ລິ້ງ ສຳຫລັບເຂົ້າຫາ

logo-print

ຊາວອາເມຣິກັນ ຢາກມີ ຄວາມສໍາພັນ ກັບ Cuba ຫຼາຍຂຶ້ນ (ວີດີໂອ)


Americans Want Closer Ties with Cuba
please wait

No media source currently available

0:00 0:03:13 0:00
ລິງໂດຍກົງ
ນັບ​ຕັ້ງ​ແຕ່ ປະທານາທິບໍດີ ​ໂອ​ບາ​ມາ ​ໄດ້ປະກາດອະນຸຍາດ​ໃຫ້​
ປະຊາຊົນ​ອາ​ເມຣິກັນ​ ເດີນທາງ​ໄປ​ຍັງຄິວ​ບາ ຫຼືກຸຍ​ບາ ​ໄດ້ອີກ ​
ແບບ​ມີ​ຂອບ​ເຂດ​ຈໍາກັດ ໃນ​ປີ 2011 ນັ້ນ ຊາວ​ອາ​ເມຣິກັນ​ຫຼາຍ​
ແສນ​ຄົນກໍ​ໄດ້ເຂົ້າໄປ​ທ່ອງ​ທ່ຽວ​ໃນ​ປະ​ເທດ​ຄອມ​ມີ​ວນີສ​ແຫ່ງນັ້ນ
ຫຼາຍໆ​ຄົນເວົ້າ​ວ່່າ ມັນ​ເຖິງ​ເວລາ​ແລ້ວທີ່​ຈະ​ທົບທວນເບິ່ງ​ຄວາມ​
ສໍາພັນ​ລະຫວ່າງ​ສະຫະລັດ​ແລະ​ຄິວ​ບາ ​ທີ່​ໄດ້​ຢຸດ​ສະ​ງັກລົງມາ​
ໄດ້​ຫຼາຍ​ກວ່າ 50 ປີນັ້ນ​. ຜູ້​ສື່ຂ່າວ​ວີໂອ​ເອ Zlatica Hoke ມີ​
ລາຍ​ງານ​ເລຶ່ອງນີ້​ເພີ່ມ​ຕື່ມ ຊຶ່ງ​ທອງ​ປານ ຈະ​ນໍາ​ມາສະ​ເໜີ​ທ່ານ
​ໃນ​ອັນ​ດັບ​ຕໍ່​ໄປ

ລິງໂດຍກົງ

ຜົນ​ການ​ຢັ່ງ​ຫາງ​ສຽງ​ມະຫາຊົນ​ພົບ​ວ່າ ຫຼັງ​ຈາກ​ໄດ້​ໄປ​ທ່ຽວ​ຊົມ​ຄິວ​ບາ​ມາ​ແລ້ວນັ້ນ ຊາວ​ອາ​ເມຣິກັນ​ຫຼາຍໆ​ຄົນ​ມີ​ຄວາມ​ເຫັນ​ວ່າ ​ເຂົາ​ເຈົ້າ​ຢາກໃຫ້ ສະຫະລັດ​ມີ​ຄວາມສໍາພັນ​ທີ່​ໃກ້ຊິດ​ຂື້ນ ​ກັບປະ​ເທດ​ເກາະດອນ​ດັ່ງກ່າວ.​ Ellen Lansberger ຈາກ​ນີວຢ໊ອກ ກໍ​ເປັນ​ຜູ້​ນຶ່ງ​ໃນ​ນັ້ນ.

ທ່ານນາງ Lansberger ​ເວົ້າ​ວ່າ: “ຂ້າພະ​ເຈົ້າຄິດ​ວ່າ ຄວາມ​ສໍາພັນ​ລະຫວ່າງ​ສະຫະລັດ ​ກັບຄິວ​ບາ ໜ້າ​ຈະ​ເປີດ​ກວ້າງ​ໄດ້​ແລ້ວ. ຄົນ​ເຮົາ​ຕ້ອງ​ໄດ້​ເວົ້າ​ນໍາກັນ ​ແບ່ງປັນ​ຄວາມ​ຄິດ​ເຫັນ​ກັນ. ພວກ​ເຮົາ​ມີ​ລະບົບ​ການ​ຄ້າ​ເສລີ ທີ່​ກໍາລັງດໍາ​ເນີນ​ໄປ​ຢູ່​ໃນ​ຂະນະ​ນີ້ ລະຫວ່າງ​ສະຫະລັດ ​ແມັກ​ຊິ​ໂກ ​ແລະ​ຄາ​ນາ​ດາ ​ໂດຍ​ປາດ​ສະ​ຈາກ​ພົມ​ແດນ​ທາງ​ເສດຖະກິດ​ ​ແລະ​ເຮົາ​ມີ​ປະ​ເທດ​ເກາະ​ນ້ອຍໆ​ນີ້ ​ໃກ້​ບ້ານ​ເຮົາ ທີ່​ບໍ່​ປະກົດ​ວ່າ​ເປັນ​ໄພ​ຂົ່ມຂູ່​ຕໍ່​ສະຫະລັດ​ແຕ່​ຢ່າງ​ໃດ ທີ່​ພວກ​ເຮົາ​ກໍາລັງ​ໂດດ ດ່ຽວ​ຈາກ​ໂລກ​ນັ້ນ ມັນ​ບໍ່​ມີເຫດຜົນ​ຫຍັງ​ເລີຍ.”

