ຜູ້ດໍາລົງຕໍາແໜ່ງນາຍົກລັດຖະມົນຕີຂອງໝູ່ເກາະໂຊໂລມອນ ທ່ານມານາສເຊ ໂຊກາແວ ກ່າວວ່າທ່ານຈະບໍ່ລົງແຂ່ງຂັນ ເມື່ອບັນດາສະມາຊິກລັດຖະສະພາ ລົງຄະແນນສຽງເລືອກຕັ້ງເອົານາຍົກລັດຖະມົນຕີຄົນໃໝ່ໃນອາທິດໜ້ານີ້, ແລະ ພັກການເມືອງຂອງທ່ານ ຈະສະໜັບສະໜູນອະດີດລັດຖະມົນຕີການຕ່າງປະ ເທດ ທ່ານ ເຈເຣມາຍອາ ມາເນເລ (Jeremiah Manele), ອີງຕາມລາຍ ງານຂອງອົງການຂ່າວ Reuters.
ສອງພັກພັກຝ່າຍຄ້ານໃຫຍ່ໃນໝູ່ເກາະໂຊໂລມອນ ໄດ້ຕົກລົງຮ່ວມກັນໃນວັນ ເສົາແລ້ວນີ້ ໃນຂະນະທີ່ພວກເຂົາເຈົ້າແຂ່ງຂັນກັບພັກຂອງ ທ່ານ ໂຊກາແວ ເພື່ອສ້າງຕັ້ງລັດຖະບານ ຫຼັງຈາກການເລືອກຕັ້ງທີ່ຍັງບໍ່ມີຜູ້ຊະນະຢ່າງແຈ່ມແຈ້ງ ເທື່ອນັ້ນ.
ການເລືອກຕັ້ງໃນອາທິດຜ່ານມາ ແມ່ນຄັ້ງທຳອິດນັບແຕ່ທ່ານ ໂຊກາແວ ໄດ້ລົງນາມໃນຂໍ້ຕົກລົງຄວາມໝັ້ນຄົງກັບຈີນເມື່ອປີ 2022, ໂດຍໄດ້ເຊື້ອເຊີນບັນດາ ເຈົ້າໜ້າທີ່ຕຳຫຼວດຈີນເຂົ້າໄປໃນໝູ່ເກາະປາຊີຟິກ ແລະໄດ້ເຮັດໃຫ້ປະເທດແຫ່ງ ນີ້ໃກ້ຊິດກັບ ປັກກິ່ງ ຫຼາຍຂຶ້ນ.
ການເລືອກຕັ້ງດັ່ງກ່າວ ແມ່ນຖືກຕິດຕາມເບິ່ງຈາກ ຈີນ, ສະຫະລັດ ແລະ ປະເທດເພື່ອນບ້ານ ອອສເຕຣເລຍ ເນື່ອງຈາກຄວາມເປັນໄປໄດ້ກ່ຽວກັບຜົນກະທົບຕໍ່ຄວາມໝັ້ນຄົງຢູ່ໃນພາກພື້ນ.
ທ່ານ ໂຊກາແວ ໄດ້ປະກາດວ່າ ທ່ານຈະບໍ່ເປັນຜູ້ລົງແຂ່ງຂັນເປັນນາຍົກລັດຖະ ມົນຕີໃນລະຫວ່າງຖະແຫຼງຂ່າວຜ່ານທາງໂທລະພາບໃນຕອນແລງຂອງວັນຈັນ ວານນີ້.
ທ່ານ ໂຊກາແວ ກ່າວວ່າ ລັດຖະບານຂອງທ່ານ ໄດ້ຮັບ “ຄວາມກົດດັນຈາກ ສະຫະລັດ ແລະບັນດາປະເທດພັນທະມິດຕາເວັນຕົກ” ແລະທ່ານກໍໄດ້ຖືກກ່າວ ຫາ “ຫຼາຍສິ່ງຫຼາຍຢ່າງ.”
ທ່ານກ່າວວ່າ “ພູມສາດການເມືອງແມ່ນການສະແດງອອກໃຫ້ເຫັນ, ລຸນຫຼັງ ພວກເຮົາໄດ້ດໍາເນີນການຕັດສິນໃຈທີ່ສໍາຄັນໃນປີ 2019,” ໂດຍອ້າງອີງຈາກ ການຕັດສິນໃຈຂອງລັດຖະບານທ່ານ ທີ່ຈະປ່ຽນການຮັບຮູ້ທາງການທູດຈາກ ໄຕ້ຫວັນ ໄປເປັນ ປັກກິ່ງ.
ທ່ານ ມາເລເນ ກ່າວວ່າ ຖ້າທ່ານໄດ້ຮັບເລືອກຕັ້ງເປັນນາຍົກລັດຖະມົນຕີ ທ່ານຈະມີ “ພື້ນຖານທາງດ້ານນະໂຍບາຍການຕ່າງປະເທດອັນດຽວກັນ, ເປັນເພື່ອນກັບໝົດທຸກຄົນ ແລະບໍ່ເປັນສັດຕູກັບໃຜ.”
ຟໍຣັມສະແດງຄວາມຄິດເຫັນ