ກອງປະຊຸມສຸດຍອດທີ່ເມັກຊິໂກ :ປະທານາທິບໍດີບາຣັກໂອບາມາແຫ່ງສະຫະຣັດສືບຕໍ່ເຂົ້າຮ່ວມໃນກອງ
ປະຊຸມສຸດຍອດຂອງພວກຜູ້ນຳປະເທດໃນທະວີບອະເມຣິກາເໜືອເປັນເທື່ອທຳອິດຂອງທ່ານໃນວັນຈັນ ມື້ນີ້ທ່ີເມືອງ Guadalajara ປະເທດເມັກຊິໂກ ຊຶ່ງເຣື່ອງໄຂ້ຫວັດສາຍພັນໃໝ່ ຕລອດທັງເຣື່ອງການຄ້າແລະສົງຄາມຢາເສບຕິດໃນເມັກຊິໂກ ເປັນຫົວຂໍ້ເຣື່ອງທ່ີສຳຄັນທີ່ສຸດໃນລາຍການປະຊຸມ.
ຄາດວ່າ ບັນດາຜູ້ນຳຈາກປະເທດ ສະຫະຣັດ ເມັກຊິໂກແລະການາດາຈະສະເໜີແຜນການຮ່ວມ ສະບັບນຶ່ງໃນການຕໍ່ຕ້ານໂຣກໄຂ້ຫວັດສາຍພັນໃໝ່ H1N1 ແຕ່ຈະມີການເຫັນພ້ອມນຳກັນໜ້ອຍລົງ ໃນເຣື່ອງ ອື່ນໆ. ປະທານາທິບໍດີ Felipe Calderon ແຫ່ງເມັກຊິໂກ ກ່າວຕໍ່ປະທານາທິບໍດີໂອບາມາ ໃນຕອນແລງວັນອາທິດວານນີ້ວ່າ ສະຫະຣັດຄວນຈະ ທຳການເຄື່ອນໄຫວໄວຂຶ້ນເພື່ອສົ່ງເງິນຈຳນວນ 1ພັນ 4 ຮ້ອຍລ້ານດອນລາທ່ີສະຫະຣັດໃຫ້ຄຳໝັ້ນສັນຍາໄວ້ ເພື່ອທຳການຕໍ່ ຕ້ານອາຊຍາກັມທ່ີມີການຈັດຕັ້ງນັ້ນ. ໄດ້ມີການຊັກຊ້າໃນການສົ່ງເງິນຈຳນວນ 100 ລ້ານເພາະວ່າ ພວກາສະມາຊິກສະພາສະຫະຣັດບາງທ່ານມີຄວາມເປັນຫ່ວງກ່ຽວກັບການລະເມີດສິດທິມະນຸດ ໂດຍພວກທະຫານເມັກຊິໂກນັ້ນ. ໃນລະຫວ່າງການພົບປະຫາລືກັນເປັນເວລາ 45 ນາທີກັບປະທານາທິບໍດີ Calderon ນັ້ນ ທ່ານໂອບາມາໄດ້ສະແດງໃຫ້ການສນັລບສນຸນຢ່າງແຂງແຮງ ສຳລັບການຕໍ່ສູ້ຂອງເມັກຊິໂກໃນການຕໍ່ຕ້ານພວກລັກລອບຄ້າຢາເສບຕິດ ໃນຂະນະດຽວກັນ ກໍເນັ້ນເຖິງຄວາມສຳຄັນກ່ຽວກັບເຣື່ອງສິດທິມະນຸດເຊັ່ນກັນ . ຫລັງຈາກນັ້ນ ທັງສອງປະທານາທິບໍດີກໍໄດ້ປະທານອາຫານຄ່ຳແລະ ເຮັດວຽກໄປພ້ອມ ຮ່ວມກັບນາຍົກຣັຖມຸນຕີ Stephen Harper ແຫ່ງການາດາ. ຜູ້ນຳທັງສາມຈະພົບປະກັນອີກໃນວັນຈັນມື້ນີ້ ກ່ອນທ່ານໂອບາມາຈະເດີນທາງກັບຄືນສູ່ສະຫະຣັດ. ເຣື່ອງທ່ີຄອບງຳໃນລາຍການປຶກສາຫາລືກັນໃນຄັ້ງນີ້ແມ່ນຄວາມພະຍາ ຍາມເພື່ອຟື້ນຟູການເສດຖະກິດຂອງ 3 ປະເທດຄືນ.
