ສະຫະລັດ ຈະຊອກຫາຊ່ອງທາງ ເພື່ອໃຫ້ມີ ການເອົາ “ບາດ
ກ້າວອັນເໝາະສົມ” ຢູ່ໃນສະພາຄວາມໝັ້ນຄົງສະຫະປະຊະ
ຊາດ “ໃນບໍ່ເທົ່າໃດມື້ຂ້າງໜ້ານີ້” ຕໍ່ການທີ່ອີຣ່ານທີ່ໄດ້ຍິງທົດ
ລອງລູກສອນໄຟຂີປະນາວຸດ ເມື່ອຕົ້ນອາທິດນີ້.
ເອກອັກຄະລັດຖະທູດ ສະຫະລັດ ປະຈຳອົງການສະຫະປະ
ຊາຊາດ ທ່ານນາງ Samantha Power ກ່າວຕໍ່ວີໂອເອໃນ
ວັນສຸກມື້ນີ້ວ່າ “ພວກເຮົາໄດ້ຄົ້ນຫາຄວາມຈິງ ແລະບັດນີ້ປາ
ກົດວ່າ ການຍິງລູກສອນໄຟທີ່ອີຣ່ານໄດ້ກະທຳໄປນັ້ນແມ່ນ
ລະເມີດຕໍ່ມະຕິຂອງສະພາຄວາມໝັ້ນຄົງສະຫະປະຊາຊາດ.
ແນ່ນອນ ພວກເຮົາຈະນຳເອົາເລື້ອງນີ້ ຂື້ນສູ່ສະພາຄວາມ
ໝັ້ນຄົງສະຫະປະຊາຊາດ ແລະກົດດັນໃຫ້ມີການເອົາບາດກ້າວ ທີ່ເໝາະສົມ ແລະພວກ
ເຮົາຍັງຈະເບິ່ງໄປໃນລະດັບສອງກຳ້ສອງຝ່າຍ ທີ່ພວກເຮົາສາມາດເຮັດໄດ້.”
ໃນວັນພຸດແລ້ວນີ້ ທ່ານນາງ Power ກ່າວວ່າ ວໍຊິງຕັນ ໄດ້ສຶກສາເບິ່ງ ໃນອັນທີ່ເປັນໄປ
ໄດ້ວ່າ ອີຣ່ານໄດ້ລະເມີດຕໍ່ມະຕິຂອງສະພາຄວາມໝັ້ນຄົງ ດ້ວຍການຍິງລູກສອນໄຟ.
ທ່ານນາງກ່າວວ່າ ການຢືນຢັນກ່ຽວກັບການຍິງລູກສອນໄຟຂີປະນາວຸດໄລຍະປານກາງ
ເມື່ອວັນທີ 10 ຕຸລາຜ່ານມາ ທີ່ສາມາດບັນທຸກ ຫົວລະເບີດນິວເຄລຍໄດ້ນັ້ນ ແມ່ນເປັນທີ່
ຈະແຈ້ງລະເມີດຕໍ່ມະຕິ 1929 ຂອງສະພາຄວາມໝັ້ນຄົງສະຫະປະຊາຊາດ ທີ່ໄດ້ມີການ
ຮັບຮອງເອົາ ເມື່ອຫ້າປີກ່ອນ ຊຶ່ງໄດ້ຫ້າມບໍ່ໃຫ້ ມີການທົດລອງດັ່ງກ່າວ.
ທ່ານນາງ Power ກ່າວວ່າ ສະຫະລັດກຳລັງກະກຽມລາຍງານກ່ຽວກັບເຫດການດັ່ງກ່າວ
ເພື່ອສະເໜີຕໍ່ຄະນະກຳມະການລົງໂທດອີຣ່ານໃນສະພາຄວາມໝັ້ນຄົງແລະອາດຈະຍົກ
ເອົາເລື້ອງດັ່ງກ່າວ ຂຶ້ນມາໂອ້ລົມໂດຍກົງ ກັບບັນດາສະມາຊິກຂອງສະພາຄວາມໝັ້ນຄົງ.
ທ່ານນາງກ່າວວ່າ “ການຫ້າມຂອງສະພາຄວາມໝັ້ນຄົງກ່ຽວກັບກິດຈະການລູກສອນໄຟ
ຂີປະນາວຸດຂອງອີຣ່ານພ້ອມດ້ວຍການຫ້າມຂາຍອາວຸດຍັງມີຜົນບັງຄັບໃຊ້ຢູ່ເໝືອນເດີມ ແລະພວກເຮົາຈະສືບຕໍ່ກົດດັນ ໃຫ້ສະພາຄວາມໝັ້ນຄົງ ທຳການຕອບໂຕ້ ທີ່ເໝາະສົມຕໍ່
ການທີ່ອີຣ່ານບໍ່ເອົາຫົວຊາກ່ຽວກັບພັນທະສາກົນຂອງຕົນ.”
ທ່ານນາງໄດ້ກ່າວຕໍ່ວີໂອເອ ວ່າ ການລະເມີດດັ່ງກ່າວນີ້ ບໍ່ມີທ່າທາງວ່າຈະເປັນຜົນກະທົບ
ຕໍ່ການຈັດຕັ້ງ ປະຕິບັດຂໍ້ຕົກລົງນິວເຄລຍ ທີ່ໄດ້ບັນລຸກັນໃນ ເດືອນກໍລະກົດລະຫວ່າງເຕ
ຫະຣ່ານແລະຫົກປະເທດມະຫາອຳນາດ.
