ເຈົ້າໜ້າທີ່ທ້ອງຖິ່ນຄົນໜຶ່ງ ຢູ່ພາກໃຕ້ຂອງໂຊມາເລຍ ກ່າວວ່າ
ພວກຫົວຮຸນແຮງ al-Shabab ໄດ້ຢຶດເອົາຄ້າຍທະຫານ
ລັດຖະບານ 2 ແຫ່ງຢູ່ໃນເຂດ Lower Shabelle.
ຜູ້ປົກຄອງເຂດ Lower Shabelle ທ່ານ Abdulkadir
Mohamed Nur ກ່າວຕໍ່ວີໂອເອ ພະແນກພາສາ ໂຊມາເລຍ
ວ່າ ພວກຫົວຮຸນແຮງຕິດອາວຸດໜັກຈຳນວນນຶ່ງ ໄດ້ບຸກໂຈມຕີ
ເມືອງ Awdhegle ແລະ Mubarak ໃນຕອນເຊົ້າ ຂອງວັນສຸກ
ມື້ນີ້. ຄ້າຍທັງສອງ ແມ່ນຢູ່ຫ່າງຈາກນະຄອນຫຼວງ Mogadishu
ຂອງໂຊມາເລຍໄປທາງກ້ຳຕາເວັນຕົກ ປະມານ 75 ກິໂລແມັດ.
ທ່ານ Nur ກ່າວວ່າ ທະຫານລັດຖະບານຫຼາຍຄົນ ຖືກຂ້າຕາຍ ໃນການໂຈມຕີຄັ້ງນີ້. ທ່ານ
ກ່າວອີກວ່າ ທ່ານກຳລັງສົ່ງກອງທະຫານຈຳ ນວນໜຶ່ງ ໄປຢຶດເອົາເຂດດັ່ງກ່າວຄືນມາ.
ຄ້າຍທີ່ຖືກໂຈມຕີນັ້ນ ແມ່ນຖືກເຝົ້າຢາມໂດຍ ກອງທະຫານຈາກສະຫະພາບອາຟຣິກາ ຫຼື
AU ມາຮອດເມື່ອສອງເດືອນແລ້ວນີ້. ເມື່ອກອງທະຫານຂອງ AU ໄດ້ຍ້າຍອອກໄປແລ້ວ
ຄວາມຮັບຜິດ ຊອບທາງດ້ານຄວາມປອດໄພ ແມ່ນໄດ້ມອບໃຫ້ແກ່ທະຫານໂຊມາເລຍ.
ເມື່ອອາທິດແລ້ວນີ້ ລັດຖະມົນຕີຕ່າງປະເທດ ສະຫະລັດ ທ່ານ John Kerry ໄດ້ເດີນທາງ
ຢ້ຽມຢາມໂຊມາເລຍແບບທີ່ບໍ່ເຄີຍມີມາກ່ອນ ບ່ອນທີ່ທ່ານໄດ້ກ່າວວ່າ ສະຫະລັດຍິນດີ ທີ່
ຈະຊ່ອຍເຫຼືອ ເພື່ອສ້າງກອງທັບແຫ່ງຊາດໂຊມາເລຍ ແລະ ຊ່ອຍລວບລວມເອົາກອງກຳລັງ ໃນຂົງເຂດເຂົ້າຢູ່ໃນກຳລັງດັ່ງກ່າວ.