ທີ່ອິຣັກ: ບັນດາເຈົ້າໜ້າທ່ີອິຣັກກ່າວວ່າ ລະເບີດທ່ີແຕກຂຶ້ນໃນກຸງແບກແດ໊ດແລະໃນພາກເໜືອຂອງອິຣັກໄດ້ເຮັດໃຫ້ຜູ້ຄົນເສັຍຊີວິດໄປຢ່າງນ້ອຍ 41 ຄົນແລະບາດເຈັບຕື່ມອີກຫລາຍສິບຄົນ. ຕຳຫລວດໃນກຸງແບກ ແດ໊ດກ່າວວ່າ ລະເບີດທ່ີຫ້າງໄວ້ໃນລົດສອງຄັນໄດ້ແຕກຂຶ້ນໃນຕອນເຊົ້າວັນຈັນມື້ນີ້ ເຮັດໃຫ້ປະຊາ ຊົນເສັຍຊີວິດໄປຢ່າງນ້ອຍ 16 ຄົນແລະບາດເຈັບຕື່ມອີກຫລາຍກວ່າ 80 ຄົນ. ການວາງລະເບີດເທື່ອນີ້ ແມ່ນແນ ເປົ້າໝາຍໃສ່ພວກກັມກອນລາຍວັນ ທ່ີພາກັນໄປເຕົ້າໂຮມ ເພື່ອຊອກຫາວຽກເຮັດໃນຄຸ້ມທ່ີມີປະຊາຊົນຊາວ Shi’ite ອາໃສຢູ່ເປັນສ່ວນຫລາຍໃນນະຄອນຫລວງນັ້ນ. ສ່ວນຢູ່ໃນພາກເໜືອຂອງປະເທດ ລະເບີດທ່ີຫ້າງໄວ້ໃນລົດບັນທຸກຄ້າຍໆກັນສອງຄັນ ໄດ້ລະເບີດຂຶ້ນຢູ່ໃກ້ໆກັບເມືອງ Mosul ເຮັດໃຫ້ຜູ້ຄົນເສັຍຊີວິດໄປ ຢ່າງນ້ອຍ 25 ຄົນ ແລະບາດເຈັບຕື່ມອີກຫລາຍກວ່າ 75 ຄົນ. ບັນດາເຈົ້າໜ້າທ່ີກ່າວວ່າ ລະເບີດດັ່ງກ່າວໄດ້ທຳລາຍບ້ານເຮືອນປະມານ30 ຫລັງໃນໝູ່ບ້ານ Khazna ຂອງຊາວShi’ite ຊຶ່ງຕັ້ງຢູ່ຫ່າງຈາກເມືອງ Mosul ໄປ ປະມານ 20 ຫລັກກິໂລແມັດ. ເມືອງ Mosual ຖືວ່າເປັນທ່ີໜັ້ນຂອງພວກກະບົດນິກາຍຊຸນນີ ຊຶ່ງພວກຫົວຮຸນແຮງເຫລົ່ານີ້ ໄດ້ທຳການໂຈມຕີມາເປັນຈຳນວນຫລາຍຄັ້ງຢູທ່ີນັ້ນ ໂດຍບໍ່ຄຳນຶງເຖິງວ່າ ກຳລັງສະຫະຣັດຫລືກຳລັງຂອງອິຣັກກໍຕາມ ເປັນຜູ້ຮັບຜິດຊອບໃນດ້ານຄວາມປອດໄພຂອງເມືອງດັ່ງກ່າວນີ້.
