ລິ້ງ ສຳຫລັບເຂົ້າຫາ

ນັກຮຽນ​ຍິງ ​ອິນ​ເດ​ຍ ທີ່ຖືກ​ຂົ່ມຂືນ ​ ​​ເສຍ​ຊີວິດ​ແລ້ວ​


ຊາວອິນເດຍ ພາກັນໄວ້ອາໄລ ໃຫ້ນັກຮຽນຍິງທີ່ເສຍຊີວິດ ຍ້ອນການຂົ່ມຂືນໝູ່ ຢູ່ເທິງລົດເມ ໃນກຸງນິວເດລີ.
ນັກຮຽນ​ຍິງ​ອິນ​ເດ​ຍ ທີ່ຖືກ​ຂົ່ມຂືນ​ໝູ່​ຢ່າງ​ໂຫດຮ້າຍໃນ​ຕົ້ນ​ເດືອນ
​ນີ້ ຢູ່​ເທິງ​ລົດເມ​ໃນ​ກຸງນິວເດ​ລີນັ້ນ ​ໄດ້​ເສຍ​ຊີວິດ​ແລ້ວ​ ທີ່​ໂຮງໝໍ​
ສິງກະ​ໂປ.

ຖະ​ແຫລ​ງຂ່າວ​ສະບັບ​ນຶ່ງ ຂອງໂຮງໝໍ Mount Elizabeth ກ່າວ​ວ່າ ຜູ້ຍິງ​ອາຍຸ 23 ປີຄົນ​ນີ້ “​ໄດ້​ເສຍ​ຊີວິດ​ໄປຢ່າງ​ສະຫງົບ” ​ໃນ​ຕອນ​ເຊົ້າ​ວັນ​ເສົາມື້​ນີ້.

ນາຍົກ​ລັດ​ຖະມົນ​ຕີ ອິນ​ເດ​ຍ ທ່ານ Manmohan Singh ກ່າວ​ວ່າ “ທ່ານ​ມີຄ​ວາ​ມ​ເສົ້າ​ສ​ະລົດ​ໃຈ​ທີ່​ສຸດ” ກ່ຽວ​ກັບການ​ເສຍ​ຊີວິດ​ຂອງ​ສະຕີ​ທີ່​ຍັງໜຸ່ມນ້ອຍ​ຄົນ​ນີ້. ທ່ານ​ກ່າວ​ອີກ​ວ່າ ຄວາມ​ຮູ້​ສຶກກ່ຽວ​ກັບ​ຄະດີ​ດັ່ງກ່າວ ທີ່​ແຜ່​ຂະຫຍາຍ​ອອກ​ໄປ​ນັ້ນ ​ແມ່ນ ​“ເປັນ​ທີ່​ເຂົ້າ​ໃ​ຈກັນ​ດີ.”

ສົບ​ຂອງ​ນາງ ມີ​ກຳນົດ​ທີ່​ຖື​ກສົ່ງກັບຄືນໄປອິນ​ເດຍ​ ໃນ​ວັນ​ເສົາມື້ນີ້. ໄດ້ມີການ​ປະ​ທ້ວງ​ໃຫຍ່
ຫລາຍໆ​ຄັ້ງທີ່​ກຸງ​ນິວ​ເດ​ລີ ນັບຕັ້ງ​ແຕ່​ມີການຂົ່ມ ຂືນຢ່າງ​ໂຫດຮ້າຍ​ດັ່ງກ່າວ.​ ບັນດາ​ເຈົ້າໜ້າ​ທີ່​
ໃນກຸງ​ນິວ​ເດ​ລີ ກ່າວວ່າ ​ເຂົາ​ເຈົ້າ​ພາກັນຕຽມຮັບ​ມື​ກັບ​ການ​ປະ​ທ້ວງຕື່ມ​ອີກ ລຸນ​ຫຼັງ​ການ​ເສຍ​
ຊີວິດ​ຂອງ​ຜູ້ຍິງ​ຄົນ​ນີ້.

ຜູ້ຍິງຄົນ​ນີ້ ມີ​ລາຍ​ງານ​ວ່າ​ ໄດ້​ເດີນ​ມາງ​ໄປ​ກັບຜູ້​ຊາຍ​ຄົນ​ນຶ່ງ​ຢູ່​ໃນ​ລົ​ດ​ເມ​ຮັບ​ເໝົາໃນນະຄອນ
​ຫລວງອິນ​ເດຍ ​ໃນ​ວັນ​ທີ 16 ທັນວາ ​ເວລານັ້ນ​ມີ​ກຸ່ມ​ຜູ້​ຊາຍ​ຫົກ​ຄົນ​ຢູ່​ເທິງລົດ​ເມ ພາກັນຕີ​ເຂົາ​ເຈົ້າ​ດ້ວຍ ​ທ່ອນເຫລັກ. ຜູ້ຍິງ​ໄດ້​ຖືກ​ຂົ່ມຂືນ​ຊໍ້​າ​ແລ້ວ​ຊໍ້າ​ອີກ. ລາຍ​ງານ​ກ່າວ​ວ່າ ທ່ອນ​ເຫລັກ​ທີ່​ໃຊ້​ໃນ​ການ​ຂົ່ມຂືນ ໄດ້​ເຮັດ​ໃຫ້​ລາວ​ໄດ້​ຮັບ​ບາດ​ເຈັບພາຍໃນ​. ນາງ​ຍັງ​ໄດ້​ຮັບ​ບາດ​ເຈັບ​ຢູ່​ສະໝອງ. ຜູ້ຍິງ​ດັ່ງກ່າວ ​ແລະ​ໝູ່​ຂອງ​ລາວ ​ໄດ້​ຖືກໂຍນ​ອອກ​ຈາກລົດ​ເມ ທີ່​ກໍາລັງ​ແລ່ນ​ຢູ່​ນັ້ນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG