ບັນດາຜູ້ຕາງໜ້າຂອງກຸ່ມກະບົດ Houthis ໃນເຢເມນແລະພັນທະມິດເຂົາເຈົ້າບັດນີ້ກ່າວວ່າ ເຂົາເຈົ້າຈະເຂົ້າຮ່ວມການເຈລະຈາສັນຕິພາບ ທີ່ໄດ້ຮັບການໄກ່ເກ່ຍໂດຍອົງການສະ ຫະປະຊາຊາດ ທີ່ Kuwait ຫຼັງຈາກບໍ່ຍອມເຂົ້າຮ່ວມການເຈລະຈາດັ່ງກ່າວ ເພື່ອປະທ້ວງ ຕໍ່ການກ່າວຫາກ່ຽວກັບການລະເມີດການຢຸດຍິງໂດຍກຳລັງສະໜັບສະໜູນລັດຖະບານ.
ບັນດາຜູ້ຕາງໜ້າທັງຂອງພວກກະບົດ Houthis ແລະພັກຂອງອະດີດປະທານາທິບໍດີ Ali Abdullah Saleh ທີ່ໜູນຫລັງ Houthis ກ່າວວ່າ ເຂົາເຈົ້າມີແຜນທີ່ຈະເດີນທາງໄປເຖິງ Kuwait ໃນວັນພຸດມື້ນີ້ ຫລືວັນພະຫັດມື້ອຶ່ນ.
ສະຫະປະຊາຊາດໄດ້ພະຍາຍາມທີ່ຈະເລີ້ມເປີດການເຈລະຈາ ໃນວັນຈັນທີ່ຜ່ານມາ ແຕ່ ກໍໄດ້ເລື່ອນການເຈລະຈາຢ່າງເປັນທາງການຍ້ອນມີພຽງແຕ່ຜູ້ຕາງໜ້າລັດຖະບານໄດ້ປາ ກົດໂຕໄປຮ່ວມ.
aຫລັງຈາກໄດ້ປະກາດເລື່ອນເວລາແລ້ວ ທູດສະຫະປະຊາຊາດ ທ່ານ Ismail Ould Cheikh Ahmed ກໍໄດ້ຂອບໃຈລັດຖະບານ “ຕໍ່ຄວາມໝັ້ນໝາຍ’ ແລະໄດ້ກ່າວວ່າ ທ່ານມີຄາມຫວັງວ່າ ພວກກະບົດ Houthis ຄົງຈະບໍ່ພາດໂອກາດໃນການທີ່ຈະເຮັດໃຫ້ຄວາມຮຸນແຮງໃນ Yemen ສິ້ນສຸດລົງ.
ເລຂາທິການໃຫຍ່ສະຫະປະຊາຊາດ ທ່ານ Ban Ki-moon ໄດ້ຮຽກຮ້ອງໃຫ້ ທຸກພັກຝ່າຍ ທີການເຈລະຈາກັນດ້ວຍຄວາມຈິງໃຈ ແລະເລີ້ມການສົນທະນາໂດຍປາສະຈາກການຊັກຊ້າໃດໆ.
ໂຄສົກທ່ານ Ban ກ່າວຢູ່ໃນຖະແຫລງການວ່າ “ເລຂາທິການໃຫຍ່ສະຫະປະຊາຊາດ ມີຄວາມໝັ້ນໃຈວ່າການຍາດເອົາໂອກາດນີ້ເພື່ອສ້າງຄວາມກ້າວໜ້າໃຫ້ແກ່ຂັ້ນຕອນທີ່ຈະ ຊ່ວຍແກ້ໄຂບັນຫາທີ່ຄ້າງຄາຢູ່ນັ້ນແລະເຮັດໃຫ້ບັນຫາຂັດແຍ້ງທີ່ແກ່ຍາວມານັ້ນປິດສາກລົງ. ປະຊາຊົນຊາວເຢເມນ ແລະຢູ່ໃນຂົງເຂດ ຄວນໄດ້ຮັບໃນສິ່ງທີ່ບໍ່ຕໍ່າໄປກວ່ານີ້.”
ພວກກະບົດ Housthis ໄດ້ເຂົ້າຍຶດເອົານະຄອນຫຼວງ Sana’a ຂອງເຢເມນໃນເດືອນກັນຍາປີ 2014 ແລະໃນເດືອນກຸມພາປີກາຍນີ້ ໄດ້ເລີ້ມບຸກໂຈມຕີ ໄປຍັງພາກໃຕ້ ຂອງ ປະເທດ ທີ່ໄດ້ເຮັດໃຫ້ປະທານາທິບໍດີ Abdu Rabu Mansour Hadi ຕ້ອງຫຼົບໜີເຂົ້າ ໄປຢູ່ Saudi Arabia. Saudi ໄດ້ຕອບໂຕ້ໂດຍການໂຈມຕີທາງອາກາດ ເພື່ອປ້ອງກັນລັດຖະບານທ່ານ Hadi.
ບັນຫາຂັດແຍ້ງນີ້ໄດ້ເຮັດໃຫ້ມີຜູ້ເສຍຊີວິດຫຼາຍກວ່າ 6,400 ຄົນ ແລະໄດ້ກໍ່ໃຫ້ເກີດໄພ ພິບັດດ້ານມະນຸດສະທຳຢູ່ໃນເຢເມນ.