​ສະຫະລັດ​ໄດ້​ຕັດ​ສາຍ​ສໍາພັນ​ທາງ​ການ​ທູດ​ກັບ​ຄິວ​ບາ​ໃນ​ປີ 1961 ຫຼັງ​ຈາກ ຜູ້​ນໍາ​ຄອມ​ມີ​ວນີສ Fidel Castro ຂຶ້ນມາ​ກໍາ​ອໍານາດ. ນອກ​ນີ້​ ສະຫະລັດ ຍັງ​ໄດ້ຫ້າມ​ການ​ຕິດ​ຕໍ່​ພົວ ພັນ​ທາງ​ເສດຖະກິດຢ່າງ​ເຄ່ງ​ຄັດ ​ກັບ​ເກາະ​ຄິວ​ບາ ຊຶ່ງ​ຕັ້ງ​ຢູ່​ຫ່າງ​ຈາກ​ລັດ​ຟລໍ​ຣິດາ​ຂອງ​ສະຫະລັດ​ ໄປ​ທາງ​ທິດ​ໃຕ້​ປະມານ 150 ກິ​ໂລແມັດ​ນັ້ນ. ​ແຕ່​ຫຼັງ​ຈາກການ​ເປັນ​ປໍ​ລະ​ປັກ ກັນ​ມາ ເປັນ​ເວລາ​ຫຼາຍ​ກວ່າ 50 ປີແລ້ວ​ນັ້ນ ຫຼາຍໆ​ຄົນ​ຈາກ​ທັງ​ສອງປະ​ເທດ ກໍຢາກ​ໃຫ້ ການ​ຫ້າມ​ດັ່ງ ກ່າວ​ນັ້ນ ​ຍຸຕິ​ລົງ.

Delia Maria Barroso ​ເປັນ​ຫົວໜ້າ​ຄະນະ​ເຕ້ນ​ລະ​ບໍາ Danzares ຂອງ​ຄິວ​ບາ.

ນາງ ບາຣາສ​ໂຊ ​ເວົ້າ​ວ່າ: “ຂ້າພະ​ເຈົ້າຄິດ​ວ່າ ພວກ​ຄົນ​ໃນ​ຂົງ​ເຂດ​ອາ​ເມຣິກາ​ເໜືອ ກໍ​ຄື​ກັນ​ກັບ​ຄົນ​ຄິວ​ບາ​ຫັ້ນ​ຫຼ່ະ ຄື​ມີ​ຄວາມ​ເປັນ​ຫ່ວງ​ເປັນ​ໃຍ​ ຮັກ ​ແພງຊຶ່ງ​ກັນແລະ​ກັນ ແລະ​ມີ​ຄວາມ​ປາດ​ຖະໜາ​ຈະ​ສະ​ແດງ​ຄວາມ​ຄິດ​ຄວາມ ​ເຫັນ ​ແລະ​ຕິດ​ຕໍ່​ຫາ​ກັນ. ຂ້າພະ​ເຈົ້າຄິດ​ວ່າ ສິ່ງທີ​່ພວກ​ເຮົາ​ທັງ​ໝົດຂາດເຂີນ​ນັ້ນ ກໍ​ຄື​ຄວາມ​ເປັນ​ໄປ​ໄດ້​ທີ່​ຈະ​ໄດ້​ຮັບ​ຄວາມ​ອົບ​ອຸ່ນອັນ​ນັ້ນ ​ເພື່ອ​ວ່າ​ພວກ​ເຮົາຈະ​ເຂົ້າ​ໃຈ​ຊຶ່ງ​ກັນ​ແລະ​ກັນ​ດີ​ຂຶ້ນ ເພາະວ່າ​ ຖ້າ​ຈະ​ເວົ້າ​ໄປ​ແລ້ວ ພວກ​ເຮົາ​ກໍ​ຄື​ເພື່ອນ​ບ້ານ​ກັນ​.”

