ຮອນດູຣັສ: ປາກົດວ່າເສດຖີເຈົ້າຂອງ ranch ຫລືຟາມລ້ຽງສັດ ທ່ານ Porfirio “Pepe” Lobo ໄດ້ຮັບໄຊຊະນະຢ່າງແໜ້ນໜາ ໃນການເລືອກຕັ້ງປະທານາທິບໍດີ ຫລັງການກໍ່ລັດຖະປະຫານ ທີ່ປະເທດຮອນດູ ຣັສ ມື້ວານນີ້. ທ່ານໂລໂບ ຜູ້ສະມັກແຂ່ງຂັນຈາກພັກຝ່າຍຄ້ານ ຫົວນິຍົມແນວທາງເດີມ ໄດ້ຮັບຄະແນນສຽງ 56% ລື່ນຄູ່ແຂ່ງ ທ່ານ Elvin Santos ຈາກພັກເສຣີນິຍົມຂອງລັດຖະບານນັ້ນ ຢ່າງຫລວງຫລາຍ. ທ່ານຊານຕົສ ເປັນອະດີດຮອງປະທານາທິບໍດີ ໃນຄະນະລັດຖະບານຂອງປະທານາທິບໍດີ Manuel Zelaya ທີ່ຖືກໂຄ່ນລົ້ມ ເມື່ອເດືອນມີຖຸນາຜ່ານມາ. ບັນດາເຈົ້າໜ້າທີ່ເລືອກຕັ້ງພາກັນຊົມເຊີຍການປ່ອນບັດ ທີ່ ໂດຍສ່ວນໃຫຍ່ແລ້ວ ແມ່ນໄດ້ດຳເນີນໄປຢ່າງລາບລື່ນ ໂດຍມີປະມານ 62 ສ່ວນຮ້ອຍຂອງຜູ້ມີສິດເລືອກຕັ້ງ ພາກັນອອກໄປໃຊ້ສິດຂອງເຂົາເຈົ້າ. ມີເຫດການປະທະກັນເລັກນ້ອຍ ຢູ່ໃນເມືອງ San Pedro Sula ບ່ອນທີ່ປະຊາຊົນຈຳນວນນື່ງ ໄດ້ພາກັນເດີນຂະບວນປະທ້ວງ ສະນັບສະນູນທ່ານ Zelaya ທີ່ໄດ້ຮຽກຮ້ອງໃຫ້ມີການຂ້ວາມບາດການເລືອກຕັ້ງ. ຕຳຫລວດໄດ້ຍິງລະເບີດນ້ຳຕາ ຂັບໄລ່ພວກປະທ້ວງໃຫ້ສະຫລາຍໂຕ. ທັງທ່ານ Zelaya ແລະທ່ານ Roberto Micheletti ທີ່ໄດ້ຮັບການໜຸນຫລັງຈາກພວກທະຫານ ແລະຂື້ນດຳລົງຕຳແໜ່ງແທນທ່ານ Zelaya ນັ້ນ ຕ່າງກໍບໍ່ໄດ້ເຂົ້າແຂ່ງຂັນ ໃນການເລືອກຕັ້ງຄັ້ງນີ້.
ຢູຣູກວາຍ: ສ່ວນຢູ່ທີ່ປະເທດ Uruguay ນັ້ນ ກໍປາກົດວ່າ ອະດີດຫົວໜ້າກອງໂຈນ ທີ່ໂຄສະນາຫາສຽງເລືອກຕັ້ງ ບົນນະໂຍບາຍທີ່ວ່າ ຈະສືບຕໍ່ແນວທາງປານກາງຂອງພັກລັດຖະບານຕໍ່ໄປນັ້ນ ໄດ້ຮັບໄຊຊະນະ ໃນການເລືອກຕັ້ງຮອບສອງ ຫລືຮອບຕັດສິນຊີ້ຂາດ ໃນມື້ວານນີ້. ຜົນການເລືອກຕັ້ງຂັ້ນຕົ້ນ ສະແດງວ່າ ທ່ານ Jose Mujica ອະດີດກະບົດອ່ຽງຊ້າຍ ທີ່ໄດ້ໃຊ້ເວລາ 14 ປີ ຢູ່ໃນຄຸກ ໄດ້ຮັບຄະແນນສຽງຫລາຍກ່ວາ 50% ເລັກນ້ອຍ ແລະຄູ່ແຂ່ງຂອງທ່ານ ຄືປະທານາທິບໍດີ Luis Alberto Lacalle ໄດ້ປະກາດ ຍອມຮັບເອົາຄວາມປາໄຊ. ທ່ານ Mujica ຈະຂື້ນດຳລົງຕຳແໜ່ງແທນປະທານາທິບໍດີ Tabare Vazquez ທີ່ບໍ່ສາມາດເຂົ້າແຂ່ງຍາດເອົາຕຳແໜ່ງເປັນສະໄໝທີສອງໄດ້ ຍ້ອນກົດໝາຍລັດຖະທຳມະນູນຫ້າມ. ໄຊຊະນະຂອງທ່ານ Mujica ເຮັດໃຫ້ພັກແນວໂຮມປະສົມ Broad Front ທີ່ອ່ຽງຊ້າຍກາງນັ້ນ ຄອງອຳນາດຕື່ມອີກ 5 ປີ ໃນ Uruguay.
