ປະທານາທິບໍດີເຢເມນ ທ່ານ Ali Abdullah Saleh
ໄດ້ສັ່ງໃຫ້ຈັບກຸມຫົວໜ້າຊົນເຜົ່າຝ່າຍຄ້ານຄົນນຶ່ງທີ່ພວກ
ສະໜັບສະໜຸນຜູ້ກ່ຽວ ໄດ້ປະທະກັນ ກັບກຳລັງຮັກສາ
ຄວາມສະຫງົບຂອງລັດຖະບານ ເລີ່ມແຕ່ມື້ວັນຈັນ ເປັນ
ຕົ້ນມາ.
ກະຊວງປ້ອງກັນປະເທດເຢເມນ ໄດ້ປະກາດກ່ຽວກັບຄຳ
ສັ່ງໃຫ້ຈັບ Sheikh Sadig al-Ahmar ໃນວັນພະຫັດ
ມື້ນີ້ ຂະນະທີ່ພວກຈົງຮັກພັກດີ ຕໍ່ຫົວໜ້າເຜົ່າ Hashid
ຍັງສືບຕໍ່ທຳການສູ້ລົບ ກັບກຳລັງຂອງເຢເມນ ທີ່ນະຄອນ
ຫຼວງ Sana’a.
ໃນການໃຫ້ສຳພາດແກ່ຕາໜ່າງໂທລະພາບ Al Jazeera ນັ້ນທ່ານ Ahmar ໄດ້ກ່າວຫາ
ປະທານາທິບໍດີ Saleh ວ່າ ແກ່ດຶງເອົາເຢເມນເຂົ້າສູ່ສົງຄາມກາງເມືອງ. ທ່ານໄດ້ຮຽກຮ້ອງ
ໃຫ້ບັນດາປະເທດອາຣັບອື່ນໆກົດດັນໃຫ້ທ່ານ Saleh ລາອອກ.
ລາຍງານຂ່າວຂອງປະເທດຕາເວັນຕົກໄດ້ອ້າງຄຳເວົ້າຈາກແຫຼ່ງຂ່າວລັດຖະບານແລະພວກທີ່
ເຫັນເຫດການທີ່ກ່າວວ່າ ມີຢ່າງນ້ອຍ 24 ຄົນເສຍຊີວິດໃນການສູ້ລົບກັນ ໃນຕອນແລງວັນ
ພຸດແລະຕອນເຊົ້າວັນພະຫັດມື້ນີ້. ມີທະຫານແລະພວກຊົນເຜົ່າຈຳນວນນຶ່ງ ໄດ້ເສຍຊີວິດໃນ
ຄວາມວຸ້ນວາຍ ທີ່ເລີ່ມມາແຕ່ຕົ້ນອາທິດນີ້.
ໃນອີກດ້ານນຶ່ງນັ້ນກະຊວງປ້ອງກັນປະເທດຂອງເຢເມນ ກ່າວວ່າ ມີ 28 ຄົນເສຍຊີວິດໃນ
ເຫດລະເບີດທີ່ຄັງອາວຸດ ໃນນະຄອນຫຼວງ Sana’a. ແຕ່ອົງການຂ່າວເອພີ ລາຍງານວ່າ
ພວກນັກເຄື່ອນໄຫວຝ່າຍຄ້ານ ໄດ້ໂຕ້ແຍ້ງກ່ຽວກັບລາຍງານຂ່າວຂອງລັດຖະບານແລະເວົ້າ
ວ່າ ການເສຍຊີວິດເຫຼົ່ານີ້ ເກີດຂຶ້ນຍ້ອນການຍິງປືນໃຫຍ່ໂຈມຕີຢ່າງໜັກ ຂອງລັດຖະບານ
ໃສ່ຄຸ້ມປະຊາຊົນອາໄສຢູ່ຄຸ້ມນຶ່ງ.
ໃນຕອນເຊົ້າວັນພະຫັດມື້ນີ້ພວກທີ່ເຫັນເຫດການລາຍງານວ່າ ໄດ້ມີການຍິງປືນໃຫຍ່ໂຈມ
ຕີຢ່າງໜັກແລະສຽງລະເບີດຢ່າງແຮງດັງຂຶ້ນທີ່ນະຄອນຫຼວງ Sana’a. ພວກທີ່ເຫັນເຫດ
ການຍັງເວົ້າອີກວ່າ ມີໄຟຟ້າມອດເປັນໄລຍະໆແລະພວກນັກລົບຝ່າຍຄ້ານໄດ້ເຂົ້າຢຶດເອົາ
ຕຶກໂຮງການລັດຖະບານຫຼາຍໆຫຼັງ ຮວມທັງ ຕຶກສຳນັກງານອົງການຂ່າວ Saba ຂອງ
ທາງການເຢເມນ.
ໃນວັນພຸດວານນີ້ມີປະຊາຊົນຈຳນວນນຶ່ງໄດ້ພາກັນຫຼົບໜີໂດຍທາງລົດ ອອກຈາກນະຄອນ
ຫຼວງຂອງເຢເມນ.
ກະຊວງການຕ່າງປະເທດສະຫະລັດ ໄດ້ສັ່ງໃຫ້ພວກນັກການທູດທີ່ບໍ່ຈຳເປັນແລະສະມາຊິກ
ຄອບຄົວພະນັກງານສະຖານທູດ ເດີນທາງອອກຈາກເຢເມນໂດຍກ່າວວ່າ ໄພຂົ່ມຂູ່ກ່ຽວກັບ
ເລື່ອງຄວາມປອດໄພຢູ່ເຢເມນ ແມ່ນສູງຫຼາຍ ຍ້ອນກິດຈະກຳຂອງພວກກໍ່ການຮ້າຍ ແລະ
ຄວາມວຸ້ນວາຍຢູ່ໃນປະເທດດັ່ງກ່າວ.