ລິ້ງ ສຳຫລັບເຂົ້າຫາ

Lao Prime Minister: GDP Growth Rate Will Remain High


ນາ​ຍົກ​ລັດຖະມົນຕີລາວເນັ້ນຢ້ຳວ່າ​ເສດຖະກິດ​ຂອງ​ລາວ​ໃນ​ ຕະຫລອດ​ແຜນການ​ປະຈຳ​ປີ 2008 ຫາ 2009 ນີ້ ຈະ​ມີ​ການ​ຂະຫຍາ​ຍຕົວ​ເພີ້ມຂຶ້ນ ​ໃນ​ອັດຕາ​ສະ​ເລ່ຍ​ເຖິງ 6.9% ​ໂດຍ​ຫລຸດ​ລົງ​ຈາກ​ປີ​ກາຍ​ໃນ​ລະດັບ 1% ຫາກ​ແຕ່​ທາງ​ດ້ານ​ທະນາຄານ​ພັດທະນາແຫ່ງເອ​ເຊຍ​ກັບ​ຄາດໝາຍວ່າ ​ເສດຖະກິດ​ຂອງ​ລາວ​ຈະ​ມີ​ການ​ຂະຫຍາຍຕົວ ພຽງ​ແຕ່ໃນອັດຕາ​ບໍ່​ເກີນ 5.5% ​ເທົ່າ​ນັ້ນ ​ແລະ ກໍ​ຈະ​ເພີ້ມຂຶ້ນ​ເປັນ 5.7% ​ໃນ​ປີ 2010.

