ຈີນໄດ້ດໍາເນີນການທົດລອງການບິນ ເຮືອບິນອາຍພົ່ນໂດຍສານຂະໜາດກາງທີ່
ຜະລິດຢູ່ພາຍໃນປະເທດເປັນຄັ້ງທໍາອິດ. ເຮືອບິນ C919 ຈະສາມາດບັນຈຸຄົນໂດຍ
ສານໄດ້ 175 ຄົນ ແລະມີເປົ້າໝາຍວ່າ ຈະແຂ່ງຂັນກັບອດສາຫະກັມຊື່ດັງຕ່າງໆ ເຊັ່ນ
Boeing 737 ແລະ Airbus 320 ເປັນຕົ້ນ. ແຕ່ຕາມການລາຍງານຂອງ Bill Ide ນັກ
ຂ່າວວີໂອເອ ນັ້ນກໍແມ່ນວ່າ ການເດີນທາງທີ່ເປັນຂີດໝາຍນີ້ ເປັນພຽງບາດກ້າວທໍາອິດ
ຂອງການເດີນທາງອັນຍາວໄກ ກວ່າຈະໄປເຖິງຈຸດນັ້ນ. ບົວສະຫວັນມີລາຍງານນີ້ມາ
ສະເໜີທ່ານໃນອັນດັບຕໍ່ໄປ.
ການບິນຖ້ຽວທໍາອິດຂອງເຮືອບິນອາຍພົ່ນ C919 ແມ່ນເປັນບາດກ້າວອັນສໍາຄັນສໍາລັບ
ບໍລິສັດລັດວິສາຫະກິດການບິນທາງການຄ້າຂອງຈີນ ຫລື COMAC ແລະຄວາມພະຍາ
ຍາມໃນການແຂ່ງຂັນຊິງເຂົ້າຕະຫລາດໂລກ ຊຶ່ງເປັນຕະຫລາດທີ່ຄາດວ່າຈະມີມູນຄ່າ
ຫລາຍໆ ພັນຕື້ໂດລາໃນ 20 ປີຂ້າງໜ້າ.
ພາກສ່ວນໃຫຍ່ໆ ຢູ່ໃນມູນຄ່າລວມຂອງຕະຫລາດນີ້ ແມ່ນໄດ້ແກ່ຕະຫລາດການບິນທີ່
ມີການ ຂະຫຍາຍໂຕວ່ອງໄວທີ່ສຸດ ຊຶ່ງນັ້ນກໍຄືປະເທດຈີນ. ແລະທ່ານ Tung Wan ວິສະ
ວະກອນດ້ານການບິນເວົ້າວ່າ ເນື່ອງຈາກ ການບິນແມ່ນອຸດສະຫະກໍາຫລັກຂອງປະເທດ, ຈຶ່ງຄາດວ່າ ສາຍການບິນພາຍໃນ ຈະສະແດງໃຫ້ເຫັນວ່າ ເຂົາເຈົ້າ ໃຫ້ການສະໜັບສະ
ໜຸນໃນດ້ານນີ້. ທ່ານກ່າວດັ່ງນີ້:
"ຂ້າພະເຈົ້າຄິດວ່າເຮືອບິນ C919 ຈະຖືກມອງເຫັນວ່າ ເປັນແຜນການທີ່ເປັນເສົາຄໍ້າ
ຫລືໂຄງການແມ່. ມັນບໍ່ກ່ຽວຂ້ອງວ່າ ສາຍການບິນໃນທ້ອງຖິ່ນ ຈະມັກຫລືບໍ່ ຂ້າພະ
ເຈົ້າຄິດວ່າ ສາຍການບິນໃນທ້ອງຖິ່ນສ່ວນຫຼາຍຈະຕ້ອງໄດ້ສັ່ງຊື້ເຮືອບິນ C919 ທີ່ມີ
ບ່ອນຍ່າງແລວດຽວແລະເນື້ອທີ່ແຄບໆ ເພື່ອຕອບສະໜອງຄວາມຕ້ອງການ ໃນການບໍລິການຂອງຕົນ"
ບໍລິສັດ COMAC ເວົ້າວ່າ ຕົນໄດ້ຮັບໃບສັ່ງຊື້ມາ 570 ສະບັບແລ້ວຈາກລູກຄ້າ 23 ຄົນ.
ແຕ່ຢ່າງໃດກໍຕາມ ພວກນັກວິໄຈເວົ້າວ່າ ການທີ່ຈະຊີງເຂົ້າໄປຢູ່ໃນຕະຫລາດສາກົນໄດ້ນັ້ນ ແມ່ນຍາກຫລາຍ. ເຮືອບິນອາຍພົ່ນດັ່ງກ່າວ ຕ້ອງໄດ້ຜ່ານການທົດລອງອັນສໍາຄັນ ເປັນໄລ
ຍະສາມປີຂ້າງໜ້າ ແລະຈາກນັ້ນກໍຈະຮັກສາປະຫວັດດ້ານຄວາມປອດໄພໃຫ້ໄດ້ຢ່າງໜ້ອຍ 3-5 ປີ ພາຍຫລັງທີ່ບັນດາເຮືອບິນຊຸດທໍາອິດໄດ້ເອົາອອກມານໍາໃຊ້.
