ອີຣັກ: ຕຳຣວດອີຣັກ
ກ່າວວ່າ ການໂຈມຕີ ດ້ວຍຣະເບີດ ສະລະຊີບ 2 ຄັ້ງ ທີ່ເມືອງ RAMADI
ທາງພາກ ຕາເວັນຕົກ ຂອງອີຣັກ ເຮັດໃຫ້ ມີຜູ້ເສັຽຊີວິດ ຢ່າງນ້ອຍ 20 ຄົນ
ແລະໄດ້ຮັບບາດເຈັບອີກ ຫລາຍກວ່າ 30 ຄົນ. ຕຳຣວດເວົ້າວ່າ ເປັນທີ່ປາກົດວ່າ
ການໂຈມຕີ ດ້ວຍຣະເບີດ ສະລະຊີບ ໃນວັນພຸດມື້ນີ້ ແມ່ນ ແນເປົ້າໝາຍ ໃສ່ເຈົ້າໜ້າທີ່ອະວຸໂສ ໃນແຂວງ ANBAR ຊຶ່ງມີ ເມືອງ RAMADI ເປັນເມືອງ ເອກຫລືທີ່ວ່າ ການແຂວງນັ້ນ. ເຂົາເຈົ້າເວົ້າວ່າ ເຫດຮ້າຍເລີ້ມຂຶ້ນ ດ້ວຍການໂຈມຕີ
ໂດຍຣົດຣະເບີດ ສະລະຊີບ ເທິງເສັ້ນທາງ ໃກ້ໆໂຮງການ ເຈົ້າແຂວງໆ ANBAR ຄືທ່ານ
QASSIM MOHAMMED AL-FAHDAWI. ຕຳຣວດກ່າວວ່າ ຜູ້ໂຈມຕີ ດ້ວຍຣະເບີດ
ສະລະຊີບອີກຄົນນຶ່ງ ທີ່ຍ່າງໄປ ໄດ້ບີບຄະນວນຣະເບີດ ໃຫ້ແຕກຂຶ້ນ
ໃນເວລາຕໍ່ມາ ບໍ່ດົນ ຫລັງຈາກທ່ານ AL-FAHDAWI ໄດ້ອອກຈາກ ໂຮງການໄປ
ເພື່ອໄປກວດເບິ່ງ ຄວາມເສັຽຫາຍ ຈາກເຫດຣະເບີດ ຄັ້ງທຳອິດ. ການໂຈມຕີຄັ້ງທີ 2
ເຮັດໃຫ້ເຈົ້າແຂວງ ໄດ້ຮັບບາດເຈັບ ແລະເຮັດໃຫ້ຜູ້ຊ່ອຍ ຜູ້ບັນຊາການຕຳຣວດ
ຂອງທ່ານເສັຽຊີວິດ.
ສາຍການບິນ: ປະທານາທິບໍດີ ສະຫະຣັດ ທ່ານ BARACK OBAMA ກ່າວວ່າຄວາມ ລົ້ມແຫລວ ຢ່າງເປັນຣະບົບ ຂອງບັນດາຜແນກ ການຮັກສາຄວາມປອດພັຍ ຂອງສະຫະຣັດ
ໄດ້ເປີດໂອກາດ ໃຫ້ມີການພະຍາຍາມ ວາງຣະເບີດ ໃສ່ເຮືອບິນໂດຍສານ
ທີ່ມຸ່ງໜ້າມາຍັງ ນະຄອນ DETROIT ໃນວັນບຸນຄຣິສຕ໌ມາສນັ້ນ. ໃນການຖແລງ
ຈາກຣັດຮາວາຍ ໃນມື້ວານນີ້ ທ່ານ OBAMA ກ່າວວ່າ ຜແນກການຕ່າງໆ
ບໍ່ໄດ້ແຈ້ງໃຫ້ກັນແລະກັນຊາບ ຢ່າງຖືກຕ້ອງ ຕາມກົດລະບຽບ
ກ່ຽວກັບຂໍ້ມູນຕ່າງໆ ຫລັງຈາກ ໄດ້ຮັບຄຳເຕືອນ ຈາກບິດາ ຂອງຜູ້ຊາຍ ຊາວໄນຈີເຣັຽ
ທີ່ເປັນຜູ້ຕ້ອງສົງສັຍ ໃນການຈະບີບ ຄະນວນຣະເບີດ ໃຫ້ແຕກຂຶ້ນ
ຢູ່ເທິງເຮືອບິນໂດຍສານ ຂອງສາຍການບິນ NORTHWEST ຫລື DELTA ນັ້ນ.
ປະທານາທິບໍດີ OBAMA ເອີ້ນຄວາມບົກຜ່ອງ ໃນການຮັກສາ ຄວາມປອດພັຍ
ດັ່ງກ່າວນີ້ວ່າ ເປັນສິ່ງທີ່ຮັບເອົາບໍ່ໄດ້ ແລະກ່າວວ່າ ສະຫະຣັດຕ້ອງໄດ້ແກ້ໄຂ
ຂໍ້ຂາດຕົກບົກຜ່ອງ ໃນການຮັກສາ ຄວາມປອດພັຍປະເທດ ຢ່າງໄວວາ.
ລາວ - ມົ້ງ - ໄທ: ຣັຖບານລາວ ໄດ້ປະຕິເສດ ຕໍ່ຄຳຮ້ອງຂໍ
ຂອງອົງການ ສະຫະປະຊາດ ທີ່ຂໍໄປຢ້ຽມຢາມຊາວມົ້ງ ຈຳນວນຫລາຍກ່ວາ 4500
ຄົນ ທີ່ຖືກເຈົ້າໜ້າທີ່ໄທ ບັງຄັບຈັດສົ່ງ ກັບຄືນປະເທດລາວນັ້ນ.
ໂຄສົກກະຊວງ ການຕ່າງປະເທດລາວທ່ານນື່ງກ່າວວ່າ ທາງການລາວ
ຈະຍິນດີຕ້ອນຮັບພວກສັງເກດການນາໆຊາດ ໃນພາຍຫລັງ
ຫລັງຈາກທີ່ຂັ້ນຕອນການ ຈັດຕັ້ງຖິ່ນຖານໃໝ່
ໃຫ້ພວກຊາວມົ້ງເຫລົ່ານັ້ນ ສຳເລັດເສັດສີ້ນລົງແລ້ວ.
ເຈົ້າໜ້າທີ່ໄທເວົ້າວ່າ ຕົນໄດ້ຈັດສົ່ງຊາວມົ້ງ 4 ພັນກວ່າຄົນກັບ ຄືນໄປລາວ
ໃນມື້ວັນຈັນຜ່ານມາ. ໃນນັ້ນ ແມ່ນມີຮວມທັງ ພວກຊາວມົ້ງ 158 ຄົນ ທີ່ທາງ ອົງການ
ສະຫະປະຊາຊາດ ໄດ້ຮັບຮູ້ ຢ່າງເປັນທາງການວ່າ ເປັນອົພຍົບ. ການຈັດສົ່ງຊາວມົ້ງ
ກັບຄືນໄປລາວ ໄດ້ພາໃຫ້ເກີດ ຄວາມວິຕົກກັງວົນຢ້ານວ່າ ພວກຊາວມົ້ງ ຈະຖືກລົງໂທດ
ໂດຍເຈົ້າໜ້າທີ່ລາວ. ແຕ່ໄທເວົ້າວ່າ ຕົນໄດ້ຮັບ ການຄ້ຳປະກັນ ຈາກຣັຖບານລາວວ່າ
ຊາວມົ້ງເຫລົ່ານີ້ ຈະບໍ່ຖືກລົງໂທດ. ອົງການອົພຍົບ ຂອງສະຫະປະຊາຊາດ ກ່າວວ່າ
ຕົນໄດ້ຍື່ນຄຳຮ້ອງຂໍ ຢ່າງເປັນທາງການ ໄປຍັງຣັຖບານລາວແລ້ວ
ເພື່ອຂໍໄປຢ້ຽມຢາມຊາວມົ້ງ ຈຳນວນຫລາຍພັນຄົນ ທີ່ໄດ້ຖືກສົ່ງ ກັບຄືນໄປລາວ
ຈາກປະເທດໄທນັ້ນ.