ທ່ານ ບົວ​ສອນ​ ບຸບພາ​ວັນ ນາ​ຍົກ​ລັດຖະມົນຕີລາວ ​ໄດ້​ສະ​ແດງ​ ການເນັ້ນຢ້ຳ​ເນື່ອງ​ໃນ​ໂອກາດ​ທີ່​ໄດ້​ພົບປະ​ໂອ້ລົມ ​ແລະ ​ແລກ​ປ່ຽນ ຄວາມ​ຄິດ​ເຫັນຮ່ວມ​ກັນ​ກັບ​ບັນດາ​ຄະນະ​ນຳ​ຂອງ​ກະຊວງ​ສຶກສາ​ທິການ ​ແລະ ບັນດາ​ຄະນະ​ ອະທິການ​ບໍດີ, ພະນັກງານ, ຄູ ​ແລະ ອາຈານ ລວມ​ໄປ​ເຖິງ​ນັກ​ສຶກສາ​ຂອງມະຫາວິທະຍາ​ໄລ​ແຫ່ງ​ຊາດ​ລາວ ​ເມື່ອ​ບໍ່ນານ​ມາ ນີ້ວ່າ ​ເສດ​ຖະກິດ​ຂອງ​ລາວ​ໃນ ຕະຫລອດ​ແຜນການ​ປະຈຳ​ປີ 2008 ຫາ 2009 ນີ້ ຈະ​ມີ​ການ​ຂະຫຍາຍ ຕົວ​ເພີ້ມຂຶ້ນ ​ໃນ​ອັດຕາ​ສະ​ເລ່ຍບໍ່ໜ້ອຍກວ່າ 6.9% ຫລືວ່າ ຫລຸດ​ລົງ​ຈາກ​ແຜນການ​ປີ​ກາຍ​ໃນ​ອັດຕາ​ສະ​ເລ່ຍພຽງ 1% ​ເທົ່າ​ນັ້ນ ​ໂດຍ​ເປັນ​ຜົນ​ເນື່ອງມາ​ຈາກ​ຜົນ​ກະທົບ​ມາ​ຈາກ​ວິ​ກິ​ດການ​ທາງ​ເສດ​ຖະ​ກິດ​ການ​ເງິນໂລກ ທີ່​ເປັນ​ຢູ່​ໃນ​ເວລາ​ນີ້. ​ກ່ອນໜ້ານີ້ ທາງ​ການ​ລາວ​ກໍ​ໄດ້​ວາງ​ເປົ້າໝາຍ​ໄວ້​ວ່າ ຈະ​ເຮັດ​ໃຫ້​ເສດຖະ ກິດ​ຂອງ​ລາວ ​ໂດ​ຍສະ​ເພາະ​ແມ່ນມູນ​ຄ່າ​ການ​ຜະຫລິດມວນ​ລວມ ຫລື​ວ່າ ຍອດ​ຜົນ​ຜະຫລິດ​ລວມ ພາຍ​ໃນ​ປະ​ເທດ ຫລື GDP ນັ້ນ ​ໃຫ້​ຂະຫຍາຍຕົວ​ໃນ​ອັດຕາ​ສະ​ເລ່ຍບໍ່ໜ້ອຍ ກວ່າ 8%. ຫາກ​ແຕ່ວ່າ​ຕາມ​ຄາດໝາຍ​ໃໝ່ຂອງ​ ທ່ານ ​ບົວ​ສອນ ​ດັ່ງ​ກ່າວນີ້ ກໍ​ຈະ​ເປັນ​ຜົນ​ເຮັດ​ໃຫ້​ເສດຖະກິດ​ຂອງ​ລາວ​ໃນ​ປີນີ້ ຈະ​ຕົກ​ຕໍ່າລົງ​ກວ່າ​ເປົ້າໝາຍ​ເດີມ​ທີ່​ວາງເອົາໄວ້ ​ເຖິງ 1.1%.​ແຕ່​ຢ່າງ​ໃດ​ກໍ​ຕາມ ທາງ​ດ້ານ​ທະນາຄານ​ພັດ​ທະນາ​ແຫ່ງ​ເອ​ເຊຍ ​ຫລື ADB ນັ້ນ ກໍ​ໄດ້​ສະ​ເໜີລາຍ​ງານ​ໃນ​ກໍລະນີ​ດຽວກັນ ນີ້ວ່າ ​ເສດ​ຖະ​ກິດ​ຂອງ​ລາວ​ໃນ​ປີນີ້ ຈະ​ຂະຫຍາຍຕົວໃນອັດຕາ​ບໍ່​ເກີນ 5.5% ຫລື​ວ່າ ຫລຸດ​ລົງ​ຈາກ​ເປົ້າໝາຍຂອງ​ລັດຖະບານ​ລາວ​ທີ່​ວາງ​ເອົາ​ໄວ້​ດັ່ງກ່າວ​ເຖິງ 2.5% ຊຶ່ງ​ກໍ​ມີ​ຜົນ​ມາ​ຈາກ​ການ​ຕົກ​ຕໍ່າລົງ​ຂອງ​ພາກ​ການ​ສົ່ງ​ອອກ​ສິນຄ້າ​ຂອງ​ ລາວ​ໄປ​ໃນ​ຕ່າງປະ​ເທດ ທີ່​ຖືກສົມທົບ​ດ້ວຍການ​ລົງທຶນ​ຂອງ​ຕ່າ​ງປະ​ເທດ​ຢູ່​ໃນ​ລາວ ທີ່​ໄດ້​ມີ​ການ​ຫົດ​ຕົວ​ລົງ ​ແລະ ​ໃນ​ຂະນະ​ດຽວກັນ ກໍ​ຍັງສົ່ງ​ຜົນ​ກະທົບ ຕໍ່​ເນື່ອງ ​ໄປ​ເຖິງ​ພາກ​ທຸລະ​ກິດ​ບໍ ລິ​ການ ​ແລະ ການ​ທ່ອງ​ທ່ຽວ ຂອງ​ລາວ​ອີກ​ດ້ວຍ ​ເນື່ອງ​ຈາກ​ວ່າ ມີ​ນັກ​ທ່ອງ​ທ່ຽວຊາວ​ຕ່າງປະ​ເທດ ​ເດີນທາງ​ເຂົ້າ​ໄປ​ໃນ​ລາວຫລົດໜ້ອຍຖອຍ​ລົງ ​ເມື່ອ​ປຽບທຽບ​ໃສ່​ກັບ​ປີກາຍ​ນັ້ນ​ເອງ.


