ຢ່າງໜ້ອຍ 71 ຄົນໄດ້ເສຍຊີວິດ ເມື່ອເຮືອບິນທີ່ນຳພານັກກິລາເຕະ ບານບຣາຊິລ ປະສົບອຸບັດຕິເຫດຕົກໃກ້ກັບເມືອງ Medellin ປະເທດ ໂຄລອມເບຍ ໃນຕອນແລງຂອງວັນຈັນ ທີ່ຜ່ານມາ. ຈຳນວນຜູ້ເສຍຊີວິດທັງໝົດແມ່ນຕ່ຳກວ່າຈຳນວນທີ່ຖືກລາຍງານກ່ອນໜ້ານີ້ ວ່າມີຢ່າງໜ້ອຍ 76 ຄົນ.
ໜຶ່ງໃນຈຳນວນຜູ້ລອດຊີວິດ 6 ຄົນໃນເຮືອບິນລຳດັ່ງກ່າວແມ່ນ ສະມາຊິກ 3 ຄົນຂອງທີມ ເຕະບານ Chapecoense, ຢ່າງໜ້ອຍ 2 ຄົນໃນນັ້ນທີ່ໄດ້ຮັບບາດເຈັບຫຼາຍພໍສົມຄວນ ແມ່ນ ນັກຂ່າວຄົນໜຶ່ງ ແລະ ພະນັກງານເຮືອບິນ 2 ຄົນ.
ບັນດາເຈົ້າໜ້າທີ່ໄດ້ກ່າວວ່າ ຜູ້ຮັກສາປະຕູ ບຣາຊິລ ທ້າວ Marcos Danilo Padilha ທຳອິດໄດ້ລອດຊີວິດຈາກອຸບັດຕິເຫດ, ແຕ່ “ຕໍ່ມາໄດ້ເສຍຊີວິດ ໃນເວລາທີ່ຖືກສົ່ງ” ໄປ ໂຮງໝໍ.
ບັນດາແພດໝໍໄດ້ຕັດຂາຂອງຜູ້ຮັກສາປະຕູສຳຮອງ ທ້າວ Jackson Follman, ໃນຂະ ນະທີ່ນັກເຕະກອງຫຼັງ ທ້າວ Helio Neto ໄດ້ຮັບບາດເຈັບທີ່ກະໂຫຼກຫົວ. ນັກເຕະກອງຫຼັງ ທ້າວ Alan Ruschel ກໍແມ່ນຜູ້ລອດຊີວິດອີິກຄົນໜຶ່ງ. ທ່ານໝໍຄົນໜຶ່ງໄດ້ກ່າວວ່າ ລາວ ໄດ້ຖືກຜ່າຕັດ ແລະ ຕໍ່ມາຖືກສົ່ງໄປໂຮງໝໍອີກແຫ່ງໜຶ່ງສຳລັບການກວດກາເພີ່ມເຕີມ.
ເຮືອບິນລຳດັ່ງກ່າວ, ເປັນເຮືອບິນຂອງສາຍກາຍບິນຂະໜາດນ້ອຍຂອງ ເວເນຊູ ເອລາ ຊື່ວ່າ LaMia , ທີ່ໄດ້ບິນອອກຈາກປະເທດ ໂບລີເວຍ ເພື່ອໄປຮ່ວມການແຂ່ງຂັນຮອບຊິງ ຊະນະ ເລີດ ຂັນອາເມຣິກາໃຕ້ຫລື Copa Sudamericana ໃນເວລາທີ່ເຮືອບິນຕົກ.
ຄວາມພະຍາຍາມໃນການກູ້ໄພໄດ້ປະສົບກັບອຸປະສັກຍ້ອນ ສະຖານທີ່ເກີດເຫດເປັນ ເຂດທີ່ເຂົ້າເຖິງໄດ້ຍາກ ແລະບໍ່ສາມາດເບິ່ງໃນໄລຍະໄກໄດ້.
ທ່ານ Alfredo Bocanegra ຫົວຂອງອົງການການບິນພົນລະເຮືອນຂອງ ໂຄລອມເບຍ ໄດ້ກ່່າວວ່າ ບັນດາເຈົ້າໜ້າບໍ່ສາມາດຕັດສິນຄວາມເປັນໄປໄດ້ ກ່ຽວກັບ ການໝົດນ້ຳມັນ ຂອງເຮືອບິນ ກ່ອນທີ່ມັນຈະຕົກ, ແຕ່ຈຸດເພັ່ງເລັງທີ່ສຳຄັນຂອງການສືບສວນສອບສວນ ນັ້ນ ແມ່ນກ່ຽວກັບຄວາມເປັນໄປໄດ້ໃນການເກີດບັນຫາກ່ຽວກັບລະບົບໄຟຟ້າ.