ຣັຖສະພາ - ມົ້ງ:
ກ່ອນໜ້ານີ້ ສະມາຊິກສະ ພາຕ່ຳ ILLEANA ROS-LEHTINEN ຂອງ ພັກຣີພັບຣີກັນ
ຈາກຣັດຟລໍຣິດາ ຊຶ່ງເປັນສະມາ ຊິກອະວຸໂສ ຂອງພັກຣີພັບຣີກັນ ໃນ ຄະນະກັມມະການ
ກິຈການຕ່າງປະເທດ ຂອງສະພາຕ່ຳ ສະຫະຣັດ ແລະປະທານ ຄະນະກັມມະການ ທ່ານ HOWARD
BERMAN ຊຶ່ງເປັນ ສະມາຊິກ ສະພາຕ່ຳຂອງພັກເດໂມແຄຣັທ ຈາກຣັດແຄລິຟໍເນັຽ
ກໍໄດ້ອອກ ຖແລງການສະບັບນຶ່ງ ຕອບຕໍ່ການບັງຄັບ ຈັດສົ່ງຊາວມົ້ງ
ຈຳນວນຫລາຍພັນຄົນ ຈາກປະເທດໄທ ກັບຄືນໄປລາວນັ້ນ ຊຶ່ງມີໃຈຄວາມວ່າ: ການຕັດສິນໃຈ
ຂອງຣັຖບານໄທ ໃນການຈັດສົ່ງ ຊາວລາວເຜົ່າມົ້ງ ຈຳນວນ 4 ພັນ 500 ກວ່າຄົນ
ກັບຄືນໄປລາວນັ້ນ ໄດ້ສ້າງ ຄວາມວິຕົກກັງວົົນ ເປັນທີ່ສຸດ. ຮວມຢູ່ໃນ
ພວກທີ່ຖືກສົ່ງ ກັບຄືນໄປນັ້ນ ຈຳນວນນຶ່ງ ແມ່ນຍັງສືບຕໍ່ ປະເຊີນກັບ
ການຖືກປະຫັດປະຫານ ທີ່ເຂົາເຈົ້າມີຄວາມຢ້ານກົວ ຢ່າງສົມເຫດສົມຜົນ
ຍ້ອນການພົວພັນ ຂອງພວກເຂົາເຈົ້າ ກັບການຕໍ່ຕ້ານ ຝ່າຍປະເທດລາວ ທີ່ໄດ້ຮັບ
ການສນັບສນຸນ ຈາກສະະຣັດ ເມື່ອຫລາຍໆທົສວັດ ຜ່ານມາແລ້ວນັ້ນ.
ຈີນ - ຖານທັບ: ເຈົ້າໜ້າທີ່ອະວຸໂສທາງດ້ານ ທະຫານ ຄົນນຶ່ງຂອງຈີນ ໄດ້ສເນີໃຫ້ມີການສ້າງ ຕັ້ງຖານທັບຖາວອນຂຶ້ນ ຢູ່ໃນຕ່າງປະເທດ ເພື່ອໃຫ້ການສນັບສນຸນ ແກ່ການປະຕິບັດງານ ຕໍ່ຕ້ານພວກໂຈນທະເລ ໃນບໍຣິເວນອ່າວເອເດັນ. ໃນການໃຫ້ສຳພາດ ທີ່ນຳອອກເຜີຍແຜ່ ໂດຍເວັບໄຊທ໌ ຂອງກະຊວງ ປ້ອງກັນປະເທດຈີນນັ້ນ ພົນເຮືອຕຣີ YIN ZHUO ກ່າວວ່າ ຖານທັບທີ່ວ່ານີ້ ຈະຊ່ອຍກອງທັບຈີນ ໃນການປະຕິບັດ ພັນທະນາໆຊາດຂອງຕົນ ໃຫ້ຫລ້ອນໜ້າທີ່. ທ່ານ YIN ໃຫ້ຂໍ້ສັງເກດວ່າ ການຕັດສິນໃຈ ເພື່ອສ້າງຕັ້ງ ຖານທັບດັ່ງກ່າວ ຈະຕ້ອງໄດ້ຮັບ ການຕັດສິນໃຈ ໂດຍພັກຄອມມູນິສ ທີ່ປົກຄອງປະເທດ ແລະຄະນະ ກັມມາທິການສູນກາງ ດ້ານກອງທັບ. ຈີນໄດ້ທຳການລາຕເວນ ມາເປັນເວລານຶ່ງປີແລ້ວ ໃນບໍຣິເວນອ່າວເອເດັນ ໂດຍໄດ້ໃຫ້ການຄຸ້ມຄອງ ກຳປັ່ນຈີນ ແລະຕ່າງປະເທດ ທີ່ແລ່ນໄປມາ ໃນເຂດນ່ານນ້ຳດັ່ງກ່າວ ບໍ່ໃຫ້ພວກໂຈນທະເລ ໂຊມາເລັຽ ຈີ້ເອົາໄປ. ການສເນີ ທີ່ວ່ານີ້ ໄດ້ມີຂຶ້ນບໍ່ເທົ່າໃດມື້ ຫລັງຈາກ ກຳປັນຂົນສົ່ງລຳນຶ່ງ ຂອງຈີນ ແລະລູກເຮືອ 25 ຄົນ ໄດ້ຖືກຊ່ອຍ ໃຫ້ລອດພົ້ນ ຈາກເງື້ອມມື ຂອງພວກໂຈນທະເລ ໂຊມາເລັຽ ໃນມື້ວັນຈັນ ຜ່ານມາ.
ເກົາຫລີເໜືອ - ເງິນ: ອົງການຂ່າວຂອງເກົາ ຫລີໃຕ້ ແລະຂອງຈີນລາຍງານວ່າ
ເກົາຫຼີເໜືອ ຈະຫ້າມບໍ່ໃຫ້ ມີການນຳໃຊ້ ເງິນຕຣາຕ່າງປະ ເທດ ຢ່າງສິ້ນເຊີງ
ເລີ້ມແຕ່ວັນທີ 1 ມັງກອນ ເປັນຕົ້ນໄປ. ອົງການຂ່າວຊິນຫວາ ຂອງທາງການຈີນ
ໄດ້ອ້າງຄຳເວົ້າ ຢູ່ໃນຖແລງຂ່າວສະບັບນຶ່ງ ຂອງທາງການເກົາຫລີເໜືອ
ທີ່ຕິດຢູ່ຕາມຫ້າງຮ້ານ ແລະຕລາດແຫ່ງຕ່າງໆ ໃນເກົາຫລີເໜືອ. ຖແລງຂ່າວ
ຊຶ່ງລົງວັນທີ 28 ທັນວາ ໄດ້ຫ້າມບໍ່ໃຫ້ ສ່ວນບຸກຄົນ ທຸຣະກິດ
ແລະອົງການຈັດຕັ້ງຕ່າງໆ ນຳໃຊ້ເງິນຕຣາ ຕ່າງປະເທດ. ອົງການຂ່າວຊິນຫວາ
ໄດ້ອ້າງຄຳເວົ້າ ຢູ່ໃນຖແລງຂ່າວ ທີ່ກ່າວວ່າ ຊາວຕ່າງປະເທດ ຈະຕ້ອງໄດ້ແລກປ່ຽນ
ເງິນເຂົາເຈົ້າ ເປັນເງິນວອນ ຂອງເກົາຫລີເໜືອເສັຽກ່ອນ ເພື່ອໃຊ້ຈ່າຍ
ແລະຊື້ສິ່ງຂອງຕ່າງໆ ໃນເກົາຫລີເໜືອ. ສ່ວນໜັງສືພິມລາຍວັນ JOONG-ANG
ຂອງເກົາຫລີໃຕ້ ໄດ້ອ້າງຄຳເວົ້າ ຂອງເວັບໄຊທ໌ຂ່າວ ກ່ຽວກັບເກົາຫລີເໜືອ
ທີ່ມີສຳນັກງານ ຢູ່ກຸງໂຊລ ທີ່ກ່າວວ່າ ຣັຖບານເກົາຫຼີເໜືອ ຈະຢຶດເອົາ
ເງິນຕຣາຕ່າງປະທດ ທີ່ປະຊາຊົນຂອງຕົນ ມີຢູ່ທັງໝົດ.
ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.