ຫາກແຕ່​ວ່າ ດ້ວຍ​ການ​ຂະຫຍາຍຕົວ​ທາງເສດ​ຖະ​ກິດໃນອັດຕາ​ດັ່ງກ່າວ​ນີ້ຂອງ​ລາວ ກໍ​ຍັງ​ຄົງ​ນັບ​ເປັນ​ການ​ຂະຫຍາຍຕົວທາງ​ເສດ​ຖະ​ກິດ​ທີ່​ມີ​ອັດຕາ​ທີ່​ສູງ ​ເມື່ອ​ທຽບ​ໃສ່​ກັບບັນດາ​ປະ​ເທດ ​ໃນ​ພູມ​ມີ​ພາກ​ເອ​ເຊຍຕາ​ເວັນ​ອອກສຽງ​ໃຕ້ດ້ວຍ​ກັນ ດັ່ງ​ທີ່​ ທ່ານ ສີ​ລິນ​ທອນ ​ເລືອງ​ຄຳ​ສິງ ນັກ​ເສ​ດຖະສ​າດ ຂອງທະນາຄານພັດທະນາ​ແຫ່ງ​ເອ​ເຊຍ ປະຈຳ​ປະ​ເທດ​ລາວ ​ໄດ້​ໃຫ້ການ​ອະທິບາຍ​ເຖິງ​ບັນດາ​ເງື່ອນ​ໄຂທີ່​ກ່ຽວຂ້ອງ​ກັບ​ສະພາບ​ການ​ດັ່ງກ່າວນີ້ ວ່າ:

ຖ້າ ​ເມື່ອ​ສົມທຽບ​ເບິ່ງ​ການ​ຂະຫຍາຍຕົວຂອງ​ເສດ​ຖະ​ກິດ​ລາວ​ເຮົາ ກໍ​ແມ່ນ​ສູງ​ກວ່າ​ບັນດາ​ປະ​ເທດ​ໃນ​ພາກພື້ນ. ອັນ​ນີ້ກໍ​ແມ່ນ​ເນື່ອງ​ມາ​ຈາກ ​ເສດ​ຖະ​ກິດ​ຂອງ​ລາວ​ເຮົາ​ກໍ​ຍັງ​ບໍ່​ໄດ້​ເຊື່ອ​ມ ໂຍງ​ເຂົ້າກັບ​ພູມ​ມີພາກຢ່າງ​ສົມບູນ​ເຫລື​ອວ່າຢ່າງ​ເຕັມ​ຮູບ​ແບບ ​ແລະ ກໍ​ຍັງ​ມີ​ຂໍ້​ຈຳກັດ​ທີ່​ກ່ຽວກັບ​ການ​ເຊື່​ອມ​ໂຍງ​ຕໍ່ກັບ​ສະ​ຖາ​ບັນ​ການ​ ເງິນ​ຕ່າງໆຂອງໂລກ ຫລື ຕະຫລາດ​ການ​ເງິນ​ຂອງ​ໂລກ ຫັ້ນ.

