ທູດສັນຕິພາບນາໆຊາດ ທ່ານ Kofi Annan ກ່າວວ່າ ປະທານາທິ ບໍດີຊີເຣຍທ່ານ
Bashar al-Assad ໄດ້ຕົກລົງທີ່ຈະເລີ້ມຖອນກໍາລັງທະຫານ ອອກຈາກເຂດ ທີ່ເປັນ
ສູນກາງປະທ້ວງ ຂອງພວກຝ່າຍຄ້ານ ແລະເສັດສິ້ນການຖອນກຳລັງ ພາຍໃນວັນທີ
10 ເມສາຈະມາເຖິງນີ້.
ທ່ານ Annan ໄດ້ປະກາດການກ່ຽວກັບການຕົກລົງດັ່ງກ່າວໃນວັນຈັນ ວານນີ້ຢູ່ໃນ
ລາຍງານຕໍ່ສະພາຄວາມໝັ້ນຄົງອົງການສະຫະປະຊາຊາດ ໂດຍຜ່ານທາງວີດີໂອ ຈາກ
ນະຄອນເຈນີວາ. ໃນເວລາຕໍ່ມາບັນດານັກການທູດ ໄດ້ອ້າງຄໍາເວົ້າຂອງທ່ານ Annan
ທີ່ກ່າວວ່າ ປະທານາທິບໍ ດີຊີເຣຍ ໄດ້ຕົກລົງຮັບເອົາບາດກ້າວ “ໃນທັນທີ” ຫຼາຍໆຂໍ້
ຮວມທັງ ການຢຸດເຊົາບໍ່ໃຫ້ເຄື່ອນຍ້າຍກໍາລັງທະຫານໄປສູ່ສູນກາງທີ່ປະຊາຊົນອາໄສ
ຢູ່ ແລະເລີ້ມຖອນທະຫານ ແລະອາວຸດໜັກອອກຈາກຂົງເຂດເຫຼົ່ານັ້ນ.
ທ່ານ Ahmad Fawzi ໂຄສົກຂອງທ່ານ Annan ກ່າວຕໍ່ VOA ວ່າ ຂໍ້ຕົກລົງສະບັບ
ນີ້ຮຽກຮ້ອງໃຫ້ທ່ານ Assad ເສັດສິ້ນບາດກ້າວຕ່າງໆພາຍໃນວັນທີ 10 ເມສາ ແລະ
ບັງຄັບໃຫ້ພວກກະບົດຈົ່ງໄດ້ປະຕິບັດຕາມສັນຍາການຢຸດຍິງພາຍໃນ 48 ຊົ່ວໂມງຂອງ
ເສັ້ນຕາຍດັ່ງກ່າວ.
ເອກອັກຄະລັດຖະທູດຊີເຣຍປະຈໍາສະຫະປະຊາຊາດ ທ່ານ Bashar Ja’afari ກ່າວຕໍ່
ບັນດານັກຂ່າວວ່າ ລັດຖະບານຂອງທ່ານ ມີຄວາມໝາຍໝັ້ນທີ່ຈະເຮັດໃຫ້ການປະຕິບັດ
ງານຂອງທ່ານ Annan ປະສົບ ກັບຄວາມສຳເລັດ. ທ່ານກ່າວຕື່ມອີກວ່າ ກຸງ
Damascus ຍັງຄາດໝາຍວ່າ ທ່ານ Annan ຈະຕິດຕໍ່ໄປຍັງພັກຝ່າຍທີ່ເປັນຜູ້ລິເລີ່ມ
ໃຫ້ການຊຸກຍູ້ ແລະປະກອບອາວຸດໃຫ້ແກ່ພວກກໍ່ການຮ້າຍ ທີ່ຊີເຣຍຖິ້ມ ໂທດໃສ່ວ່າ
ເປັນກະບົດນັ້ນ.
ນອກນັ້ນ ທ່ານ Ja’afari ຍັງໄດ້ຕິຕຽນກອງປະຊຸມໃນວັນອາທິດຜ່ານ ມາທີ່ກຸງ
Istanbul ປະເທດເທີກີ ຂອງ 70 ປະເທດທີ່ຄັດຄ້ານຕໍ່ການ ປາບປາມຂອງທ່ານ
Assad ໃນການທັບມ້າງການລຸກຮືຂື້ນ ໂດຍເອີ້ນ ກຸ່ມແນວໂຮມ “ເພື່ອນຂອງຊີເຣຍ”
ນັ້ນວ່າ ເປັນສັດຕູຂອງຊີເຣຍ.
ທ່ານຍັງໄດ້ປະນາມ ແຜນການຂອງບັນດາປະເທດສະມາຊິກໃນເຂດອ່າວເປີເຊຍ ທີ່ໃຫ້
ເງິນເດືອນແກ່ພວກກະບົດຊິີເຣຍ ແລະສະຫະລັດ ໄດ້ສະເໜີທີ່ຈະສົ່ງອຸປະກອນສື່ສານໄປ
ໃຫ້ພວກນັກເຄື່ອນໄຫວຊີເຣຍ ນັ້ນວ່າ “ເປັນການປະກາດສົງຄາມ.”
ເບິ່ງວີດີໂອ ກ່ຽວກັບຊາວເຄີຣດໃນຊີເຣຍ