​ຕະຫຼອດຫຼາຍໆ​ປີ​ຜ່ານມາ​ ການ​ເຄຶ່ອນ​ໄຫວ​ໃດ​ໆ​ ໂດຍບັນດາ​ນັກ​ການ​ເມືອງ​ສະຫະລັດ ​ເພື່ອຈະປັບປຸງ​ຄວາມ​ສໍາພັນ​ກັບ​ຄິວ​ບາ​ນັ້ນ ​ກໍ​ປາກົດ​ວ່າ​ ໄດ້​ຖືກ​ຂັດຂວາງ​ໂດຍ​ຊາວ​ອາ​ເມຣິກັນ​ເຊື້ອສາຍ​ຄິວ​ບາ ຄືພວກ​ທີ່​ໄດ້​ຫຼົບໜີ​ຈາກ​ການປົກຄອງ​ລະບອບ​ຄອມ​ມີ​ວນີສ ຊຶ່ງ​ສ່ວນ​ຫຼາຍ​ ໄປ​ອາ​ໄສ​ຢູ່​ໃນ​ລັດ​ຟລໍ​ຣິດາ. ​ແຕ່ພວກຄົນ​ລຸ້ນ​ໃໝ່ ຊາວ​ອາ​ເມຣິກັນ​ເຊື້ອ​ຄິວ​ບາ ທີ່​ເກີດຢູ່​ໃນ​ສະຫະ ລັດ ຕ້ອງການ​ຢາກ​ຈະ​ກັບ​ຄືນ​ໄປ​ຢ້ຽມຢາມ​ດິນ​ແດນ​ບັນພະບຸລຸດ​ຂອງ​ພວກເຂົາ​ເຈົ້າ​. ລັດຖະບານ​ໂອ​ບາ​ມາ ​ໄດ້​ອະນຸຍາດ​ໃຫ້​ມີ​ ອັນທີ່​ເອີ້ນ​ວ່າ ການ​ຢ້ຽມ ຢາມລະຫວ່າງ​ປະຊາຊົນກັບປະຊາຊົນ ອັນ​ເປັນ​ການ​ເປີດ​ໂອ​ກາດ​ໃຫ້​ຊາວ​ອາ​ເມຣິກັນ ​ເດີ​ນທາງ​ໄປ​ຄິວ​ບາ​ໄດ້ ຖ້າ​ຫາກ​ພວກ​ເຂົາ​ເຈົ້າ ມີ​ຄອບຄົວ​ຢູ່ທີ່​ນັ້ນ​ ຫຼື​ຢາກ​ໄປຢ້ຽມຢາມ​ ເພື່ອ​ເຫດຜົນ​ທາງ​ວັດທະນະ​ທໍາຫຼືສາສະໜາ. ທ່ານ ຈອນ ​ແຄຣີ ລັດຖະມົນຕີ​ຕ່າງປະ​ເທດ​ສະຫະລັດ ​ເວົ້າ​ເມື່ອ​ອາທິດ​ຜ່ານ​ມາ​ວ່າ ສະຫະລັດ​ຈະ​ສືບ​ຕໍ່​ປັບປຸງ​ນະໂຍບາຍຂອງ​ຕົນ ​ກ່ຽວ​ກັບ​ຄິວ​ບານັ້ນ ​ໃຫ້ເຂົ້າກັບ​ສະພາບ​ການ.

ທ່ານ ​ແຄ​ຣີ ​ເວົ້າ​ວ່າ: “ທຸກໆ​ປີ​ໃດ ຊາວ​ອາ​ເມ​ຣິກັນ ຫຼາຍ​ແສນ​ຄົນ ພາ ກັນ​ໄປ​ຢ້ຽມຢາມ​ເມືອງ​ຫຼວງຮາ​ວາ​ນາ ຂອງ​ຄິວ​ບາ ​ແລະເງິນ​ຈໍານວນ​ຫຼາຍ​ຮ້ອຍ​ລ້ານ​ໂດ​ລ່າ ​ໃນ​ຮູບ​ຂອງການ​ຄ້າ ແລະເງິນທີ່ສົ່ງ​ໃຫ້​ພີ່ນ້ອງຈາກສະຫະ ລັດ​ ຫຼັ່ງ​ໄຫຼ​ເຂົ້າ​ໄປ​ຍັງ​ຄິວ​ບາ. ພວກ​ເຮົາ​ມີ​ຄວາມ​ໝັ້ນ​ໝາຍ​ຕໍ່​ການແລ​ກປ່ຽນ​ກັນ​ລະຫວ່າງ ມະນຸດ​ກັບ​ມະນຸດ​ ອັນ​ນີ້​. ແລະ​ຢູ່​ໃນ​ສະຫະລັດ​ນີ້ ​ພວກ​ເຮົາ ​ເຊື່ອ​ວ່າ ​ແທ້ໆ​ແລ້ວ​ ພວກ​ປະຊາຊົນ​ຂອງເຮົາແມ່ນເປັນ​ທູດ​ສໍາພັນທີ່​ດີ​ທີ່​ສຸດ​ຂອງ​ເຮົາ.”

