ທາງການລາວມຸ້ງຫວັງວ່າ ທາງການໄທຈະຍັງຄົງຮັກສາລະດັບການຮັບຊື້ກະແສໄຟຟ້າຈາກລາວ ຕາມທີ່ໄດ້ຕົກລົງກັນໄວ້ ໃນປະລິມານລວມ 7,000 megawatts ນັບແຕ່ປີ 2015 ເປັນຕົ້ນໄປ, ຫາກແຕ່ວ່າ ຍ້ອນບັນຫາວິກິດການທາງເສດຖະກິດການເງິນໂລກ ທີ່ໄດ້ສົ່ງຜົນກະທົບຕໍ່ເສດຖະກິດໂດຍລວມຂອງໄທດ້ວຍນັ້ນ ກໍໄດ້ເຮັດໃຫ້ມີຄວາມເປັນໄປໄດ້ສູງທີ່ໄທຈະມີການປັບຫລຸດການຊື້ກະແສໄຟຟ້າຈາກລາວໃຫ້ໜ້ອຍລົງ.
ທ່ານ ທອງລຸນ ສີສຸລິດ ຮອງນາຍົກລັດຖະມົນຕີີ ແລະ ລັດຖະມົນ ຕີວ່າການຕ່າງປະເທດຂອງລາວ ໄດ້ຖະແຫລງເນັ້ນຢ້ຳ ພາຍ ຫລັງຈາກການສິ້ນສຸດກອງປະຊຸມຄະນະກຳມາທິການຮ່ວມ ລະຫວ່າງ ລາວກັບໄທ ຄັ້ງທີ 15 ຊຶ່ງໄດ້ມີຂຶ້ນຢ່າງເປັນທາງການ ໃນລະຫວ່າງ ວັນທີ 23 ຫາ 25 ມີນາ ທີ່ຜ່ານມານີ້ ຢູ່ເມືອງຫລວາງພະບາງ ດ້ວຍການສະແດງຄວາມມຸ້ງຫວັງວ່າ ທາງການໄທ ຈະຍັງຄົງສືບຕໍ່ຮັກສາລະດັບການຮັບຊື້ກະແສໄຟຟ້າຈາກລາວ ໃນປະລິມານລວມ 7,000 ເມກາວັດ ນັບຈາກ ປີ 2015 ເປັນຕົ້ນໄປ ຊຶ່ງເປັນໄປຕາມຂໍ້ຕົກລົງໃນບົດບັນທຶກຄວາມເຂົ້າໃຈ ຮ່ວມ ຫລື MOU ສະບັບໃໝ່ທີ່ໄດ້ລົງນາມຮ່ວມກັນລະຫວ່າງນາຍົກລັດຖະມົນຕີຂອງທັງສອງປະເທດ ນັບຈາກປີ 2007 ເປັນຕົ້ນມາແລ້ວ ດັ່ງທີ່ ທ່ານ ທອງລຸນ ໄດ້ຖະແຫລງເນັ້ນຢ້ຳໃນ ຕອນໜຶ່ງ ວ່າ:
ສອງຝ່າຍກໍມີຄວາມຍິນດີ ຕໍ່ການພົບປະຂອງສອງນາຍົກລັດຖະມົນຕີ ຂອງສອງປະເທດ ເຊິ່ງຝ່າຍໄທໄດ້ຢືນຢັນ ຈະສືບຕໍ່ຮັບຊື້ກະແສໄຟຟ້າຂອງລາວທີ່ໄດ້ເຊັນກັນ ທີ່ໄດ້ຕົກລົງກັນເປັນ 7,000 ເມກາວັດນັ້ນ ພາຍຫລັງປີ 2015 ຕາມບົດບັນທຶກວ່າດ້ວຍການຮ່ວມມື ແລະ ການພັດທະນາພະລັງໄຟຟ້າລະຫວ່າງລາວກັບໄທ ໃນ ວັນທີ 22 ທັນວາ ປີ 2007.
ໂດຍພາຍໃຕ້ຂໍ້ຕົກລົງດັ່ງກ່າວລະຫວ່າງລາວກັບໄທ ໄດ້ກຳນົດຮ່ວມກັນໄວ້ວ່າ ຈະໃຫ້ການໄຟຟ້າຝ່າຍຜະຫລິດແຫ່ງປະເທດໄທ ເປັນພາກສ່ວນທີ່ຈະຮັບຊື້ກະແສໄຟຟ້າຈາກລາວ ໂດຍທີ່ຈະຕ້ອງຮັບຜິດຊອບໃນການເຈລະຈາຮ່ວມກັນ ກັບບັນດາກຸ່ມບໍລິສັດທີ່ເຂົ້າໄປລົງທຶນກໍ່ ສ້າງເຂື່ອນ ຫລື ໂຮງ ງານໄຟຟ້າຢູ່ໃນລາວ ເພື່ອກຳນົດລາຄາຊື້ຂາຍກະແສໄຟຟ້າລະຫວ່າງກັນໃຫ້ຮຽບຮ້ອຍ ແລະ ໃນໄລຍະທີ່ຜ່ານມາ ກໍປະກົດວ່າໄດ້ມີການກຳນົດບັນດາໂຄງການເຂື່ອນ ຫລື ໂຮງງານໄຟຟ້າທີ່ໄທ ຈະຮັບຊື້ກະແສໄຟຟ້າຈາກລາວແລ້ວ ຊຶ່ງກໍຄື ໂຄງການເຂື່ອນນ້ຳເທີນສອງ, ໂຄງການເຂື່ອນນ້ຳເທີນໜຶ່ງ, ໂຄງການເຂື່ອນນ້ຳງຽບ, ໂຄງການເຂື່ອນນ້ຳອູ, ໂຄງການເຂື່ອນນ້ຳເທີນຫີນບູນໄລຍະທີ່ ສອງ, ໂຄງການເຂື່ອນນ້ຳງື່ມ ສອງ ແລະ ສາມ ລວມໄປເຖິງ ໂຄງການຫົງສາລິກໄນ ຊຶ່ງຈະຜະຫລິດກະແສໄຟຟ້າຈາກຖ່ານລິກໄນ ຕັ້ງຢູ່ໃນເຂດແຂວງໄຊຍະບູລີອີກດ້ວຍ.
