ຂ່າວ ສະຖານະການໃນອັຟການີສຖານ: ຣັຖບານອັຟການີສຖານກ່າວວ່າ ການໂຈມຕີທາງອາກາດຂອງກຸ່ມເນໂຕ ໄດ້ສັງຫານພວກພົນລະເຮືອນ ຢ່າງນ້ອຍ 27 ຄົນໃນພາກໃຕ້ຂອງອັຟການີສຖານ. ສະພາຣັຖມຸນຕີ ອອກຖະແຫລງການສະບັບນຶ່ງໃນວັນຈັນມື້ນີ້ ທຳການປະນາມເຫດການທ່ີເກີດຂຶ້ນວ່າ ບໍ່ມີເຫດຜົນອັນ ໃດ ມາສະໜັບສະໜຸນໄດ້ເລີຍ. ຄຳປະກາດຂອງຣັຖບານໄດ້ຫລຸດຈຳ ນວນຄົນຕາຍລົງ ຈາກ 33 ຄົນ ທີ່ໄດ້ປະກາດໄປກ່ອນໜ້ານີ້. ທາງຝ່າຍເນໂຕ ກ່າວຢູ່ໃນຖະແຫລງການສະບັບນຶ່ງວ່າ ກຳລັງຂອງຕົນໄດ້ແນເປົ້າໝາຍໃສ່ພວກກະບົດໃນແຂວງ Uruzgan ແລະວ່າການໂຈມຕີທາງອາກາດບັ້ນນຶ່ງ ໄດ້ສັງຫານ ແລະເຮັດໃຫ້ພວກພົນລະເຮືອນຫລາຍຄົນເສັຍຊີວິດແລະບາດເຈັບໂດຍບັງເອີນ ແຕ່ບໍ່ໄດ້ບອກຈຳນວນພວກເຄາະຮ້າຍໃຫ້ຮູ້.
ນາຍພົນ Stanley McChrystal ຜູ້ບັນຊາການກຳລັງນາໆຊາດທ່ີອັຟການີສຖານໄດ້ສະແດງຄວາມ ເສັຍໃຈນຳເຫດການດັ່ງກ່າວ ໂດຍກ່າວວ່າ ການເຮັດໃຫ້ພວກພົນລະເຮືອນບາດເຈັບຫລືເສັຍຊີວິດ ເປັນ ການບ່ອນທຳລາຍຄວາມໄວ້ວາງໃຈຂອງປະຊາຊົນອັຟການີສຖານ ໃນ ພາລະກິດຂອງກຸ່ມເນໂຕນັ້ນ. ແຂວງ Uruzgan ຕັ້ງຢູ່ໃນພາກຕາເວັນອອກສຽງເໜືອຂອງແຂວງHelmand ບ່ອນທ່ີກອງກຳລັງຂອງກຸ່ມເນໂຕ ແລະອັຟການີສຖານພວມທຳການກວດລ້າງຄັ້ງໃຫຍ່ ຕໍ່ພວກກະບົດຕາລີບັນ.
ເຣື່ອງນີວເຄລັຍຂອງອິຣ່ານ: ອິຣ່ານກ່າວວ່າ ຕົນກຳລັງວາງແຜນທ່ີຈະເລີ້ມສ້າງໂຮງງານກັ່ນທາດ ຢູເຣນຽມໃໝ່ເພື່ອຍົກລະດັບຫລືເກຣດຂຶ້ນອີກ 2 ແຫ່ງ. ສື່ມວນຊົນແຫ່ງ ຣັດອິຣ່ານ ອ້າງຄຳເວົ້າຂອງທ່ານ Ali Akbar Salehi ຫົວໜ້າໂຄງ ການນີວເຄລັຍຂອງອິຣ່ານ ໃນວັນຈັນມື້ນີ້ວ່າ ການກໍ່ສ້າງໂຮງງານກັ່ນທາດຢູເຣນຽມໃໝ່ ຈະເລີ້ມຂຶ້ນໃນປີໜ້າ ຕາມປະຕິທິນຂອງອິຣ່ານ ຊຶ່ງ ເລີ້ມຕົ້ນຂຶ້ນໃນເດືອນມີນາໜ້ານີ້.
ອິຣ່ານໄດ້ປະກາດໃຫ້ຮູ້ໃນເດືອນພະຈິກປີຜ່ານມານີ້ ແຜນການຈະສ້າງໂຮງກັ່ນທາດຢູເຣນຽມໃໝ່ 10 ແຫ່ງ ເພິ່ມໃສ່ນຶ່ງແຫ່ງທ່ີຕົນມີຢູ່ໃນປັດ ຈຸບັນທ່ີເມືອງ Natanz ນັ້ນ ໃນຂະນະທ່ີອິຣ່ານສືບຕໍ່ທ້າທາຍຕໍ່ຄຳຮຽກ ຮ້ອງຂອງນາໆຊາດເພື່ອໃຫ້ຕົນຢຸດການກັ່ນທາດຢູເຣນຽມນັ້ນ.ສະຫະຣັດແລະພວກປະເທດມະຫາອຳນາດອື່ນໆ
ພາກັນຢ້ານກົວວ່າ ການຍົກລະດັບທາດຢູເຣນຽມເພ່ີມຂຶ້ນຂອງອິຣ່ານນີ້ ອາດສາມາດມີວັດ ຖຸປະສົງເພື່ອຜລິດອາວຸດນີວເຄລັຍກໍໄດ້ ແຕ່ທາງກຸງເຕຮິຣ່ານຢືນຢັດວ່າ ໂຄງການນີວເຄລັຍຂອງຕົນແມ່ນເພ່ືອເປົ້າໝາຍທາງສັນຕິເທົ່ານັ້ນ. ຣັຖບານກຸງວໍຊິງຕັນໄດ້ນຳພາ ຄວາມພະຍາຍາມເພື່ອໃຫ້ມີການລົງໂທດຄັ້ງທີສ່ີຂອງສະຫະປະຊາຊາດຕໍ່ອິຣ່ານ ຍ້ອນກິດຈະກຳດ້ານນີວເຄລັຍຂອງອິຣ່ານນັ້ນ.
ໃນວັນອາທິດວານນີ້ ນາຍພົນ David Petraeus ແຫ່ງສະຫະຣັດ ກ່າວວ່າ ສະຫະຣັດຈະທຳຄວາມກົດດັນເພີ່ມຂຶ້ນອີກຕໍ່ອິຣ່ານ ໂດຍກ່າວວ່າ ຕົນໄດ້ໃຫ້ໂອກາດທຸກຢ່າງແກ່ຣັຖບານກຸງເຕຮິຣ່ານແລ້ວ ເພື່ອໃຫ້ແກ້ໄຂບັນຫາຂັດແຍ່ງກັນນີ້ໂດຍຜ່ານທາງການທູດ.
ຄວາມວຸ້ນວາຍທີ່ຟີລິບປິນ: ບັນດານາຍທະຫານຟີລິບປິນກ່າວວ່າ ຜູ້ບັນຊາການສູງສຸດຂອງກຸ່ມ Abu Sayyaf ທ່ີມີສາຍພົວພັນກັບກຸ່ມ al-Qiada ໄດ້ເສັຍຊີວິດໄປໃນ ການສູ້ຣົບກັນໃນເຂດພາກໃຕ້ທີ່ວຸ້ນວາຍ ໃນຕອນເຊົ້າວັນອາທິດວານນີ້.
ນາຍພົນໂທ Benjamin Dolorfino ກ່າວຕໍ່ບັນດານັກຂ່າວວ່າ ທາງ ກອງທັບໄດ້ຢືນຢັນວ່າ ນາຍ Albader Parad ແມ່ນຮວມຢູ່ໃນພວກນັກຕໍ່ສູ້ຫົວຮຸນແຮງ 6 ຄົນທ່ີເສັຍຊີວິດໄປໃນການຍິງຕໍ່ສູ້ ກັນເທິງເກາະ Jolo ນັ້ນ. ນາຍ Parad ໄດ້ເປັນຜູ້ນຳພາໃນ ການລັກພາໂຕ ໃນປີແລ້ວນີ້ ພວກພນັກງານສະພາກາແດງ 3 ຄົນ ທີ່ໄດ້ຖືກປ່ອຍໂຕເປັນອິດສະຣະໃນ ເວລາຕໍ່ມາ. ນາຍພົນ Dolorfino ກ່າວວ່າ ການສັງຫານນາຍ Paradເປັນຄວາມສຳເຣັດອັນຍິ່ງ ໃຫຍ່ສຳລັບກອງທັບ. ບັນດານາຍທະຫານອື່ນໆອີກເວົ້າວ່າ ນ້ອງຊາຍຂອງນາຍ Parad ຄືນາຍ Umbra Jumdail ຊຶ່ງເປັນແກນນຳຂອງກຸ່ມ Abu Sayyaf ກໍໄດ້ຖືກຂ້າຕາຍເຊັ່ນກັນ. ກອງທັບຟີລິບປິນ ກ່າວວ່າ ທະຫານຝ່າຍຣັຖ ບານ 3 ຄົນໄດ້ຮັບບາດເຈັບໃນການປະທະກັນຄັ້ງນີ້.
