ນັກຂຽນ ແລະ ນັກຂ່າວຊາວຫວຽດນາມ ທີ່ໄດ້ຮັບໂທດຂັງຄຸກ 9 ປີ ຍ້ອນຜົນງານຂອງນາງ ໄດ້ຮັບລາງວັນ ດ້ານວັນນະຄະດີສາກົນ.
ກຸ່ມ ສິດທິມະນຸດ PEN America ໄດ້ປະກາດວ່າ ທ່ານ ຟາມ ດວນ ຈຣາງ(Pham Doan Trang) ຈະໄດ້ຮັບລາງວັນ PEN/Barbey Freedom to Write ປະຈຳປີ 2024. ໃນແຕ່ລະປີ ການໃຫ້ກຽດນີ້ ຈະຖືກມອບໃຫ້ ແກ່ນັກຂຽນທີ່ຖືກຂັງຄຸກຈາກຜົນງານຂອງພວກເຂົາ.
ນາງ ຈຣາງ (Trang) ເປັນທີ່ຮູ້ຈັກຢູ່ໃນຫວຽດນາມ ຈາກບັນດາ blog ແລະໜັງສືກ່ຽວກັບສິດເສລີພາບຂອງພົນລະເມືອງ. ນາງໄດ້ເລີ່ມຕົ້ນ blog ໃນປີ 2006 ເພື່ອເປັນການສ້າງພື້ນທີ່ສໍາລັບການອະພິປາຍຢ່າງອິດສະຫຼະ. ນັບຕັ້ງແຕ່ນັ້ນມາ, ນັກຂຽນຄົນດັ່ງກ່າວ ໄດ້ເລີ່ມຂຽນວາລະສານອອນລາຍນ໌, ເປີດສຳນັກພິມ, ແລະຂຽນໜັງສືກ່ຽວກັບການເມືອງ, ສິດທິມະນຸດ, ລະບົບກົດໝາຍຂອງຫວຽດນາມ.
ໜັງສືຂອງນາງ ລວມມີການຕໍ່ຕ້ານທີ່ບໍ່ຮຸນແຮງ, ການເມືອງເພື່ອປະຊາຊົນທົ່ວໄປ, ປື້ມຄູ່ມືສໍາລັບນັກຕໍ່ສູ້ເພື່ອເສລີພາບ, ແລະການເມືອງຂອງລັດແຫ່ງຕໍາຫຼວດ.
ບົດຂຽນດັ່ງກ່າວ ໄດ້ເຮັດໃຫ້ ນາງ ຈຣາງ ໄດ້ຮັບຄວາມສົນໃຈຈາກອຳນາດການປົກຄອງຫວຽດນາມ. ໜັງສືຂອງນາງ ໄດ້ຖືກຍຶດ ແລະຜູ້ທີ່ຊື້ ຫຼືເປັນເຈົ້າຂອງໜັງສື ກໍມີຄວາມສ່ຽງຕໍ່ການຖືກຕັ້ງຂໍ້ຫາເຜີຍແຜ່ການໂຄສະນາຊວນເຊື່ອເພື່ອຕໍ່ຕ້ານລັດ, ອີງຕາມກຸ່ມ PEN.
ໃນປີ 2020, ຫວຽດນາມໄດ້ຈັບຕົວນາງ ຈຣາງ ດ້ວຍຂໍ້ກ່າວຫາ ເຜີຍແຜ່ “ໂຄສະນາຊວນເຊື່ອ ເພື່ອຕໍ່ຕ້ານລັດ”, ແລະໃນການດຳເນີນຄະດີໃນປີ 2021, ສານໄດ້ຕັດສິນລົງໂທດໃຫ້ຂັງຄຸກນາງ ເປັນເວລາ 9 ປີ.
ນັກຂຽນທ່ານນີ້ ກໍາລັງຮັບໂທດຂອງນາງຢູ່ໃນຄຸກ ທີ່ຢູ່ຫ່າງໄກຈາກບ້ານເກີດຂອງນາງ ປະມານ 900 ໄມ, ຊຶ່ງຫມາຍຄວາມວ່າ ຄອບຄົວ ສາມາດໄປຢ້ຽມຢາມໄດ້ ເປັນບາງຄັ້ງຄາວເທົ່ານັ້ນ.
“ທ່ານນາງ ຈຣາງ ໄດ້ກະຕຸ້ນປະຊາຊົນຊາວຫວຽດນາມ ຜ່ານບັນດາບົດຂຽນຂອງນາງ ກ່ຽວກັບປະຊາທິປະໄຕ, ສິດທິມະນຸດ, ການເສື່ອມໂຊມດ້ານສິ່ງແວດລ້ອມ, ແລະ ການເສີມຂະຫຍາຍສິດອຳນາດຂອງແມ່ຍິງ. ລັດຖະບານຫວຽດນາມ ໄດ້ຂົ່ມເຫັງ ແລະຈໍາຄຸກ ນາງ ຈຣາງ ໃນຄວາມພະຍາຍາມທີ່ຈະເຮັດໃຫ້ສຽງຂອງນາງມິດລົງ, "ທ່ານນາງ ຊູຊານ ນອສເຊລ (Suzanne Nossel), ຫົວໜ້າອົງການ PEN America ກ່າວໃນຖະແຫຼງການສະບັບນຶ່ງ.