ການປະຊຸມຄັ້ງທີ່ 7 ຂອງຄະນະວິຊາການວ່າດ້ວຍການປັກຫລັກໝາຍຖີ່ແລະບູລະນະລະບົບຫລັກໝາຍຊາຍແດນລະວ່າງລາວກັບຫວຽດນາມ ຊຶ່ງກໍໄດ້ມີຂື້ນຢ່າງເປັນທາງການເມື່ອບໍ່ນານມານີ້ຢູ່ແຂວງເຫງ່ອານ ປະເທດຫວຽດນາມ ຄະນະຜູ້ແທນຂອງທັງສອງຝ່າຍໄດ້ສະລຸບລາຍງານຜົນການດຳເນີນງານຮ່ວມກັນໃນໄລຍະທີ່ຜ່ານມາວ່າໄດ້ຕົກລົງຮ່ວມກັນໃນການກຳໜົດທີ່ຕັ້ງຫລັກໝາຍຊາຍ ແດນໄດ້ທັງໝົດ 261 ຈຸດ ແລະຈະມີການປັກຫລັກໝາຍຊາຍແດນທັງໝົດ 278 ຫລັກໝາຍ ໂດຍມາເຖິງປັດຈຸບັນນີ້ ກໍສາມາດດຳເນີນການສຳເລັດແລ້ວ 170 ຈຸດແລະປັກຫລັກໝາຍຊາຍແດນໄດ້ 184 ຫລັກໝາຍ ຈຶ່ງຍັງຄົງເຫລືອອີກ 91 ຈຸດ ແລະ 94 ຫລັກໝາຍທີ່ຈະຕ້ອງດຳເນີນ ການໃຫ້ສຳເລັດພາຍໃນປີ 2010 ນີ້.
ແຕ່ຢ່າງໃດກໍຕາມ ເນຶ່ອງຈາກວ່າການປັກຫລັກໝາຍຖີ່ແລະບູລະນະລະບົບຫລັກໝາຍໃນຕະ ຫລອດແນວເຂດຊາຍແດນລະວ່າງລາວກັບຫວຽດນາມທີ່ມີລະຍະທາງຍາວກວ່າ 2,000 ກິໂລ ເມດນັ້ນ ຈະຕ້ອງມີການປັກຫລັກໝາຍຊາຍແດນຮ່ວມກັນຕະຫລອດໄລຍະກວ່າ 2ປີມານີ້ ຈຶ່ງ ເຮັດໃຫ້ທາງການຂອງທັງສອງຝ່າຍໄດ້ສະແດງຄວາມເຊື່ອໝັ້ນແລະໄດ້ຕົກລົງຮ່ວມກັນວ່າ ການປັກຫລັກໝາຍຖີ່ແລະບູລະນະລະບົບຫລັກໝາຍຕະຫລອດຊາຍແດນລາວຍກັບຫວຽດນາມນັ້ນ ຈະສຳເລັດສົມບູນພາຍໃນປີ 2014 ຢ່າງແນ່ນອນ. ສາເຫດທີ່ເຮັດໃຫ້ທາງການລາວກັບຫວຽດ ນາມຕ້ອງດຳເນີນການປັກຫລັກໝາຍຖີ່ແລະບູລະນະລະບົບຫລັກໝາຍຊາຍແດນໃໝ່ທັງໝົດນັ້ນ ກໍຍ້ອນວ່າຫລັກໝາຍໃນອະດີດໄດ້ເກີດການປ່ຽນແປງໄປຢ່າງຫລວງຫລາຍ ຈຶ່ງເຮັດໃຫ້ການຮ່ວມມືກັນໃນຄັ້ງໃໝ່ນີ້ ມີເປົ້າໝາຍທີ່ຈະເຮັດໃຫ້ເຂດຊາຍແດນລະວ່າງສອງປະເທດມີຄວາມຊັດແຈ້ງຂື້ນອັນຈະເປັນການປ້ອງກັນບໍ່ໃຫ້ເກີດຂໍ້ຂັດແຍ້ງກັນຂື້ນໃນອະນາຄົດອີກດ້ວຍ. ດ່ັງທີ່ທ່ານທອງລຸນ ສີສຸລິດ ຮອງນາຍົດລັດຖະມົນຕີແລະລັດຖະມົນຕີວ່າການຕ່າງປະເທດຂອງລາວ ໃຫ້ການຢືນຢັນແລະອະທິບາຍໃນຕອນນຶ່ງວ່າ:
“ຖ້າຫາກພວກເຮົາບໍ່ປຶກສາຫາລື ບໍ່ຕົກລົງກັບຫວຽດນາມ ຫລືຖ້າຫາກສອງຝ່າຍບໍ່ໄດ້ຕົກລົງກັນວ່າ ຕັດສິນໃຈປັກຫລັກໝາຍຖີ່ນີ້ ຈັກໜ່ອຍບໍ່ເຂົ້າໃຈກັນ ເພາະວ່າການປັກຫລັກຢູ່ຈອມພູນີ້ ເລັ່ງໄປຕາມສັນພູເຂດຊາຍແດນ ບາດໄປຮອດຍ່ານໃດຍ່ານນຶ່ງສະພາບຂອງພູ ມີຫລາຍແງ່ຫລາຍມຸມ ຫ້ວຍນ້ຳກໍມີທຳມະຊາດປ່ຽນແປງໄປ ມັນປັນກັນຢູ່ບ່ອນໃດແທ້ ເກີດຖົກຖຽງກັນ ບາງເທື່ອພູໜ່ວຍນີ້ກັບພູໜ່ວຍນີ້ມັນໄກ້ກັນ ແລະມີຄວາມຕ່ຳສູງເທົ່າກັນ ຊຶ່ງດຽວນີ້ເຮົາຈະປັກຫລັກໝາຍໃຫ້ຖີ່ເຂົ້ານັ້ນ ເພື່ອເອົາໄວ້ເປັນຫລັກຖານອ້າງອິງດ້ວຍກົດໝາຍໄວ້ໃຫ້ລູກຫລານຂອງພວກເຮົາ”.
