ລາຍງານການສຶກສາທາງວິທະຍາ ສາດພົບວ່າ ເຂື່ອນດອນສະຫົງໃນ ແຂວງຈຳປາສັກຂອງລາວ ຈະສົ່ງ ຜົນກະທົບຕໍ່ປະຊາຊົນນັບລ້ານຄົນ ຢູ່ໃນເຂດປະເທດລາວ, ໄທ, ກຳປູ ເຈຍ ແລະ ວຽດນາມ ເນື່ອງຈາກ ແຫລ່ງເພາະພັນປາຂະໜາດໃຫຍ່ ນັ້ນ ຈະຖືກທຳລາຍໄປ ຫລັງຈາກທີ່ ໄດ້ມີການກໍ່ສ້າງເຂື່ອນດັ່ງກ່າວແລ້ວ ເສັດ.
ລາຍງານການສືກສາຂອງ ທ່ານ ອຽນ ແບຣດ ແຫ່ງມະຫາວະທະຍາໄລ Victoria ຈາກປະເທດແຄນນາດາ ເຊິ່ງໄດ້ນຳເຜີຍແຜ່ເມື່ອບໍ່ນານມານີ້ ໄດ້ລະບຸຢ່າງຈະແຈ້ງວ່າ ການກໍ່ ສ້າງເຂື່ອນກັ້ນແມ່ນ້ຳຂອງ,ຢູ່ໃນເຂດພາກໃຕ້ຂອງລາວນັ້ນ,ຈະສົ່ງຜົນກະທົບຢ່າງໜັກໜວ່ງ ຕໍ່ຄວາມໝັ້ນຄົງດ້ານສະບຽງອາຫານຂອງປະຊາກອນ ນັບລ້ານຄົນຢູ່ໃນປະເທດທີ່ຢູ່ຕອນຫລ່າງຂອງແມ່ນ້ຳຂອງ, ຊຶ່ງກໍຄື ລາວ, ໄທ, ກຳປູເຈຍ ແລະ ວຽດນາມ ນັ້ນເອງ.
ແຕ່ຢ່າງໃດກໍຕາມ ລາຍງານດັ່ງກ່າວນີ້ ກໍບໍ່ໄດ້ໃຫ້ລາຍລະອຽດເຖິງວິທີການທີ່ໄດ້ໃຊ້ເຂົ້າໃນການຄຳນວນ ກ່ຽວກັບຜົນກະທົບທີ່ຈະເກີດຂຶ້ນ ແລະ ກໍບໍ່ໄດ້ຊີ້ຊັດອີກດ້ວຍວ່າ ການສ້າງເຂື່ອນນັ້ນ ຈະເຮັດໃຫ້ປາໃນແມ່ນ້ຳຂອງຕ້ອງສູນພັນໄປຢ່າງຊິ້ນເຊີງ,ຫລື ບໍ່ ໂດຍໄດ້ໃຫ້ການອະທິບາຍພຽງວ່າ ເຂື່ອນດອນສະຫົງ ຈະໄປປິດກັ້ນເສັ້ນທາງການອົບພະຍົບຂອງປານາໆພັນ ທີ່ຈະຕ້ອງເດີນທາງຜ່ານນ້ຳຕົກ,ຫລີ່ຜີຕະຫລອດປີ ຊຶ່ງກໍຖືວ່າ ເປັນວົງຈອນຊີວິດອັນສຳຄັນ ໃນການສືບສາຍພັນຂອງປາເຫລົ່ານັ້ນ. ໂດຍຜົນກະທົບທີ່ຈະຕິດຕາມມາກໍຄື ຄວາມສູນເສຍດ້ານການປະໂມງໃນເຂດລຸ່ມແມ່ນ້ຳຂອງຕອນຫລ່າງ ທີ່ໄດ້ຫລໍ່ແລ້ງຊີວິດຂອງປະຊາກອນນັບລ້ານຄົນໃນ ລາວ, ໄທ, ກຳປູເຈຍ ແລະ ວຽດນາມ.
ພ້ອມກັນນັ້ນ ການສຶກສາດັ່ງກ່າວນີ້ ກໍຍັງໄດ້ຊີ້ຊັດໃຫ້ເຫັນວ່າ ມາດຕະການກ່ຽວກັບການຊ່ອຍການອົບພະຍົບຂອງປາ ຕາມທີ່ປາກົດຢູ່ໃນລາຍງານການປ້ອງກັນບັນຫາຜົນກະທົບຕໍ່ສະພາບແວດລ້ອມທຳມະຊາດ ທີ່ກຸ່ມລົງທຶນໃນໂຄງການເຂື່ອນດອນສະຫົງ ໄດ້ຈັດທຳຂຶ້ນໃນໄລຍະກ່ອນໜ້ານີ້ນັ້ນ ນັບເປັນການສຶກສາທີ່ບໍ່ມີປະສິດທິພາບອີກດ້ວຍ.
ທັງນີ້ ໂດຍເຖິງແມ່ນວ່າກຸ່ມລົງທຶນໃນໂຄງ ການເຂື່ອນດອນສະຫົງ ຈະໄດ້ສະເໜີທາງອອກ ໂດຍການຂະຫຍາຍສ່ອງທາງການອົບພະຍົບຂອງປາ ໃຫ້ໃຫຍ່ຂຶ້ນກໍຕາມ ຫາກແຕ່ກໍນັບເປັນທາງເລືອກທີ່ມີຄວາມສ່ຽງຢ່າງຫລວງຫລາຍ ທີ່ຄາດຫວັງຜົນບໍ່ໄດ້ຢ່າງຄັກແນ່ອີກດ້ວຍ.
ຍິ່ງໄປກວ່ານັ້ນ ຄະນະນັກວິໃຈທີ່ໄດ້ທຳການສຶກສາດັ່ງກ່າວນີ້ ກໍຍັງໄດ້ຈັດສົ່ງລາຍງານການສຶກສາດັ່ງກ່າວ ໄປໃຫ້ທາງການລາວ ແລະ ກຳປູເຈຍ ພ້ອມດ້ວຍຈົດໝາຍທີ່ສະແດງການຮຽກຮ້ອງ ຂໍໃຫ້ລັດຖະບານລາວ ແລະ ກຳປູເຈຍ ພິຈາລະນາທົບທວນເພື່ອຫາທາງເລືອກໃໝ່ຂອງການພັດທະນາ ທີ່ໃຫ້ຄວາມສຳຄັນກັບບັນຫາສະພາບແວດລ້ອມ ແລະ ການສົ່ງເສີມຄວາມໝັ້ນຄົງດ້ານສະບຽງອາຫານໃຫ້ແກ່ປະຊາຊົນທີ່ຍາກຈົນຢູ່ໃນເຂດປະເທດຂອງຕົນໃຫ້ດີກວ່າເກົ່າອີກດ້ວຍ.
ສ່ວນທາງດ້ານກຸ່ມເຄືອຂ່າຍພັນຕະມິດ ເພື່ອການອານຸລັກແມ່ນ້ຳຂອງ ກໍໄດ້ສະແດງການຢືນຢັນວ່າ ຈະດຳເນີນການເຄື່ອນໄຫວ ເພື່ອຂັດຄ້ານໂຄງການເຂື່ອນຢູ່ໃນແນວແມ່ນ້ຳ, ຂອງຕໍ່ໄປຢ່າງບໍ່ຢຸດຢັ້ງ ພ້ອມທັງຍັງຈະລົນນະລົງໃຫ້ຂໍ້ມູນຂ່າວສານ ແກ່ປະຊາຊົນຄົນໄທທົ່ວປະເທດ, ເພື່ອສະແດງການຄັດຄ້ານຕໍ່ແຜນການຮັບຊື້ກະແສໄຟຟ້າຈາກປະເທດລາວ ແລະ ພະມ້າ ຂອງລັດຖະບານໄທ ຢ່າງຕໍ່ເນື່ອງອີກດ້ວຍ.
ທັງນີ້ ກໍເນື່ອງຈາກເຫັນວ່າ ມັນເປັນແຜນການຮັບຊື້ກະແສໄຟຟ້າທີ່ເກີນກວ່າລະດັບຄວາມຕ້ອງການທີ່ເປັນຈິງພາຍໃນປະເທດໄທ, ດັ່ງທີ່ ນາງ ແປຣມລະດີ ດາວເລືອງ ຜູ້ສະສານງານເຄື່ອຂາຍພັນຕະມິດ ເພື່ອການອານຸລັກແມ່ນ້ຳຂອງ, ໄດ້ຖະແຫລງຊີ້ແຈງ.
ທັງນີ້ ໂດຍລັດຖະບານໄທ ໄດ້ຕົກລົງໃນຫລັກການວ່າ ຈະຮັບຊື້ກະແສໄຟຟ້າຈາກລາວ ໃນປະລິມານລວມບໍ່ໜ້ອຍກວ່າ 7.000 ເມກາວັດ ພາຍໃນປີ 2015, ສ່ວນແຜນການກໍ່ສ້າງເຂື່ອນຢູ່ໃນແນວແມ່ນ້ຳຂອງໃນເຂດປະເທດ ລາວ, ໄທ ແລະ ກຳປູເຈຍນັ້ນ ກໍປາ ກົດວ່າ ມີຢູ່ທັງໝົດເຖິງ 11 ໂຄງການ ໂດຍໃນຈຳນວນນີ້ 9 ໂຄງການ ຢູ່ໃນເຂດປະເທດລາວ.