ທີ່ອິຣ່ານ: ທ່ານ Medhi Karroubi ທ່ີປາໄຊໃນການເລືອກຕັ້ງປະທານາທິບໍດີ ກ່າວວ່າ ພວກປະທ້ວງ ທັງແມ່ຍິງແລະຜູ້ຊາຍ ຫລາຍຄົນໄດ້ຖືກຂົ່ມ ຂືນຊຳເລົາໃນສູນກັກຂັງແຫ່ງຕ່າງໆ ນັບແຕ່ທາງເຈົ້າໜ້າທ່ີໄດ້ຈັບກຸມເຂົາເຈົ້າ ຍ້ອນພາກັນເດີນຂະບວນປະທ້ວງຄັດຄ້ານຕໍ່ຜົນຂອງການເລືອກຕັ້ງປະທານາທິບໍດີນັ້ນ. ທ່ານ Karroubi ໄດ້ຂຽນຈົດໝາຍສະ ບັບນຶ່ງສົ່ງໄປຫານັກບວດທ່ີມີ ອຳນາດ ທ່ານ Akbar Hashemi Rafsanjani ເວົ້າວ່າ ພວກແມ່ຍິງແລະເດັກນ້ອຍຜູ້ຊາຍ ໄດ້ຮັບຄວາມເສັຍຫາຍຢ່າງຮ້າຍແຮງທາງດ້ານຮ່າງກາຍແລະຈິດໃຈຈາກການຖືກຂົ່ມ ຂືນຊຳເລົາ ຊຶ່ງທ່ານໄດ້ຮຽກຮ້ອງໃຫ້ສະພາທ່ີມີອຳນາດສູງສຸດຂອງອິ ຣ່ານ ໄຂການສືບສວນກ່ຽວກັບການລະເມີດສິດດັ່ງກ່າວ. ຢ່າງໜ້ອຍ ພວກປະທ້ວງ 3 ຄົນໄດ້ເສັຍຊີວິດໃນລະວ່າງທີ່ຖືກກັກຂັງ ແລະພວກເຈົ້າໜ້າທ່ີຕຳຫລວດອິຣ່ານ ກໍໄດ້ຮັບຮູ້ວ່າພວກທ່ີຖືກກັກຂັງໄດ້ຖືກລະເມີດສິດໃນສູນກັກຂັງ Kahrizak ນັ້ນ. ທ່ານ Qorbanali Dori-Najafabadi ຫົວໜ້າໄອຍະການຂອງອິຣ່ານ ຍອມຮັບໃນອັນທ່ີທ່ານເອີ້ນວ່າ ເຫດການອັນໜ້າເຈັບປວດທ່ີບໍ່ສາມາດແກ້ໂຕໄດ້ຢູ່ໃນຄຸກແຫ່ງນັ້ນ ແລະທ່ານກ່າວຕື່ມວ່າ ຜູ້ໃດກໍຕາມທີ່ລະເມີດກົດໝາຍຄວນຈະຖືກລົງໂທດ.
ສະຫະຣັດແລະອັງໂກລາ: ທ່ານນາງຮີນລາຣີ ຄລິນຕັນ ຣັຖມຸນຕີການຕ່າງປະເທດສະຫະຣັດພົບ ປະກັບປະທານາທິບໍດີອັງໂກລາ ທ່ານ Jose Eduardo dos Santos ທ່ີໄດ້ດຳຣົງຕຳແໜ່ງມາເປັນເວລາດົນນານນັ້ນໃນວັນຈັນມື້ນີ້ໃນຂະນະທ່ີສະຫະຣັດໃຫ້ຄຳໝັ້ນສັນຍາທ່ີຈະສົ່ງເສີມສາຍພົວພັນຂອງຕົນກັບອັງໂກລາ ທ່ີອຸດົມສົມບູນດ້ວຍບໍ່ນ້ຳມັນນັ້ນ. ທ່ານນາງຄລິນຕັນ ເດີນທາງໄປຮອດນະຄອນຫລວງ Luandaໃນວັນ ອາທິດວານນີ້ ແລະໄດ້ທຳການພົບປະຫາລືກັບທ່ານ Assuncao Afonso dos Anjos ຣັຖມຸນຕີຕ່າງປະເທດຂອງອັງໂກລາ. ທ່ານນາງຄລິນຕັນໄດ້ກ່າວຊົມເຊີຍອັງໂກລາ ທີ່ໄດ້ຈັດການເລືອກຕັ້ງຣັຖສະພາໃນປີແລ້ວນີ້ ແລະກ່າວຕື່ມວ່າ ທາງຣັຖບານກຸງວໍຊິງຕັນຫວັງວ່າອັງໂກລາຈະຮັບຜ່ານກົດໝາຍຣັຖທັມມະນູນສະບັບໃໝ່ ທຳການດຳເນີນຄະດີພວກລະເມີດສິດທິມະນຸດໃນອະດີດຜ່ານມາ ແລະຈັດການເລືອກຕັ້ງປະທານາທິບໍດີທ່ີເສຣີແລະຍຸຕິທັມ ແລະໃນເວລາອັນເໝາະສົມ. ອັງໂກລາບໍ່ເຄີຍມີການເລືອກຕັ້ງປະທານາທິບໍດີມາຕັ້ງແຕ່ປີ 1992. ທ່ານ Dos Santos ໄດ້ດຳຣົງຕຳແໜງ່ປະທານາທິບໍດີມາໄດ້ 30 ປີແລ້ວ. ອັງໂກລາເປັນປະເທດທີ່ສົ່ງນ້ຳມັນລາຍສຳຄັນໃຫ້ສະຫະຣັດ. ການຢ້ຽມຢາມຂອງຣັຖມຸນຕີການຕ່າງປະເທດສະຫະຣັດມີຂຶ້ນໃນເວລາທ່ີຈີນໄດ້ເພີ່ມທະວີອິດທິພົນຂອງຕົນຂຶ້ນ ໃນວົງການອຸດສາຫະກັມນ້ຳມັນ ຂອງອັງໂກລານັ້ນ. ທ່ານນາງຄລິນຕັນວາງແຜນຈະຊຸກຍູ້ໃຫ້ອັງໂກລາ ດຳເນີນການເສດ ຖະກິດຂອງຕົນໃນຫລາຍຮູບແບບ ແລະໃຫ້ລົງທຶນຫລາຍຂຶ້ນໃສ່ດ້ານກະເສດ. ທາງກຸງວໍຊິງຕັນມອງເຫັນວ່າ ການກະເສດເປັນຊ່ອງທາງນຶ່ງທ່ີຈະສາມາດປົດປ່ອຍປະຊາຊົນຫລາຍລ້ານຄົນ ໃຫ້ພົ້ນຈາກຄວາມທຸກຈົນໃນອາຟຣິການັ້ນ.
