ຄະນະບໍລິຫານການສອບເສັງເຂົ້າມະຫາວິທະຍາໄລ ຫລື ACT ໃນວັນເສົາມື້ນີ້ ໄດ້ຍົກເລີກການສອບເສັງໃນເກົາຫຼີໃຕ້ ແລະຮົງກົງທັງໝົດ ຫລັງຈາກພວກເຈົ້າໜ້າທີ່ຢືນຢັນວ່າ ຂໍ້ສອບໄດ້ມີການຮົ່ວໄຫລ.
ໂຄສົກຂອງ ACT ທ່ານ Edward Colby ກ່າວວ່າ ທາງບໍລິສັດໄດ້ຍົກເລີກການສອບເສັງໃນນາທີສຸດທ້າຍ ໃຫ້ແກ່ຜູ້ເຂົ້າສອບເສັງປະມານ 5,500 ຄົນຢູ່ ສະຖານທີ່ຕ່າງໆ 56 ແຫ່ງ ຫລັງຈາກໄດ້ຮັບ “ຫລັກຖານທີ່ໜ້າເຊື່ອຖື” ກ່ຽວກັບການຮົ່ວໄຫລຂອງຂໍ້ສອບໃນວັນສຸກວານນີ້.
ທ່ານ Colby ກ່າວວ່າ ທ່ານເຊື່ອວ່າ ມັນເປັນເທື່ອທຳອິດທີ່ຮູ້ວ່າ ໄດ້ມີການຍົກເລີກການສອບເສັງຢູ່ໃນທົ່ວປະເທດ.
ທ່ານກ່າວວ່າ “ພວກເຮົາມີຄວາມເປັນຫ່ວງທີ່ສຸດກ່ຽວກັບກິດຈະການໃດໆກໍຕາມ ທີ່ອາດເປັນຜົນກະທົບຕໍ່ຄວາມເປັນທຳແລະຄວາມໜ້າເຊື່ອຖືຂອງການສອບເສັງ. ເວລາໃດສ່ວນບຸກຄົນພະຍາຍາມທີ່ຈະສ້າງຜົນປະກຳໄລໃນການລັກຂະໂມຍເອົາເອກກະສານຂໍ້ສອບ ແລະນຳໄປຂາຍແລ້ວ ມັນສາມາດສ້າງຄວາມເສຍຫາຍໃຫ້ ແກ່ນັກຮຽນຫລາຍພັນຄົນ ຜູ້ທີ່ບໍ່ໄດ້ເຮັດຫຍັງຜິດ ດັ່ງທີ່ມີຢູ່ໃນກໍລະນີດັ່ງກ່າວນີ້.”
ທ່ານ Colby ບໍ່ໄດ້ກ່າວວ່າ ມັນເກີດຂຶ້ນໄດ້ຢ່າງໃດ ຫລືຂໍ້ສອບໄດ້ຖືກລັກເອົາຢູ່ໃສ ແຕ່ກໍໄດ້ກ່າວວ່າ ພວກທີ່ມີກຳນົດເຂົ້າສອບເສັງນັ້ນຈະໄດ້ຮັບເງິນຄືນ. ທ່ານກ່າວວ່າ ອົງການສອບເສັງ ACT ຈະບໍ່ມີຂຶ້ນອີກຈົນເທົ່າເດືອນກັນຍາ.
ເກົາຫລີໃຕ້ມີປະຫວັດການປະຕິບັດທີ່ບໍ່ຖືກຕ້ອງ ເວລາກ່າວເຖິງການສອບເສັງທີ່ ມີການກະກຽມໄວ້ລ່ວງໜ້າ. ໃນປີ 2013 ຄະນະກຳມະການມະຫາວິທະຍາໄລ ຊຶ່ງເປັນບໍລິສັດຄວບຄຸມການສອບເສັງ SAT ໄດ້ຍົກເລີກການສອບເສັງທີ່ຄ້າຍ ຄືກັນນີ້ ຢູ່ທົ່ວປະເທດ ຫລັງຈາກຂໍ້ສອບໄດ້ມີການຮົ່ວໄຫລ.