ນອກຈາກ​ນີ້ ທ່ານ ສີ​ລິນ​ທອນ ຍັງ​ໄດ້​ໃຫ້ການ​ຄາດໝາຍອີກດ້ວຍ​ວ່າ ​ໃນ​ຕະຫລອດ​ປີ 2009 ນີ້ ອັດຕາ​ເງິນ​ເຟີ້ຂອງ​ລາວ ຈະ​ຢູ່​ໃນ​ລະດັບລະຫວ່າງ 5% ຫາ 6% ຊຶ່ງ​ຫລຸດ​ລົງ​ຈາກ​ປີ​ກາຍ​ຍ້ອນ​ວ່າ ສະພາ​ວະ​ໃນ​ດ້ານ​ລາຄາ​ນ້ຳມັນ​ ​ແລະ ສິນຄ້າ​ປະ​ເພດ​ທຶນ​ຕ່າງໆ ທີ່​ຫລຸດ​ລົງ​ໃນ​ປີນີ້. ຫາກ​ແຕ່​ວ່າ​ໃນ​ພາກສ່ວນໜຶ່ງທີ່​ຖື​ວ່າ​ມີ​ຄວາມໜ້າ​ເປັນ​ຫວ່ງຢ່າງ​ຍິ່ງກໍ​ຄື ລາຍ​ຮັບ​ຂອງ​ລັດຖະບານ​ລາວ​ໃນ​ດ້ານ​ພາສີ​ອາກອນ ​ແລະ ຄ່າ​ທຳນຽມ ຕ່າງໆນີ້ ຈະ​ຕ້ອງ​ຫລຸດໜ້ອຍຖອຍ​ລົງ​ຢ່າງ​ຫລີກ​ລ້ຽງບໍ່​ໄດ້, ຊຶ່ງ​ໃນ​ກໍລະນີ​ດຽວກັນນີ້ ທາງ​ການ​ລາວ​ເອງ ກໍ​ໄດ້​ປະ​ເມີນ​ສະຖານະ​ການວ່າ ລາຍ​ຮັບ​ຈາກ​ພາສີ​ອາກອນ​ແລະ​ ຄ່າ​ທຳນຽມຕ່າງໆ​ໃນ​ລັດຖະບານ​ລາວ​ໃນ​ປີນີ້ ຈະ​ຫລຸດ​ລົງ​ກວ່າ​ປີ​ກາຍຄຶດ​ເປັນ​ມູນ​ຄ່າ​ຫລາຍ​ກວ່າ 700 ຕື້ກີບ ​ແລະ ກໍ​ຍັງ​ຈະ​ສົ່ງ​ຜົນເຮັດ​ໃຫ້​ລັດຖະບານ​ລາວ​ນັ້ນ ຕ້ອງ​ຂາດ​ດຸນ​ທາງ​ດ້ານ​ງົບປະມານ​ລາຍຈ່າຍ ຄຶດ​ເປັນ​ມູນ​ຄ່າ​ລວມຫລາຍ​ກວ່າ 3.000 ຕື້ກີບ ​ຫລື ຫລາຍ​ກວ່າ 350 ລ້ານ​ ໂດ​ລ້າ​ສະຫະຣັດ ອັນ​ຈະ​ສົ່ງ​ຜົນ​ກະທົບ​ຕໍ່​ເນື່ອງ​ໄປ​ເຖິງ​ການດຳ​ເນີນ​ງານ​ໃນ​ໂຄງການ​ພັດ​ທະນາ​ຕ່າງໆ ຂອງ​ລັດຖະບານ​ລາວ​ຢ່າງ​ຫລີກ​ລ້ຽ​ງບໍ່​ໄດ້ ​ໂດຍ​ສະ​ເພາະ​ແມ່ນ ​ໂຄງການ​ພັດ​ທະນາ ​ເພື່ອ​ຫລຸດຜ່ອນ​ບັນຫາ​ຄວາມ​ຍາກ​ຈົນ​ຂອງ​ປະຊາຊົນ​ລາວ. ຍິ່ງ​ໄປ​ກວ່າ​ນັ້ນ ກໍ​ຍັງ​ຈະ​ສົ່ງ​ຜົນ​ກະ​ທົບ​ໄປ​ເຖິງ​ລະດັບ​ການ​ຈ້າງ​ງານຢູ່​ໃນ​ປະ​ເທດ​ລາວ​ອີ​ກດ້ວຍ ​ໂດຍ​ໃນ​ໄລຍະ​ສະ​ເພາະໜ້ານີ້ ທາງ​ການ​ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ​ຂອງ​ລາວ​ເອງ ກໍ​ຄາດໝາຍວ່າ ຈະ​ມີ​ຄົນ​ລາວ​ທີ່​ຫວ່າງ​ງານ​ຢູ່​ໃນ​ປະ​ເທດ​ຈຳ​ນວນ​ຫລາຍ​ກວ່າ ໜຶ່ງ​ແສນ​ຄົນ ​ໂດຍ​ຍັງ​ບໍ່ທັນ​ລວມ​ໄປ​ເຖິງ ​ແຮງງານ​ລາວ​ທີ່​ລັກ​ລອບ​ທຳ​ງານ​ຢູ່​ໃນ​ໄທ​ໂດຍ​ຜິດ​ກົດໝາຍອີກ​ຫລາຍ​ກວ່າ ສີ່​ແສນ​ຄົນ​ແຕ່​ຢ່າງ​ໃດ.

ຊົງຣິດ ໂພນເງິນ ລາຍ​ງານ​ຈາກ​ບາງກອກໃນວັນທີ 10 ເມສາ 2009

ກ່ຽວຂ້ອງກັນ

XS
SM
MD
LG