<!-- IMAGE -->
ອີງຕາມກະຊວງຕ່າງປະເທດສະຫະຣັດ ນັ້ນ ແມ່ນວ່າ ໃນປີ 2008 ຜ່ານມານີ້ ສຫຣໄດ້ເພີ່ມການຊ່ວຍເຫລືອ ສຳລັບ ການພັທະນາຢູ່ໃນທົ່ວໂລກຂື້ນຢ່າງ ຫລວງຫລາຍ ຊຶ່ງນັບວ່າ ອີກຄັ້ງນຶ່ງທີ່ ສຫຣ ຍັງຄົງເປັນປະເທດທີ່ໃຫ້ການຊ່ວຍເຫລືອແກ່ຕ່າງປະເທດລາຍໃຫຍ່ທີ່ສຸດແຕ່ຜູ້ດຽວຂອງໂລກ ກ່າວຄື ເມື່ອປີກາຍນີ້ ພວກປະເທດພວມພັທະນາທັງຫລາຍນັ້ນ ໄດ້ຮັບການຊ່ວຍເຫລືອ ຈາກສຫຣ ລວມເປັນມູນຄ່າ 26 ພັນລ້ານໂດລາ ຄືເພີ່ມຂື້ນ 4 ພັນສອງຮ້ອຍລ້ານ ຫລື 19 ເປີເຊັນ ຈາກປີ 2007. ການຊ່ວຍເຫລືອດ້ານການພັທະນາຂອງສຫຣ ໄດ້ເພີ່ມຂື້ນຫລາຍກວ່າສາມເທົ່າຕົວໃນລະຍະສິບປີຜ່ານມາ.
ສະເພາະໃນປີ 2008 ຜ່ານມານີ້ ມູນຄ່າການຊ່ວຍເຫລືອແກ່ຕ່າງປະເທດຂອງສຫຣ ຖືວ່າ ສູງອັນດັບສອງໃນ ປະວັດສາດຂອງພວກໃຫ້ການຊ່ວຍເຫລືອທັງໝົດ ຮອງຈາກອັນດັບນຶ່ງ ທີ່ມີຈຳນວນຫລາຍເປັນປະວັດການຂອງ ສຫຣ ຄືໃນຈຳນວນເງິນ 27 ພັນເກົ້າ ຮ້ອຍລ້ານໂດລາໃນປີ 2005. ການເຕີບໃຫຍ່ຂຍາຍຕົວຂອງການຊ່ວຍເຫລືອດ້ານການພັທະນາຂອງສຫຣ ນັ້ນ ແມ່ນເນຶ່ອງມາຈາກການເສີມຂຍາຍ ໂຄງການຊ່ວຍເຫລືອຕ່າງໆຂອງສຫຣ ອອກໄປໃນຫລາຍໆ ພາກ ສ່ວນຕ່າງກັນ ເຊັ່ນໂຄງການສຸຂະພາບ ແລະປ້ອງ ກັນເຊື້ອເອັຊໄອວີແລະໂຣກເອດສ໌ ໃນທົ່ວໂລກ ການຊ່ວຍເຫລືອດ້ານມະນຸສະທຳ ແລະການຊ່ວຍເຫລືອເພື່ອການເຕີບໂຕດ້ານເສດຖະກິດ. ສ່ວນການຊ່ວຍເຫລືອແກ່ພວກປະເທດດ້ອຍພັທະນາເມື່ອປີຜ່ານມານັ້ນ ໄດ້ເພີ່ມຂື້ນ 40 ເປີເຊັນກວ່າ ເປັນ 6 ພັນ 9 ຮ້ອຍລ້ານໂດລາ ຈາກ 4 ພັນ 8 ຮ້ອຍລ້ານໃນ ປີ 2007.
ນອກເໜືອໄປຈາກການຊ່ວຍເຫລືອທາງດ້ານການພັທະນາຂອງຣັຖບານແລ້ວ ກໍຍັງມີການຊ່ວຍເຫລືອຈາກພາກ ສ່ວນເອກກະຊົນຂອງ ສຫຣ ຜ່ານການຄ້າ ການລົງທືນ ການສົ່ງເງິນຂອງຊາວອາເມຣິກັນ ຄືນເມືອໃຫ້ຍາດຕິພີ່ນ້ອງ ການຊ່ວຍເຫລືອລ້າ ແລະການບໍລິຈາກຂອງອົງການເພື່ອການກຸສົນຕ່າງໆ ຄິດເປັນມູນຄ່າຫລາຍພັນລ້ານໂດລາຕື່ມອີກ ເພື່ອສະນັບສະນຸນການພັທະນາໃນປະເທດເຫລົ່ານັ້ນ.
ຜ່ານໂຄງການຊ່ວຍເຫລືອຕ່າງປະເທດນັ້ນ ສຫຣແມ່ນພະຍາຍາມຈະຊຸກຍູ້ການຈະເຣີນເຕີບໂຕດ້ານເສດຖະກິດແບບຍືນຍົງ ສະນັບສະນຸນໃຫ້ມີການປົກຄອງທີ່ດີ ເພີ່ມໂອກາດໃຫ້ທຸກຄົນໄດ້ຮັບການສຶກສາທ່ີມີຄຸນນະພາບ ຕໍ່ສູ້ກັບພະຍາດ ແລະປັບປຸງການສາທາລະນະສຸກ ຕອບສະນອງຄວາມຮຽກຮ້ອງຕ້ອງການດ້ານມະນຸດສະທຳສຸກ ເສີນ ສ້າງຄວາມກ້າວໜ້າດ້ານສິດທິມະນຸດແລະເສຣີພາບ ປ້ອງກັນແລະຕອບໂຕ້ຕໍ່ການຂັດແຍ່ງກັນທາງອາວຸດ ແລະແກ້ໄຂບັນຫາພັຍຂົ່ມຂູ່ຂ້າມປະເທດ ເຊັ່ນ ລັດທິການກໍ່ການຮ້າຍໃນລະວ່າງຊາດ ການລັກລອບຂົນສົ່ງມນຸດ ແລະການຄ້າ ຂາຍຢາເສບຕິດ ທີ່ຜິດກົດໝາຍ.
ຣັຖບານສຫຣ ແມ່ນໄດ້ເພີ່ມທັງປະລິມານແລະຄຸນນະພາບຂອງການຊ່ວຍເຫລືອແກ່ຕ່າງປະເທດຂອງຕົນ. ສຫຣ ແມ່ນມີຄວາມໝາຍໝັ້ນທີ່ຈະໃຫ້ການຊ່ວຍເຫລືອແບບສອງຝ່າຍ ແລະຫລາຍ ຝ່າຍ ທີ່ມີປະສິດທິຜົນແລະອອກໝາກອອກຜົນ ໃຫ້ສອດຄ່ອງກັບຫລັກການຂອງຄຳປະກາດປາຣີ ແລະໝາຍໝັ້ນຕໍ່ການຊຸກຍູ້ ໃຫ້ມີການເຕີບໂຕດ້ານເສດຖະກິດແບບຢັ້ງຢືນ ແລະໃນລະຍະຍາວ ເພື່ອໃຫ້ພວກປະເທດທີ່ໄດ້ຮັບການຊ່ວຍເຫລືອນັ້ນ ກຸ້ມຕົນເອງແລະຫລີກລ່ຽງ ຈາກການກາງຕໍ່ເພິ່ງອິງການຊ່ວຍເຫລືອ ຈາກຕ່າງປະເທດຢູ່ເລື້ອຍໄປນັ້ນ.