ໃນວັນສຸກຜ່ານມານີ້ ທາງການຟີລິບປິນປະກາດໃຫ້ຊາບວ່າ ເຂົາເຈົ້າໄດ້ຈັບກຸມຊາຍຄົນນຶ່ງທ່ີສົງໄສວ່າເປັນກະບົດມຸສລິມ ທ່ີຖືກກ່າວຫາວ່າ ເປັນຜູ້ລັກພາໂຕນັກທ່ອງອາເມຣິກັນ 3 ຄົນໄປເມື່ອ 9 ປີກ່ອນນີ້ ແລະວ່າ ນາຍ Jumadail Arad ໄດ້ຖືກຈັບກຸມໃນວັນພະຫັດຜ່ານມາ ທ່ີທ່າເຮືອແຫ່ງນຶ່ງໃນກຸງມານີລາ.
ສະຫະຣັດແລະໄຕ້ຫວັນ: ລາຍງານຂອງກະຊວງປ້ອງກັນປະເທດສະຫະຣັດສະບັບນຶ່ງກ່າວວ່າ ຝຸງເຮືອບິນຣົບໄອພົ່ນຂອງໄຕ້ຫວັນ ບໍ່ສາມາດທ່ີຈະຕໍ່ຕ້ານການໂຈມຕີຈາກຈີນໄດ້ ຍ້ອນວ່າພວກເຮືອບິນຣົບເຫລົ່ານີ້ເກົ່າແກ່ລ້າສະໄໝ ແລະມີບັນຫາໃນການບຳລຸງຮັກສາ. ລາຍງານດັ່ງກ່າວ ທ່ີອົງການສືບລັບຂອງກະຊວງປ້ອງກັນປະເທດຂອງ ສະຫະຣັດ ນຳອອກເປີດເຜີຍອອກທ່ີໄຕ້ຫວັນ ກ່າວວ່າເຖິງແມ່ນເກະໄຕ້ ຫວັນມີເຮືອບິນຣົບເກືອບຮອດ 400 ລຳຢູ່ໃນບັນຊີຂອງຕົນກໍຕາມ ແຕ່ພວກເຮືອບິນທີ່ສາມາດໃຊ້ປະຕິບັດການໄດ້ແທ້ໆນັ້ນ ແມ່ນມີໜ້ອຍກ່ວານັ້ນຫລາຍ.
ການເປີດເຜີຍລາຍງານສະບັບນີ້ ຊຶ່ງເປັນການກະທຳຕາມຄຳສັ່ງຂອງ ຣັຖສະພາສະຫະຣັດ ແມ່ນມີຂຶ້ນໃນທ່າມກາງທ່ີໄຕ້ຫວັນກຳລັງທຳ ຄວາມພະຍາຍາມສືບຕໍ່ມາ ເພື່ອຂໍຊື້ເຮືອບິນຣົບຮຸ່ນ F-16 ທ່ີທັນສະໄໝຫລາຍກ່ວາລຸ້ນທີ່ໄຕ້ຫວັນມີຢູ່ນັ້ນ ຈາກສະຫະຣັດ 66 ລຳ.
ຈີນໄດ້ສະແດງປະຕິກິຣິຍາຢ່າງໂກດແຄ້ນໃນເດືອນແລ້ວນີ້ ຫລັງຈາກ ຣັຖບານປະທານາທິບໍດີບາຣັກໂອບາມາ ເປີດເຜີຍໂຄງການຂາຍອາວຸດຊຸດທຳອິດຂອງຕົນໃຫ້ໄຕ້ຫວັນ ແຕ່ບໍ່ມີເຮືອບິນ F-16 ໂຮມຢູ່ນຳນັ້ນ.
ທີ່ມຽນມ້າ: ມີລາຍງານຂ່າວວ່າ ພວກອຳນາດປົກຄອງທະຫານມຽນມ້າ ຕຽມພ້ອມ ທ່ີຈະອອກກົດລະບຽບໃໝ່ ທ່ີຈະຮັດເຄັ່ງການຄວບຄຸມຂອງຕົນຕໍ່ພວກ ພຣະສັງສາດສະໜາພຸດຢູ່ໃນປະເທດ ລ່ວງໜ້າການເລືອກຕັ້ງທົ່ວໄປທ່ີຈະມີຂຶ້ນໃນປີນີ້. ໜັງສືພິມ Myanma Ahlin ຂອງທາງການ ແຈ້ງໃຫ້ຊາບວ່າ ທ່ານ Ashin Kumara ປະທານຄນະກັມມະການຄວບຄຸມສົງຂອງຣັຖບານ ຫລືຄນະກັມມະການສົງ ຈະຮຽກກອງປະຊຸມພວກເຈົ້າອາວາດອາວຸໂສ ຊຶ່ງຈະມີການປະກາດຫລັກຊີນຳໃໝ່ຕ່າງໆໃຫ້ຮູ້ ຢູ່ໃນກອງປະຊຸມນັ້ນ.
