ທາງການລາວປະກາດແຈ້ງການຂໍໃຫ້ປະຊາຊົນລາວ ໂດຍສະເພາະແມ່ນໃນເຂດແຂວງພາກ
ເໜືອ ຢ່າໄດ້ພາກັນແຕກຕື່ນໄປກັບເຫດການແຜ່ນດິນໄຫວ ເພາະເປັນແຜ່ນດິນໄຫວທີ່ບໍ່ຮຸນ
ແຮງແຕ່ຢ່າງໃດ.
ທ່ານນາງສຸວັນນີ ພອນວິໄລ ຮອງຫົວໜ້າກົມອຸຕຸນິຍົມວິທະຍາຖະແຫຼງວ່າ ກົມອຸຕຸນິຍົມ
ວິທະຍາໄດ້ອອກປະກາດແຈ້ງການໄປຍັງໜ່ວຍງານຕ່າງໆຂອງລັດຖະບານ ລວມທັງສື່ມວນ
ຊົນລາວທຸກແຂວງ ເພື່ອໃຫ້ຄໍາເນີນການໂຄສະນາປະຊາສໍາພັນກ່ຽວກັບການປະກາດແຈ້ງ
ການໄປເຖິງປະຊາຊົນລາວໃນທົ່ວປະເທດລາວ ໂດຍສະເພາະແມ່ນປະຊາຊົນລາວໃນເຂດ
ແຂວງພາກເໜືອນັ້ນ ເພື່ອຂໍໃຫ້ຢ່າໄດ້ພາກັນແຕກຕື່ນໄປກັບເຫດການແຜ່ນດິນໄຫວໃນ ຄັ້ງຫຼ້າສຸດນີ້.
ທັງນີ້ກໍເນື່ອງຈາກວ່າ ເຫດການແຜ່ນດິນໄຫວຄັ້ງຫຼ້າສຸດ ທີ່ເກີດຂຶ້ນໃນເຂດເມືອງທົ່ງມີໄຊ
ແລະເມືອງພຽງໃນແຂວງໄຊຍະບຸລີນັ້ນ ເປັນເຫດການແຜ່ນດິນໄຫວທີ່ບໍ່ເປັນອັນຕະລາຍຕໍ່
ທັງຊີວິດ ຮ່າງກາຍ ແລະຊັບສິນຂອງປະຊາຊົນລາວແຕ່ຢ່າງໃດ ເພາະເປັນເຫດການແຜ່ນ
ດິນໄຫວທີ່ມີການສັ່ນສະເທືອນບໍ່ຮຸນແຮງ ແລະຍັງຢູ່ເລິກລົງໄປໃຕ້ດິນເຖິງ 40 ກິໂລແມັດ
ອີກດ້ວຍ ດັ່ງທີ່ທ່ານນາງສຸວັນນີ ໄດ້ຊີ້ແຈງວ່າ:
“ສັງເກດເຫັນໄດ້ຂໍ້ມູນຈາກ
ພາກພື້ນແມ່ນມີຈຸດໃຈກາງ
ແຜ່ນດິນໄຫວຫັ້ນຢູ່ລະຫວ່າງ
ເຂດເສັ້ນຂະໜານທີ່ 18.55
ອົງສາເໜືອແລະ 101.27
ອົງສາ ຕະວັນອອກມີຄວາມ
ແຮງສັ່ນສະເທືອນປະມານ
4.7 ຣິກເຕີ ແລະຄວາມເລິກ
ຈາກໜ້າດິນປະມານ 40
ກິໂລແມັດ”
ທ່ານນາງສຸວັນນີ ບອກອີກດ້ວຍ
ວ່າເຫດແຜ່ນດິນໄຫວທີ່ຈະສົ່ງຜົນ
ກະທົບຕໍ່ຊີວິດຮ່າງກາຍແລະຊັບ
ສິນຂອງປະຊາຊົນໄດ້ນັ້ນຈະຕ້ອງ
ມີລະດັບຄວາມຮຸນແຮງ ຕັ້ງແຕ່ 6 ຣິກເຕີຂຶ້ນໄປ. ນອກຈາກນີ້ ການທີ່ລາວເປັນປະເທດທີ່ມີ
ທີ່ຕັ້ງຢູ່ໃນເຂດທີ່ບໍ່ຕິດກັບທະເລອີກດ້ວຍນັ້ນ ກໍຍັງນັບເປັນອີກເງື່ອນໄຂນຶ່ງທີ່ເຮັດໃຫ້ລາວ
ບໍ່ຕ້ອງປະເຊີນກັບບັນຫາແຜ່ນດິນໄຫວ ລະດັບທີ່ຮຸນແຮງຄືກັບຫຼາຍໆປະເທດ ອີກດ້ວຍ.
ແຕ່ຢ່າງໃດກໍຕາມ ລາວກໍປະສົບກັບເກີດເຫດການແຜ່ນດິນໄຫວ ທີ່ມີລະດັບຄວາມຮຸນແຮງ
ເຖິງ 6.1 ຣິກເຕີມາແລ້ວຄັ້ງນຶ່ງເມື່ອປີ 2007 ຊຶ່ງເກີດຂຶ້ນຢູ່ໃນເຂດແຂວງຫຼວງນໍ້າທາແລະ
ແຂວງບໍ່ແກ້ວ ທາງພາກເໜືອຂອງລາວເຊັ່ນດ່ຽວກັນ. ຫາກແຕ່ວ່າເຫດແຜ່ນດິນໄຫວໃນ
ຄັ້ງນັ້ນກໍບໍ່ໄດ້ສົ່ງຜົນກະທົບຢ່າງຮຸນແຮງແຕ່ຢ່າງໃດ ເນື່ອງຈາກວ່າພື້ນທີ່ທີ່ເປັນສູນກາງຂອງ
ແຜ່ນດິນໄຫວນັ້ນ ບໍ່ໄດ້ຢູ່ໃນເຂດຊຸມຊົນແຕ່ເປັນພື້ນທີ່ໃນເຂດຊາຍແດນທີ່ຕິດຕໍ່ກັບປະເທດ
ມຽນມາ ຊຶ່ງເປັນປະເທດທີ່ຕັ້ງຢູ່ເຂດຮອຍເລື່ອນຂອງເປືອກໂລກໃຕ້ດິນຢູ່ແລ້ວນັ້ນເອງ.
