ລັດຖະບານສາມັກຄີຊາດອັຟກາສິນຖານ ຫລັງຈາກຫລາຍເດືອນ ທີ່ມີບັນຫາໃນການເຈລະຈາ ໄດ້ລົງນາມໃນຮ່າງຂໍ້ຕົກລົງສັນຕິພາບ ທີ່ໄດ້ລ້າຊ້າມາເປັນເວລາດົນນານ ກັບກຸ່ມກະບົດ ທີ່ໃຫຍ່ສຸດເປັນອັນດັບສອງຂອງປະເທດ ທີ່ນຳພາໂດຍຂຸນເສິກທີ່ຫລົບລີ້ໜີກົດໝາຍ ທີ່ມີປະຫວັດໃນການກໍ່ອາຊະຍາກຳສົງຄາມ ແລະລະເມີດສິດທິມະນຸດ.
ການຢຸດຍິງຄັ້ງໃໝ່ທີ່ລົງນາມໃນວັນພະຫັດວານນີ້ ກັບກຸ່ມ Hizb-Islami ມີຂຶ້ນທ່າມກາງທີ່ມີຄວາມຫວັງວ່າ ມັນອາດຈະຊ່ວຍຫລຸດຜ່ອນບັນຫາທ້າທາຍໃນດ້ານຄວາມໝັ້ນ ທີ່ປະເຊີນໜ້າກັບອັຟການິສຖານຢູ່ໃນເວລານີ້ ແລະຊຸກຍູ້ໃຫ້ບັນດາກຸ່ມກະບົດອື່ນໆທີ່ສູ້ລົບຄຽງບ່າຄຽງໄຫລ່ກັບກຸ່ມ Taliban ເຂົ້າມາຮ່ວມຂັ້ນຕອນ ສັນຕິພາບ.
ນີ້ແມ່ນຂໍ້ຕົກລົງສັນຕິພາບຄັ້ງທຳອິດ ໃນຮອບ 15 ປີຂອງສົງຄາມໃນອັຟການິສຖານ ທີ່ກຸ່ມ Taliban ໄດ້ເລີ້ມຂຶ້ນ ຫລັງຈາກໄດ້ຖືກຂັບໄລ່ອອກໄປໂດຍກຳລັງພັນທະມິດ ພາຍໃຕ້ ການນຳພາສະຫະລັດ ໃນປີ 2001.
ກຸ່ມ Hizb-Islami ແມ່ນນຳພາໂດຍ ທ່ານ Gulbuddin Hekmatyar ຜູ້ບັນ ຊາການກອງໂຈນມາເປັນເວລາດົນນານ ຊຶ່ງກຳລັງຂອງທ່ານ ໄດ້ສູ້ລົບຕ້ານສະຫະພາບໂຊຫວຽດໃນ ຊຸມປີ 1980. ຫລັງຈາກນັ້ນຕໍ່ມາ ທະຫານຂອງທ່ານກໍໄດ້ສູ້ລົບກັບກຸ່ມ Taliban ເພື່ອເຂົ້າ ຄວບຄຸມອັຟການິສຖານ ລະຫວ່າງສົງຄາມກາງເມືອງທີ່ຮ້າຍແຮງໃນຊຸມປີ 1990.
ທີ່ປຶກສາດ້ານຄວາມໝັ້ນຄົງແຫ່ງຊາດອັຟການິສຖານ ທ່ານ Hanif Atmar ໄດ້ລົງນາມໃນຂໍ້ຕົກລົງນີ້ ກັບທ່ານ Karim Amin ຫົວໜ້າເຈລະຈາ ຂອງທ່ານ Hekmatyar ຢູ່ໃນພິທີ ທີ່ມີການຖ່າຍທອດອອກອາກາດທົ່ວປະເທດ.
ທ່ານ Atmar ກ່າວວ່າ ຂໍ້ຕົກລົງສັນຕິພາບ ກັບທ່ານ Hekmatyar ສະແດງໃຫ້ເຫັນເຖິງຄວາມຈິງໃຈຂອງລັດຖະບານທີ່ຈະແກ້ໄຂແລະຊອກຫາຊ່ອງທາງໃນການເຈລະຈາຢ່າງສັນຕິ ເພື່ອຍຸຕິບັນຫາຂັດແຍ້ງອັຟການິສຖານ.
ທ່ານກ່າວວ່າ “ພວກເຮົາໄດ້ສະແດງໃຫ້ເຫັນເຖິງການຕັດສິນໃຈຂອງພວກເຮົາ ແລະຂ້າ ພະເຈົ້າຂໍຮຽກຮ້ອງຕໍ່ກຸ່ມ Taliban ວ່າມັນເຖິງເວລາແລ້ວທີ່ພວກທ່ານ ທີ່ຈະມານັ່ງຢູ່ໂຕະ ເພື່ອເຈລະຈາສັນຕິພາບ ຖ້າຫາກພວກທ່ານມີຄວາມປາດຖະໜາດ້ວຍຄວາມຈິງໃຈ ເພື່ອຍຸຕິການສູ້ລົບ ແລະຄວາມຮຸນແຮງ ປ່ອຍໃຫ້ພວກເຈົ້າຫລຸດພົ້ນຈາກອິດທິພົນຂອງປາກິສຖານ ພວກຕ່າງປະເທດ ແລະກຸ່ມກໍ່ການ ຮ້າຍຕ່າງໆ ແລະຮັບເອົາລັດຖະທຳມະນຸນ ອັຟການິສຖານ. ພວກເຮົາພ້ອມແລ້ວ ທີ່ຈະສະເໜີຕໍ່ພວກທ່ານ ເຊັ່ນດຽວກັນກັບການຢຸດຍິງທີ່ພວກເຮົາໄດ້ເຮັດກັບກຸ່ມ Hizeb-Islami.”
