ພັກການເມືອງທີ່ໄດ້ຮັບຄວາມນິຍົມທີ່ສຸດຂອງໄທ, ພັກກ້າວໄກ ຫຼື MFP, ກໍາລັງປະເຊີນກັບໄພຂົ່ມຂູ່ທີ່ຄຸ້ນເຄີຍຂອງການຍຸບພັກຕາມຄໍາສັ່ງຂອງສານ, ແຕ່ບັນດາສະມາຊິກອາວຸໂສກ່າວວ່າ ມີແຜນການທີ່ຈະກັບຄືນມາຢ່າງໄວວາ ຖ້າພວກເຂົາຖືກຍຸບ, ໂດຍປະຕິເສດທີ່ຈະປ່ອຍໃຫ້ຂະບວນການປະຕິຮູບຂອງພວກເຂົາຕາຍໄປ.
MFP ໄດ້ຮັບຄະແນນສຽງສ່ວນຫຼາຍໃນການເລືອກຕັ້ງໃນເດືອນພຶດສະພາ 2023 ຂອງໄທ ດ້ວຍຄະແນນສຽງ 14 ລ້ານສຽງ ແລະ 151 ບ່ອນນັ່ງ, ໂດຍໄດ້ຍຸຕິການປົກຄອງ 9 ປີຂອງລັດຖະບານທີ່ຄອບງໍາໂດຍທະຫານ.
ພັກດັ່ງກ່າວ ໄດ້ດຳເນີນການດ້ວຍການປະຕິຮູບທີ່ເດັດຂາດ ເພື່ອການປົກຄອງທີ່ສະເໝີພາບ ໂດຍການຕັດທະຫານອອກຈາກອຳນາດ, ທຳລາຍການຜູກຂາດທາງເສດຖະກິດ ແລະ ປັບປຸງກົດໝາຍວ່າດ້ວຍການໝິ່ນປະໝາດຣາຊະວົງ, ທີ່ຮູ້ຈັກກັນໃນຊື່ ກົດໝາຍໝິ່ນປະໝາດກະສັດ, ເຊິ່ງກຳນົດຄວາມຜິດທາງອາຊະຍາ ຕໍ່ການວິພາກວິຈານສະຖາບັນກະສັດທີ່ມີອຳນາດ.
ແຕ່ຜູ້ສະໝັກເປັນນາຍົກລັດຖະມົນຕີຂອງພັກ ທ່ານ ພິທາ ລິ້ມຈະເຣີນຣັດ ໄດ້ຖືກຂັດຂວາງບໍ່ໃຫ້ສ້າງຕັ້ງລັດຖະບານໂດຍສະພາສູງທີ່ຖືກແຕ່ງຕັ້ງຈາກພວກອະນຸລັກນິຍົມທີ່ສຸດ ເຊິ່ງເປັນພັນທະມິດກັບພວກນາຍພົນທີ່ໄດ້ຍຶດອໍານາດ ໃນການກໍ່ລັດຖະປະຫານ ເມື່ອເກືອບນຶ່ງທົດສະວັດກ່ອນໜ້ານີ້.
ເມື່ອຖືກບັງຄັບໃຫ້ເປັນຝ່າຍຄ້ານ, ພັກ MFP ຕ້ອງປະເຊີນກັບອຸປະສັກຂອງສິ່ງທ້າທາຍທາງດ້ານກົດຫມາຍຈາກຄູ່ແຂ່ງທີ່ມຸ່ງໝັ້ນທີ່ຈະທຳລາຍວາລະການປະຕິຮູບຂອງພັກດັ່ງກ່າວ.
ຄາດກັນວ່າ ສານລັດຖະທຳມະນູນຂອງໄທ ພາຍໃນບໍ່ເທົ່າໃດອາທິດນີ້ ຈະຕັດສິນວ່າ ຈຸດໃຈກາງຂອງວາລະຂອງພັກກ້າວໄກ ເຊິ່ງເປັນການສະເໜີດັດແກ້ ເລື້ອງການໝິ່ນປະໝາດຣາຊະວົງ ເທົ່າກັບການໂຄ່ນລົ້ມຫຼືບໍ່.
ສານໄດ້ຍຸບພັກອະນາຄົດໃໝ່, ທີ່ເປັນອົງກອນໃນກ່ອນໜ້ານີ້ຂອງພັກກ້າວໄກ ໃນປີ 2020, ເຊິ່ງໄດ້ເຮັດໃຫ້ເກີດການປະທ້ວງຕາມຖະໜົນຫົນທາງຢ່າງດຸເດືອດ ໂດຍບັນດານັກເຄື່ອນໄຫວເພື່ອປະຊາທິປະໄຕ.
ຟໍຣັມສະແດງຄວາມຄິດເຫັນ