ພວກນັກວິໄຈເວົ້າວ່າ ຍັງເວົ້າອີກວ່າ ລາຄາຂອງເຮືອບິນດັ່ງກ່າວຊຶ່ງເທົ່າກັບ ປະມານເຄິ່ງນຶ່ງຂອງຄູ່ແຂ່ງ ແລະຕະຫລາດອັນໃຫຍ່ມະຫາສານຂອງຈີນ ຈະເຮັດໃຫ້ເຮືອບິນ C919 ໄດ້ປຽບ ແຕ່ຖ້າເວົ້າເຖິງເລື່ອງເທັກໂນໂລຈີແລ້ວ ຍັງອີກຫລາຍໆປີຢູ່ ມັນຈຶ່ງຈະນໍາທັນຄູ່ແຂ່ງຂັນໄດ້.
ທັງເຮືອບິນ Airbus ແລະ Boeing ຕ່າງກໍຫານຳເອົາເຮືອບິນແບບຄ້າຍໆຄືກັນນີ້ອອກມາ.
ການນຳເອົາອອກອາກາດ ການບິນຄັງທໍາອິດຂອງເຮືອບິນ C919 ທາງໂທລະພາບຂອງ
ລັດ ໄດ້ເຮັດໃຫ້ມີຄວາມປະທັບໃຈ ໃນການຄວບຄຸມຢູ່ທາງພາກພື້ນດິນແບບດຽວກັນກັບ
ການສົ່ງຈະຫລວດຂຶ້ນໄປເທິງອາວະກາດ. ການສ້າງເຮືອບິນໃຊ້ໃນການຄ້າ ແລະຄວາມພະຍາຍາມທີ່ຈະແຂ່ງກັບກຸ່ມຜູ້ຜະລິດນ້ອຍໆກຸ່ມນຶ່ງໃນໂລກ ແມ່ນແຕກຕ່າງກັບການ
ແຂ່ງຂັນຂອງຈີນເຂົ້າໃນ ຂະແໜງອຸດສາຫະກໍາອື່ນໆຫລາຍ ແລະມີຄວາມສ່ຽງສູງ
ຫລາຍກວ່າ.
ທ່ານ Tung Wan ເວົ້າວ່າ ອຸດສະຫະກໍາດ້ານການບິນ ແລະເຮືອບິນ C919 ແມ່ນສັນ
ຍາລັກຂອງຄວາມພູມໃຈຂອງຊາດ. ທ່ານກ່າວເພີ້ມເຕີມວ່າ:
"ຖ້າຫາກມີການລົ້ມແຫລວທາງດ້ານເຕັກນິກໃດໆ ເຊັ່ນ ໝໍ້ໄຟໃຊ້ການບໍ່ໄດ້ ຄືກັນກັບ
ເຮືອບິນ Boeing 787 ເຄີຍໄດ້ປະສົບມານັ້ນ ເຮືອບິນລຸ້ນນີ້ຈະປະເຊີນກັບຄວາມ
ຫຍຸ້ງຍາກຫລາຍ. ສະນັ້ນ ເທົ່ານີ້ ກໍວາດພາບອອກໄດ້ແລ້ວວ່າ ພວກເຂົາເຈົ້າຕົກຢູ່
ພາຍໃຕ້ຄວາມກົດດັນຫລາຍປານໃດ. ເຂົາເຈົ້າ ຕ້ອງໄດ້ເຮັດໃຫ້ແນ່ໃຈໄດ້ວ່າ ຈະບໍ່ມີເຫດການແບບນັ້ນເກີດຂຶ້ນແນ່ນອນ."
ພາຍຫລັງທີ່ໄດ້ບິນຂຶ້ນທົດລອງເປັນເວລາ ນຶ່ງຊົ່ວໂມງເຄິ່ງ ເຮືອບິນດັ່ງກ່າວ ກໍໄດ້ບິນກັບ
ຄືນມາສໍາພັດກັບໜ້າດິນອີກ ທີ່ສະໜາມບິນສາກົນ Pudong ຂອງນະຄອນຊຽງໄຮ ທີ່ພວກເຈົ້າໜ້າທີ່ໄດ້ຍົກຍ້ອງສັນລະເສີນການບິນດັ່ງກ່າວ ວ່າເປັນຜົນສໍາເລັດຂອງຊາດ. ແຕ່
ຢ່າງໃດກໍຕາມ ພວກນັກວິຈານກໍຍັງໄດ້ໃຫ້ຂໍ້ສັງເກດວ່າ ເຄື່ອງອາໄຫລ່ສ່ວນໃຫຍ່ຂອງ
ເຮືອບິນດັ່ງກ່າວ ກໍແມ່ນໄດ້ສັ່ງເຂົ້າໄປຈາກຕ່າງປະເທດທັງນັ້ນ.
