ລິ້ງ ສຳຫລັບເຂົ້າຫາ

ທ່ານ Gates ສືບຕໍ່ຢ້ຽມຢາມ ອັຟການິສຖານ

  • ໄພສານ ວໍຣະຈັກ

ລັດຖະມົນຕີ ກະຊວງປ້ອງກັນປະເທດ ສະຫະລັດ ທ່ານ Robert Gates ໄດ້ໄປຢ້ຽມ ທະຫານອະເມຣິກັນ ຢູ່ໃນ ພາກໃຕ້ອັຟການິສຖານ ຂະນະທີ່ທະຫານສະຫະລັດພວມ ທຳການກວດລ້າງຂັບໄລ່ພວກກະບົດທາລີບານ ອອກໄປ ຈາກທີ່ໝັ້ນ ຂອງພວກເຂົາ.

ໃນວັນສຸກມື້ນີ້ ທ່ານ Gates ໄດ້ພົບກັບ ພວກທະຫານ ປະມານ 100 ຄົນ ທີ່ຄ້າຍແຫ່ງນຶ່ງ ໃກ້ໆເມືອງການດາຮາ ໂດຍເວົ້າວ່າ ຄວາມສຳເລັດ ຂອງພວກເຂົາເຈົ້າ ຢູ່ໃນເຂດດັ່ງກ່າວ ຈະສ້າງຄວາມແຕກຕ່າງ ໃຫ້ແກ່ການ ປະຕິບັດງານຕໍ່ຕ້ານພວກກະບົດ ຂອງອົງການເນໂຕ້ ໃນອັຟການິສຖານ.

ທ່ານໄດ້ສະແດງຄວາມເສົ້າສະຫຼົດໃຈ ຕໍ່ການເສຍຊີວິດຂອງພວກທະຫານ 8 ຄົນ ເມື່ອ ໄວໆມານີ້ ໃນການໂຈມຕີຂອງພວກກະບົດ ແລະເຕືອນວ່າ ຈະມີມື້ທີ່ເສົ້າໂສກ ແບບນີ້ ຕື່ມອີກໃນອະນາຄົດ.

ທະຫານຄົນນຶ່ງ ໄດ້ຖາມທ່ານ Gates ວ່າ ທະຫານສະຫະລັດ ຈະບຸກໂຈມຕີ ບ່ອນຫຼົບລີ້ ຂອງພວກກະບົດ ໃນປາກິສຖານ ທີ່ໄດ້ຂ້າມຊາຍແດນ ເຂົ້າມາໂຈມຕີ ກຳລັງຂອງອົງການ ເນໂຕ້ ໃນອັຟການິສຖານຫຼືບໍ່. ລັດຖະມົນຕີປ້ອງກັນປະເທດຂອງສະຫະລັດ ກ່າວວ່າ ຄວາມ ເປັນໄປ ໄດ້ໃນການພົວພັນທາງທະຫານໂດຍກົງຂອງສະຫະລັດ ໃນປາກິສຖານນັ້ນ ແມ່ນ ມີຕໍ່າຫຼາຍ.

ທ່ານ Gates ເວົ້າວ່າ ປາກິສຖານ ມີເປົ້າໝາຍທາງທະຫານ ຄືກັນກັບສະຫະລັດ ເພື່ອລຶບ ລ້າງບ່ອນຫຼົບລີ້ຂອງພວກກະບົດ. ແຕ່ທ່ານເວົ້າວ່າ ການເພັ່ງເລັງຂອງປາກິສຖານ ໃນປັດຈຸ ບັນ ໃສ່ການແກ້ໄຂວິກິດການໄພນໍ້າຖ້ວມ ຢູ່ໃນທົ່ວປະເທດນັ້ນ ຈະເຮັດໃຫ້ການບຸກ ໂຈມຕີ ພວກຫົວຮຸນແຮງຂອງປາກິສຖານ ຢູ່ໃນເຂດຊົນເຜົ່າ Waziristan ເໜືອ ມີການຊັກຊ້າໄປ ຊົ່ວໄລຍະນຶ່ງ.

XS
SM
MD
LG