ຍິ່ງໄປກວ່ານັ້ນ ເປົ້າໝາຍສຳຄັນອີກປະການນຶ່ງທີ່ທາງການລາວແລະຫວຽດນາມຕ້ອງການເຮັດໃຫ້ ເຂດຊາຍແດນລະວ່າງສອງປະເທດມີຄວາມແຈ່ງແຈ່ມແລະແນ່ນອນນັ້ນ ກໍຄືການທີ່ຈະຮ່ວມມືກັນ ເພື່ອພັດທະນາເຂດການຄ້າຊາຍແດນໃຫ້ມີຄວາມທັນສະໄໝຫລາຍຂື້ນນັບມື້ ໂດຍລ່າສຸດກໍມີລາຍ ງານວ່າທາງການກະຊວງອຸດສາຫະກຳແລະການຄ້າຂອງທັງສອງຝ່າຍໄດ້ຕົກລົງຮ່ວມມືກັນເຂົ້າໃນ ການພັດທະນາການຄ້າລະຫວ່າງເຂດແຂວງຕ່າງໆ ທີ່ມີຊາຍແດນຕິດຕໍ່ກັນທັງໃນເຂດພາກເໜືອ ພາກກາງແລະພາກໃຕ້ ໂດຍໃນໄລຍະເລີ່ມຕົ້ນນີ້ກໍຈະເນັ້ນໜັກການຮ່ວມກັນຈັດງານວາງສະແດງສິນຄ້າເປັນດ້ານຫລັກ ສ່ວນໃນອະນາຄົດກໍຈະຍົກລະດັບການຈັດງານເປັນການງາງສະແດງສິນຄ້ານາໆຊາດໃນເຂດລຸ່ມແມ່ນ້ຳຂອງຕໍ່ໄປ. ໂດຍກ່ອນໜ້ານີ້ ຜູ້ນຳພັກປະຊາຊົນປະຕິວັດລາວກັບ ຜູ້ນຳພັກຄອມມີວນິສຕ໌ຫວຽດນາມ ກໍໄດ້ຕົກລົງທີ່ຈະເພີ່ມການພົບປະແລກປ່ຽນເຈົ້າໜ້າທີ່ຂັ້ນສູງ ລະວ່າງກັນໃຫ້ຫລາຍຂື້ນ ທັງການແລກປ່ຽນໃນດ້ານທິດສະດີ ແລະແຜນການປ່ຽນແປງໃໝ່ ການພັດທະນາຊັບພະຍາກອນມະນຸດ ການພັດທະນາທາງສັງຄົມ ການເມືອງແລະຄວາມໝັ້ນຄົງໃນທັງສອງປະເທດ ຮ່ວມກັນຢ່າງໄກ້ຊິດ.
ສ່ວນທາງດ້ານເສດຖະກິດນັ້ນ ທັງສອງຝ່າຍກໍຈະສົ່ງເສີມໃຫ້ມີການຄ້າຫລາຍຮູບແບບ ທີ່ມີການອຳ ນວຍຄວາມສະດວກໃຫ້ພາກທຸລະກິດການຄ້າ ການລົງທຶນ ແລະພັດທະນາການເຊື່ອມຕໍ່ດ້ານຄົມມະນາຄົມ-ຂົນສົ່ງຢ່າງຄົບວົງຈອນ. ສຳລັບໃນດ້ານການຄ້ານັ້ນ ທັງສອງຝ່າຍກໍໄດ້ວາງເປົ້າ ໝາຍທີ່ຈະເພີ່ີມມູນຄ່າການຄ້າລະວ່າງກັນໃຫ້ໄດ້ ເຖິງ 1ພັນລ້ານໂດລາສະຫະລັດ ໃນປີ 2010 ແລະເພີ່ມຂື້ນເປັນ 2 ພັນລ້ານໂດລາສະຫະລັດ ໃນປີ2015 ແລະ 5 ພັນລ້ານໂດລາສະຫະລັດ ໃນປີ 2020 ຕໍ່ໄປ.
