ປະທານາທິບໍດີ ອາສຣາຟ ການີ ໄດ້ກ່າວໃນວັນອາທິດມື້ນີ້ ວ່າ ລັດຖະບານຂອງທ່ານ ບໍ່ໄດ້ໝັ້ນໝາຍວ່າ ຈະປ່ອຍພວກນັກໂທດຕາລີບານ 5,000 ຄົນ ອັນເປັນສ່ວນນຶ່ງຂອງຂໍ້ຕົກລົງສັນຕິພາບທີ່ເປັນຂີດໝາຍສຳຄັນ ທີ່ສະຫະລັດ ໄດ້ລົງນາມກັບ ກຸ່ມກະບົດອິສລາມ ຫຼື ກຸ່ມຕາລີບານ ເມື່ອວັນເສົາວານນີ້.
ທ່ານການີ ໄດ້ກ່າວທີ່ກອງປະຊຸມຖະແຫລງຂ່າວ ໃນນະຄອນຫຼວງກາບູລ ວ່າ ຂໍ້ຮຽກຮ້ອງໃຫ້ປ່ອຍພວກນັກໂທດກະບົດນັ້ນ ບໍ່ສາມາດເປັນ “ເງື່ອນໄຂຕໍ່ລອງ” ສຳລັບການເປີດການເຈລະຈາສັນຕິພາບພາຍໃນອັຟການິສຖານ ກັບກຸ່ມຕາລີບານ. ທ່ານໄດ້ຢືນຢັດວ່າ ຂໍ້ຮຽກຮ້ອງຂອງກຸ່ມກະຍົດ ອາດລວບລວມເຂົ້າໃນວາລະຂອງການສົນທະນາປຶກສາຫາລື ທີ່ຈະມີຂຶ້ນນັ້ນ.
“ອຳນາດໃນການປ່ອຍພວກນັກໂທດ ແມ່ນຂຶ້ນຢູ່ກັບລັດຖະບານອັຟການິສຖານ ແລະບໍ່ແມ່ນສະຫະລັດ” ທ່ານການີ ໄດ້ກ່າວໄປ ແລະກ່າວອີກວ່າ ລັດຖະບານຂອງທ່ານ ຈະບໍ່ຍອມຮັບເອົາການກົດດັນໃດໆ ກ່ຽວກັບເລື້ອງການແລກປ່ຽນນັກໂທດ.
ຂໍ້ຕົກລົງລະຫວ່າງ ສະຫະລັດ ແລະກຸ່ມຕາລີບານ ໄດ້ຖືກປະທັບຕາແລ້ວ ໃນວັນເສົາວານນີ້ ຢູ່ໃນປະເທດກາຕ້າ ໂດຍມີບັນດາຜູ້ຕາງໜ້າອະວຸໂສຂອງ 20 ປະເທດໃນທົ່ວໂລກ ເຂົ້າຮ່ວມເປັນສັກຂີພະຍານ ທີ່ກຳນົດໃຫ້ທຸກຝ່າຍຂອງອັຟການິສຖານ ເປີດການເຈລະຈາໂດຍກົງ ໃນວັນທີ 10 ມີນາ ຫຼື ພາຍໃນວັນດັ່ງກ່າວ ເພື່ອໃຫ້ຕົກລົງກັນ ກ່ຽວກັບ ການຢຸດຍິງຢ່າງຖາວອນໃນທົ່ວປະເທດ ແລະການແບ່ງປັນອຳນາດຮ່ວມກັນ.
ເຖິງຢ່າງໃດກໍຕາມ ບາງສ່ວນຂອງຂັ້ນຕອນ ທີ່ໄດ້ກຳນົດໃຫ້ເອົາ ກ່ອນໜ້າການເຈລະຈາ ປະກອບດ້ວຍ ການປ່ອຍນັກໂທດຕາລີບານ ຫຼາຍເຖິງ 5,000 ຄົນ ຈາກຄຸກຂອງອັຟການິສຖານ ແລະ ກຳລັງຮັກສາຄວາມສະຫງົບຂອງລັດຖະບານ ຫຼາຍເຖິງ 1,000 ຄົນ ຜູ້ທີ່ຖືກຄວບຄຸມຕົວໂດຍພວກກະບົດ.
ຂໍ້ຄວາມຂອງຂໍ້ຕົກລົງດັ່ງກ່າວອ່ານວ່າ “ສະຫະລັດ ໝັ້ນໝາຍທີ່ຈະເລີ້ມທຳງານຮ່ວມກັບທຸກຝ່າຍທີ່ກ່ຽວຂ້ອງທັງໝົດໃນທັນທີ ກ່ຽວກັບແຜນການທີ່ຈະປ່ອຍຕົວ ພວກນັກໂທດທີ່ເປັນນັກລົບແລະພວກນັກໂທດດ້ານການເມືອງແບບເລັ່ງລັດ ອັນເປັນມາດຕະການເພື່ອສ້າງຄວາມໝັ້ນໃຈ ດ້ວຍການປະສານງານແລະການຮັບຮອງໂດຍທຸກຝ່າຍທີ່ກ່ຽວຂ້ອງ.”
ບັນດາຜູ້ນຳອະວຸໂສຂອງກຸ່ມຕາລີບານ ໃນຂະນະທີ່ ກ່າວຖະແຫລງ ຕໍ່ບັນດານັກຂ່າວຢູ່ທີ່ພິທີລົງນາມຂໍ້ຕົກລົງ ໃນນະຄອນຫຼວງໂດຮາຂອງກາຕ້າ ໄດ້ກ່າວວ່າ ວໍຊິງຕັນ ໄດ້ໝັນໝາຍທີ່ຈະອຳນວຍຄວາມສະດວກ ໃນການແລກປ່ຽນນັກໂທດ ໂດຍຢືນຢັດວ່າ ການເຈລະຈາພາຍໃນອັຟການິສຖານ ຈະເລີ້ມຂຶ້ນ ຫຼັງຈາກ ພວກນັກໂທດກຸ່ມຕາລີບານ ຖືກປ່ອຍຕົວເປັນອິດສະຫລະ ເທົ່ານັ້ນ.
