ລິ້ງ ສຳຫລັບເຂົ້າຫາ

ປະທານາທິບໍດີ ເທີກີ ຮຽກຮ້ອງ ໃຫ້ຈັດ ການເລືອກຕັ້ງ ໃໝ່


ປະທານາທິບໍດີ ເທີກີ ທ່ານ Recep Tayyip Erdogan, 31 ກໍລະກົດ, 2015.

ປະທານາທິບໍດີ ເທີກີ ທ່ານ Recep Tayyip Erdogan, 31 ກໍລະກົດ, 2015.

ປະທານາທິບໍດີ ​ເທີ​ກີ ທ່ານ Recep Tayyip Erdogan ​ໄດ້ຮຽກ​ຮ້ອງ​ໃຫ້​ມີ​ການ​ເລືອກ​ຕັ້ງ​ລັດຖະສະພາ​ໃໝ່, ຫຼັງ​ຈາກ​ກຳນົດ​ເສັ້ນ​ຕາຍ​ໄດ້​ລ່ວງກາຍແລ້ວ​ ສຳລັບ​ການສ້າງ​ລັດຖະບານຮ່ວມ​ກັບ​ພັກ​ຝ່າຍ​ຄ້ານ.

ການ​ເຄື່ອນ​ໄຫວດັ່ງກ່າວ, ໄດ້​ປະກາດໃນ​ຖະ​ແຫຼ​ງການ ປະທານາທິບໍດີ ​ໃນ​ວັນ​ຈັນ​ວານ​ນີ້, ​ແມ່ນ​ໄດ້​ຖືກ​ຄາດໝາຍ​ຢ່າງ​ກວ້າງ​ຂວາງ ​ຫຼັງ​ຈາກ​ສອງ​ເດືອນ​ ທີ່ໄດ້ມີ​ການ​ເຈລະຈາ​ກ່ຽວກັບ ການສ້າງຕັ້ງລັດຖະບານ ​ບໍ່ສາມາດທີ່​ຈະ​ສ້າງ​ລັດຖະບານ​ໃໝ່ໄດ້.

ຖະ​ແຫຼ​ງການ​ດັ່ງກ່າວ​ບໍ່​ໄດ້​ແຈ້ງໃຫ້ວ່າ ເມື່ອ​ໃດ​ການ​ເລືອກ​ຕັ້ງໃໝ່​ຈະມີ​ຂຶ້ນ, ​ແຕ່​ເຈົ້າ​ໜ້າ​ທີ່​ລັດຖະບານ​ໄດ້​ກ່າ​ວກ່ອນ​ໜ້າ​ນີ້​ວ່າ ​ເບິ່ງ​ຄື​ວ່າ​ຈະ​ຖືກ​ຈັດ​ຂຶ້ນ​ໃນ​ວັນ​ທີ 1 ​ເດືອນ​ພະຈິກ​ນີ້.

​ເຈົ້າ​ໜ້າ​ທີ່​ຂອງ​ລັດຖະບານ​ກ່າວ​ວ່າ ທ່ານ Erdogan ມີ​ກຳ​ນົດທີ່​ຈະ​ພົບ​ປະ​ກັບ​ນາຍົກ ລັດຖະມົນຕີ Ahmet Davutoglu ​ໃນ​ວັນ​ອັງຄານ​ມື້​ນີ້, ​ເພື່ອຂໍຮ້ອງໃຫ້​ທ່ານສ້າ​ງ ລັດຖະບານ ປະສົມ​ຊົ່ວຄາວ ​ຈົນ​ກວ່າ ການ​ເລື​ອກຕັ້ງຄັ້ງ​ໃໝ່ຈັດ​ຂຶ້ນແລ້ວ.

ພັກ​ຍຸດຕິ​ທຳ ​ແລະ ການ​ພັດທະນາ​ ຂອງ​ທ່ານ Erdogan ​ໄດ້ເສຍ​ສຽງ​ສ່ວນ​ຫຼາຍໃນ​ລັດຖະ ສະພາ​ໃນ​ເດືອນ ມິຖຸນາ ​ເປັນ​ຄັ້ງ​ທຳ​ອິດ​ຕັ້ງ​ແຕ່​ປີ 2002, ເຮັດ​ໃຫ້​ພວກ​ເຂົາ​ຕ້ອງ​ໄດ້ເຈລະຈາ​ ກັບ​ພັກ​ຝ່າຍ​ຄ້ານ​ເພື່ອ​ພະຍາຍາມ​ສ້າງ​ຕັ້ງລັດຖະບານປະສົມ.

ຄູ່​ແຂ່ງຂອງ​ທ່ານ Erdogan ໄດ້ກ່າວໂທດທ່ານ ພະຍາຍາມທັບມ້າງ ການສ້າງຕັ້ງ ລັດຖະບານປະສົມ ດັ່ງນັ້ນທ່ານກໍຈະສາມາດເຮັດໃຫ້ພັກ ຂອງທ່ານ ມີໂອກາດໃນການ ເອົາຊະນະຄືນສຽງສ່ວນຫຼາຍ ແລະ ກຳ ອຳນາດຄົນດຽວ.

ຄວາມບໍ່ແນ່ນອນທາງດ້ານການເມືອງຂອງ ເທີກີ, ພ້ອມກັບການຕໍ່ສູ້ ກັບພວກຫົວຮຸນແຮງ ລັດອິສລາມ ຢູ່ເຂດຊາຍແດນຂອງພວກເຂົາ ແລະ ຄວາມຮຸນແຮງກັບພວກຫົວຮຸນແຮງ ຊາວ ເຄີດ ຢູ່ໃນບ້ານຕົນ, ໄດ້ເຮັດໃຫ້ສະກຸນເງິນ Lira ມີຄ່າຕົກຕ່ຳລົງເປັນປະຫວັດການ.

XS
SM
MD
LG