ແຕ່ຢ່າງໃດກໍຕາມ ກ່ອນໜ້ານີ້ ທ່ານ ປະນິທານ ວັດ ທະນາຍາກອນ ຮັກສາການໂຄສົກ ລັດຖະ ບານໄທ ກໍໄດ້ຖະແຫລງການຢືນຢັນວ່າ ໃນໂອກາດທີ່ ທ່ານ ສົມສະຫວາດ ເລັງສະຫວັດ ຮອງນາຍົກລັດຖະມົນ ຕີ ຜູ້ປະຈຳການຄະນະລັດຖະບານ ລາວ ໄດ້ເຂົ້າ ຢ້ຽມຄຳນັບ ທ່ານ ອະພິຊິດ ເວດຊາຊີວະ ນາຍົກລັດຖະມົນຕີຂອງໄທເມື່ອບໍ່ນານມານີ້ ທາງການຂອງທັງສອງຝ່າຍ ໄດ້ມີການຢິບຍົກເອົາປະເດັນ ກ່ຽວ ກັບການຮ່ວມມືພັດທະນາທາງດ້ານພະລັງງານລະຫວ່າງກັນ ຂຶ້ນມາປຶກສາຫາລື ເພື່ອເປັນປະເດັນສຳຄັນ ໃນການທີ່ຈະຕົກລົງໃນໄລຍະຕໍ່ໄປ. ທັງນີ້ ໂດຍເຖິງແມ່ນວ່າທາງການຂອງທັງສອງຝ່າຍ ຈະຍັງຄົງຢືນຢັນທີ່ຈະຮ່ວມມືກັນໃນດ້ານດັ່ງກ່າວຕໍ່ໄປຢ່າງບໍ່ຢຸດຢັ້ງກໍຕາມ ຫາກແຕ່ວ່າດ້ວຍບັນຫາວິກິດການທາງເສດຖະກິດການເງິນໂລກ ທີ່ເປັນຢູ່ໃນຂະນະນີ້ ຈຶ່ງເຮັດໃຫ້ທັງສອງຝ່າຍເຫັນສອດຄອງກັນວ່າ ຈຳເປັນທີ່ຈະຕ້ອງມີການທົບທວນຄືນໃໝ່ທັງໝົດ ໃນສ່ວນທີ່ກ່ຽວຂ້ອງກັບຕົ້ນທຶນຂອງການສ້າງເຂື່ອນ ແລະ ໂຮງງານໄຟຟ້າໃນລາວ ແລະ ໃນສ່ວນທີ່ກ່ຽວຂ້ອງ ກັບຄວາມຕ້ອງການຊົມໃຊ້ພະລັງງານໄຟຟ້າ ທີ່ເປັນຈິງໃນປະເທດໄທ.
ທ່ານ ປະນິທານ ບອກດ້ວຍວ່າ ການທົບທວນຄືນເພື່ອປັບປຸງ ຫລື ປ່ຽນແປງບັນດາຂໍ້ຕົກລົງ ແລະ ສັນຍາຊື້ຂາຍກະແສໄຟຟ້າລະຫວ່າງລາວກັບໄທດັ່ງກ່າວນີ້ ມີກຳນົດການທີ່ຈະດຳເນີນໃຫ້ແລ້ວເສັດກ່ອນທີ່ ທ່ານ ບົວສອນ ບຸບພາວັນ ນາຍົກລັດຖະມົນຕີລາວ ຈະເດີນທາງຢ້ຽມ ຢາມປະເທດໄທຢ່າງເປັນທາງການໃນ ເດືອນພຶດສະພາ ປີນີ້ຕໍ່ໄປ. ຫາກ ແຕ່ວ່າ ດ້ວຍບັນຫາວິກິດການ ທາງເສດຖະກິດການເງິນດັ່ງກ່າວ ກໍໄດ້ເຮັດໃຫ້ກຸ່ມລົງທຶນກໍ່ສ້າງເຂື່ອນຢູ່ໃນລາວຫລາຍໂຄງການ ຍັງຄົງບໍ່ສາມາດທີ່ຈະຫາແຫລ່ງເງິນທຶນກູ້ຢືມໄດ້ ເນື່ອງຈາກວ່າທາງຝ່າຍໄທເອງ ກໍຍັງຄົງບໍ່ຍອມລົງນາມໃນສັນຍາຮັບຊື້ກະແສໄຟຟ້າຈາກລາວຢ່າງເປັນທາງການອີກດ້ວຍ. ເພາະສະນັ້ນ ທັງສອງຝ່າຍ ຈຶ່ງຍັງຄົງບໍ່ສາມາດຕົກລົງກັນໄດ້ ກ່ຽວກັບລາຄາຊື້ຂາຍກະແສໄຟຟ້າລະຫວ່າງກັນນັ້ນເອງ.
ຊົງຣິດ ໂພນເງິນ ລາຍງານຈາກບາງກອກໃນວັນທີ່ 29 ມີນາ 2009
