ສະຫະລັດໄດ້ທຳການລົງໂທດຮອບໃໝ່ຕໍ່ຣັດເຊຍ ທີ່ພົວພັນກັບການໂຈມຕີດ້ວຍສານພິດທຳລາຍປະສາດຢູ່ປະເທດອັງກິດໃສ່ອະດີດສາຍລັບຣັດເຊຍຄົນນຶ່ງແລະ ລູກສາວຂອງທ່ານ ໃນປີກາຍ.
ກະຊວງການຕ່າງປະເທດສະຫະລັດ ກ່າວຢູ່ໃນຖະແຫຼງການສະບັບນຶ່ງວ່າ ມາດຕະການລົງໂທດໃໝ່ “ຈະຄັດຄ້ານໃນການຕໍ່ອາຍຸການກູ້ຢືມ ຫຼືເລື້ອງການເງິນ ຫຼືການຊ່ວຍເຫຼືອທາງດ້ານເຕັກນິກແກ່ຣັດເຊຍ ໂດຍສະຖາບັນການເງິນລະຫວ່າງປະເທດ ເຊັ່ນທະນາຄານໂລກ ຫຼືອົງການກອງທຶນສາກົນ IMF.
ນອກນັ້ນ ທະນາຄານຕ່າງໆຂອງສະຫະລັດ ກໍຈະຖືກຫ້າມ ບໍ່ໃຫ້ເຂົ້າຮ່ວມໃນການໂອນເງິນໃດໆກັບຣັດເຊຍ.
ຍິ່ງໄປກວ່ານັ້ນ ຍັງຈະມີການນຳໃຊ້ນະໂຍບາຍ “ເລີ້ມປະຕິເສດ” ບໍ່ໃຫ້ອອກໃບອະນຸຍາດ ເພື່ອສົ່ງອອກໄປຍັງຣັດເຊຍ ກ່ຽວກັບວັດຖຸຕ່າງໆ ທີ່ສາມາດນຳໃຊ້ ໄດ້ສອງທາງ ທີ່ເປັນສານເຄມີແລະຊີວະພາບ ທີ່ຄວບຄຸມໂດຍກະຊວງການຄ້າ ຂອງສະຫະລັດ.
ການລົງໂທດດັ່ງກ່າວ ຈະເລີ້ມມີຜົນໃນເວລາ 15 ມື້ ໃນໄລຍະແຈ້ງການຂອງລັດ ຖະສະພາ ແລະຈະມີຜົນບັງຄັບໃຊ້ຢ່າງໜ້ອຍນຶ່ງປີ.
ທ່ານເຊີເກ ສກຣີພອລ ແລະລູກສາວຂອງທ່ານ ລອດຊີວິດມາໄດ້ຈາກການໂຈມຕີດ້ວຍອາວຸດເຄມີທຳລາຍປະສາດ ໃນປີກາຍນີ້ ຢູ່ເມືອງຊາລສ໌ບູຣີ ໃນປະເທດອັງກິດ. ການໂຈມຕີດັ່ງກ່າວ ໄດ້ມີການຖິ້ມໂທດໃສ່ປະເທດຣັດເຊຍ.
