ. ພັກການເມືອງຂອງທ່ານນາງໄດ້ຮັບໄຊຊະນະການເລືອກຕັ້ງຄັ້ງປີ 1990 ດ້ວຍຄະແນນສຽງຖ້ວມທົ້ນ ແຕ່ກໍໄດ້ຖືກຂັດຂວາງບໍ່ໃຫ້ເຂົ້າກໍາອໍານາດ. ທ່ານນາງໄດ້ຢືນຢັນເມື່ອວັນພຸດຜ່ານມານີ້ວ່າ ທ່ານນາງຈະຈະລົງສະມັກເລືອກຕັ້ງເປັນສະມາຊິກສະພາໃນການເລືອກຕັ້ງຄັ້ງຕໍ່ໜ້ານີ້.
ສະຫະລັດແລະພວກປະເທດຕາເວັນຕົກໄດ້ລົງໂທດອະດີດລັດຖະບານທະ ຫານມຽນມາຫລາຍໆບັ້ນ ຍ້ອນການຝ່າຝືນສິດທິມະນຸດທີ່ຮຸນແຮງຂອງຕົນນັ້ນ ໂຮມທັງການປະຕິບັດການທາງທະຫານຕໍ່ຕ້ານພວກກຸ່ມຊົນເຜົ່າ ແລະຈໍາຄຸກພວກນັກໂທດການເມືອງຫລາຍເຖິງ 2,000 ຄົນ. ທ່ານນາງຄລິນຕັນ ໄດ້ຮຽກຮ້ອງອີກຄັ້ງນຶ່ງ ໃຫ້ລັດຖະບານມຽນມ ປ່ອຍຕົວພວກນັກໂທດການເມືອງທັງໝົດ.
ລັດຖະມົນຕີການຕ່າງປະເທດສະຫະລັດເວົ້າວ່າ:“ພວກເຮົາຢາກຈະເຫັນພວກນັກໂທດການເມືອງທັງໝົດເຫລົ່ານັ້ນຖືກປ່ອຍຕົວ. ພວກເຮົາຢາກເຫັນ ຄວາມພະຍາຍາມທີ່ຈິງຈັງໃນການສ້າງສັນຕິພາບ ແລະຄວາມປອງດອງຊາດ. ພວກເຮົາຢາກເຫັນມື້ທີ່ກໍານົດໃຫ້ມີການເລືອກຕັ້ງ.”
