ບັນດານັກຄົ້ນຄວ້າອາວະກາດ ສະຫະລັດ ກ່າວວ່າ ມີ
“ຄວາມມະຫັດສະຈັນ” ແລະ “ພໍອົກພໍໃຈ” ທີ່ເຫັນ
ພາບຕ່າງໆ ໄດ້ຖືກນຳສົ່ງກັບຄືນມາ ໂດຍຍານສໍາຫຼວດ
New Horizons ໃນຂະນະທີ່ມັນເຄື່ອນຍ້າຍເຂົ້າໄປໃກ້
ດາວ ພະຍົມ ຫຼື Pluto ເທື່ອລະໜ້ອຍ.
ຍານສໍາຫຼວດດັ່ງກ່າວ ຈະບິນຜ່ານເຂົ້າໃກ້ດາວ ພະຍົມ ທີ່ສຸດ
ໃນວັນອັງຄານມື້ຮື ເມື່ອມັນຈະຢູ່ຫ່າງຈາກພື້ນຂອງ Pluto ພຽງ
ປະມານ 12,500 ກິໂລແມັດເທົ່ານັ້ນ.
ແຕ່ບັນດານັກວິທະຍາສາດ ໄດ້ມີຄວາມກະຕືລືລົນ ໂດຍອັນທີ່
ຍານ New Horizons ໄດ້ນຳສົ່ງກັບຄືນມາແລ້ວນັ້ນ ໂດຍເອີ້ນມັນວ່າ ເປັນທິວທັດອັນໃໝ່ຂອງດາວ Pluto.
ທ່ານ John Spencer ຈາກອົງການອາວະກາດແຫ່ງຊາດ
ສະຫະລັດ ຫຼື NASA ກ່າວໃນວັນເສົາວານນີ້ ວ່າ “ອັນທີ່
ພວກເຮົາເຫັນຢູ່ດຽວນີ້ ມັນມີແຕ່ຄວາມມະຫັດສະຈັນ
ພວກເຮົາກຳລັງເຫັນ ຮູບແບບລາຍສີດຳ ແລະ ສີຂາວ
ທີ່ໜ້າປະຫລາດໃຈເຫຼົ່ານີ້. ພວກເຮົາບໍ່ຮູ້ຈັກເລີຍວ່າ
ມັນໝາຍຄວາມວ່າແນວໃດ. ພວກເຮົາ ກຳລັງເຫັນ
ສິ່ງຕ່າງໆທີ່ມີຮູບແບບເປັນວົງກົມ ທີ່ພວກເຮົາສົງໄສ
ວ່າ ເປັນພວກຂຸມໃຫຽ່ເລິກທີ່ເກີດຈາກສະເກັດດາວ
ຕົກລົງໃສ່ ຫຼືວ່າ ແມ່ນສິ່ງອື່ນ ແລະ ພວກເຮົາມີຄວາມ
ຕື່ນເຕັ້ນຫຼາຍ ໃນການຄາດເດົາວ່າມັນແມ່ນຫຍັງແທ້ໆ.”
