ກອງທັບເຮືອຂອງສະຫະລັດ ເວົ້າວ່າ ເຮືອພິຄາດຂອງກອງທັບເຮືອຈີນ ໄດ້ແນເປົ້າຍິງແສງເລເຊີໃສ່ເຮືອບິນລາດຕະເວນຂອງສະຫະລັດ ໃນຂະນະທີ່ເຮືອບິນດັ່ງກ່າວ ບິນເຫວີ່ນຢູ່ເທິງເຂດທະເລຂອງຟີລິບປິນ, ຊຶ່ງຫ່າງຈາກ ເກາະກວາມ ໄປທາງຕາເວັນຕົກປະມານ 600 ກິໂລແມັດ ໃນອາທິດແລ້ວນີ້.
ກອງທັບເຮືອປະຈຳເຂດມະຫາສະໝຸດປາຊີຟິກຂອງສະຫະລັດ ກ່າວຢູ່ໃນຖະແຫລງການສະບັບນຶ່ງວ່າ ກຳປັ່ນຂອງຈີນໄດ້ແນແສງເລເຊີໄປໃສ່ເຮືອບິນລາດ
ຕະເວນ P-8A Poseidon ຂອງອາເມຣິກາໃນແບບທີ່ວ່າ "ບໍ່ປອດໄພ" ແລະ "ບໍ່ມີລັກສະນະວິຊາການ," ໃນຂະນະທີ່ເຮືອບິນ P-8 ກຳລັງປະຕິບັດງານຢູ່ "ໃນເຂດໜ່ານຟ້າສາກົນທີ່ສອດຄ່ອງກັບກົດ ແລະລະບຽບການຂອງສາກົນ.”
ຖະແຫລງການສະບັບນັ້ນກ່າວອີກວ່າ ການກະທຳເຊັ່ນນັ້ນຂອງຈີນ ເປັນການລະເມີດຕໍ່ກົດການປະເຊີນໜ້າກັນແບບບໍ່ໄດ້ວາງແຜນໄວ້ ຢູ່ໃນເຂດທະເລຫລື CUES ຊຶ່ງເປັນຂໍ້ຕົກລົງຫລາຍຝ່າຍທີ່ເຊັນກັນໃນປີ 2014 ແລະທັງຍັງເປັນການກະທຳທີ່ບໍ່ສອດຄ່ອງກັບບົດບັນທຶກຄວາມເຂົ້າໃຈ ຫລື MOU ທີ່ເຊັນກັນລະຫວ່າງກະຊວງປ້ອງກັນປະເທດຂອງສະຫະລັດ ກັບກະຊວງປ້ອງກັນປະເທດຂອງຈີນ ກ່ຽວກັບຄວາມປອດໄພໃນການປະເຊີນໜ້າກັນ ຢູ່ເທິງອາກາດ ແລະໃນທະເລ.
ແສງເລເຊີ ແມ່ນຖືກຈັບໄດ້ດ້ວຍເຄື່ອງຈັບສັນຍານຢູ່ເທິງເຮືອບິນ P-8A ແລະບໍ່ສາມາດເບິ່ງເຫັນດ້ວຍຕາເປົ່າ. ກອງທັບເຮືອກ່າວວ່າ "ແສງເລເຊີໃນລະດັບ ທີ່ເປັນອາວຸດ ອາດຈະເຮັດໃຫ້ພະນັກງານຢູ່ໃນເຮືອບິນ ແລະພວກຢູ່ໃນເຮືອຢູ່ທະເລ ເຈັບເປັນໄດ້ ຕະຫລອດທັງເຮັດໃຫ້ລະບົບຂອງກຳປັ່ນ ແລະຂອງເຮືອບິນໄດ້ຮັບຄວາມເສຍຫາຍໄດ້.”
ເຮືອບິນ P-8A Poseidon ແມ່ນປະຈຳການຢູ່ທີ່ຖານທັບອາກາດຄາເດນາ (Kadena) ໃນເກາະໂອກີນາວາ (Okinawa) ຂອງຍີ່ປຸ່ນ ແລະໄດ້ດຳເນີນການປະຕິບັດງານລາດຕະເວນໃນເຂດທະເລເປັນປະຈຳ ແລະທຳການສຳຫລວດ ຢູ່ໃນຂົງເຂດການປະຕິບັດງານຂອງກອງທັບເຮືອທີ 7 ຂອງສະຫະລັດ.