ພັຍລົມໄຕ້ຝຸ່ນທີ່ເອເຊັຍ: ຕຳຫລວດໃນພາກຕາເວັນຕົກຂອງຍີ່ປຸ່ນ ກ່າວວ່າ ປະຊາຊົນ 4 ຄົນເສັຍຊີວິດ ແລະຢ່າງໜ້ອຍ 10 ຄົນຕື່ມອີກຫາຍສາບສູນໄປໃນວັນຈັນ ມື້ນີ້ ຍ້ອນດິນເຈື່ອນທັບແລະນ້ຳຖ້ວມ ໃນຂະນະທີ່ລົມໄຕ້ຝຸ່ນ Etau ນຳເອົາຝົນຕົກແຮງມາສູ່ຂົງເຂດ. ທາງການຍີ່ປຸ່ນກ່າວວ່າ ເຂດທ່ີໄດ້ຮັບຜົນກະທົບຮ້າຍແຮງທ່ີສຸດແມ່ນ ເຂດກຳແພງນະຄອນ Hyogo ແລະ Okayama ຊຶ່ງຂີ້ຕົມໄດ້ເຈ່ືອນ ລົງມາທັບແລະທຳລາຍບ້ານເຮືອນໄປຫລາຍຫລັງ. ສ່ວນຢູ່ທີ່ປະເທດຈີນນັ້ນ ກໍໄດ້ຖືກລົມໄຕ້ຝຸ່ນມໍຣະກົດ ພັດເຂົ້າປະທະຝ່ັງຕາເວັນອອກຂອງປະເທດ ໃນວັນອາທິດວານນີ້ ເຮັດໃຫ້ເດັກນ້ອຍຄົນນຶ່ງເສັຍຊີວິດ ແລະໝູ່ບ້ານຫລາຍຮ້ອຍແຫ່ງຖືກນຳ້ຖ້ວມ ແລະທຳລາຍບ້ານເຮືອນ 2ພັນຫລັງໃນແຂວງ ເຊຈຽງແລະແຂວງຟູຈຽນ.
ອົງການຂ່າວຊິນຫົວຂອງຣັຖບານຈີນກ່າວວ່າ ເມືອງເວີ້ນໂຈໃນແຂວງເຊຈຽງ ບັນທຶກປະລິມານນ້ຳຝົນໄດ້ຮອດ 70 ຊັງຕິແມັດ. ທາງການຈີນໄດ້ຍົກຍ້າຍປະຊາຊົນ1 ລ້ານຄົນໃນ2 ແຂວງດັ່ງກ່າວ ແລະສັ່ງໃຫ້ເຮືອຈຳນວນຫລາຍກວ່າ 35ພັນລຳ ກັບຄືນເຂົ້າມາຈອດທ່າເຮືອ ກ່ອນທີ່ລົມພາຍຸທ່ີມີຄວາມແຮງເຖິງ 120ຫລັກກິໂລແມັດຕໍ່ຊົ່ວໂມງ ຈະພັດມາເຖິງນັ້ນ. ພວກພະຍາກອນອາກາດທຳນາຍວ່າ ລົມໄຕ້ຝຸ່ນມໍຣະກົດຈະອ່ອນແຮງລົງ ໃນຂະນະມັນພັດຜ່ານໄປເທິງບົກທາງທິດເໜືອ.
ວັນອັງຄານ, ໑໗ ກັນຍາ ໒໐໒໔