ນັບແຕ່ມີການເດີນຂະບວນປະທ້ວງຂອງພະສົງຄັ້ງໃຫຍ່ໃນເດືອນກັນຍາ ປີ2007ເປັນຕົ້ນມາ ພວກພຣະສົງໃນທົ່ວປະເທດໄດ້ຖືກຄວບຄຸມຢ່າງເຄັ່ງຄັດຈາກຣັຖບານທະຫານ. ບັນດາຜູ້ສັງເກດການກ່າວວ່າ ເປັນທ່ີ ຈະແຈ້ງວ່າ ຣັຖບານທະຫານມຽນມ້າ ກຳລັງພະຍາຍາມຈະຄວບຄຸມ ການຄັດຄ້ານຕໍ່ການເລືອກຕັ້ງທ່ີອາດຈະມີຂຶ້ນໄປໄດ້ ຈາກພວກພຣະສົງນັ້ນ. ຣັຖບານມຽນມ້າໄດ້ກ່າວວ່າ ການເລືອກຕັ້ງຈະມີຂຶ້ນໃນທ້າຍປີນີ້ ເພື່ອຫັນປ່ຽນປະເທດໄປສູ່ລະບອບປະຊາທິປະໄຕ ແຕ່ບໍ່ໄດ້ແຈ້ງວັນເວລາໃຫ້ຊາບ.
ກ່ຽວກັບເຮຕີ: ປະທານາທິບໍດີເຮຕີ ກ່າວວ່າ ຈຳນວນຜູ້ເສັຍຊີວິດຈາກໄພແຜ່ນດິນໄຫວຄັ້ງຮ້າຍແຮງໃນເດືອນ ແລ້ວນີ້ ສາມາດມີເຖິງ 3 ແສນຄົນໄດ້ ເວລາໃດໄດ້ມີການກູ້ເອົາຊາກສົບຂອງຜູ້ເຄາະຮ້າຍທ່ີຖືກຖົມຢູ່ກ້ອງສິ່ງຫັກພັງຂອງອາຄານຕ່າງໆ ອອກມາໄດ້ໝົດແລ້ວ. ທ່ານ Rene Preval ກ່າວໃນມື້ວານນີ້ວ່າ ໄດ້ມີການ ເກັບກູ້ເອົາຊາກສົບ ມາຈາກຖະໜົນຫົນທາງ ໄດ້ຫລາຍກ່ວາສອງແສນສົບ ແຕ່ກໍເຊື່ອວ່າຍັງມີສົບຄົນອື່ນໆອີກເປັນຈຳນວນຫລວງຫລາຍ ຕົກຄ້າງຢູ້ໃຕ້ຊາກ ຫັກພັງຕ່າງໆ.
ທ່ານ Preval ໄດ້ມີຄວາມເຫັນດັ່ງກ່າວ ຕໍ່ກອງປະຊຸມພວກຜູ້ນຳປະເທດໃນເຂດອາເມຣິກາລາຕິນແລະໃນເຂດທະເລກາຣິບບຽນ ທ່ີເມັກຊິໂກ ຊຶ່ງທ່ານໄດ້ກ່າວຕື່ມວ່າ ຄວາມຮຽກຮ້ອງຕ້ອງການອັນຮີບດ່ວນທ່ີສຸດຂອງເຮຕີໃນເວລານີ້ ແມ່ນການກໍ່ສ້າງບ່ອນຢູ່ອາໄສສຸກເສີນໃຫ້ແກ່ ພວກທີ່ໄດ້ຮັບເຄາະທັງຫລາຍ.
ເວລານີ້ ປະຊາຊົນເຮຕີໃນຈຳນວນປະມານ 1 ລ້ານ 5 ແສນຄົນຍັງພາກັນພັກພາອາໄສຢູ່ໃນຄ້າຍຕູບຜ້າຕັ້ງ ທ່ີຢູ່ກັນຢ່າງໜາແໜ້ນ ແລະ
ພວກພນັກງານຊ່ອຍເຫລືອບັນເທົາທຸກ ກ່າວວ່າ ສະພາບການດັ່ງກ່າວສາມາດພາໃຫ້ເກີດໂຣກລະບາດຂຶ້ນໄດ້ ເວລາລະດູຝົນເລີ້ມຂຶ້ນໃນເດືອນມີນາໜ້ານີ້.
ແຜ່ນດີນໄຫວທ່ີເກີດຂຶ້ນເມື່ອວັນທີ 12 ມັງກອນຜ່ານມານີ້ ໄດ້ເຮັດໃຫ້
ນະຄອນຫລວງ Port-au-Prince ຂອງເຮຕີແລະພວກຂົງເຂດອ້ອມແອ້ມ ຢູ່ໃນສະພາບພັງທະລາຍ ເກືອບວ່າຢ່າງສີ້ນເຊີງ.
ວັນເສົາ, ໒໗ ກໍລະກົດ ໒໐໒໔
