ເລຂາທິການໃຫຍ່ ອົງການສະຫະປະຊາຊາດ ທ່ານແອນໂຕນີໂອ ກິວເຕເຣັສ ກ່າວວ່າ ການສູ້ລົບທີ່ເພີ້ມທະວີຄວາມຮຸນແຮງຂຶ້ນ ໃນຊີເຣຍ ແມ່ນ “ນຶ່ງໃນເວລາທີ່ເປັນອັນຕະລາຍຮ້າຍແຮງທີ່ສຸດ ຂອງບັນຫາຂັດແຍ້ງ ແລະຮຽກຮ້ອງໃຫ້ມີການຢຸດຍິງໃນທັນທີ.”
ທ່ານກ່າວຕໍ່ພວກນັກຂ່າວ ທີ່ນະຄອນນິວຢອກ ໃນວັນສຸກວານນີ້ວ່າ “ໃນໄລຍະສອງສາມມື້ຜ່ານມານີ້ ຂ້າພະເຈົ້າໄດ້ເຕືອນຊ້ຳແລ້ວຊ້ຳອີກກ່ຽວກັບການເພີ້ມທະວີຄວາມຮຸນແຮງ ໃນການເປັນປໍລະປັກ ຢູ່ໃນພາກຕາເວັນຕົກສຽງເໜືອຂອງປະເທດຊີເຣຍ. ຂ້າພະເຈົ້າຢ້ານກົວວ່າ ເຫດການໃນຮອບ 24 ຊົ່ວໂມງຜ່ານມານີ້ ພວກເຮົາໄດ້ກ້າວມາຮອດຈຸດແລ້ວ.”
ຫົວໜ້າອົງການສະຫະປະຊາຊາດ ໃຫ້ຄວາມເຫັນດັ່ງກ່າວ ຫຼັງຈາກທະຫານເທີກີ 33 ຄົນຖືກຂ້າຕາຍໃນວັນພະຫັດຜ່ານມາໂດຍການໂຈມຕີທາງອາກາດຂອງລັດຖະບານຊີເຣຍ ຢູ່ໃນແຂວງອິດລິບ ຊຶ່ງເປັນເຫດການທີ່ຮ້າຍແຮງສຸດສຳລັບພວກທະຫານເທີກີ ນັບແຕ່ໄດ້ເຂົ້າຮ່ວມບັນຫາຂັດແຍ້ງ ມາແຕ່ປີ 2016. ທະຫານຊີເຣຍ ທີ່ໄດ້ຮັບການໜຸນຫຼັງຈາກຣັດເຊຍພວມທຳການບຸກໂຈມຕີຢ່າງໜັກ ເພື່ອຂັບໄລ່ພວກຕໍ່ຕ້ານລັດຖະບານ ອອກໄປຈາກທີ່ໝັ້ນແຫ່ງສຸດທ້າຍຂອງພວກເຂົາເຈົ້າ ຢູ່ໃນແຂວງອິດລິບ.
ທານກິວເຕເຣັສ ກ່າວວ່າ ການຢຸດຍິງແມ່ນມີຄວາມຈຳເປັນ “ກ່ອນທີ່ສະຖານະການຈະຄວບຄຸມບໍ່ໄດ້.”
ສະພາຄວາມໝັ້ນຄົງອົງການສະຫະປະຊາຊາດ ໄດ້ປະຊຸມສຸກເສີນໃນວັນສຸກ ວານນີ້ ຊຶ່ງສະມາຊິກ 13 ປະເທດ ຂອງຈຳນວນທັງໝົດ 15 ປະເທດໄດ້ໃຫ້ການສະໜັບສະໜຸນຕໍ່ການຮຽກຮ້ອງໃຫ້ມີການຢຸດຍິງຂອງທ່ານກິວເຕເຣັສ.
ເອກອັກຄະລັດຖະທູດສະຫະລັດ ປະຈຳອົງການສະຫະປະຊາຊາດ ທ່ານນາງແຄລລີ ແຄຣັບທ໌ ໄດ້ຮຽກຮ້ອງໃຫ້ “ສະຫະພັນຣັດເຊຍຢຸດເຊົາການປະຕິບັດງານໂດຍເຮືອບິນລົບຂອງຕົນ ແລະຮຽກຮ້ອງໃຫ້ກຳລັງທະຫານຊີເຣຍ ແລະຣັດເຊຍທີ່ເປັນຜູ້ໜຸນຫຼັງ ຖອນທະຫານອອກໄປ ສູ່ເສັ້ນຢຸດຍິງ ຊຶ່ງໄດ້ມີການສ້າງຕັ້ງຂຶ້ນໃນປີ 2018.
ຣັດເຊຍໄດ້ປະຕິເສດວ່າ ກຳລັງຂອງຕົນບໍ່ໄດ້ພົວພັນໃນການໂຈມຕີທາງອາກາດດັ່ງກ່າວ.
ເອກອັກຄະລັດຖະທູດຣັດເຊຍ ປະຈຳສະຫະປະຊາຊາດ ທ່ານວາສຊີລີ ເນເບັນເຊຍ ກ່າວຕໍ່ສະພາຄວາມໝັ້ນຄົງວ່າ ຄະນະຜູ້ແທນຂອງຣັດເຊຍ ພວມຢູ່ທີ່ນະຄອນຫຼວງອັງກາຣາ ເພື່ອເຮັດໃຫ້ສະຖານະການມີຄວາມທຸ່ນທ່ຽງ ແລະກ່າວວ່າມົສກູ “ພ້ອມແລ້ວທີ່ຈະຫຼຸດຜ່ອນຄວາມຮຸນແຮງລົງ ກັບປະເທດໃດກໍຕາມທີ່ຕ້ອງການຢາກໃຫ້ເຮັດແບບນັ້ນ.”