ປະທານາທິບໍດີເທີກີ ທ່ານ Recep Tayyip Erdogan ກ່າວວ່າ ທ່ານຈະສອບຖາມ ປະທານາທິບໍດີດໍໂນລ ທຣຳ ຢ່າງຂຸ້ນຂ້ຽວ ກ່ຽວກັບການຕັດສິນໃຈຂອງສະຫະລັດທີ່
ຈະຕິດອາວຸດ ໃຫ້ແກ່ກຳລັງທະຫານບ້ານຊາວເຄີດ ໃນຊີເຣຍ ເວລາທ່ານພົບປະກັນ
ກັບປະທານາທິບໍດີທຣຳ ທີ່ນະຄອນຫຼວງວໍຊິງຕັນໃນອາທິດໜ້າ.
ທ່ານ Erdogan ກ່າວໃນວັນພຸດວານນີ້ວ່າ ການສູ້ລົບກັບກຸ່ມກໍ່ການຮ້າຍລັດອິສລາມ
ຫຼື Daesh ນັ້ນ ບໍ່ຄວນທີ່ຈະດຳເນີນໄປ ກັບກຸ່ມກໍ່ການຮ້າຍ ອີກກຸ່ມນຶ່ງ ການເອົາບາດ
ກ້າວແບບນີ້ ຈະເປັນອັນຕະລາຍ ຕໍ່ອະນາຄົດຂອງຊີເຣຍ ແລະຂົງເຂດນຳດ້ວຍ.
ກຸ່ມກຳລັງທະຫານບ້ານ YPG ຂອງຊາວເຄີດ ແມ່ນໄດ້ຖືກຮັບຮູ້ກັນຢ່າງເປັນທີ່ກວ້າງ
ຂວາງວ່າ ເປັນກຳລັງທີ່ມີປະສິດທິພາບທີ່ສຸດໃນການສູ້ລົບກັບກຸ່ມລັດອິສລາມຢູ່ໃນຊີ
ເຣຍ.
ແຕ່ອັງກາຣາຖືວ່າ ກຸ່ມດັ່ງກ່າວເປັນເຄືອຂ່າຍຂອງພັກກຳມະກອນຊາວເຄີດຫລື PKK
ຊຶ່ງກຳລັງສູ້ລົບກັບປະເທດເທີກີຢູ່ນັ້ນ. ເທີກີ ແລະສະຫະລັດຕ່າງກໍລະບຸວ່າ ກຸ່ມ PKK
ເປັນອົງການກໍ່ການຮ້າຍ.
ລັດຖະມົນຕີການຕ່າງປະເທດເທີກີ ທ່ານ Mevlut Cavusoglu ປະກາດວ່າ ອາວຸດ
ທຸກໆອັນທີ່ກຸ່ມທະຫານບ້ານ YPG ໄດ້ຮັບນັ້ນ ແມ່ນເປັນໄພຂົ່ມຂູ່ຕໍ່ເທີກີ.
ການເດີນທາງມາຢ້ຽມຢາມວໍຊິງຕັນຂອງທ່ານ Erdogan ແມ່ນເບິ່ງກັນວ່າເປັນບ່ອນ
ຢຸດແວ່ທີ່ສຳຄັນສຸດ ໃນການຢ້ຽມຢາມຕ່າງປະເທດ ເພື່ອເສີມຂະຫຍາຍ ຄວາມຖືກ
ຕ້ອງຊອບທຳຂອງລັດຖະບານທ່ານ ຫລັງຈາກໄດ້ຮັບໄຊຊະນະໃນການລົງປະຊາມະ
ຕິໃນເດືອນແລ້ວທີ່ເປັນບັນຫາໂຕ້ແຍ້ງຍ້ອນມີການມອບອຳນາດທັງໝົດໃຫ້ແກ່ທ່ານ.
ການລົງຄະແນນສຽງດັ່ງກ່າວນີ້ ແມ່ນເຕັມໄປດ້ວຍ ການກ່າວຫາວ່າ ມີການສໍ້ໂກງຄະ
ແນນສຽງກັນ.
ບັນຫາໂຕ້ແຍ້ງ ທີ່ຍັງດຳເນີນຢູ່ຕໍ່ມາ ກ່ຽວກັບພວກນັກລົບຊາວເຄີດ ແມ່ນຈຸດທີ່ກໍ່ໃຫ້
ເກີດຄວາມເຄັ່ງຕຶງລະຫວ່າງພັນທະມິດໂດຍສະເພາະໃນຂະນະທີ່ພວກນັກຊ່ຽວຊານ
ສ່ວນໃຫຍ່ທຳນາຍວ່າວໍຊິງຕັນໃນທີ່ສຸດຈະຕິດອາວຸດໃຫ້ແກ່ກຸ່ມ YPG.
