ລິ້ງ ສຳຫລັບເຂົ້າຫາ

ວັນເສົາ, ໐໒ ມີນາ ໒໐໒໔

ຈີນ ແລະ ມາເລເຊຍ ຊຶ່ງຕາມປົກກະຕິ ເປັນເພື່ອນມິດກັນ ແຕ່ໄດ້ເກີດການປະເຊີນໜ້າ ທາງທະເລຮອບໃໝ່


ຮູບກຳປັ່ນຈີນ ແລ່ນຢູ່ໃນທະເລຈີນໃຕ້ ທີ່ພວມມີການຂັດແຍ້ງກັນ ເມື່ອວັນທີ 21 ເມສາ 2017.
ຮູບກຳປັ່ນຈີນ ແລ່ນຢູ່ໃນທະເລຈີນໃຕ້ ທີ່ພວມມີການຂັດແຍ້ງກັນ ເມື່ອວັນທີ 21 ເມສາ 2017.

ຈີນ ແລະມາເລເຊຍ ໄດ້ປະເຊີນໜ້າກັນ ແບບງຽບໆອີກເທື່ອນຶ່ງ ແຕ່ຄັ້ງນີ້ ເບິ່ງຄືວ່າ ​ແມ່ນດົນຜິດປົກກະຕິໃນເຂດທະເລບ່ອນທີ່ການອ້າງເອົາອະທິປະໄຕຂອງປະເທດທັງສອງກວມກັນ ແລະຕ່າງຝ່າຍຕ່າງກໍໄດ້ສະແດງອອກໃຫ້ເຫັນເຖິງຄວາມຕັ້ງໃຈທີ່ແຂງຂັນຂອງຕົນຂຶ້ນກວ່າເກົ່າໃນຄວາມພາກພູມໃຈແລະຄວາມເຊື່ອໝັ້ນຂອງຕົນຕໍ່ອີກຝ່າຍນຶ່ງ ອີງຕາມຄຳເວົ້າຂອງພວກນັກວິເຄາະທີ່ຕິດຕາມເບິ່ງການເຄື່ອນໄຫວຂອງປະເທດທັງສອງ.

ໃນຕົ້ນເດືອນແລ້ວນີ້ ກຳປັ່ນຂອງໜ່ວຍຍາມຝັ່ງຂອງຈີນ ໝາຍເລກ 5402 ໄດ້ເຂົ້າໄປຈອດຢູ່ໃກ້ກັບໝູ່ຫາດລູໂກເນຍ (Luconia Shoals) ໃນບໍລິເວນທະເລທາງພາກເໜືອຂອງເກາະບໍນຽວ ທີ່ປະເທດມາເລເຊຍກ່າວວ່າ ຢູ່ໃນເຂດເສດຖະກິດສະເພາະທາງທະເລຂອງຕົນ ອີງຕາມອົງການລິເລີ້ມທາງທະເລທີ່ໂປ່ງໃສໃນເຂດເອເຊຍ ທີ່ຕັ້ງຢູ່ນະຄອນຫຼວງວໍຊິງຕັນ.

ປັກກິ່ງເວົ້າວ່າ ເຂດທະເລດັ່ງກ່າວ ແມ່ນນອນຢູ່ໃນເສັ້ນແບ່ງດິນແດນຂອງຕົນທີ່ກວມເອົາ 90 ເປີເຊັນຂອງທະເລຈີນໃຕ້ ຊຶ່ງເປັນການຄາດຄະເນທີ່ອີງຕາມບັນທຶກ ໃນການນຳໃຊ້ທາງປະຫວັດສາດ. ບຣູນາຍ ມາເລເຊຍ ຟີລິບປິນ ໄຕ້ຫວັນແລະຫວຽດນາມຕ່າງກໍໄດ້ອ້າງເອົາກຳມະສິດຂອງຕົນເປັນບາງສ່ວນຫຼືວ່າທັງໝົດກວມກັນກັບການອ້າງເອົາອະທິປະໄຕໃນເຂດທະເລທີ່ກວ້າງ 3 ລ້ານ 5 ແສນຕາລາງກິໂລແມັດທີ່ອຸດົມສົມບູນໄປດ້ວຍປູປານານ້ຳຕະຫຼອດທັງແຫຼ່ງພະລັງງານນຳດ້ວຍ.

ເມື່ອວັນທີ 19 ພະຈິກຜ່ານມາ ກຳປັ່ນຂອງຈີນໄດ້ຮາວີລົບກວນກຳປັ່ນເຈາະນ້ຳມັນແລະຂົນເຄື່ອງຂອງມາເລເຊຍ ທີ່ປະຕິບັດງານຢູ່ໃນບໍລິເວນ 44 ໄມລ໌ທະເລຫຼື 81.5 ກິໂລແມັດຢູ່ນອກແຄມຝັ່ງທະເລຂອງຕົນ ອີງຕາມອົງການລິເລີ້ມທາງ ທະເລທີ່ໂປ່ງໃສ ຂອງສູນກາງຍຸດທະສາດແລະການສຶກສາລະຫວ່າງປະເທດຊຶ່ງເປັນອົງການວິໄຈບັນຫາຂອງສະຫະລັດ. ມາເລເຊຍໄດ້ສົ່ງກຳປັ່ນຂອງຕົນໄປຍັງບໍລິເວນທີ່ມີການຂັດແຍ້ງກັນ ແລະກຳປັ່ນລຳນັ້ນໄດ້ຖືກຕິດຕາມໂດຍກຳປັ່ນຂອງຈີນ ອີງຕາມລາຍງານເມື່ອວັນທີ 25 ພະຈິກຂອງກຳປັ່ນລຳດັ່ງກ່າວ.

ເຫດການແບບນີ້ແມ່ນພວມກາຍເປັນເລື້ອງທຳມະດາແລ້ວ ນັ້ນຄືຄຳເວົ້າຂອງພວກນັກຊ່ຽວຊານຢູ່ໃນມາເລເຊຍ ແຕ່ມັນໄດ້ເກີດຂຶ້ນໂດຍບໍ່ມີຜູ້ໃດສັງເກດຍ້ອນວ່າລັດຖະບານຂອງປະເທດທັງສອງ ຊຶ່ງສ່ວນໃຫຍ່ແລ້ວ ແມ່ນບໍ່ໄດ້ຜິດຖຽງກັນແລະບໍ່ໄດ້ໃຫ້ຄວາມສຳຄັນໃນການຂັດແຍ້ງດັ່ງກ່າວ.

ແຕ່ເວລານີ້ມາເລເຊຍແມ່ນມີຄວາມຈິງຈັງ ທີ່ຈະເອົາ “ບາດກ້າວແບບມີປະສິດທິຜົນ” ໃນການປົກປ້ອງ ຕໍ່ການອ້າງເອົາອະທິປະໄຕຂອງຕົນ ດ້ວຍການນຳໃຊ້ເຂດທະເລ ນັ້ນຄືຄຳເວົ້າຂອງທ່ານໂອ ໄອ ຊຸນ (Oh Ei Sun) ເຈົ້າໜ້າທີ່ອະວຸໂສຂອງສະຖາບັນກິດຈະການລະຫວ່າງປະເທດຂອງສິງກະໂປ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG