ທຳນຽບຂາວກ່າວໃນວັນຈັນວານນີ້ວ່າ ປະທານາທິບໍດີສະຫະລັດ ທ່ານ ໂຈ ໄບເດັນ ໄດ້ສັນຍາທີ່ຈະຮ່ວມມືກັບ ອີຈິບ ແລະ ກາຕ້າ ເພື່ອຮັບປະກັນການປະຕິບັດຂໍ້ສະເໜີກ່ຽວກັບການຢຸດຍິງລະຫວ່າງ ອິສຣາແອລ ກັບ ກຸ່ມຮາມາສ.
ໃນການລົມກັນທາງໂທລະສັບກັບປະທານາທິບໍດີອີຈິບ ທ່ານອັບເດລ ຟັດທາ ອາລ ເອລ-ຊິດຊີ (Abdel Fattah el-Sissi) ແລະ ປະທານາທິບໍດີກາຕ້າ ອີເມຍ ເຊອິກ ຕາມິມ ບິບ ຮາມາດ ອາລ ທານີ (Emir Sheikh Tamim bin Hamad Al Thani), ທ່ານ ໄບເດັນ ໄດ້ຮຽກຮ້ອງໃຫ້ຜູ້ນຳທັງສອງຈົ່ງ ປະຕິບັດການທຸກຢ່າງທີ່ພວກເພິ່ນສາມາດເຮັດໄດ້ ເພື່ອຊຸກຍູ້ໃຫ້ມີການປ່ອຍ ໂຕປະກັນທີ່ຍັງຖືກຈັບໂດຍ ກຸ່ມຮາມາສ ຢູ່ໃນຂົງເຂດກາຊາ.
ຖະແຫຼງການສະບັບນຶ່ງຂອງທຳນຽບຂາວ ໄດ້ອະທິບາຍເຖິງການປ່ອຍໂຕປະ ກັນວ່າ “ເປັນອຸປະສັກພຽງຢ່າງດຽວຕໍ່ການຢຸດຍິງໃນທັນທີ ແລະ ການບັນ ເທົາທຸກສຳລັບປະຊາຊົນໃນຂົງເຂດກາຊາ.”
ສະຫະລັດ, ອີຈິບ ແລະ ກາຕ້າ ໄດ້ເຂົ້າຮ່ວມການເຈລະຈາເປັນເວລາຫຼາຍເດືອນ ທີ່ເພັ່ງເລັງໃສ່ການບັນລຸການຢຸດຕໍ່ສູ້ກັນ. ປັດຈຸບັນຂໍ້ສະເໜີທີ່ກໍາລັງ ພິຈາລະນານັ້ນ ລວມມີການຢຸດຍິງເປັນເວລາຍາວປະມານ 6 ອາທິດ, ການ ປ່ອຍໂຕປະກັນທີ່ຖືກກັກໂດຍກຸ່ມຮາມາສ, ການປ່ອຍໂຕນັກໂທດ ປາແລັສໄຕນ໌ ທີ່ຖືກຈັບໂດຍອິສຣາແລ ແລະ ເພີ້ມການຊ່ວຍເຫຼືອດ້ານມະນຸດສະທຳໃຫ້ແກ່ ພົນລະເຮືອນປາແລັສໄຕນ໌ຢູ່ໃນຂົງເຂດກາຊາ.
ເຈົ້າໜ້າທີ່ຮາມາສ ໄດ້ພົບປະກັບບັນດາຜູ້ແທນຈາກ ອີຈິບ ແລະ ກາຕ້າ ຢູ່ທີ່ນະຄອນຫຼວງໄຄໂຣ ໃນວັນຈັນວານນີ້ ເພື່ອປຶກສາຫາລືກ່ຽວກັບຂໍ້ສະເໜີດັ່ງກ່າວມານັ້ນ.
ການເຈລະຈາໄດ້ມີຂຶ້ນໃນຂະນະທີ່ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ກໍາລັງດໍາເນີນການຢ້ຽມຢາມພາກພື້ນ ເພື່ອຫາລືກ່ຽວກັບສະຖານະການຕ່າງໆ ກັບບັນດາເຈົ້າໜ້າທີ່ ຊາອຸດີ ອາຣາເບຍ, ຈໍແດນ ແລະ ອິສຣາແອລ.
ເຈົ້າໜ້າທີ່ສາທາລະນະສຸກປາແລັສໄຕນ໌ກ່າວໃນວັນຈັນວານນີ້ວ່າ ການໂຈມຕີທາງອາກາດຂອງອິສຣາແອລໃນຕອນກາງຄືນ ໄດ້ເຮັດໃຫ້ມີຜູ້ເສຍຊີວິດຢ່າງໜ້ອຍ 22 ຄົນຢູ່ໃນເມືອງຣາຟາ ທີ່ຕັ້ງຢູ່ທາງພາກໃຕ້ຂອງແຫຼມກາຊາ.
ບັນດາຜູ້ເຫັນເຫດການ ແລະພະນັກງານແພດໝໍ ກ່າວວ່າການໂຈມຕີທາງອາກາດໄດ້ກະທົບໃສ່ເຮືອນສາມຫລັງຢູ່ໃນເມືອງຣາຟາ.
ບໍລິເວນທີ່ຕັ້ງຢູ່ລຽບຕາມເຂດຊາຍແດນລະຫວ່າງ ກາຊາ ແລະ ອີຈິບ, ປັດຈຸບັນນີ້ແມ່ນມີພົນລະເມືອງຫຼາຍກວ່າເຄິ່ງນຶ່ງຂອງເຂດກາຊາ ໃນຂະນະທີ່ປະຊາ ຊົນຊອກຫາບ່ອນລີ້ໄພຈາກການຕໍ່ສູ້ທາງທະຫານຂອງ ອິສຣາແອລ ທີ່ແນເປົ້າໃສ່ການກຳຈັດກຸ່ມຫົວຮຸນແຮງຮາມາສ.
ກອງທັບອິສຣາແອລກ່າວໃນວັນຈັນວານນີ້ວ່າ ເຮືອບິນລົບຂອງຕົນໄດ້ທໍາການໂຈມຕີຕໍ່ພວກຫົວຮຸນແຮງເຮັສໂບລລາ ທີ່ຕັ້ງຢູ່ໃນພາກໃຕ້ຂອງເລບານອນ.
ກຸ່ມຮາມາສ ໄດ້ສັງຫານປະຊາຊົນ 1,200 ຄົນ ຢູ່ການໂຈມຕີທຳອິດຕໍ່ ອິສຣາແອລ ໃນເດືອນຕຸລາຜ່ານມາ ແລະໄດ້ຈັບໂຕປະກັນປະມານ 250 ຄົນ, ອີງຕາມບັນທຶກໂຕເລກຂອງອິສຣາແອລ.
ຟໍຣັມສະແດງຄວາມຄິດເຫັນ