ອິຣ່ານ-ນິວເຄລຍ: ລັດຖະບານອິຣ່ານກ່າວວ່າ ຕົນມີແຜນການທີ່ຈະກໍ່ສ້າງໂຮງງານກັ່ນທາດຢູເຣນຽມໃໝ່ ເພື່ອຍົກລະດັບເກຣດເສີມສະມັດຕະພາບນັ້ນ 10 ແຫ່ງ ທີ່ຄ້າຍຄືກັນກັບໂຮງງານເສີມສະມັດຕະພາບແຫ່ງໃຫຍ່ ທີ່ Natanz. ສື່ມວນຊົນຂອງລັດລາຍງານວ່າ ໄດ້ມີການອະນຸມັດຫ້າສະຖານທີ່ແລ້ວ ສຳລັບກໍ່ສ້າງໂຮງງານໃໝ່ດັ່ງກ່າວ ແລະອົງການພລັງງານປາລະມະນູຂອງປະເທດ ກໍໄດ້ຮັບຄຳສັ່ງໃຫ້ຊອກຫາຕື່ມອີກ 5 ບ່ອນ. ຫົວໜ້ານິວເຄລຍຂອງອິຣ່ານ ທ່ານ Ali Akbar Salehi ກ່າວວ່າ ສະຖານທີ່ແຫ່ງໃໝ່ແມ່ນຈະສ້າງເລິກເຂົ້າໄປໃນໂຕພູເຂົາ ເພື່ອປົກປ້ອງໂຮງງານຈາກການຖືກໂຈມຕີ ແລະໂຮງງານໃໝ່ກໍຈະນຳໃຊ້ເຕົາກັ່ນແບບໃໝ່ ທີ່ມີປະສິດທິພາບຫລາຍກ່ວາເກົ່າ. ຄຳປະກາດຂອງລັດຖະບານອິຣ່ານ ກ່ຽວກັບການເສີມຂະຫຍາຍໂຄງການນິວເຄລຍຂອງຕົນອອກໄປນັ້ນ ມີຂື້ນໃນຂະນະທີ່ມະຫາອຳນາດຕ່າງໆ ແລະອົງ ການພະລັງປາລະມະນູສາກົນຂອງສະຫະປະຊາຊາດ ພະຍາຍາມທີ່ຈະຈຳກັດ ກິດຈະກຳເສີມສະມັດຕະ ພາບທາດຢູເຣນຽມຂອງອິຣ່ານ. ໂຄສົກທຳນຽບຂາວ ທ່ານ Robert Gibbs ກ່າວວ່າ ໃນການກໍ່ສ້າງໂຮງງານເສີມສະມັດຕະພາບທາດຢູເຣນຽມໃໝ່ນັ້ນ ແມ່ນອິຣ່ານຈະກະທຳໃນອັນທີ່ ເປັນການຝ່າຝືນຕໍ່ພັນ ທະຂອງຕົນ ທີ່ມີຕໍ່ນາໆຊາດນັ້ນຢ່າງຮ້າຍແຮງທີ່ສຸດ ໂດຍທ່ານກ່າວຕື່ມວ່າ ແລະນັ້ນກໍແມ່ນ “ອີກໂຕຢ່າງນື່ງ ຂອງການເລືອກໂດດດ່ຽວຕົນເອງ ຂອງອິຣ່າ.” ສະຫລູບຂ່າວ: ເຈົ້າໜ້າທີ່ຂັ້ນສູງທ່ານນື່ງຂອງອິຣ່ານ ກ່າວວ່າ ການຕັດສິນໃຈສ້າງໂຮງງານເສີມສະມັດຕະພາບທາດຢູເຣນຽມ 10 ແຫ່ງນັ້ນ ແມ່ນມີຂື້ນເພື່ອເປັນການຕອບໂຕ້ ຕໍ່ການປະນາມອິຣ່ານ ໂດຍອົງ ການພະລັງປາລະມະນູສາກົນ ຂອງສະຫະປະຊາຊາດ.
ດູບາຍ: ຕະຫລາດຮຸ້ນທີ່ Dubai ແລະສະຫະລັດອາຫຣັບ Emirates ຕົກລາຄາຢ່າງໃຫ່ຍ ໃນລະວ່າງ 6 ຫາ 7% ໃນການຊື້ຂາຍກັນໃນເຊົ້າວັນຈັນມື້ນີ້. ສອງຕະຫລາດຮຸ້ນນີ້ ໄດ້ໄຂຂື້ນເປັນເທື່ອທຳອິດໃນມື້ນີ ຫລັງຈາກທີ່ບໍລິສັດຊັບສິນທີ່ດິນ Dubai World ທີ່ເປັນຂອງລັດ ໄດ້ຂໍເລື່ອນເວລາໃນການຊຳລະໜີ້ຂອງຕົນອອກໄປ ທີ່ໄດ້ສົ່ງຜົນໃຫ້ຮຸ້ນຕົກລົງຢ່າງໃຫຍ່ ໃນວັນພຸດຜ່ານມາ ແລະຕະຫລາດຮຸ້ນໄດ້ອັດລົງ ຍ້ອນເທດສະການສະຫລອງບຸນ Eid al-Adha ສີ່ມື້ ຂອງຊາວມຸສລິມ. ໃນວັນອາທິດວານນີ້ ທະນາຄານກາງ ຂອງສະຫະລັດອາຫຣັບ Emirates ຫລື UAE ກ່າວວ່າ ຕົນຕັ້ງໃຈທີ່ຈະປ້ອນເງິນ ເຂົ້າໃສ່ພາກສ່ວນການທະນາຄານຂອງຕົນ ໃນຄວາມພະຍາຍາມເພື່ອຈຳກັດຂອບເຂດຂອງຜົນກະທົບຈາກວິກິດການນີ້. ອົງການ IMF ຫລືກອງທືນສາກົນໄດ້ອອກຄຳຖະແຫລງສະແດງຄວາມຍິນດີນຳ ຄຳປະກາດຂອງທະນາຄານກາງ ຂອງ UAE. ຕະຫລາດຮຸ້ນໃນທົ່ວໂລກຕົກລາຄາຢ່າງໃຫຍ່ໃນອາທິດແລ້ວນີ້ ຍ້ອນພວກລົງທືນພາກັນຂາຍອອກ ເພາະຢ້ານວ່າວິກິດການສິນເຊື່ອຂອງ Dubai ອາດສາ ມາດສົ່ງຜົນກະທົບຕໍ່ພວກເສດຖະກິດ ທີ່ກຳລັງໂຜ່ໂຕຂື້ນມາ ແລະພວກທະນາຄານໃນຢູໂຣບ ທີ່ເອົາເງິນໃຫ້ດູບາຍ ກູ້ຢືມນັ້ນ.
ປະເທດໄທ: ສຳນັກພະລາດຊະວັງໄດ້ອອກມາປະກາດໃນວັນຈັນມື້ນີ້ວ່າ ການໃຫ້ພະລາດໂຊວາດຂອງກະສັດພູມີພົນ ອະດຸນຍະເດດ ໃນຄ່ຳຄືນກ່ອນວັນຄ້າຍວັນປະສູດຂອງພະອົງ ຕາມທີ່ພະອົງຊົງໄດ້ປະຕິບັດມາເປັນປະເພນີ ຊື່ງປີນີ້ໄດ້ກຳໜົດໃສ່ວັນສຸກຈະມານີ້ ໄດ້ຖືກເລື່ອນອອກໄປຢ່າງບໍ່ມີກຳໜົດ. ເລຂາສ່ວນພະອົງຂອງກະສັດໄທ ໃຫ້ຮູ້ອີກວ່າ ການເດີນສວນສະໜາມຂອງກອງກຽດຕິຍົດ ເພື່ອເປັນກຽດແກ່ພະອົງ ທີ່ໄດ້ກຳໜົດຈະຈັດຂື້ນໃນວັນພຸດມື້ຮື້ນັ້ນ ກໍໄດ້ຖືກເລື່ອນອອກໄປເຊ່ນກັນ ແຕ່ວ່າ ພະອົງຈະຍັງຊົງສະເດັດໄປເປັນປະທານໃນພະລາດຊະພິທີ ຢູ່ທີ່ພະລາດຊະວັງໃນມື້ວັນເສົາ ອັນເປັນວັນຄ້າຍວັນປະສູດຂອງພະອົງນັ້ນ ຊື່ງຈະມີຄອບຄົວເຊື້ອພະວົງ ກັບບັນດາສະມາຊິກສະພາແຫ່ງໄທເຂົ້າຮ່ວມຖວາຍພະພອນແກ່ພະອົງ. ກະສັດພູມີພົນ ຊື່ງເປັນກະສັດທີ່ຄອງບັນ ລັງດົນທີ່ສຸດຂອງໂລກ ຈະຊົງມີພະຊົນ ມາຍຸ 82 ພັນສາ ໃນວັນທີ 5 ທັນວານີ້. ພະອົງໄດ້ຊົງເຂົ້າໄປຮັບການປິ່ນປົວ ຢູ່ໂຮງພະຍາບານ ເມື່ອວັນທີ 19 ກັນຍາຜ່ານມາ ຍ້ອນອາການປອດອັກເສບແລະເປັນໄຂ້ ຊື່ງການລົ້ມປ່ວຍຂອງພະອົງໄດ້ກໍ່ໃຫ້ເກີດຄວາມເປັນຫ່ວງຢ່າງແຜ່ ຫລາຍ ໃນໝູ່ປະຊາຊົນໄທທີ່ເບິ່ງເຫັນພະອົງວ່າ ເປັນອົງປະມຸກທີ່ຊົງເຮັດໃຫ້ປະເທດທີ່ແຕກແຍກກັນໃນທາງການ ເມືອງນັ້ນ ຍັງປຸ້ມລຸມສາມັກຄີກັນຢູ່.
ຟີລິບປິນ: ພວກນັກຂ່າວກັບນັກເຄື່ອນໄຫວ ຫລາຍຮ້ອຍຄົນ ພາກັນເດີນຂະບວນໃນນະຄອນຫລວງມະນີລາ ໃນວັນຈັນມື້ນີ້ ເພື່ອປະທ້ວງຕໍ່ການສັງຫານໝູ່ພົນລະເຮືອນ 57 ຄົນ ຢູ່ໃນເກາະດອນທາງພາກໃຕ້ ທີ່ວຸ້ນວາຍຂອງປະເທດ ເມື່ອວັນຈັນອາທິດແລ້ວນີ້. ພວກປະທ້ວງທີ່ນຸ່ງເສື້ອສີດຳເປັນສ່ວນໃຫຍ່ ພາກັນສົ່ງສຽງຮ້ອງໂຮ ຂັດຄໍເລຂານຸການຝ່າຍຂ່າວຂອງປະທານາທິບໍດີ Arroyo ທີ່ໄດ້ຜ່ານດ່ານກັ້ນຂອງຕຳຫລວດ ຢູ່ໄກ້ໆກັບທຳນຽບປະທານາທິບໍດີ ອອກມາ ພົບກັບພວກປະທ້ວງເພື່ອໃຫ້ຄວາມໝັ້ນໃຈແກ່ພວກເຂົາເຈົ້າ ວ່າ ລັດຖະບານກຳລັງພະຍາຍາມນຳເອົາພວກຮັບຜິດຊອບ ມາລົງໂທດເພື່ອຄວາມຍຸດຕິທຳຢູ່. ໃນວັນສຸກແລ້ວນີ້ ທາງການຟີລິບປິນໄດ້ທຳການກ່າວຫາຢ່າງເປັນທາງການຕໍ່ ນາຍ Andal Ampatuan Jr. ເຈົ້າເມືອງໆນື່ງໃນແຂວງ Maguindanao ໃນຂໍ້ຫາຄາດຕະກຳໝູ່. ເຈົ້າໜ້າທີ່ໄດ້ນຳເອົາໂຕຜູ້ກ່ຽວ ໄປຍັງນະຄອນຫລວງມະນີລາ ຈາກພາກໃຕ້ຂອງຟີລິບປິນ ບ່ອນທີ່ຜູ້ກ່ຽວໄດ້ເຂົ້າມອບໂຕໃນວັນພະຫັດ. ທາງການສົງໃສວ່າ ນາຍ Ampatuan ເປັນຜູ້ວາງແຜນການໂຈມຕີຂະບວນລົດ ຂອງຄູ່ແຂ່ງທາງການເມືອງ ຂອງເຂົາ ຄືທ່ານ Ismael Mangudadatu ທີ່ບັນທຸກຍາດມິດ ແລະພວກສະນັບສະນູນ ແລະນັກຂ່າວ ສິບກ່ວາຄົນ ໄປຈົດທະບຽນເລືອກຕັ້ງເປັນເຈົ້າແຂວງ ໃຫ້ທ່ານ Mangudadatu ນັ້ນ.
ສະຫລູບຂ່າວ: ປະທານາທິບໍດີຟີລິບປິນ ທ່ານນາງ Gloria Arroyo ປະກາດ ໃຫ້ຮູ້ໃນວັນຈັນມື້ນີ້ວ່າ ທ່ານນາງຈະສະມັກເລືອກຕັ້ງເປັນຜູ້ແທນລັດຖະສະພາແຫ່ງຊາດ ໃນປີໜ້າ ຫລັງຈາກສະໄໝການດຳລົງຕຳແໜ່ງຂອງທ່ານນາງສີ້ນສຸດລົງ. ກົດໝາຍລັດຖະທຳມະນຸນຫ້າມທ່ານນາງ ບໍ່ໃຫ້ສະມັກເລືອກຕັ້ງປະທາ ນາທິບໍດີ ເປັນສະໄໝທີສອງ.
