ຍີ່ປຸ່ນທີ່ໃຫ້ການສະໜັບສະໜຸນຕໍ່ການພັດທະນາເສດຖະກິດໃນເຂດເອເຊຍຕາເວັນອອກ ສຽງໃຕ້ ພວມເພີ້ມທະວີ ການພົວພັນຂອງຕົນໃນເຂດດັ່ງກ່າວ ຂະນະທີ່ຈີນ ໄດ້ຍົກລະດັບ ການມີໜ້າຂອງຕົນຢູ່ໃນ 10 ປະເທດສະມາຊິກຂອງສະມາຄົມບັນດາປະຊາຊາດໃນເຂດເອເຊຍຕາເວັນອອກສຽງໃຕ້ຫຼືອາຊ່ຽນ.
ຍີ່ປຸ່ນໄດ້ຂະຫຍາຍບົດບາດຂອງຕົນ ໃນການອະພິປາຍກ່ຽວກັບຄວາມໝັ້ນຄົງໃນເຂດເອ ເຊຍຕາເວັນອອກສຽງໃຕ້ ໂດຍສະເພາະແລ້ວໃນທະເລຈີນໃຕ້ບ່ອນທີ່ຍີ່ປຸ່ນກ່າວວ່າການຂັດແຍ້ງໃດໆກໍຕາມແມ່ນຕ້ອງໄດ້ຮັບການແກ້ໄຂໂດຍລະບຽບກົດໝາຍແລະບໍ່ແມ່ນການ ໃຊ້ກຳລັງ.
ໃນຕົ້ນອາທິດນີ້ ຍີ່ປຸ່ນໄດ້ປະກາດໂຄງການຊ່ອຍເຫລືອເປັນເວລາ 3 ປີໃນມູນຄ່າ 6 ພັນ 800 ລ້ານໂດລາ ເພື່ອເສີມຂະຫຍາຍໂຄງລ່າງພື້ນຖານ ຢູ່ໃນເຂດອະນຸພາກພື້ນລຸ່ມແມ່ ນ້ຳຂອງ ຊຶ່ງຮວມທັງເຂດຕ່າງໆ ຂອງຫວຽດນາມ ສປປ ລາວ ແລະ ໄທ.
ໃນການຖະແຫຼງທີ່ມະຫາວິທະຍາໄລແຫ່ງນຶ່ງຢູ່ບາງກອກ ລັດຖະມົນຕີການຕ່າງປະເທດ ຍີ່ປຸ່ນ ທ່ານ Fumio Kishida ກ່າວວ່າ ຂໍ້ລິເລີ້ມການເຊື່ອມໂຍງ ລະຫວ່າງຍີ່ປຸ່ນ ແລະ ເຂດແມ່ນ້ຳຂອງ ແມ່ນມີຈຸດປະສົງແນໃສ່ ເພື່ອສ້າງຂອບທີ່ໃຫ້ການສະໜັບສະໜຸນເພື່ອ ປັບປຸງໂຄງລ່າງພື້ນຖານ ເຊັ່ນຂົວ ແລະຕາໜ່າງທາງລົດໄຟ ການພັດທະນາຊັບພະຍາ ກອນມະນຸດ ແລະໃຫ້ການສະໜັບສະນຸນຕໍ່ຂົງເຂດແມ່ນ້ຳຂອງ.
ໂຄງການຫລ້າສຸດຂອງຍີ່ປຸ່ນສຳລັບຂົງເຂດແມ່ນ້ຳຂອງນີ້ມີຂຶ້ນຫລັງຈາກ ການໃຫ້ຄວາມ ຊ່ອຍເຫລືອໃນປີ 2013 ໃນມູນຄ່າ 2 ພັນຕື້ເຢນ ຕໍ່ການໃຫ້ຄວາມຊ່ອຍເຫຼືອສຳລັບການພັດທະນາຢ່າງເປັນທາງການຫຼື ODA ແກ່ບັນດາປະເທດອາຊ່ຽນ ພາຍໃນໄລຍະຫ້າປີ. ນອກນັ້ນຍີ່ປຸ່ນຍັງໄດ້ໃຫ້ການສະໜັບສະໜຸນຕໍ່ການຮວມຕົວຂອງອາຊ່ຽນເປັນເງິນ 100 ລ້ານໂດລາ.
ນັກລັດຖະສາດການປົກຄອງ ຂອງໄທ ທ່ານທິດທິນັນ ພົງສຸດທີ່ຣັກ ກ່າວວ່າ ໂຄງການ ໄລຍະຍາວຂອງຍີ່ປຸ່ນກ່ຽວກັບການໃຫ້ຄວາມຊ່ອຍເຫລືອໃນດ້ານການພັດທະນາແລະ ການສະໜັບສະໜຸນ ທາງດ້ານການທູດນັ້ນ ແມ່ນໄດ້ຮັບການກົດດັນຫຼາຍຂຶ້ນຈາກອິດ ທິພົນທີ່ພວມເພີ້ມທະວີຂຶ້ນຂອງຈີນຢູ່ໃນຂົງເຂດດັ່ງກ່າວ.
ອ່ານຂ່າວນີ້ຕື່ມເປັນພາສາອັງກິດ