​ເວລາ​ນີ້ ​ປະກົດເຫັນ​ຮ່ອງຮອຍ​ວ່າ ລັດຖະບານ​ຄິວ​ບາ​ກໍາລັງ​ເລີ່​ມ​ໂຍະຍານ ຂໍ້​ຈໍາກັດ​ຮັດ​ແຄບ​ຕໍ່ສັງຄົມ​ຂອງ​ຕົນ​ລົງ​ແດ່​ແລ້ວ. ນາງ Yoani Sanchez ນັກຂຽນ​ປຶ້ມແລະ​ຜູ້​ຂຽນ​ລົງ​ເວັບ​ໄຊ້ ທີ່​ຄັດຄ້ານ​ລັດຖະບານ ​ໄດ້​ບອກ​ຜູ້​ຊົມ​ທີ່​ງານສະ​ແດງ​ວັນນະຄະດີບັ້ນ​ນຶ່ງ ທີ່​ເມືອງ Cartagena(ຄາ​ຕາ​ເຮ​ນາ) ປະ​ເທດ​ໂຄ​ລໍາ​ເບຍ​ ​ວ່າ ນາງ​ມີ​ແຜນການ​ຈະ​ເປີດ​ຕົວ​ໜັງສື ພິມ​ລະບົບ​ດິຈິໂຕ​ລ ຫຼືທາງ ອອນ​ລາຍ ສະບັບນຶ່ງ ​ໃນ​ບ້ານ​ເກີດ​ຂອງ​ນາງ ​ໃນ​ຄວາມ​ຄິດ​ເພື່ອ​ຂະຫຍາຍ​ເສລີພາບດ້ານ​ການຂ່າວ​ອອກ​ໄປ.

ນາງ Sanchez ​ເວົ້າ​ວ່າ: “ສິ່ງ​ທີ່​ຮ້າຍ​ແຮງ​ທີ່​ສຸດ​ ທີ່​ສາມາ​ດເກີດ​ຂຶ້ນ​ໄດ້ ກໍ​ຄື​ວ່າ ມື້​ທໍາ​ອິດ​ທີ່ເຮົາ​ເປີດ​ສື່​ດັງ​ກ່າວ​ຂຶ້ນມາ ພວກ​ເຂົາກໍ​ອາດຈະ​ພັງ​ປະຕູ​ເຂົ້າ​ມາ ​ແລະ​ປິດ​ກັ້ນ​ເວັບ​ໄຊ້ ຊຶ່ງ​ມັນ​ກໍອາດ​ຈະບໍ່​ຮ້າຍ​ແຮ​ງປານ​ໃດ​ ​ເພາະວ່າບໍ່​ມີ​ຫຍັງ​ໜ້າ​ສົນ​ໃຈ​ກວ່າ ສິ່ງ​ທີ່​ຖືກ​ຫ້າມ ​ແມ່ນ​ບໍ່? ​ແຕ່​ມັນ​ກໍ​ຍັງ​ເປັນ​ໄປ​ໄດ້​ເຊັ່ນ​ກັນ​ວ່າ ພວກ​ເຮົາ​ກໍາລັງ​ຈະເລີ່​ມປູກຮາກ​ເຫງົ້າຂອງ​ຂະ​ບວນການ​ໜັງສືພິມ ທີ່​ອາດ​ຈະຢູ່​ເໜືອ​ພວກ​ສື່​ໃນປັດຈຸບັນ​ນີ້ ​ແລະ​ກາຍ​ເປັນ​ໜັງສືພິມ​ຂອງ​ອະນາຄົດ​ໄດ້.”

ນາງ Sanchez ​ເວົ້າ​ວ່າ ຂະນະ​ນີ້ ລັດຖະບານ​ຄິວ​ບາກໍາລັງທໍາ​ການ​ຜ່ອນ​ສັ້ນ​ຜ່ອນ​ຍາວ ແດ່ໜ້ອຍ​ນຶ່ງແລ້ວ ຍ້ອນ​ວ່າ​ຕົນ​ ບໍ່​ສາມາດ​ເກ້​ຍກ່ອມ​ໃຫ້​ປະຊາຊົນໝັ້ນ​ໃຈ​ໄດ້​ອີກ​ຕໍ່​ໄປ​ແລ້ວ​ວ່າ ​ແດນ​ສະຫວັນ​ພາຍ​ໃຕ້​ລະບອບຄອມ​ມີ​ວນີວ ຂອງ​ຕົນ​ນັ້ນ ຈະ​ກາຍ​ເປັນ​ຈິງ​ຂຶ້ນ​ມາໄດ້​.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG